Яратон эше! Нуналъёсмы пеймыт, улонмы шуг,
Муртъёс уродэсь, тэрытэк уло шуса, эн ӧпкельы!
Ӟеч луом ваньмы, сабыр луом ваньмы.
Ӟеч мылкыдэн одӥг кенешен уломы шуса, оскыса ул!
Огмес-огмы адӟонтэм карыса,
Чурыт мылкыдэн улӥськом шуса, эн ӧпкельы!
Даур вуоз, сюлэммы небӟоз,
Уродъёс бырозы, улонмы капчи луоз шуса, оскыса ул!
Ялан юыса онраськеммы ини
Кый-вина милемыз кыӵам шуса, эн ӧпкельы!
Эсэн ке луоз со кыйез виом,
Юонэз куштом, визьмо луом шуса, оскыса ул!
Мон куанер, мон гольык шуг адӟыса улӥсько
Монэ ӟеч муртъёс серекъян весь каро шуса эн ӧпкельы.
Тани куанеръёс но уз луэ, гольык ӵоктаськозы
Ваньмыз адямиос огкадь ӟеч луозы шуса, оскыса ул!
Тани шунды ӝужа ни, куазь сактэ лэся…
Ӟеч ке улӥм, ӟеч ке тыршим
Пеймыт нуналъёсмы люгдоз шуса, оскыса ул!
Яратон эше! Вай бур кидэ, пеймыт сюресмес куштыса!
Шунды пала, люгыт пала берыктӥськыса.
Бур кимес кутса, ӟеч кариськом.
Сайкыт дуннее, люгыт дуннее
Нуись сюресэз утчалом.