მარგალური ულიუ ზღვა რე
მარგალური ულიუ ზღვა რე,
მა ვორექჷ თე ზღვაში მინჯე;
თე ზღვასჷ ოკო ქოუმინჯე,
მიდგაქჷ მუდგა ვაგერღვინჯე.
მენცარეფიში დიდჲ მენცარი
ნინა გოხოლჷ, მარგალური;
კოჩქჷ ვეფიქრა, თეში ცქვაფათჷ
მა ნინა მუმარგალუნი.
მორო ცქვაფა მუშოთი ოკო,_
ოცქვაფურიშჲ დოხორესჷ,
დიდი ნინაშჷ, ნინაში ნინაშჷ,
ნინეფიში დოხორესჷ.
ფარსაკი რე მარგალური,_
უჰამაში ობირეში;
მითაჟამიში ოჯინჯალე,
ჩქიმი ნინა, ჯვეშჲშე ჯვეში.
ვარენი ეფერი თქუასჷნი,
მუ კოჩი რე იშქიდანცჷ,_
ნინაში ირი ისტორია
თეშჷ ინიხვიჩინანცჷ.
მუსუ რე თენა ვეხანტჷნცჷ დო,
მუ რე თეთჷ ვეთქუენი;
თე ნინასჷ ქინანჭუქუნჷ,
ვეშილებე დეთხუენი.
ირფელცჷ თეში ეჭარჷნცჷ,
მუჭომითი თინა რენი;
თეში გეშა რე მარგალური
ზღვა უქვინჯე ნინა რენი;
ჩქიმი თოლიში მოწონუა,
ჩქიმი გურიში ბინა რენი;
თენა თაში ვარდასჷნი,
მი რე თესჷ გინარენი.
ხუთიანთასამშოშიშახჷ ნინაშე
მარგალური გვალო შხვა რე;
თეცალი მდიდარი დო ჯვეშჲ ნინა
მეტი ვეგორუ, ნამთინი ვარე.
ქჷმოძირითჷ, მა, შხვა ნინა,_
ხუთოში მილიონი სიტყვაში მინჯე;
ფართო, მუჭოთი ოკეანე,
ტომbა, მუჭოთი ზღვა უქვინჯე.
ათეჯგუა საარიკო
ნინა ორე მარგალური;
მუ ეფერი კოჩი ოკო რდასჷ
თესჷ ვაუმარგალჷნი.
მარგალურცუ პატისჷ ვაცენცჷ,
ეთისჷ ხვადჷ ოში ჭჷნი;
ჭინჭაზჷმა ხოლო ვარე,
მარგალური მის ოჭიჭჷნი.
ხომუ ქომიჩქჷნა, თე ქიანაშჷ
ანდანერი ნინა რენი;
ჟარნეჩი დო ვითჲ სიტყვა უღუნი
ეფერი ჭიჭე ნინათი რენი.
აკაქჷ ოკო ვადინასჷ,
ნინაქჷ, ნამდგა ვარდასჷნი,_
შილებენო მანგიორი
ართიში, ნამთინი შხვა რდასჷნი?!
ქიანა მუთუ ეიაჭარე
კოცჷ, ნინა ვარდასჷნი;
ღორონთქჷ თინა ვაჸუასჷ,
ნამთინცჷ ღურა მარდასჷნი;
შხვა ნინეფიწკჷმა ართო
მარგალური ვარდასჷნი.
არძა ნინა მუშუში მინჯექჷ
ოკო გაამარგასჷნი.
ირიკოცჷ მუ უჩქჷ, მუ რექჷნი,
ჩქიმი თილი უნჭე მარგალური;
კოჩიშობასჷ ვემედინა,
სქანი მამანტიქჷ ქჷგგალუნი!
მარგალური ულიუ ზღვა რე,
მა ვორექჷ თე ზღვაში მინჯე;
თე ზღვასჷ ოკო ქოუმინჯე,
მიდგაქჷ მუდგა ვაგერღვინჯე.
***
მარგალური, მაფალუუ,
სქანიჯგუა მუთა მაპალუუ;
სი ვეჸიქჷდა, არძა ნინა
ღორონთქჷ გეგნოგვაგვალუუ!..
ქორთული ნინეფი, მაფალუუ,
თქვანიჯგუა მუთა მაპალუუ;
თქვა ვეჸითჷ და არძო ნინა
ღორონთქჷ გეგნოქვაქვალუუ!..