მა გვიმარათ გინორთელი
გური ოტობაიას
გვიმარონშო დო კაკლარონშო იფხვამა
ნაშქასერშა,
თინეფშა მიბარ ჩქიმ შურიშ მორსხა -
ტყვიაშ გოგერგილ უკლაშ ჯიმაშ სვეტერია ტანი
დო ოხვამეშ მუკნახარცქა
ქუა, ჯვეშიშ მიკნაჭარა,
გომრენა ტერეფი.
გვიმარონშო დო კაკლარონშო იფხვამა
ნაშქასერშა,
ინა ვეშასოფე მითა როკსოფუს დო
ვემშაზაკვე უბადო შურსუ,
ბორჯ დო ბორიემს ვეგნაფართხე დიხა,
იშ ნამანგარებუ,
დღას ვეგიაგორენა ჩქიმი ანჯიშა,
გომრენა და გომირდან ტერეფი.
გვიმარონშო დო კაკლარონშო იფხვამა
ნაშქასერშა,
ქიანაშ დამარგებუ, ვეშამიჸოთა
გვიმარელი დო კაკლარელი ნერჩი,
თიშა მიშამტყობ გური, გვიმარელი დო კაკლარელი.
ვავა, გვიმარაშ ზღვაიას გილაცქვარანს
სქან სამარგალო დო სქვერელია ცირათ,
მა გვიმარათ გინორთელი,
სი გიჩქ, ვადომშქურდა, ბაბა, გური,
გომრენა და გომირდან ტერეფი.
გვიმარონშო დო კაკლარონშო იფხვამა
ნაშქასერშა,
ველართასიო გუმათანე მურიცხიქ დო
ვეგეთუასო უბადო მორთაქ,
ხეთ გეგნოფუფჩონუ ჯვეშ ნაჭარა დო
ჯიმაშ საფულეს, ფოსვიშ გოხვიარელს,
ბირცხაშ ზისხირით დობღაფუ
ოხვამეშ როხუს,
ვამოკო მაგანა დო ბერგი.
... დო მათ გვიმარათ გინიფრთიდა,
თაქ ვარეთო ჩქიმ ბოშეფი,
გომრენა და გომირდან ტერეფი.