ქომოლურო უჯგუ ღურა
ჩქიმი რინა თინერი რე,
ართმანგი მაფუ დღა დო სერი,
ჩქიმი ზისხირით ჩქიმი ნტერი
დიო ხოლო ვარე რძღელი.
ო,დანიელი,თქვან წამებას
ბრელით ვაუჯგუ ჩქიმი რინა,
ორაგადე ბრელი მიღუ,
ვაბთქუენი მუ ბქიმინა,
თინათი მიჩქ,მართალიშენი
მათი მარდის ვამიწინა,
ტყურას იშენი მართალი უჯგუ,-
მუ დროში რე კინოკინა.
უნჩაში ჯიმაქ დოპილჷდა,
ქჷმაჸინო თინა ჯიმა,
მოსაჯებული მუშენი მაფუ
თიშ ფერაფ დო ინოჯინა
მივოდინეთ ჩქი ირფელი
ღორონთიშე გჷნარჩქინა,-
მუჟამს ღორონთი მივოტეთ დო
ეშმაკის დოუჭყით რჩქილა..
მი დო მი რე ურგინჯუანს
შქას გოხარცქილი ჩქიმი გურსუ,
ზისხირი დო ჩილამური
ჩქიმი თოლეფშე ართათ მურცუ,
ჯიმა რენია-მიმტკიცენა
მით ჩქიმ ზისხირს თელო შუნცუ.
რინაში ნება ვარე ვარა,
შხვას მუთუნს მი დავენს,
ღორონთი ვადარინუანს
ჩქიმი სინწარეთ მით ხარენს.
მუში მეტი შხვა ქორდასჷნი,
მუშენი ვაკო მიდგარენს,
მარა ღორონთი ვეგიოტენს
მითინს შხვაში მიდნაღელს!
ათეჯგურა თოისერი
მითინს ქუძირუნო დღას,-
ჩქიმი ჸუდეს დო ჩქიმი კარს,
ჩქიმი დიხას დო ჩქიმი ცას,
ჩქიმი გვალას დო ჩქიმი ტყას,
ჩქიმი მინდორს დო ჩქიმი ზღვას,-
მირე არძენს შხვა დო შხვას!..
მტერცჷთი დო მოჯგირესჷთ
სახელქ ოკო ქიგიადვას.
ქუჯიში დო ცოტნეში კუნთხუს
მი ოხერეფი გაძიცანს?
თეშა მის რე გარზინენი,
უჯინექ დო გური ინგარს,-
მუში ქიჸანაში მოყოროფე
არძო მიკოჭკად ჯვარც.