Эксэй дыръя асьме палмес (ельмес, ёросмес, шаермес) дышетӥськыса тодыны нокин но уг тыршы (туртскы) вал. Тодыны тыршись муртъёс луо ке но вал, туж ӧжыт луо вал, соослы но становойёс, земской начальникъёс но пӧртэм, пӧртэм эксэйен йыр муртъёс оло кыӵе но могатон амалъёс шедьто вал. Кенеш вамен кутӥсьёсмы (совет властьмы) нош пӧрмыса вуэм беразы ик, калыклэсь ӟечсэ-уродзэ тодэмлэн туж бадӟым, трос пайдаез луэмысь, иняз басьтыса, котькыӵе муртэз ас палзэ ӟеч мед тодоз шуса валэктыны но юрттэ, дышетыны но тырше.
Озьы ке но, асьме куспын али (каль) но, гожтэт тодымтэ мурт гинэ ӧвӧл, гожтэт тодӥсь муртъёс но туж тросэз палмес дышетӥськыса тодыны кулэ вылэмезлэсь мазэ-созэ ик уг валало. Валамтэенызы та ужез соос али но мукет тодонлыкъёсын (наукаосын) сурало; озьы сураменызы кудӥз сое география лыдэ понэ, кудӥз история шуэ, кудӥз-кудӥз нош мукет но кыӵе ке тодынлык лыдэ понэ. Тазьы сое валамтэысьтызы ӟудыны-абдраны но уг луы. Малы ке шуид, — палэз дышетӥськыса тодон уж, туж пӧртэм, пӧртэм бадӟым уж луэ. Со, асьмелы ма гинэ кулэ, ваньзэ котыртыса ас пушказ басьтэ. Озьы со трос наукаез но, школаез но, астэ ачид дышетонэз (самообразованиез) но, пӧртэм, пӧртэм общественной шуон ужъёсыз но ас син азяз, ас ки улаз кутыса возе. Собере палмес ӟеч тодон понна дышетӥськыны кутским ке, мукет котькыӵе могатӥсьёс но луозы. Кылсярысь: палмес ӟечгес тодон понна дышетӥськыны, гожтэм книгаосмы но али асьмелэн ӧвӧл, асьме областямы потӥсь газетъёсы но журналъёсы но уг гожъяло шуид ке но луоз. Соин тӥни палэз тодон шуон тодонлыкез (наукаез) гожтэт тодӥсь муртъёс но тодытэк-валатэк, мукет тодонлыкъёсын (наукаосын) сурамысьтызы пичи но паймоно но абдрано но уг луы.
Марлы нош асьмелы палмес туж тодыны кулэ шуса юад ке, — тани марлы:
Палмес туж сюлмысь тыршыса дышетӥськон уж — туж бадӟым, кулэ уж луэ. Со вамен асьмеос йырвизьмес тросгес, сэзьгес, памятьмес юнгес, золгес кариськомы. Собере палмес тодыны турттыса дышетӥськемен, сое пӧртэм амалъёсын эскеремен, палмы сярысь пӧртэм, пӧртэм трос тодонъёсмы но йылыса кошке. Со йылэм тодонъёс вамен нокытсы ветлымтэ, синмыныз адӟымтэ муртъёсмы но со улон палзэ синучконысь ассэ адӟемез кадь ик, ӟеч адӟыса тодэ. Со, асьме палэз тодонъёсыз вань, мукет палъёслэн тодонъёсынызы валче огинэ кушыса быдэсак вань СССР-мылэсь но вань ӟечсэ-уродзэ тодыны луэ. Озьы со мукет туж трос тодонлыкъёслы (наукаослы) юрттыса, быдэсак вань та югыт дуннелэсь кыӵезэ, ма кадьзэ, маиз вань, маиз ӧвӧлзэ возьматыса юрттэ.
Та сяна дышетӥськыса тодон уж асьмемыз котырамы мар ванез-ӧвӧлэз чакласа, эскерыса, кулэзэ кулэ карыса, тупатъяса, будэтъяса, утялтыса, кулэтэмзэ сӧрыса быдтыны валэктэ. Озьы валэктэменыз нош со, асьме палмы шоры ӟеч синмын, шуныт сюлмын, яратыса учкыны дышетэ; асьмемыз но, тужгес ик вашкала дырысь пересь айыосмес, мумыосмес сюдыса, утьыса вордыса быдэстэм понназ туж мусо карыны визьма. Тазьы ас улон-вылонмес ӟеч карон понна, котыръёсмы шоры туж визьмо, нодо, кулэезъя учкыны дышетэменыз, со асьмемыз туж ӟеч мурт, ӟуч шуэм сямен «настоящий гражданин» каре, вань тодон сэзьлыкез (культураез) визьмын азьпала ӵыжиськонлыкез (цивилизациез) вылэ ӝутэ. Озьы вылэ ӝутэменыз нош котьмар сярысь трос ӟеч ваньбуръёсын улон-вылонъёсыз азин карыса тупатэ.
Асьме палмес дышетӥськыса тодонлык (краеведени) асьме удмурт калыклы тани та сярысь но туж кулэ маке луэ:
Та вамен асьмелэн тужгес ик, тужгес ик вашкала дырысен кутскыса пересьёсмылэсь кыӵе, ма кадь улэмзэс-вылэмзэс (историязэс), визьбурзэс, кылбурзэс (поэзизэс) быдэсак вань тодон сэзьлыксэс (культуразэс) пулэн шуккыса (печатласа) тодымтэ вынъёсмылы, агайёсмылы (нюняйёсмылы) но, быдэсак вань дуннеысь калыкъёслы но возьматыны луэ. Со возьматэммы вамен соослы асьме визьмо удмурт калыклэн ӟеч визь нодъёсызлы дышетӥськон амал луэ.
Тани таӵе бадӟым луо асьме палмес дышетӥськыса тодыны тыршемлэн ӟечлыкъёсыз. Таӵе бадӟымесь ӟечлыкъёсызлы луыса ик та уж асьме СССР-ын туж кулэ уж лыдэ поныса пуктэмын.