Грозной иетне ютасть,
Митя партияв совась.
Сон арси думси истя:
„Ней уж мон явуль эрзя:
А карман эрзякс кортамо,
Лытка латкасо якамо.
Пандя, ней уж мон содан —
Ков молян ды ков озан.
Рузокс прязом сермадса,
Вейкс эрзетнинь мон стувса;
Кадык тувокс сынь эрить
Рудаз поцо сокорить“.
Пек аламо шка ютась
Паро куля Укомс сась:
Митя парсте роботы,
Што сон пек енсто корты.
Кармасть тосо судямо,
Митень покшокс ладямо.
ВИК‘ов Митень сынь кучизь
ОТСЕК‘екс тозой ладизь.
Седе пек Митень кармась
Рузонь келень вечкемась;
Рузонь тейтертнень вечки,
Сынст мельга анцяк яки.
Тейтернитне пек уж парт,
А эрзень эчке човарт:
Пильгенетне човинить,
Ашо сэрийть котынить,
Нурькинькинить юбкинить,
Товсо ваднезь чаминить.
Коть уж мон и сыридинь,
А яла теке думсинь:
„Вана неть так уж тейтерть!
Вейкс максса — анцяк тон мерть“
Но и те ощо а вейкс...
Эль пурныть пуромксов вейс.
|
|
Рузт, эрзят, церат, ават,
Модань паксень сокицят....
Митя парсте стараи
Ушодмо речь думаи.
Рускс корты сыненст истя:
„Рукава низко спустя,
Я не буду говорить,
Чтобы слов не повторить....
Говорить я буду ясно,
И мордва поймет прекрасно....
Аудитория грязна,
Непонятлива, темна....“
— „Ащик, стой, ялгай, евтак —
Икилив иля капшак!
Тон кодамо вал евтыть —
„Аудитория“ мерить?“
Арси Митя, месть евтамс,
Косто чарькудьманть таргамс?
Те валунть сонцькак азды —
Косто ней лия саи?
Сон теньгис пек а ризны,
Мекив-васов а тарны.
Кепиди прянзо смеласто,
Ваны вицтэ, веселасто.
„Дорогой товарищи,
Ми идем тов, ков ведут....“
— „Пандя, пандя, брат, лоткак.
Луче тон эрзякс кортак“ —
Пижнеме эрзят кармасть,
Кунцоломояк лоткасть.
Рустнэяк кармасть ракамо
Лангозонзо нарьгаямо.
Мереть тензэ „Митя—тов“,
А эрзетне „Митя—ков“.
Рузонь валдо паро ковне
Эрзень сельтнень ашо товне.
|