Мар кароз на, бурдзэ вандӥзы ук (Дядюков)

Мар кароз на, бурдзэ вандӥзы ук Автор: Иван Тихонович Дядюков

Источник: Гудыри : газет. — 1924. — № 65. — 4-тӥ бам.

Ӟуч арня нуналэ, Иван Кудо кытчы ке кенеше ветлӥз; ӵукна дас часэн кошкыса, ӝыт куинь часэн синъёсыз тордылыса, горд-горд луыса гуртаз бертӥз, бӧрдэм луоз. Иван Кудо корказ пыриз но, ӝӧк дураз пуксьыса нош ик бӧрдыны кутскиз:

— Уй-уй уй-уййй… Ма каром на табере… Кытчы мыном на… Кинлы вералом на…

— Маро луиз тыныд Иван Кудо? Малы бӧрдӥськод? Иське кин ке жугиз-а быттырзэ?

— Ӧз жуге но, бурдме вандӥзы…

— Бурддэ вандӥзы! Кинъёс? Мар понна?

— Зэм верам кылы понна ук вандыса куштӥзы… Хны-хны-хны-ы-ы…

— Тыныд верамын ук ни, зэмзэ эн вера шуса, тон ке нош эрекчаны турттытэк одӥг зэмзэ вераны турттӥськод; зэм веран вылэ сялӟы но кушты.

— Зэм верамелэсь неноку но алэмды уз луы тӥляд монэ, мон дунне вылэ эрекчаськон понна ӧй вордскы, зэмзэ вераны вордски, коть кӧня бурдме мед вандылозы зэм верам поннам, коть кӧня бамъёсме мед пыжылозы, озьы но зэм верамысь уг дугды, ялам верало; мон та дунне вылэ эрекчаськыны, пӧяськыны ӧй вордскы, мон та дунне вылэ зэмзэ вераны вордски, сьӧд калык понна ужаны кылдӥ.