اے شہ اقلیم شوکت السلام
Jump to navigation
Jump to search
اے شہ اقلیم شوکت السلام
رونق تخت خلافت السلام
اختر چرخ سیادت الصلوٰۃ
نیر برج سعادت السلام
تو جو ناگہ خانہ روشن کر گیا
تیرہ ہے بزم رسالت السلام
مقتدا تو پیشواؤں کا رہا
تجھ کو زیبا تھی امامت السلام
تو ہے جس پر دم بہ دم بھیجیں درود
یا کہیں ساعت بہ ساعت السلام
کربلا میں تو جہاں قائم رہا
تھا قیام اس جا قیامت السلام
بات کہتے جان اپنی دے گیا
اے تمامی جود و ہمت السلام
امتحان حق سے یوں نکلا ہے کون
اللہ اللہ تیری غیرت السلام
وادی بے آب میں تو کیا کھلا
اے گل باغ شہادت السلام
غم میں تیرے خاک ہو کیونکر نہ میرؔ
سخت تھی اس کو کدورت السلام
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse