ბაღანობაშ გოშინა.
Jump to navigation
Jump to search
ბაღანობაშ გოშინა
მუთუნ ვა რე სკანცალი,
თოლც აწმორე ირფელი,
გურქ ქჷდიჭყჷ ხვანცალი.
მოსისმარუ ხშირასჷ
თი დრო, ოქრო – ტატალი:
მიძახ – მიტყურუანცჷ:
–აშო ქჷმიგვაჯალი!
ნანა შური, მუ ჯგჷრჲ რე
ინგირიში ხვარჩალი,
გჷმათანე მურიცხიშ
ცასჷ მიკობარჩხალი...
იალონშა ბარდისჷ
ზესქვიშ მითოფაჩალი,
მუმულეფიშ ჸიონი,
ქოთომეფიშ კარკალი...
ინგჷრც გეჩაშ ძირაფა,
კალმახეფიშ ტკარჩალი...
ცხენეფიში რულაფა,
ცხენიშ მინჯეშ ღაჭალი...
ბაბუშ ოზე სოფელცჷ,
კუჩხ უჩაფლეთ ბარჯგალი,..
უშქურ, სხული, ატამა,
ჭყჷნტ ლატი დო მაჭარი...
ოკარიე, მაღაზა,
მარანი დო ჯარგვალი,
მოხუცებულ ბებიში
იროიან კვარკვალი...
ირფელ ართო, საყვარელჲ,
ჩქიმ გურიში კაკალი,..
ნოტე, ასე ქოპუას
ეთი ჭიჭე მარგალი.