Мæ фæндаг (Гæдиаты)

by Гæдиаты Секъа

Мæ фæндаг  (1906)  by Гæдиаты Секъа

Фыст датæ: 1906, Рауагъ аз: 1906. Равзæрæн: Гæдиаты Секъа. Уацмыстæ. Дзæуджыхъæу : Ир, 1991

МÆ ФÆНДАГ

Бафхæрдта мæ мæ амонды цалх,
Не скастæн иу хатт мæ цæстæй.
Радта мын уый масты нуазæн:
Баназ, дам, уый, — цу дæ бæстæй.

Удæгасæй фыдæбон кæн,
Уый дыл æвæрын дæ хæсæн.
Загътон: фæлидзон искуыдæм,
Кæд ыссарин æмбæхсæн.

Фæлæ уæддæр ме 'намонд
Уад алы хъæуы мæ цурмæ.
Лæвæрдта мын йæ нуазæн,
Мæ маст ыссыди мæ хъуырмæ.

Уыцы нуазæнæй мæ зæрдæ
Ыскодта сау цъар, сау агъуд.
Никуы фæцухи мæ сæрæй
Сидзæры дарæс — дзала худ.

---