Кык торйӧдчӧм
Вай висьтав меным, мича ныв,
Кыдз воштін тэ кык мусукӧс?
Кыдз воддзакӧд тэ торйӧдчин,
Кыдз туйӧ сійӧс мӧдӧдін?
«Ме тайӧ зонкӧд-мусуккӧд
Зэв лӧсьыдика торйӧдчи,
Эг шогсьы ме, эг жугыльтчы,
Кор туйӧ сійӧс мӧдӧді.
Мем шуис сійӧ мунігас,
Кыдз менӧ ёна радейтіс,
Кыдз метӧг сылы, коньӧрлы,
Оз петав югыд шондіыс.
Эз тшӧкты асьсӧ вунӧдны
Да унатор на висьтавліс,
Да бӧръя помас синваыс
Став морӧс менсьым кӧтӧдіс.
Ме кывзі сійӧс, сералі
Да сералігтыр прӧщайтчи.
Да ӧдйӧ сэсся сы дінысь
Войпуканінӧ котӧрті...»
Вай висьтав ӧні, мича ныв,
Кыдз мӧдыдкӧд тэ торйӧдчин?
Кыдз туйӧ сійӧс мӧдӧдін
Да кутшӧм ногӧн прӧщайтчин?
«Мӧд мусук абу воддзакодь:
Эз бӧрддзыв сійӧ мунігас,
Эз видзӧд шога-жугыля,
Эз окав менӧ унаысь.
Мем мунан кад пӧ воӧма.
Ог кольччы тані тэ вӧсна.
Код тӧдас, дыр-ӧ ветлӧдла.
Тэ виччысь менӧ, колӧкӧ!
Тадз шуис сійӧ, серӧктіс,
Да пуксис сэсся вӧв вылӧ.
Мем веськыд кинас шеныштіс,
Дай воши менам син вылысь.
Ме лун шӧрсянь да пемыдӧдз
Сэн бӧрдігтырйи сулалі,
Пыр видзӧді ме туй вылӧ,
Кӧн вӧвлӧн кок туй кольӧма...»
Но висьтав ӧні, мича ныв,
Тэ кодсӧ ёна жалитан?
Медводдзасӧ-ӧ, бӧръясӧ
Том сьӧлӧм тэнад радейтӧ?
«Мем жалькодь вӧлі воддзаыс,
Да сійӧ важӧн вунӧма.
Ме бӧръясӧ пыр радейта,
Ог вермы сійӧс вунӧдны!»
1928 во.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 95 years or less since publication (if applicable).
Public domainPublic domainfalsefalse