ნანაში ნინაში დუდმენცარი
| ნანაში ნინაში დუდმენცარი by [[Author:რინოს კვარაცხელია|]] |
| წყუ: გაზეთი "ნოჯიხური" №1 მკათათვე ხ.4 2013წ. |
(მამანტი ძაძამიაში მაფერაფალი ლერსი)
ტყურაშჲ რაგადჲ ვამჷმაძირე,
ორაგადესჷ მანგასჷ ფთქუა, _
ოგორაფალცჷ ვოგორა დო
მაფერაფალცჷ მუფერუა.
ნანაშჲ ნინაშჲ დუდმენცარი
ირკოცჷ ქოუჩქჷ, მამანტი რე,
ღორონთიერჲ საქმეს ჯღონცჷ,
მუთჲ მართალინი, მართალი რე.
ქიანაშჲ მაშხვა ოღალ მეუღუ
წუწელი ორქოცალო მონკა,
თე დიდი არხასჷ მიარ ხანცჷ
ბორჯიში გებიჯჷდჷ როკა...
თიშჲ სიდიდა, თიშჲ სისქვამე
სერემცჷ აფუდუ ფორილი,_
კოლხური ნინა ბჟა დო თუთა
ჸოფედჷ აკოწყორილი...
კოლხური ზიტყვა უკოროცხჷ
ზღვაში ქვიშა დო მურიცხჲცალო,_
ქიჸანასჷ ქაძირჷ ჩქინი ნინა
გოპეულერი ვარდიცალო.
მითინცჷ მუშენი უკვენდასჷ
მართალი რაგადი თეცალი,
ამდღარი საქორთუოს ვაჸუნცჷ
თიში მადიდა მენცარი.
მალჲწყარცალო ვესვანჯჷ დო
თიში ნასაქვარ ურწუმი რე.
არზი დო ხე უღუ მარდიანი,
ჟინი ღორონთიში ჭყოლოფა,_
ვერწემი წიგნო გინართინუ
ნანაში ნინაში ჸოროფა...
მარგალური ნინა ჸოფე
ადამშობაში გჷნარჩქინა,
ჩქჷ ჩქჷნი ნინა მიჩქუდესჷ,_
ჸოფე ღორონთიში ნინა,
ჸოფე მაფშალიაში ნინა,
ჸოფე აიეტიში ნინა...
ურჩქინჯელო მუთუნი ვერგჷ,
ირფელცჷ ოკო მუშუში რჩქინა,
მიქჷთი თენა მორჩქინესჷნი, _
ღორონთი, ქაცალი დიდხანცჷ რინა!
პატჷნი მამანტი გურითჷ რხვამანქჷ,
რხვამანქჷ კუჩხიში გერინელო,
ღორონცჷ დურინუაფუდა
ანთასჲ წანასჷ ბედინერო!
საწმოხონო დიდ საქმესჷ
კინჲ აწოჸუნთ ხემანჯღვერო,-
ძალა მერჩასჷ გორჩქინუქუ
თქვანჲ ქიანაშჲ სარგებელო!
29 მაისი, 2009 წელ