Эрзянь Мастор/2004/03/Урок надежды

←... Не факультатив, а предмет

Эрзянь Мастор, № 3 (178), 12 февраля 2004 edited by Нуянь Видяз, Кшуманцянь Пиргуж Урок надежды by Кшуманцянь Пиргуж

Свал ульть мартонок, эрзянь букварень теиця!→

Статья на сайте газеты: № 178, 12.02.2004, Урок надежды

 

Урок надежды

Мордовия. Мокшалей веле. Тесэ, даволковонь 4 чистэ, ютавтозель промкс: «Кода ванстомс-кастомс эрзянь келенть». Сакшность Чаунзань буень эрзянь келень школань тонавтыцятне, культурань учреждениянь важодицятне. Семинаронть анокстызь-ютавтызь: Федоськина А. П. — Мокшалеень школань директорось, Сыркин В. И. — буень содамочинь куронь прявтось, Юдина Л. П. — буень культурань куронь прявтось, Самылкин Д. Д. — Мокшалей велень прявтось, Сыркин В. А. — «Дигаля» ансамблянь прявтось, Цыпина Ю. С. — Эрзя ды Мокша раськетнень Топавтыця комитетэнь прявтось, ды лиятат.

Сакшнось делегация Саран ошсто: Мусалёв Г. Д. — эрзянь келень идема Фондонь прявтось, профессортнэ — Д. В. Цыганкин (чачсь-кассь Мокшалейсэ), Поляков О. Е., Якунчев М. А. ды Абрамов В. К., Щанкин Н. С. — республикань национальной комитетэнь специалист, В. В. Филиппов — содамочинь министерствань специалист.

Ютавтовсть панжадо урокт. Сындест мейле — «кирькс столь». Эрзянь келень тонавтыцятне, Сарансто сыцятне ды лиятне эрьва ёндо ваннызь школасо теевицянть, асатыкстнэнь. Весе редизь: школань класстнэсэ ды коридортнэсэ понгавтомкатне сёрмадозь эрзякс; эйкакштнэ весе кортыть ванькс эрзянь кельсэ. Мокшалеень школань тонавтыцятненень эйкакштнэнень эсь келень вечкемань ёжонь раштамонь кис максть паро питне. Тенень мель явить содамочинь (Сыркин В. И.) ды культурань (Юдина Л. П) куротнеяк.

Эрзянь келенть ёжозо ванновсь эрьва ёндо. Секскак ютко шкавтомо кортамось мольсь 10 чассто саезь 17 часос.

Ламонь мельс тусь эйкакштнэнь ды тонавтыцятнень вийсэ путозь концертэсь. Гайгезь гайгсть морот, стихть, сценкат…

Истят вастневематнень ютавтомат весе буетнесэ. Те канды аволь вишка лезэ эрзянь ды мокшонь кельтнень ванстомань тевентень.

Кшуманцянь Пиргуж