გოხვანჯალი
ძღაბი - ბათუ მოღირაკექჷნი, იჸიქ მუდა წანერი?
ბოში - ქარქ ქაშმოსხაპუ ვარა, ვავორექ ხანერი!
- მორო ჩილი ქჷმიჸონი, ქჷდომიძახ რხინიშა.
- ანწი მუთუნ ვამილამუ, წანაშ დამორჩილიშა.
გუნდი - ვავა ბათუ სქანიშენი, გაღვინჯენც ცისანა
უჩილეთ ქირჩინუქუ, ძღაბეფი გჷგოძიცანა.
ძღაბი - სი ნამ ძღაბის დაგიხარა, რჩქინათ რექ ცქვაფილი.
ბოში - ჩხოროშ ხუთის გინმაზია მაფუ მიკოჭყაფილი!
- აგრაფინას გაგირიგე, ხანიშენი ქჷგოსქვანც
- იცალჲ ფორხუ გაურიგი სქანი გინმაძირაფალც!
- ბანტამჲ ცირა ქჷგოკონო, ქოთქვი ბათუ მართალი.
- ეჩი წანერც მირიგენა, თეში მიშირ ფართალი.
- უმოს ჭყინტჷ ვაგოკონო, ეგებ მოგიგვარენი...
- მოკოდასჷნ მოთაკილჷ ჭკვერი აკა ვარენი.
- ნიტე ქომიშქიდანდენი, ოსურჲ გაჸიქ ოქროცალი...
- მანიკურით მოღაფილც, ვადგოსქვანც ოქოსალი.
- ვაგოკონო ბოშეფით აიშინე გვარინი
- მოთაკილჷ ეცალიშა სი ვაგიგ წარინი
- თეში ვარა ვაგიჩქჷნო ხეში მოხიცინაფა
- დეთა მუსუ გეწკვაწკვალა სქან კვალიში დინაფა
- მორო მა სი მიჸორქ თინა შხვადო სოთინ ვათქუა
- დუცუ მოუთხილე, ვარა ვადგოკორდ ბათქუა.
- მუთ დოსქიდი უჩილეთ, გაგმოტირხი ორჩინელც
- ოჯახიქ გჷმოჭყორდ, ქუვაჸუნი ოშინერც.
გუნდი - დიო ხოლო ბრელჲ ბოშეფი
ბათუშ შარას გილარენა,
ასე იძიცანა მარა
ბათუცალო ინარღენა.
1976 წ.