دیوانی مەحوی/تاک

by مەحوی

←چوارخشتەکی

دیوانی مەحوی  (1896)  by مەحوی تاک

ئایینی→

-1-

لەم ئەهلە دا کە ئیشی کەسی پێ ببێ ڕەوا:

یا پێیە، یا نە دەستە، وە یاخۆ بە دەست و پا

-2-

لەم سەرایە حاجەتی پێ بێ ڕەوا

یا بە پێ، یا دەستە، یاخۆ دەست و پا

-3-

دڵم بێ تابە، ئەحواڵم خرابە

هەتا تۆمی دڵ ئارام و دڵ ئارا

-4-

کە وا ئەو شۆخە تیرێکی بە عەمدەن گرتە من مەحوی

نمی‌دانم چ سان آرم به جا شکرانهٔ خود را

-5-

بکە سەیری فوتووحات ئەر گەرەکتە تۆ فتووحی ڕۆح

کتێبی دڵ موتاڵا کردنە، بڕوانە مەکتووبات

-6-

تاجی سەری شاهانە خاکی دەری سەی ئەحمەد

سەر ڕشتەیی ئیمانە ڕشتەی سەری سەی ئەحمەد

-7-

وەقتی هەموو کە کردووە هەر بۆ وزوو زایع

زاهید بە بایێ ئەو هەموو سەعیەیشی چوو زایع

-8-

مونەووەر نەبوە لەو والشّمسی پاری تەلعەتت خۆ دڵ

موعەتتەر بێ دە لەم واللّیلەکەی ئەمساڵی خەتت و خاڵ

-9-

چاو و گوێ بخوازە بۆ ئیشی موهیم

حبّك الأشياء يعمى و يصمّ

-10-

هەر چەندە تۆ ئەمینی بەڵام ئەو دڵەی ئەمن

نابێ لە سیحری نێرگسی فەتتانی تۆ ئەمین

-11-

ناوی زەنەخدانت لە ناو باغی بەهەشتا بێتە نێو

سەر وەردەگێڕێ باخەوان هەر جێ بە جێ بۆ تف لە سێو

-12-

درۆیە مەنعی جەمعی ضد، نەزەر کەن

لە بەزمی ئەم شەوا ڕۆژێ دیارە

-13-

تۆ بە کەرەم تیرەکەی گرتتە مەحوی شوکر

ئەو ئەکەرەم کەوتووە، ئەم لە کەرەم کەوتووە

-14-

من ڕۆژڕەشم و فەرقی نییە ڕۆژی من لە شەو

سەد ڕۆژ ئەگەر هەڵێ لە سەرم، ڕۆژم هەر شەوە

-15-

وەکوو سەروت دەوێ لەم باغەدا بێ هەر بە سەربەرزی

وەکوو دانەی لە بن خاکا دو روزی خاک بر سر زی

-16-

نیگاری دیدەبازی من ئەگەر ڕاوی هەوەس بێنێ

بە عاشق دیدە دەنوێنێ، لە نێچیری دڵ ئەڕفێنێ