რიწაშ შარას

by რამაზ კუპრა

რიწაშ შარას, ბზიფწყარს მოლე,
ფერდის ოდა მიკოდგუნი,
ვორექ ბრელშა მინაულა
ეტირხუდუ შუმი-ჭკუმი...

თელო გუმალუაფუდეს,
ზალამენდეს ანდა ნერო,
მუქ მაღოლეს, მათ ვამიჩქჷ
მუშენ გინმოშქვესჷ ნტერო...

იზაბელას მანძალენდეს-
ჯიმალობაშ შვი დო შვია,
დღემუს ვეგმასისმარუდჷ
ჩქინ შქას გოლუდუნი ტყვია...

მუშ მამალას გიბჭყოლიდეთ
ართიანიშ მიკოჯინა,
ხუს ხეგინოხუტოლერო
ჰარირაში ართო ბირა...

ბჯერს, გოპირანს ოაფხაზე,
იფცხოვრებუთ კინე წორო,
ნტერს, ჩქი ართო ქიპითჷნი
ვავარყინტეთ ჟირიხოლო...

ქიგვოსქიდუთ მაშქიდარო
ხორხოტასჷ ძვალიცალო,
რუს გოქურუნს მუშ სტეპეპშა
ერებამო ჭყვადილცალო...

მარგალეფქ დო აფხაზეფქჷ
ქუდოფსქიდით ღორებულო,
ართ-მაჟიას ენვოჯინეთ
ონჯღორეთჷ, მორდებულო...

ჟიშე ართ ცა გიმორთუნა,
ვამორკუნა გური, ჭკუა,
ქიგიშინით, ვამღუდესო
ართი ხიოლი დო ჭუა...

დიხა სოთინ ვაღინენა,
მუშუშ ჸუდეს ირკოჩ დართუ,
თეიშახ ირკოჩ ხეკვათილო
ენოცუმილ ვორეთ მართუს...

რიწაშ შარას, ბზიფწყარს მოლე,
კინე გეფალუნსჷ ნდოლო,
თი ოდაშა ხოლო ბრელშა
ჯვეშებურო მეურქ ხოლო...

1995 წანა, არგუსო.