შქვიდელიში ობირეში
| შქვიდელიში ობირეში by |
| იოსებ ყიფშიძე "რჩეული თხზულებანი" თბ.1994წ. ხ.343-345 |
1.
ვო, დონწყვილი ობიშხას
ვა დიბშქვიდიო მა წყარს!
ქომურთუმუდჷ ჩქიმი დღას,
ქოთი ქუვაშიი ზღვას!
წყარიშქვიდა ჸოფე, მარა
ჩქიმცალჸ ვა ღოლამუ შხვას.
ჩაფულაქ მიღალატჷ, ვარა
იკიბლენდი ხოლო ძგას.
ურაქ კვარტი ქეგჷმაშქუ,
ქემშმოჸოთჷ მა შქადიხას.
ორგიაქ ჯგჷრო ვე გჷმაშქუ
დო ქობსქჷდი პოპორჸ წყარს.
ჩილი დოჭოფილი პუნსჷ...
ჭარა ჭვილი ჩქიმი დუსჷ:
გეგილმოლჷ თიქი ხუსჷ,
ჩქიმი გურსჷ თინა ჭუნსჷ.
მუქ მაღოლჷ ნი, ქუჩქუდას,
მუჭოთი ვა ბძირჷნსი დღას, --
გამისოფანს ჩელა ღვას
დო გურჭვილო დომინგარს.
ჩქიმი დინაფილი შურსუ
ჟინჸ ბორია მომიგანს,
იშჸ თვალი დო ჩილამურსუ
ოშურეთიშა მომიღანს.
თენა რენო მართებული?
ახავაი, ჩქიმი დღას!
ჩქიმი თოფი დო ლეკური
ემერი ქიგილაბუ შხვას.
ახავაი, მუქ მაღოლჷ!
მა ამარი ქიმკმაბორჷ!
ჩქიმი მათხოზინა დოგორჷ
ემერი შხვასჷ გიაფიორჷ.
შხვა მითინი ანწი ნგარათ,
ვარა მუშე მა მინგარს?
ჸოროფილეფიში გამათ
ჭანდი მიწოლენსჷ ზარს.
ძელი ჩხომქჷ ოჭკუმუ დო
ძვალი კჷნოხჷბუ ძგას;
ჩქიმი თია დოჭვიმუ დო
ქაწობხვადი ჩქიმი დღას.
2.
ვო, დონწყვირი ობიშხას
ვა დიიფშქვიდიო წყარს!
წყარიშქვიდა ჸოფე, მარა
ჩქჷმიჯგუა ვა ღოლამუ შხვას:
ჩაფულაქ მიღალატუ, ვარა
კჷნჷვოჩურანდი ძგას;
ურაქ კვარტი მჷმოგჷ დო
ქჷდჷნომიტუუ შქაწყარს;
მოუსვი ნი, დუდი ქობსოფი
კოდმე-ტკირს, ბალანგარს.
ჩილი ნათხიირი პუნს,
ბედიჭვირი საცოდარს
კოს მიდამიჩქვანჷდანი.
მეემიჩქჷ, დომინგარს.
იში ორქო-ჩილამურს,
გურიმოჭვე გეთვალუას
ჟი ბორია გემიგანს,
სამჷთხეკარიშა მომიღანს.
ჩქჷმი თოფი დო ლეკური
ვა ქიგილაბუნო შხვას!
ჩქჷმი ქჷრი დო მიმინო
ვა ქიგეუხენო შხვას!
ჩქჷმი წყარ-მეძობარი
ვა ქიგეთხოზჷნი შხვას!
ჭანჯი მირაგადჷ ზარს!
ძელი ჩხონს უჭკომუ ნდო
ძვალი ქეკოხორგჷ ძგასჷ დო
ჩქიმი დღა დალუური
ქიმიკოძუ ბონდიშის.