მუჭო გორჩქინდჷ პირენეიშ გვალეფქ დო ლეხერეფქ
| მუჭო გორჩქინდჷ პირენეიშ გვალეფქ დო ლეხერეფქ by |
| გინმათანგალი გიგა ქავთარაძე |
მუთუნ ბორჯის, ბასკეთის ირფელი შხვანერო რდჷ ვინდარო ამდღა რენ. თექ, სოდეთ ამდღა პირენეიშ გვალეფი რენ, წვანეს მიშახუნელ ვეეფი რდჷ, ოდო თექ, სოდეთ ტომბა ჩეგემეფი მაღალი გვალეფს კვათუნან, ნარა წყარმალუეფი მითმეურდჷ. თიწკჷმა ადამიერეფს დო ჩხოლარეფს ართიანიშ ნინა არჩქილედეს დო პირენეიშ გვალეფს ადამიერეფი, ჩხოლარეფი დო მაფურინჯეეფი რჩქალას სქიდუდეს, სონდარო გვალეფს ვერწემი გვერშაპიქ ვა დირჩქვანუნ. თიში ასა-გასა გვალაგიროხილეფ შქას მიკარკუდჷ, ოდო კუდელი პირენეიშ გვალეფიშ ქვინჯიშახ დო საფრანგეთიშ წყარმალუ გარონაშახ ანჭუდჷ.
გვერშაპის თელ წანას ლურდჷ დო მუჟამც გოკურცხუნ, მუშ ლაკარტი გაგმიღჷ დო გოხოლუშ ოფუტეეფი გეგნორყინტჷ. მორსხა სოლეთინ ვა რჩქუდჷ. ქუალეფი ქუალეფი რენ, თინეფი ხოლო კუსანდეს. ბასკეთიშ კათაქ ბჟათ ჰამებას, ბაღანეფწკჷმა ლაჸაფის დო მინდორიეფიშ დამუშებას გეგნარჩქვანჷ. "მუშენი?" არძა ართი რენო თე ურძღაფელა სქილედეფიშ ქვარაშა მუ ალურსუნ? გვერშაპიქ გინოქუჩუჩელი ლეხერეფი, გვალეფიშ კართეეფი დო მინდორიეფი ტიოზო გინაშქვჷ დო ადამიერეფქჷთ თე არდგილეფი ქოდიტუეს.
დო ამარი, ართი ზარხულს, მუჟამც გვერშაპიქ გაგშაკურცხჷ დო 12 ოფუტეშ ტყალეფი, მუშ მახორუეფამო დო გვალაშ ართი წყარმალუ ედომუშამო გეგნორყინტჷ დო პირენეიშ არძოშე მაღალი კონკას ქამინჯირჷ დო ქოდირულუნ, საფრანგეთიშ წყარმალუ გარონაშ დო ესპანეთიშ წყარმალუ არაგონიშ ლეხერეფშე ბასკეთიშ ქომოლ-კათაქ აკიკათჷ დო ქიანაშ ხანს სხუნუნდეს, მუჭო უქიმინუდესკონ, მუჭო უჸვილუდესკო ურძღაფელა გვერშაპი დო მუნეფიშ დიხა მუჭო გინუტებუდესკონ, მარა მუთუნ მორსხაშა ვა მიაგორეს.
თიწკჷმა ართი ბადიდიქ გედირთჷ დო თქუ: გვერშაპი დამორჩილს გიშაკურცხუ, მარა ჩქი უმოს ორდო ოკო ქოგივანთხათ, ვინდარო ზარხულიშ ეკონია თუთა გვალეფს ვა მუკაჩირთუნ. უმაღალაშ კონკაშ ართი ფერდიას ტყა გობჭვარათ, დიშქა დობკვათათ დო ბორბონჩია დაჩხირი ქოდუვორზათ.
— ენა მუშო? — იკითხეს არაგონიშ დო გარონაშ ლეხერეფშე ოსხუნუშა მულირ ქომოლ-კოჩეფქ.
— თქვა მა ვა მომირჩქილეთ — უგამჷ ბადიდიქ. — ჩქი ღიფა დაჩხირს ქოდუვორზანთ დო გვერშაპის გოვოკურცხინუანთ დო მუჟამც თოლს განჯანსინ, კოთაკონკას დაჩხირს მოსანჭუნს დო გაჸალებური ლაკარტის გაგმიღანს, დაჩხირს გეგნორყინტუნს დო დოღურუ.
— ჭკვერული რე, — ხუჯი ქიმეჩეს ოსხუნუშა მულირი ჯიმაკოჩეფქ. ჸუდეშა დირთეს, არგუნეფი გეჭოფეს, კოთაკონკაშ ფერდიას ედომუშამო მოკვათეს ჯალეფი დო დაჩხირი ქოდარზეს. თინერი ბორბონჩიაქ გეიაჸუნჷ, ნამუდა პირენეიშ გვალეფიშ არძო მახორუქ ქოძირჷ. თინეფქ ქომეხვადეს, ნამდა მუნეფიშ უბედურობაშ დათებუქ ქომანჭუნ დო ძალამს ახიოლეს. დო რახანო ახიოლესინ, თინერი ზირზოლქ გეტირხჷ, ნამდა თინეფიშ ხონარი ცას ონჭუდჷ. გვერშაპიქ გეჸალჷ დო 3 ოფუტე მოჯალაგუ. ნოჸორი გაანჯჷ დო მუშ ემაჭიროთაფალეფს გორუნდჷ, მარა მითინშა ვა მოუოლჷ თოლქ. თიწკჷმა დუც გიმე გიმოუკუნჷ დო ვერწემი ბორბონჩია დაჩხირიშ ნინეფი ქოძირჷ. რახანო გვერშაპი გლახათ ორწყედჷ თოლს დო ვართ ეფერი ჯგირო რდჷ გიშაკურცხინაფლინ, ვა მეხვადჷ, მუშ მუკი-მუკი მუ ხვადუდჷნ.
გვერშაპიქ დაჩხირი გეგნორყინტჷ დო დიიჭვჷ. თიშ ხონარიშ გეშა გვალეფქ ქოდიზარზალუ, წყარმალუეფი უკახალე მითმეურდეს დო წყარგელაფუეფქუთ გორჩქინდჷ.
პირენეიშ გვალეფს გვერშაპი ჭუაშ გეშა აკმიკარკუდჷ დო სოდეთ აიშახ გვალეფი რდჷნ, ლეხერეფი გუთმორჩქინდუდჷ, მინდორიეფი ტიოზეფო გინმირთუდჷ, გვერშაპი წიანდჷ, დიხა იძანძუდჷ დო ქუალეფიშ ცუმას ადამიერეფი მითმინტებუდეს. გვერშაპიქ დაჩხირიშ ოშქირიტალო წყარმალუეფი ედომუშამო გეეშვჷ. უკული დუდი ეკონიათ გამწაჭოფუ დო დოღურჷ.
პირენეეფს შქურნაქ ქომიკოდინჷ დო გვალაშ წყარმალუეფიშ წყარქ, ნამუთ გვერშაპიქ შუნ, ნოჸორშე უკახალე გაგითოწუ დო ტობათ გინირთჷ. კათაქ ტობას იზაბეტი ქოგიოდვჷ, ოდო გვერშაპის — იზაბეტიშ ტობაშ გვერშაპი.
გვერშაპიშ შინაქ ბასკეთიშ ქიანას ირიათონო ქოდოსქიდჷ. ქოკითხით მიდგას გოკონან, მუჭო გორჩქინდჷ ლეხერქ, სოდეთ მუში ჸუდე გედგჷნ ვარა ოფუტეშ ხოლოს გვალეფქ მუჭო ეშარჩქინდჷნ. "თენა ირფელი გვერშაპიქ ქიმინჷ“ — გიგამენს ბასკი. ვერწემი რდჷ, მარა ჩქი დუვამარცხით, რახან კათას, მუჟამც არძო ართო აკიკათუნ, გვერშაპიშათ ვაშქურჷ უკული.