Инәй күлдәк йыуа…
Сал сәстәре
Туҙып сыҡҡан яулыҡ ситенән.
Нисәнсе май бер күлдәкте йыуа,
Йәше йыуа, ағып битенән.
Бик ҡәҙерләп уны элеп ҡуя
Киптерергә, йыуып бөткәс тә...
Тол ҡатындар шулай ирен көтә,
Һалдат көтә, йылдар үткәс тә.
Ҡайтып инер, юл күлдәген һалыр,
Таҙа күлдәк һорар иркәйе.
Нисек тоя, нисек аңлай инәй
Ир ҡәҙерләү – бәхет икәнен!
- Бына, - тиер, - һис бер саң теймәгән
Хушлашҡанда кейгән күлдәгең...-
Һәм өндәшмәҫ күлдәк яғаһына
Күҙ йәштәре генә тейгәнен.
Мәжнүндәрҙәй тоғро йәп-йәш ире
Шул күлдәген кейеп, ҡул һуҙһа,
Әүерелер ул да, Ләйлә кеүек
Сибәрҙәрҙән-сибәр йәш ҡыҙға.
Илленсе яҙ. Һаман һалдат көтөп
Тол ҡатындар илай илдәге.
…Осоп ҡына китер аҡҡош кеүек
Ел елпетә һалдат күлдәген.
