მუჭო მოხვადჷ პიარქ თუთას
| მუჭო მოხვადჷ პიარქ თუთას by |
| გინმათანგალი გიგა ქავთარაძე |
სი მუჭო მიგოჩქჷ, თუთა ირო თენერი რდუო? ვარი, პირენეის რცხვანე კათა რაგადანს, ნამუდა თუთას ტერტეეფი ვა უღუდჷ, წყარგუნალუეფი სენეფცალო ვარკალა დო წკონდა ჸოფე. მუჟამც თუთა დიხაუჩას გიოკიკინანდჷნ, პირენეიშ გვალეფს ბორია — ტრამონტანა გილეფელურუდჷ. თე ბორიაშე ჯგირს მუთუნს ველუდეს: თოლეფს ტვერს დო თირს ქალგორღვანდეს, შარაშე გენგოჸოთანდეს დო მუთ ირიშ უფურაში რდჷნ ტრამონტანას ვა უჸორდჷ, მუჟამც თიშ საჸალეს იჩიებუდესჷნ, რახან მუშ არზით ირფელიშ ნება უღუდჷ.
დო ა ამარი, ართშა ტრამონტანა თელ სერს ირქენდჷ, შხურეფი გოჸინჷ, კათა ჸუდეეფს ქომილარღვჷ. დიშქაშა ვა გიმართინედეს დო ართი ბასკის, ნამუთ კოთაკონკაშ ხოლოს, ოფუტეს სქიდუდჷნ, მოთვენაქ ვა უბაღჷ, ჸუდეშ წოხოლე, კარ-მინალშა გიმილჷ, დუდი ბჟაჸურე მიკართინუ დო ტრამონტანაშ ლანძღუა ქოდიჭყჷ. თე ბასკის პიარი ჯოხოდჷ.
ტრამონტანაქ ქოგეგჷ, პიარი მუჭო ოგორანდუნ დო ქელიძცუ, გურამ ბასკი ეშე ქიხვამილუ დო თუთას ქამახუნუ. პიარი თუთას ხვალე სქიდუდჷ. თექ გვალეფი ხოლო რე, მარა ვა გიაგორუ ინეფშა დო თინეფს, მიქით დიხაუჩას დოსქიდუნ, იშ მოხვარა ვა შეულებუდეს. პიარი თუთაშ გვალეფს გილეგაგუდჷ, დიხაუჩაშა შარეფს გორუნდჷ. კათა თუთას ბჟაშ ოროს ორწყედჷ, მარა თუთაშა შარა ვა უჩქუდეს. ენა ხვალე ტრამონტანას უჩქუდჷ, მარა კათაშ ოსოფინალ-ოკეკინალწკუმა დო ჯაბიწკუმა მუ საქვარი უღუდჷ ის? ტრამონტანას პიარი თეშით ხოლო ვა შუდჷ. ბასკი თუთაშა ელაჯინაშვანს, ნარღუანო გეშაფუშანდჷ: — მუჭო რე აკა პიარი თი უჩინებუ გვალეფს?
თინეფი, ნამუნეფსით თე არიკი ვა გუგებუნან, თუთას ხვალე ოროეფს დო ტერტეეფს ორწყენა. ინეფშო ითამ ირფელი ართი რდას, ნამდა პიარი თექ ხვალახეთ ამიჭიროთუნ.