შურიშ ორკე
Jump to navigation
Jump to search
სოდგარენი შორიშ ბოლოს, გიბანდალუ შურიშ ორკე,
ასეიან ჭვიმაშ ხოლოს ალმაწენდუ გურით მორკე,
ღურუშ გალე ონჯუა რდუ, უქექუანდ ცირემს თოლეფს,
ჭე ხან ქორე უჸოროფეთ გილვორექი ზუღაშ გოლეფს.
ელმირაჸვალ ნინა ნოჸორს, ანდანერსი ქობადალანს,
გინაშერენს დიდო ჭკვერეფს, ბორო ბოროს ქიმწავალანს,
ვაიჸორს-და ქიმწარაგვე, მუშენ რჸუნდას ალმანგარეთ,
ქოიჸორს-და შურ ქიმეჩი, ვა დიტუა ხვათა–ხვალეთ.
ბორიეფიშ ჩილამური გუმოწენს დო ბშოლუნს ირო,
მა ვამოკო მაფშალაფა სქანი ნინაშ ჸინჩო, ნტკილო,
სოდგარენი შორიშ ბოლოს გიბანდალუ შურიშ ორო,
ვამაშიბუ მაჸალექი, ნამუთ იჸიდ ჩქიმიშ წორო.
ღურუშ გალე ოჭმარე რდუ, ბჟა ორკინუდ თუთაშ სინთეს,
ვარკალანსუ ბორჯიშ ღვინი, ელმაწენსუ ქუაშ ჭირქეფს.