რაგადელი- ტიმ სევერინიშ კინოხიანეფიშენ
გინოჩამათ, ასეიან არგონავტეფიშ დუდკოჩ შოტლანდარ რჩქინელ ტიმ სევერინიშ კინოხიანეფ ჸოფენა კოლხარეფ, რედუტ-კალეშე ამდღანერ ყულეშე, თურო გვასალიეფი. სევე სამარგალოს გოსიმაფილ ჯოხო რე, რინი ხოლო ჯოხო შურდგუმას, ორინჯეს. რედუტ-კალარ ბოშკოჩ სევეს მუშ უსქვამაშ საოსურე ძაბა ოთურქეს გაგმუჩეს. რინგოჯოგაფილ სევე ბაბას ქუწინს მუშ გინნაჭყვიდას, მელე გინივლე დო ვგორე ოკო ჩქიმი საოსურე ძაბავა. ბაბა ულასუნს, სევე იშენთ მუშის ორთ, თიწკუმა მუმა ხონარს ეუკინანს:
სევე, რინი გორჯოგაფუ,
მა თაშ ვორწყექ წიე,
სევე რინი თაქ გისხუნუ
ვედა სქუა მელე.
ქიშიცოდე გორგუაფილი
სქანი ნანა ელე.
მახორობაშ ბჟა დო თუთა,
ნანაშ მაფშალია,
მედინუქი რედუტ-კალეშ
სკიი გვასალია.
სევე, რინი თაქ გისხუნუ,
ვაფურინა მელე,
ქიმიარჩქილი, მოთვალუნსუ
გურხაშილი ელე.
რკიანს ხოლო უკახალე
დადისქანი ებე,
უსკანეთი ჩქინი რინი
სევე ვეშილებე.
ახავაი ჩქიმი ცოდა
ინწყუ მახორობა,
მოზურზულანს ომორდუალ
უჩაფულე ძობა.
ზღვაქ პოპორი ქიჩანუ დო
უკანწუანს სანდალს
ბორია უბარს სანწალეთი
ვედინოლუ მალას.
მუქ აღოლუ, მუ ამბე რე
გეგნიხანგუ გვალო,
წყარს სანდალი დინიფაფუ,
ნახაფულიცალო.
სევეს მუთუნ ვაარჩქილე
ხე დო მუშოთ სხუნუნს,
მუჭო ძაბას დერსხენსი დო
ხათე ჸუჩა მოლურს.
ქიმკარულე სარალოსი
გვასალიაშ მახას.
მიდგარენი ინგარს, იბირს
„სი სო ული ბატას“.
დოშურდუ დო ქიდინოლუ,
განთხღალირი ლიმაქ,
ორწყე ამარ ქჷმაკათუ,
უჩაფულე ჯიმაქ.
სევე, წიე, მიკმოჯინი
ძობა ვორექ სკანი,
ართო ვორდათ ართო ვგორათ
ძაბა თოლი სქვამი.
საფულეშე გემწუდირთუ
ჩე ფრიმულამ ბაბუს,
ეჩიებუ ქოიჸორქ-და
დართი ოდაბადეს.
ჯამუჯგუა მენცარ კოჩი
ნიტე არძო ორდას.
საწმოხონი უჩიებუ
მურჩქილუაფ მოთას.
მუ ქიმინას, ცოდაშ სკუა
ვაგორასო, აბა.
მოხანტურელ, მოჭარჭულერი
ბჟა დო თუთა ძაბა?!
ბჟას ჩხორია გუუფაჩუ
იჭუ ბჟაიოლუ,
თელი სერსი ბორდიშანდი
სევე მუქ გაღოლუ.
ჸოროფილი მის ვანოჸვე
მის ვაღურუ გური,
ლაზი ვორექ სკანიანი,
ბონდო, ბოში, შური.
ართიანაშ სკუა ვორეთ
ვადოგიტენქ ხვალეს,
თეშ ჩხონაფა მეჩამუდას
მუაჩქიმი ალეს.
თექიანას ვედივტენქი
გიფუჩუანქ ბაბას,
დოვღურუქ დო დოიგორუნქ
სკანი სქვამი ძაბას.
სევე რინო მოგნათუ
ათაქიან კათაქ,
ბაბაშ კუსა ვემირჩქილე
გვასალიაშ მახაქ.
ურჩქილედი ცოდაშ ნგარას
იქანჩუდუ ელე,
სევე, რინი თაქ გისხუნუ,
ვედა სკუა მელე.
ლიმა სანდალს ოხუტოლუ,
მიიკანწუ მონკათ,
უბადო კოჩ გახომუას
დიასკანიშ ცოდაქ.
სანდალქ ბუხტის ქემკადირთუ,
უბარს საბჟალეშე,
მიანწყიი, ქჷმოვრთით,
გემწოდირთი ეშე,
გედირთუ დო ქჷგაშინუ
ებე დადიშ ბირაქ –
,,შორ შარაშა ვაგომტუა,
ვაგმათხუა ნანა, მა,
უჩინებ ქიანას,
ვაგმარძინე, ნანა, მა,
უჩინებუ კოჩიწკუმა,
ვადმანჯირე, ნანა, მა!!!“
ბონდო ხე დო ეჩიებუ
სევეშ ამბეს ნანას,
მუ ოხვარუ მარდუალებს
ჭყელებს ჩქიმ მახანას.
ამარ ბეგის უჸიდირუ
ზესინახე ცირა,
ფაშაშოთი ოკონია
ცირა თოლი გვირა.
სკანთურ ბოშიქ ძგვიბიქ მიწუ
ბეგის ოინალუ,
თიშ მეჯინუ დამორჩილს
ვარდეფს ქუუფალუ.
შურდგუმილი ვემიკინჭუ
მითინ მუშ ხოლოსი
თუთაშ სკუას უძახუნა
მელენ მარჭიხოლსი.
სევეს ხონარქ ვეკაღინუ,
ქითუოლუ ნინაქ
მუშენ მაჭარ მა ცოდას
ათეჯგურა რინაქ.
გოტყვაცუ დო გოგურგინუ
ჟი მურიცხი იხალუ,
ჭვიმა მურს გითმიობუნს,
თუდო დიხა ინწალუ.
ამარ ძგვიბი მიინჭუაფ
გერგეზიო, ჯილო
კოჩი რე დო, კოჩანიერ,
უქიმინუ ირო.
ძგვიბიქ ირფელ მიირჩქილუ
სევეს მუუფერუ,
გურს ქელაჭუ გერგეზისი,
ჩილამურქი მერუ.
აბა ძაბას მინ უწიინს,
სკან თაქიან რინას,
მუშოთიე, კოჩიშ შურს
ვეჩიებუ ნინას,
ათეჯგურა მაარწკინდი
ძაბას ხოლო უღუ,
მიდეღი დო ქააძირი,
ხათე მოლგაჸუნუ.
თქვან განიშე ულა დიო,
ვეჸი ათე მარას,
ბეგი ხათე დუკილანს.
არძო შარას სანდალს.
საორიოშ ქიანაშე,
ჩურუნს ჩქიმი ბუდუ,
სკუაცალო ნარდი მაფუ
ხუჯით გილაპუნდუ.
სანდალ ჭუმან ოჭმარეს
ათაჸურე გიშმურს,
ბუდუ ხოლო ჟიჟღიფ იალონს
ბეგიშ ჸუჩა ქუმურს.
მუთუნ ვახვარ გენიპონანთ
მიდგაქ ოკო ძირას,
ჩქინ ქიანაშ მარჭიხოლს
სკანი სქვამი ცირას.
ლიმა სანდალს ოხუტოლუ,
მიიკანწუ სკვამას,
სევე ხოლო ოხუტოლუ
თოლი სკვამი ძაბას.