Колхозонь эряф/1940/04/Чапаевсь/3
| ←Чапаевсь (оглавлениясь) | Колхозонь эряф (1940), № 4 Апрель edited by Игнатьев Г. А., Чумаков И. Ф. Чапаевсь. III. Уральскяйсь by авторсь: Фурманов, Дмитрий Андреевич, мокшекс ётафтозе: Аф содаф (аноним) |
IV. Александров-Гайсь→ |
| Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 4 Апрель 1940. — с. 50—58 |
| ←II-це главась. Степсь («КЭ» 1940, № 1—2 Январь—Февраль) |
| Дм. Фурманов
|
| ЧАПАЕВСЬ[1] |
| III |
| Уральскяйсь |
Уральскяйса станцияста звонясть. Коменданть ширде кучсть кафонц нуртт, цёратне озсесть паршиснон мархта, тусть Центральнай гостиницав. Гостиницаса пяк якшама, номерхнень эса и летьке, и рдас, и аш мезевок: аш мезь лангс озамс, аш мезь лангс мадомс, аф содасак, коза мезе путомс. Кой-кода, сякокс жа, ладявсь вастсна, тусь мялезост, эсь мельгаст кемокстасть номерня, — станяк и ниленест фкя комнатас и лядсть: ялгатнень ашель мяльсна явондомс.
Сяда меле, кода кельмоть сюнеда подрят симсть кафта самовархт, якасть ошть эзга, ашезь сода, ков тиендемс свободнай пингснон. Нинге станцияса куляксазь синь, што Фрунзесь шобдава тусь сяда малав позициять тейс — вятемс руководства ушетф наступлениять лангса. Ся пингста маладонь позициятне Уральскяйть эзда ульсть сембоц аньцек комсь вайгяльбень вастса, и эрявсь эряскодомс панемс неприятельть кода можна сяда ичкозине. Сияк азсаськ, што ня васенце бойхне тейнек ульсть аф пяк удачнайхть, и панемс казакнень удалась аф тяни, а аньцек сяда меле, мзярда тифоль сяда кели и сяда осторожнай план общай наступлениять колга сразу лама ширде: аф аньцек Уральскяйть эзда, но и нинге Александров—Гайть ширде Сломихинскяй станицать лангс и сонь пачканза Уральск — Лбищенск — Гурьев оцю кить туркс, — кить туркс, конанц эзга должеттольхть панемс казакнень якстерь частьтне, конат наступандасть север ширде.
Но тянь колга сяда меле, сяда меле; семботи сай эсь пингоц — Уральскяйста Гурьев шири стака кити сави мрдамс аф весть.
Минь ялганьконь ульсть особай привычкасна, нльне кода-бта специальностьсна. Кепотьксонди сявомс, Бочкин Терентийсь пяк кельгондезе сёрмань сёрмадоманц, и ся сёрматнень эса пцтай фалу сембода пяк ульсть сведеният хозяйственнай тефнень колга: куляксасы непременна — коса, мезе и мзяра питнец, сембонь тянь мяляфтсы, сёрмадсы, сравниндасы...
[ 51 ]Клычковсь — тонац фалу сёрмадсь дневник. Любой обстановкаса и любой условиятнень эса лофкайготкшнесь и сёрматкшнезе сембода важнайть. Аф книжканяс, то листкас, лияста сёрматкшнесь молемста, заборти нежедезь, — но сёрмадсы непременна семботь. Приятеленза сонь лангсонза тянкса пеетькшнесть, тянь эзда ашесть няенде аф толк, аф эрявиксши.
— И месть тон, Федька, каготть гаснесак? — мярьгондель эста Андреевсь. — Охота жа тейть кажнай ересть сёрматкшнемс? Да кржа ли мезе кие тись, кие азсь — дряй семботь фатясак? А кли сёрмадомс, эряви семботь, шарьхкодеть? Пялькскять сёрматкшнеманц эса аш смысла, нльне лиси аньцек вред, сяс мес ломаттнень васькафтсайть.
— Аф, Андреич, эльбятькшнят, — азондозе тейнза Федорсь. — Пялькскять мон ванца, да омбоцеть, колмоцеть, кемонцеть... пуроптсайть синь — и тев лиси, история тиеви...
— Да вдь тоса тон, шяйтан, думандакшнят, содаф, разнай мезе аф эряви... кодама история? — изь веронда Андреевсь.
— Мон жа содаса, мезсь коза, — каршезонза корхтась Федорсь, конац марясь аф ловкость тя апак лотксек и аф виздезь пристандакшнемать эзда.
— Мезе тон содат? Мезевок аф содат, — мольсь каршезонза Андреевсь, — мезе аф эряви, сянь тиендьсак.
Клычковсь тянь колга корхтаманц ашезе кельге и, сяс мес содазе андреевскяй аф корхтафкшу шить, лотксесь, кой-кона кизефксненди изь отвечакшне ёфси и тянь мархта лоткафнезе корхтамать.
Эсь дневникозонза фалу сон сёрматкшнезе сянь, мезсь коданянга изь повонда газетатнень столбецс или тоса эздонза лисендсь пяк кржа. Мезенди сёрмадсь, ашезе сода и сонцьке: тяфтак, кодама бди естественнай, органическяй потребностть коряс, сонць тянь ашезе шарьхкотькшне лацкас.
Андреевонь специальностец ульсь лия — куляксакшнемс сембе тефнень рабочай фронтть колга; сей сонь ускозе станя жа, кода Терентиень сёрмань сёрмадомати или Клычков Федоронь эсь дневникозонза. Андреевсь, можи нльне аф эсь воля, инстинктонц коряс, сембонди, кинь мархта одукс и од вастса корхтась, ушеткшнесь макссемс ёфси особай кизефкст: улихть ли фабрикат, кунара ли строяфт, цебярьста ли работайхть, мес и кунара ли лоткасть, мзяра рабочайда, кодапт качествасна, сознательнайхть ли, мезьса, мзярда и кода няфтезь эсь пряснон и стак тов и стак тов. Тяфтак и няевсь эздонза рабочайсь, конанц усксы родной средас, родной кизефксненди, нуждатненди и заботатненди. Сон станяжа интересовандакшнесь общай положениять мархта, сембода пяк, тястонь вастть козя шинц мархта, населениять, сонь составонц и сонь надежнайшинц степененц мархта; сияк азсаськ, ня кизефкснень мархта интересовандакшнесть цють ли аф фкя лаца сембе нилицьке.
[ 52 ]Лопарсь ульсь спец военнай тефнень колга, — моментальна куляксакшнезе, кодама воинскяй частьть ащихть маласа, кодама полкне сяда цебярьхть, конат — сяда кальдяфт, мезе тиендеви политическяй работать ширде якстерь-армеецнень мархта, лама ли коммунистта, кода синь вятьсазь эсь пряснон, кодама вообще положениясь фронтса и ст. тов и ст. тов.
Ня специальносттне няфтсть пря нинге ки лангса, но сембода пяк сяда меле, мзярда сембе нилицьке кундасть настоящай работати. Финцнень наблюдениянь вастсна кирсть, кода, кепотьксонди сявомс Андреевонь (рабочай центрат повондсть аф сидеста), омбонцнень, кода Лопарень, кассь: но ня васенце жа шитнень эзда сембонди няйфоль фкя: военнай тефне и интересне фатнезь сяда и сяда пяк, решительнайста фталдонь вастс сяряфнезь всякай лия эряфть и лия интереснень, мзярс синь ашезь ниль марнек.
Ошть ётнезь туркс и квалмос. Обстановкась од, удивительнай, ёфси особеннай. Аньцек и няевихть солдатскяй серай шинельхне, винтовкатне, штыкне, пушкатне, военнай повозкатне — настоящай вооруженнай лагерь. Ульцятнень эзга колоннаса ётнихть якстерьармеецне, ётнихть, капошсихть тифтень, ардыхть кавалеристтне, валомне молихть орудиятне, позициятнень малас величественнайста уихть верблюдонь пяшксе караваттне. Перьфпяле моли апак лотксек, аф эряви, разгульнай, вети цють-цють сетьмоси ляцендема: финцне „чистендасазь дулать“, омбонцне ляцендихть „дичь“, колмонцнень „мянць апак карькстт“. Фкя военнай специалистсь, секундатнень и минутатнень пингста ня шальной ляцендематнень средняй количестваснон лувондозь, няфтезе, што фкя шиня тя глупай ляцендемать мархта тевфтома карьхцьсевихть патронда кафта миллиоттнень эзда и колмотненди молемс. Вернай ли лувфоц, азомс трудна, но ляцендемась афкукс ульсь бессовестнай. Эста нинге сят степной войскатнень эса, конатнень колга моли корхтамась, ашель кшнинь сознательнай дисциплина, ашелхть сознательнай большевиконь кадрат полкнень эзга, конат ба улельхть способнайхть сразу ня полкнень тиемс лиякс, максомс тейст од облик, од форма, од тон. Тя сатовсь сяда меле, а 1919 це кизоть ушетксстонза Уральскяйть ала тюрсть — и эрекста тюрсть, отлична, геройски тюрсть — пцтай эхярь крестьянскяй полкне, коса коммунистт ашельхть ёфси, или ульсть пяк кржа, да сятненьге пялесна ульсть „пяшень“.
Ня полкнень эса сатфкст сатнесь агитациясь, бта коммунисттне — жандармат и насильникт, бта ошста синь састь насильна тиендемс эсь „коммунияснон“.
Афшуроста полкнень эса стане и корхтасть, што большевикне кля — сят ялгат и братьят, а вов коммунисттне — кяжи „вракт“. Кафта шида самда меле Клычковонди савсь нльне публичнайста азондомс доклад тя нелепайдонга нелепай темать колга:
[ 53 ]„Кодама разницась большевикнень и коммунисттнень ёткса“.
Сияк азсаськ, пяк ни дивандакшнемс аф сави, сяс мес большевикнень и коммунисттнень колга темась ётазе цють ли аф сембе республикать, сембода пяк оржаста сон „путневсь“ окраинатнень эзга: Кавказса, Украинаса, Уралса, Туркестанца и повсь нльне Грузияв.
Конашкава эста ульсь сложнай положениясь полкнень эса, можна няемс аньцек сянь эзда, што фкя инь благороднейшай революционерсь, ёну и тактическяй Линдовсь, а сонь мархтонза и большевиконь целай артельсь юмасть синцень жа „якстерьармеецснон“ кядьснон эзда.
Мзярда несколька шида меле Уральскяи сась Иваново-Вознесенскяй отрядсь эсь типичнай „варяжскяй“ шлемсост конясост огромнай якстерь тяште мархта, мзярда сон сявозе ошть ваноманц, ужетнень эзда ткачнень ланга кепсевсь вию ляцендема: ляцендсть „вольнай“ крястьянскяй полкнень якстерьармеецсна, конатнень кядьста саф ткачне сявондезь и кирьфнезь синь бесшабашнай „воляснон“.
Тяконь пингста, пяк ни курок, кодак аньцек ня полкне няезь, кодама тевс способнайхть ткачне бойса, кодане синь кемоста и мужественнайста тюрихть, — каршезост молемась сразу маштсь, кассть лия, ялгань отношеният.
Сонцень Уральскяйть эса коммунистта аф ламоль: финцне юмасть бойхнень эса, омбонцнень фатязь казакне, кой-кона пялькссна ульсь нинге сяда инголе срафтф и эйфтьф, пялькссь лядсь стройса. Работать сембода пяк вятезь саф большевикне. Центральнай фигуракс ульсь горняксь — рабочайсь „фугас“[2] кличкас коря — благороднайдонга благороднай ломань, кельгома ялга, испытаннай боец. Тейнза противоположностенди и фалу сонь мархтонза марса ащесь и лятфневсь кодама-бди Пулеметкинць, паршивай интеллигенткясь, политическяй франтсь и позерсь, станяжа коммунистсь, но сятнень эзда, конат личнай линиява заслуживандакшнихть искренняй, оржа неприязнь. Пулеметкинць эсь прянц няфнекшнезе кода эсь прянь-кельги кялень шовай, тевфтома корхтай и шава валонь кельги, конац сембе вастова комотни эсь прянь няфтема и старандай сембонь инголе сатомс популярность. Саф нилетне эстакиге кучсть „группировкат“ Пулеметкинонь и Фугасонь перьф, пуромсть Фугасонь перьф и несколька шида меле мархтонза кармасть кемоста дружбань кирдема.
Мзярда, якамать эзда сиземда меле, тяни мрдасть апак уштт каморказост и Терентийсь пяле видева аделазе традиционнай сёрманц, пачфтсь куля, што „кши мархта солянкась тии 5 цалковайхть... фунт равжа икрась 23“... — штабста кучсть вестовой, азозь, што Фрунзесь мрдась. Цёратне эстакиге [ 54 ]срхкасть и тусть. Састь, но и тясонга сембось ащи страннайста, сембось лиякс, необычайна: синь нльне сразу ашезь нолда, а тусть азомонза. Кинди? Михаил Васильевиченди, конанц мархта синь тяфтане цебярьста знакомайхть, конанц мархта работасть пяк теснаста, пяк проста ялгакс тонадсть фкя фкянди. Да аф он ли тя? Кодама чорт он? Инголест часовойсь ащи штык мархта! Сон ваны ёфси аф ялгакс саф молодецнень лангс, конат ёрасть ётамс командующайть шири апак лотксек и эсь прянь верондазь. Мзярс ащесть коридорса, марязь эсь пряснон аф лац, старандасть фкя фкянди аф ванондомс сельмос.
— Йотада, — кие-бди тердезень синь.
Сувасть. Васедемась ульсь седиваксстонь простецкяй, седивакска — ялгань. Синь марязь, што синь инголест сяка жа простой, доступнай, фалу тяфтама кельгома ялгасна. Валомне юкстазь васенце аф пара мяльснон, а тяса тага — од кулят. Фрунзень ваксса ащихть военспецт — аф кодамовок тяфтамка „окуннят“, а настоящай „лещат“: ингольдень полковникт, генералхт... И сембе синь арьсихть азомс тейнза „так точно“ да „никак нет“, сембе арьсихть аф азомс тянь, эстакиге шарьхкотькшнесазь валхнень. Цёратне шарьхкодьсазь, што тя „дисциплина“, што, синь койсост, может, и нельзя, но синць тонц повомс аф повихть: командующайти цють аф „Миша“ мярьгихть, аф стане синь мархтост корхтайхть, бта косовок эсь ширесост партийнай комитетса... Полковникне кулхцондыхть афшарьхкодезь, ваныхть растеряннайста, аф лофкайста мзелдыхть и кулхцондыхть нинге сяда пяк, кода бта марса сафнень мархта эстейст аф пупордамс, аф коламс субординациять. Тяфтане тяса мянь беседать аделавомозонза и лядсть кафта лагерьхть: фкять эса саф цёратне, омбоцеса — военнай спецне. Фрунзесь азозе, кодама обстановка тиевсь фронтса, мезе можна учемс, мезе тяни сяда пара тиемс маладонь пингть. Цёратне мяль вельде кулхцондсть, стакаста старандасть лятфтамс сембонь, шарьхкодемс и няемс лацкас: мезевок изь лисенде. Васенцесь, ашезь сода картать, и сяс станицатне и кемокстаф пункттне тейст ульсть шава звукокс; омбоце ширде, понятиятне, кода „стратегия“, „тактика“, „маневренность“ и лиятне шарьхкотькшневсть аньцек вообщем, а прязост шарьхкодевиста ашесть лядонда.
Курок спецне тусть, лядсь синцень компаниясна. Тяса музыкась кармась морама аф стане: платтне азонкшневсть подробна и откровенна. Федорсь бокста ванондсь Фрунзень лангс и ашезе шарьхкотькшне, коста сон пяк лац шарьхкоди военнай тевса, мес сон пяк верна фатнесы семботь и кодамовок кизефкснень инголи аф лоткси тупикс. Тейнза сембось шарьхкотьф, сон тяса ёфси тёждяста шарьхкотькшни, семботь лувондсы, няйсы инголявак, — мезень чорт! А вдь кунара ли ульсь гражданскяй шляпакс? Нинге ся шитнень, Фрунзень командовандаманц васенце шинзон эзда сявомок сонь эсонза [ 55 ]цебярьста няевсть ня особенносттне, сонь характернай чертанза: тёждяшись, вишкешись, шарьхкодемать пяшксешиц и яснайшиц, способностец эсь пингстонза и тщательнай анализти и сембеширдень лувомати, задачать тиеманцты верондазь кундамац и верондамась, сатфксонь сатомати оцюдонга-оцю верондамась, аф шава верондамась — обоснованнай верондамась.
Ащесть озада — корхнесть. Лятфтазь родной Иваново-Вознесенскяйть, марстонь ялгаснон, аф кунартонь работать. Тусть аньцек пялеведа меле, а шобдава лангс Фрунзесь срочна тусь Самарав, сонць азозе, што назначеният кучи тоста, а получамаснон самс, кля, сави учемс тяса, Уральскяйса, работамс партийнай комитетса. Тя случайнай партийнай работась занясь целай кафкса шит, мзярс сембе нилицьконь ашезь явше армиява.
Эсь ётковаст корхтасть:
— Полафтовсь... Михайла Васильевичсь...
— Полафтоват... Работада вдь пефтома...
— И тюжялгодсь, осалгодсь, сердешнайсь...
— Сянгярьгодат, тя вдь... Вов синь, тяса частьтне — буйнай орава, кржа ли синь мархтост кармай улема возьсемада? Лифтсть, корхтайхть, аф васенцеда ни приказ лоткафтомс ляцендемать, а мезе лиссь, эрька кулхцонтт!
И пилеснон токафтозь вальмятненди: вальмятнень фтала ухиясь и гайнясь бесшабашнай ляцендемась.
— Анархия, шяйтатне ба сонь машфтолезь! — кяжияфста азозе Андреевсь, — тоса мзярс изь кашторда и верондазь, споконайста мярьгсь эчкста: — Аф тяфтама тефт сяськондеме — семботь сяськсаськ...
Маладсь февральть 23-це шинц праздновамац — Якстерь армиять годовщинац. Таромась ушедсь, кода тя эрси, кунаркиге, а работась, праздникть афкуксонь организовандамац ульсь ётафтф и тиф мекольдень колма-ниле шитнень. Тевонь кельги Лопарсь самдост меле омбоце шиня ни содазе, што партийнай организациясь ульсь пяк лафча, што праздникть мархта возьсемс, кда ваномс лацкас, аш кинди и сон, пожалуй, аф ётафтови, кда аф ушедомс киндиге активнай работа, аф сявомс тевть фкя, вернай кядьс. Ревкомсь азозе Лопаренди, што тя тевть вятьсы партийнай комитетсь, а мольсь тоза — кучсесазь меки ревкому, корхтайхть кодама-бди комиссиянь колга, конац ёфси ашель. Лопарень вешксонц коряс, вишкста назначендасть пуромкс, тердсть рабочай представительхть, но ревкомть эзда тага изь эвонда кивок. Лопарсь арьсесь действондамс кода машты и мезе ули, пуромксть азозе действительнайкс, и правомочнайкс, нюрьхкяняста корхтась малаткшни празникть колга и сянь колга, што сайпингоня аш кода тарксемс тевть организовандаманц, мярьгсь кочкамс деловой исполнительнай орган. Ся органти сонь кочказь [ 56 ]председателькс, Андреевонь секретарькс. Тевсь токась фкя вастста. Ошть явозь раойнга, путсть вастт, коса кармайхть улема пуромкст, открытай массовай митинкт, лекцият праздникть колга, кие и коса кармай выступандама, кода использовандамс театрать, кинематографть, оркестратнень. Ладясть соткс профессиональнай союснень мархта, серьгядсть тоста рабочайхть, работницат, — финцненди мярьгсть возьсемс трибунатнень тиемаснон мархта, омбонцнень пуроптозь работама листовкатнень, плакататнень колга, „Яицкяй правдать“ очередной номеронц нолдаманц колга; аватненди—работницатненди максозь иттнень, конатненди ся шиня арьсесть максомс цебярьгофтф ярхцамбяль, сявомс театратненди, кинематографненди. Колма шитнень пингста сембось ульсь анок, 23-це шиня рана шобдава главнай площадти сембе ширде пуромкшнесть рабочайнь колоннатне — синь пуромкшнесть профсоюснень коряс. Синь стройсевсть рядга трибунатнень тейс, кучкав нолдазь воинскяй частьтнень, конат ся шиня цютькя чистендафт и щафт сяда цебярьста. Площадсь пяшксе наротта. Речт... эхярь речт и речт. Сембода цебярьста, малав и сяда седи вакска примсесазь рабочайхне и боецне Фугасонь простой, ёну и нюрьхкяня реченц. А Фугасонь мельге, кодане эрси, комотсь Пулеметкинць и кармась бестолковайста и мядондамост и кавалямост сембонди мялень мольфти и сембонди содаф истинатнень „контрреволюциянь гидрать“ колга... Сон корхталь мзярс мяльце, кда аф лоткафтомс, аф торхцадемс. Йотнихть кемонь... комсь... колмоньгемонь минутат, — Пулеметкинць нинге тяляй. Сонь кафксть ни усксезь полада — аф лезни. Мольфтсь мяль куломшка. А шись якшама, якстерьармеецне кунара ни комотнихть фкя пильгснон лангста омбоцеть лангс. Эендасть. Сяда ламос аш кирдемшка. Лопарсь Пулеметкинонди фталда внушительнайста и кемоста азозе:
— Кда аф лоткат вов тяникиге — мон ивадян „ура“. Шарьхкодеть?
Пулеметкинць вишкста варжакстсь, вандолгофтозень вецана кяжи сельмонзон и, мзярда няезе решительнай варжафксть Лопарень шамаста, шарьхкодезе, што тонац аф шутендай, — аделазе эряскодозь, валгсь трибунать лангста, юмась толпать ёткс. Речне — кода речт... Ся шиня тяфтама речт корхневсть сембе Советскяй Россиять эзга... Вечерсь — кода вечер... И вечерхневок ульсть, наверна, фкя лацот: лекция, спектакль, сеанс мархта...
Площадть эзда — ошть эзга якстерь знамятнень мархта, революционнай моротнень мархта. Мольсть кулоф воиттнень калмоснон лангс, — и тясонга ульсь — трибуна. Трибунать лангста корхтасть Фугассь и Лопарсь. Пулеметкинонь, конац шавсь пря выступандама, эсь пингстонза кирдезь и выступандама ашезь нолда. Мзярда Лопарсь лятфтазень ялгатнень, конат калмафтольхть братскяй калмоти, азондозе, кодама тевонкса [ 57 ]синь кулость и кода тейнек эряви лятфтамс синь священнай памятьснон, сонь палозь-палы, свежестьта и вийда пяшксе валонзонды ответонди — седивакскань, думандазь, кувать афкаштордома. И вдрук — ляцема. Тя ськамонза и, может, ёфси случайнай ляцемась, — кода сигнал: мзяра тяса ульсь частьта, кеняндезь сембе кармасть „ляцендема шкайть лангс“. Ляцендемась кеподсь пилень панды, беспорядочнай, — тя ёфси аф торжественнай салютоль. Кда кинь ульсь мялец, тяфтама сумятицаса тёждяль „валхтомс“ кодамовок белогвардеецти трибунать лангса ащи большевикнень: горячкать пингста тянь кивок афольхце няй ба и афольхце шарьхкоде. А алу валгомс — визькс: станяк и ащесть вышкать лангса, мзярс якстерьармеецне ашезь ляценде эсь патронцнон. Лопарсь стяда ащесь лофтанаста, кода ковнянь цильф, — ня афлама минутатнень ётамс сон марясь оцюдонга оцю ужас. Вестевок, сяда меле вестевок, нльне сембода страшнай боевой кутерьмаса сон ашезе марьсе тя афшарьхкодеви, мялень колси, эйфни трнатомать, конанц эса беспомощнайста вачкатсь телац. Аш сяда кальдяв состояния, мзярда эсь пряцень марясак лезксфтома, сокор случайносттнень властьснон кядьса!
Уральскяйть эса Якстерь армиянь шись ётась, пожалуй што, и цебярьста, а кода сон ётась областть эзга — кие сонь содасы: тоза максомс директиват кода эряви ашесть кенерь, аньцек вообщем азозь, мезе эряви тиемс. Фронту нинге тяда инголе тусть Бочкинць Клычков Федорть мархта, синь фатясть мезе можна ульсь литературать эзда: „Яицкяй правдать“ юбилейнай номеронц, воззваниянц, разнай листовканят. Мрдасть аньцек позна веть, стяфтозь уды ялгаснон и кенярдезь азондозь афшарьхкоди пялес уды Андреевти и Лопарти, кодане цебярьста синь васьфтезь „инголе ащи позициятнень“ эса (тя азондовсь оцю гордость мархта!), кода боецне ульсть благодарнайхть казнетнень инкса, синь эсь колгаст лятфнемать инкса, кода кулхцондозь речть, эняльдсть сашендомс тага! Удозь ащи ялгатне тупойста кулхцондозь тя кепотьф мяль вельде азондови речть. Андреевсь удомбачк кармась сюцема и азозе, што тейнза куломшка мяль мольфтсть ня „охотниконь баснятне“. Корхтамасна изь моль и курок, сяс мес ашельхть кулхцондыхть, азондыхненди савсь лоткамс, хоть пяк оцюволь охотасна азондомс „педа пес“ мянь „инголе ащи позициятненди“ эсь цебярьста якамаснон колга. Тянь мархта аделавсь минь ялганьконди Якстерь армиянь шись.
Фкя маладонь илядня, обедта меле, мзярда сембе нилицьке ульсть марса, кандсть телеграмма:
Лопаренди и Бочкинонди шобдава лангс тумс бригадав!
Конешна! Сась пинге явомс!
Сембонь состояниясна ульсь особеннай, прощальнай, пяшксе апак учсек мысляда и чувствада. И мезевок [ 58 ]удивительнай ашель сянь эса, што тумс шобдава лангс, а кафттненди, может, синь мельгаст. Синь жа аньцек тянь и учсесть! И сякокс жа сембе нилицьке настроеннайхтельхть кода-бди лиякс. Лопарень и Терентийть вдрук эвондась тнярс аф няендеви воинственностьсна, кода бта синь тя пингс аньцек сянь и содасть, што воявасть. Андреевть мялец колафоль обыкновеннайть коряс, Федорсь думандась и изь кашторда и мзелдозь кулхцондсь тушенды ялгаснон нерзно-восторженнай азондомаснон.
Шобдава нурдонятненди озафтозь Лопарень мархта Терентийнь, простиндасть, паласть, — ялгасна тусть. А тоса сась и омбоце телеграммась: Андреевти лядомс тязк, работамс комиссаркс тяса жа, дивизияса. Клычков Федоронди тумс Александров-Гаи, ладямс тоса политическяй работать организовандакшневи группать эса, конанц лангс начальникокс путневи Чапаевсь. Кодак лувозе, то шуфтомфокс арась Федорсь, эстакиге нльне ашезь веронда. Лувозе омбоцеда и колмоцеда, — аш кодамовок сомненият — Чапаевсь...
Вдрук эрьхтсь усмонзонды, вачкиезь трнатозевсь вероц, волнениять эзда сонь сразу нльне валоцка изь азов.
„Тяфтама геройть мархта... Чапаевть мархта карматама улема ряцок... кода тя удивительнайста лиссь... Мезе-бди лисенди диковиннай: то мон арьсень Чапаевть колга, кода легендарнай ломанень колга, то вдрук сонь мархтонза марса, ёфси ряцок, проста, кода тяни вов, Андреевонь мархта... Может, нльне и пяк малаттама фкя фкянди, ялгакс аратама? Ух, интересна, шайтанць сявольхце, — вов кода тевсь арась!“
Сяда меле Федорсь пяшксе ульсь аньцек фкя мысляса, аньцек фкя пяк оцю желанияса — куроконе няемс Чапаевть. И мезень колга ба афоль ушеткшне корхтама — Чапаевонь колга шарфнезень сембе корхтаматнень. Телеграммать коряс можналь шарьхкодемс, што тяни Александров-Гайса Чапаевсь аш, сон тоза аньцек срхкси молемс, но сембесяка, сембесяка... Александров-Гаи эряви эряскодомс тяникиге! И Федорсь ашезь карма омбоце шить учсема, срхкась колмошка частта меле. Андреевонь мархта простиндасть ялгакс, седивакска и проста. Федорсь тусь, Андреевсь Уральскяи лядсь ськамонза.
| IV-це главась. Александров-Гайсь→ |