Колхозонь эряф/1938/01-2/Колма пингт, или колма морхт/Васеньце валть эземс

←Колма пингт, или колма морхт (оглавлениясь)

Колхозонь эряф (1938), № 1—2 Январь-Февраль ков edited by Ежов П. И., Алемаев Н. Колма пингт, или колма морхт. Васеньце валть эземс by Безбородов, Михаил Ильич

I пялькссь. Моданкса→

Колхозонь эряф (Колхозная жизнь). Общественно-политическяй и литературно-художественнай журнал. Мордовскяй АССР-нь советскяй писателень союзонь оргкомитетть органоц. Лисенди кефкиице кизось, ковти весть. — № 1—2 Январь-Февраль ков 1938 киза. — с. 41—42

 

МИХАИЛ  БЕЗБОРОДОВ.

---

 

Колма  пингт,  или  колма  морхт

Стихса повесть*)^[1]

Васеньце валть эземс

 

Ляй велесь оцю,
Ульцянза келихть,
Кафта церькунза
Оцюфт и серихть.
Колма сядот куд,
Велеть эсонза,
Шуфтонь школаня
Ащи песонза.
Тёжяньда лама
Ломань ваймонза;

 

Келихть паксянза,
Келихть лаймонза.
Аньцек паксятне
Салаюф баярть —
Сокайхнень кядьста
Эряфонь салайть.
Ляй вельэряйхнень

 

Шуфтонь куднясна,
Лоскодса паннефт
Колсеф вальмасна.
Тунда аф эряй
Ярхцамс кшинясна
Якамс аф сатни
Пильге вийнясна.
Вай, лиякс эряй
Салаюф баярсь —
Ашуфнень ланга
Стака шинь марайсь.
Картада ровнат
Баярть паксянза,
Пефтемот сире,
Сери виренза.
Кели лаймова
Шуди оцю ляй,
Тя ляйть ширеса
Салаюф эряй.
Баяронь пизось
Кяжи слава кандсь;
Аф стак Ляй велесь
Авардьсь—урокодсь.
Сембе велетне
Поксесть пялонза, —
Вай, лама эряй
Баярть тевонза:
Сокама, нума,
Тише лядема,
Вирьса сёксенда
Пенгянь кярома.
Пяле питнеда
Поксесть пинети,
Вай, апак покодть
Сими-ярхцайти.
Мзярда питненкса
Молихть пялонза,
Тяфта корхтама
Маряйхть ширденза:
„Тонь, цёра, тракссце
Кафта шит якась
Паксянень ланга —
Сёрозень тапась.
Тага аваце
Вирезон якась,
Кафта кептернят
Апьенка кочкась.

А тонь аляце,
Цёра, токама:
Якась паксязон
Пулфонь, салама.
Эй, Михей Ситич!
Штрафонь книгатнень...
Нолдамс эрявихть
Веши ломаттнень.
Ашусь нолдцы прянц,
Лажназь куду туй,
Эх! коста тяни
Ярмак кшинди муй?

 

---

1. *) М. Безбородов мокшень талантливай поэтсь, кярьмочнесь оцю тевс: сон ёрась тяштемс повесть трудяй мокшетнень Октябрьскяй революцияда ингольдень эряфснон колга. Но тя работать сон ашезе пачфте кеменьцекс пяльксонцтыгя — поэтсь рана кулось. Печатлавихть отрывкатне, конатнень М. Безбородов кенерьсь сёрмадомост и конат пакшень-пакш лисендьсть газетава и журналса 1931 кизоста сявомок.