მორთ, ჩქი ქუვორდათ
ოკო გიჩქუდას, უსქანეთ რინა
ვეშემილებუ დო მუ ფქიმინა?!
სქანით იჭყაფდას მოკო გოთანა...
თე ზოხო რინი მიმოჸოთანა!
მორთ, ჩქი ქუვორდათ უნივერსუმი,
მა, სი, ჸოროფა, - ხვალე თე სუმი...
ბჟაშ ოშქაგურეშ მომიღუ შვენა.
თე ჩქინ ჸოროფა დღას ვეშმაშვენა...
მიბლათ ირ აკან, ირ ზღვა დო გვალა,
ქიბგინათ დუდიშ რწუმა დო ნძალა.
შხვაშა ვაგოკო ჸოროფაშ ღალა,
ამარ, მა ვორექ სქან შურიშ ღალა...
მუდგა ვამწუე - ჯგირი დო ფური, -
სი იჸიქ ირო ჩქიმ ოცქვაფური.
ირფელ მომონკუ, ვაგორწყექინი, -
ხოლოს ვარექინ, - ვა რე ლექინი.
რხანტუნს თი უჩა წარი დო ფიჭვი,
ხომ ქარწყექ მუჭო ჸოროფათ დიბჭვი?!
მუს მოკო ასე ჯუნა სქან ღვაში,
სქან უმშო თე გურს მოსვანჯა ვაში.
გოსქვანს სასია გილულა, ძიცა,
მათ მიჸორს ძალამს, სი გიჸორს თი ცა.
სი რექ ჩქიმ რინაშ ღვალა დო ფენდა,
პჭუნს დაჩხირ, მირსხი, - ქეშკალებენდა...
გილურქ დო ხვალე გილაბრაგადა -
გურზ თე გინაფას, ბოშ რექ აბა და!
მოხიოლ ირ ბორჯ, ირი აფუნი.
უჯინ ათე გურს მუ დღა აფუნი...
ხიოლიშ გეშა გოხორცქუ გურქუ
დო ტორონჯცალო ფსუალეფს გურქუ...
ქიჩანუ ფსუა ამარ, აფუნქუ,
მუს მოხიოლუ - ამარ, ა, პუნქუ!..