Житїѧ̑ ст҃ы́хъ ѿ ст҃а́гѡ дими́трїа росто́вскагѡ/Септе́мврїй/к҃г

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Септе́мврїа к҃в

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а септе́мврїа въ к҃г де́нь

Септе́мврїа к҃д→

Мцⷭ҇а септе́мврїа въ к҃г де́нь,
Сло́во на зача́тїе чⷭ҇тна́гѡ и҆ сла́внагѡ
прⷪ҇ро́ка, прⷣте́чи, и҆ крⷭ҇ти́телѧ гдⷭ҇нѧ і҆ѡа́нна.

Зача́тїю сп҃се́нїѧ на́шегѡ прибли́жившꙋсѧ, зача́сѧ ст҃ы́й і҆ѡа́ннъ прⷣте́ча сла́внѡ и҆ чꙋде́снѣ. Мнѡ́гїѧ ма́тєри зачина́ютъ ча̑да, но ма́лѡ тѣ́хъ, и҆́хже бы зача́тїе сла́вила и҆ пра́здновала бж҃їѧ цр҃ковь. Трѝ ѹ҆́бѡ то́чїю таковы́ѧ ма́тери ѡ҆брѣто́шасѧ, въ и҆́хже ѹ҆тро́бахъ сотво́ршаѧсѧ зача̑тїѧ, мі́ръ ѹ҆диви́ша: ст҃а́ѧ првⷣнаѧ а҆́нна, ст҃а́ѧ є҆лїсаве́тъ, и҆ прⷭ҇та́ѧ прчⷭ҇таѧ дв҃а мр҃і́а. А҆́нна првⷣнаѧ бцⷣꙋ, є҆лїсаве́тъ прⷣте́чꙋ, дв҃а мр҃і́а зача̀ хрⷭ҇та̀ сп҃са на́шего. Всѧ́ же та̀ зача̑тїѧ вѣ́стникомъ нбⷭ҇нымъ бл҃говѣсти́шасѧ, блгⷣтїю бж҃їею соверши́шасѧ, но не кромѣ̀ бесѣ́ды междꙋ̀ бл҃говѣ́стникомъ и҆ зачина́ющими, поне́же са́мъ бг҃ъ тре́боваше соизволе́нїѧ зачина́ющихъ. Бл҃говѣ́стникъ ѹ҆́бѡ ст҃ы́й а҆рха́гг҃лъ гаврїи́лъ, вше́дши во ѻ҆лта́рь къ сщ҃е́нникꙋ заха́рїи, слꙋжа́щемꙋ тогда̀ въ чинꙋ̀ чреды̀ своеѧ̀ пред̾ бг҃омъ, нача̀ бесѣ́дꙋ сицевꙋ́ю: не бо́йсѧ заха́рїе: занѐ ѹ҆слы́шана бы́сть мл҃тва твоѧ̀, и҆ жена̀ твоѧ̀ є҆лїсаве́тъ роди́тъ сы́на тебѣ̀, и҆ нарече́ши и҆́мѧ є҆мꙋ̀ і҆ѡа́ннъ. И҆ бꙋ́детъ тебѣ̀ ра́дость и҆ весе́лїе, и҆ мно́зи ѡ҆ рождествѣ̀ є҆гѡ̀ возра́дꙋютсѧ. Ѿвѣща̀ заха́рїа: стра̑ннаѧ и҆ неча́ємаѧ мнѣ̀ возвѣща́еши, ѽ вѣ́стниче ра́достный. и҆́бо роди́ти ча̑да въ ста́рости, є҆стествꙋ̀ ве́щь проти́вна: а҆́зъ же ста́ръ є҆́смъ, и҆ жена̀ моѧ̀ заматорѣ́вши во дне́хъ свои́хъ, ка́кѡ ѹ҆̀бо мо́жемъ зача́ти и҆ роди́ти сы́на; а҆́гг҃лъ речѐ: въ нача́лѣ слове́съ твои́хъ маловѣ́рна ѡ҆брѣта́ю тѧ̀ бы́ти заха́рїе, ꙗ҆́кѡ не ча́еши сбытїѧ̀ глаго́лѡмъ мои́мъ: а҆́ще бо и҆ проти́вна є҆стествꙋ̀ твоемꙋ̀ ве́щь возвѣща́етсѧ, но не проти́вна бж҃їей си́лѣ, є҆́йже не невозмо́жно ничто́же: ꙗ҆́кѡ мо́жетъ бг҃ъ ѿ ка́менїѧ воздви́гнꙋти ча̑да а҆враа́мꙋ. И҆лѝ не вѣ́си, ꙗ҆́кѡ возмо́жно бѣ̀ бг҃ꙋ а҆да́ма ѿ землѝ, є҆ѵꙋ же ѿ ко́сти а҆да́мовой созда́ти; и҆ престарѣ́вшейсѧ са́ррѣ пода́ти сы́на і҆саа́ка; ѹ҆̀бо и҆ твое́й женѣ̀ всемогі́й бг҃ъ подае́тъ роди́ти въ ста́рости сы́на, занѐ ѹ҆слы́шана мл҃тва твоѧ̀. Ѿвѣща̀ заха́рїа: а҆́зъ ны́нѣ приношꙋ̀ мл҃твы моѧ̀ къ бг҃ꙋ ѡ҆ прише́ствїи жела́емагѡ мессі́и, є҆го́же ѡ҆бѣща̀ ѹ҆сты̀ ст҃ы́хъ прⷪ҇ро́кѡвъ свои́хъ, дабы̀ посла́лъ є҆го̀ скорѣ́е на зе́млю, спастѝ сѣ́мѧ а҆враа́мле ѿ рабо́ты ꙗ҆зы́ческїѧ: є҆ще́ же молю́сѧ ѡ҆ мои́хъ согрѣше́нїихъ, и҆ ѡ҆ людски́хъ невѣ́жествїихъ. а҆ ѡ҆ се́мъ, дабы̀ и҆мѣ́лъ сы́на: ны́нѣ не молю́сѧ, ѹ҆же́ бо ѡ҆бетша́хъ лѣ́ты, и҆ жена̀ моѧ̀ состарѣ́сѧ. Гл҃а є҆мꙋ̀ а҆́гг҃лъ: а҆́зъ є҆́смь гаврїи́лъ предстоѧ́й пред̾ бг҃омъ, є҆гѡ́же ѿкрове́нїемъ вѣ́мъ, ꙗ҆́кѡ ны́нѣ не ѡ҆ прїѧ́тїи сы́на мо́лишисѧ, но ѡ҆ ни́хже глаго́леши: ѻ҆ба́че пре́жде ста́рости твоеѧ̀, и҆ пре́жде заматорѣ́нїѧ сꙋпрꙋ́ги твоеѧ̀ є҆лїсаве́ты, моли́лсѧ є҆сѝ ѹ҆се́рднѡ, да да́сть ва́мъ бг҃ъ сы́на и҆мѣ́ти. Всеми́лостивый же гдⷭ҇ь, є҆мꙋ́же ни ма́лое движе́нїе се́рдца человѣ́ческагѡ быва́етъ та́йно, слꙋ́шаѧй моли́твы молѧ́щихсѧ є҆мꙋ̀, и҆ во́лю боѧ́щихсѧ є҆гѡ̀ творѧ́й: то́й прє́жнїѧ твоѧ̀ мл҃твы ѹ҆слы́шавъ, да́рꙋетъ тебѣ̀, а҆́ще и҆ не ско́рѡ, ѻ҆ба́че до́брѣ, бл҃года́ти тезоимени́та сы́на: вѣ́сть бо когда̀ по своемꙋ̀ бл҃говоле́нїю и҆сполнѧ́ти прошє́нїѧ ст҃ы́хъ свои́хъ. бꙋ́детъ же и҆мѣ́ѧй роди́тисѧ тебѣ̀ сы́нъ, ве́лїй пред̾ гдⷭ҇емъ. Ѿвѣща̀ заха́рїа: ви́ждꙋ тѧ̀ бл҃говѣ́стниче, ꙗ҆́кѡ а҆́гг҃лъ є҆сѝ бж҃їй, и҆́бо и҆ бесѣ́да твоѧ̀ ꙗ҆́вѣ тѧ̀ твори́тъ, и҆ видѣ́нїе добро́ты твоеѧ̀ ꙗ҆влѧ́етъ, и҆ си́ла слове́съ твои́хъ свидѣ́телствꙋетъ: въ нача́лѣ ѹ҆́бѡ ꙗ҆вле́нїѧ и҆ вѣща́нїѧ твоегѡ̀ внеза́пꙋ ѹ҆жасо́хсѧ, ꙗ҆́коже и҆ногда̀ и҆ данїи́лъ прⷪ҇ро́къ ви́дѣвъ а҆́гг҃ла ѹ҆боѧ́сѧ: ви́дѣхъ, речѐ, ꙗ҆вле́нїе вели́ко, и҆ не ѡ҆ста̀ во мнѣ̀ крѣ́пость. Та́кожде и҆ ма́терь самѱѡ́нова речѐ: чл҃вѣ́къ бж҃їй прїи́де ко мнѣ̀, и҆ ѻ҆́бразъ є҆гѡ̀, ꙗ҆́кѡ ѻ҆́бразъ а҆́гг҃ла бж҃їѧ, стра́шенъ ѕѣлѡ̀. Тѣ́мже ѹ҆боѧ́хсѧ и҆ а҆́зъ, и҆ не дерза́ю а҆́гг҃лскимъ твои́мъ словесе́мъ проти̑внаѧ вѣща́ти. ѻ҆ба́че вопроша́ю: чесѡ̀ ра́ди сы́нъ и҆мꙋ́щїйсѧ роди́ти, бꙋ́детъ ве́лїй; є҆да́ ли бо́лїй и҆ честнѣ́йшїй бꙋ́детъ і҆еремі́и прⷪ҇ро́ка, къ немꙋ́же сло́во бѣ̀ гдⷭ҇не гл҃ющее: пре́жде не́же мнѣ̀ созда́ти тѧ̀ во чре́вѣ, позна́хъ тѧ̀, и҆ пре́жде не́же и҆зы́ти тебѣ̀ и҆з̾ ложе́снъ, ѡ҆ст҃и́хъ тѧ̀, прⷪ҇ро́ка во ꙗ҆зы́ки поста́вихъ тѧ̀. Ѿвѣща̀ а҆́гг҃лъ: бꙋ́детъ ве́лїй пред̾ гдⷭ҇емъ сы́нъ тво́й, не ра́внымъ дх҃о́внымъ вели́чествомъ, и҆́мже превзы́детъ і҆еремі́ю: а҆́ще бо то́й ѡ҆ст҃и́сѧ пре́жде ржⷭ҇тва̀ своегѡ̀, но се́й мно́жае па́че дх҃а ст҃а́гѡ и҆спо́лнитсѧ є҆щѐ и҆з̾ чре́ва мт҃ре своеѧ̀. І҆еремі́а то́чїю прⷭ҇ро́чествовати ѡ҆ мессі́и прознаменова́сѧ, се́й же и҆ рꙋ́кꙋ на него̀ возложи́ти и҆ крⷭ҇ти́ти, пред̾ꙋста́висѧ. Не то́чїю же і҆еремі́ю, но и҆ про́чїихъ вели́кихъ ст҃ы́хъ превзы́детъ вели́чествомъ блгⷣти бж҃їѧ, ꙗ҆́кѡ не воста́нетъ въ рожде́нныхъ жена́ми бо́лїй і҆ѡа́нна крⷭ҇ти́телѧ. Ꙗ҆́коже ѕвѣзда̀ ѿ ѕвѣзды̀ и҆з̾ѻби́лꙋетъ во сла́вѣ, та́кожде и҆ во ст҃ы́хъ бж҃їихъ є҆ди́нъ дрꙋга́го сла́вою и҆ че́стїю превосхо́дитъ: и҆́бо и҆ въ на́шихъ а҆́гг҃лскихъ і҆ера́рхїѧхъ лицѐ бж҃їе всегда̀ ви́дѧщихъ: не всѣ̑мъ ра́внѡ хотѣ́нїѧ своегѡ̀ бг҃ъ ѿкрыва́етъ та̑йны, но посре́дственнѣ чрез̾ вы́шшїѧ чи́ны нижа́йшымъ ꙗ҆влѧ́ѧ. Мнѡ́гїѧ ѕвѣ́зды прише́ствїе сл҃нечное предварѧ́ютъ, но є҆ди́на то́чїю денни́ца самомꙋ̀ предхо́дитъ сл҃нцꙋ: мно́зи прⷪ҇ро́цы прише́ствїе мессі́и проповѣ́даша, но ѻ҆троча̀ и҆мꙋ́щее ѿ тебѐ зача́тисѧ и҆ роди́тисѧ, не то́чїю сло́вомъ проповѣ́сть, но и҆ пе́рстомъ свои́мъ пока́жетъ лю́демъ бж҃їѧ а҆́гнца, взе́млющаго грѣхѝ мі́ра, и҆ тогѡ̀ ра́ди бꙋ́детъ ве́лїй, па́че всѣ́хъ родѧ́щихсѧ жена́ми бо́лїй. є҆ли́кѡ бо и҆сполне́нїе ра́достныѧ вѣ́сти прїѧ́тнѣйше є҆́сть, не́же сама̀ вѣ́сть: толи́кѡ честнѣ́йшїй и҆́мать бы́ти прⷪ҇ро́къ и҆мѣ́ѧй зача́тисѧ и҆ роди́тисѧ, па́че и҆ны́хъ прⷪ҇ро́кѡвъ. Всѝ прⷪ҇ро́цы и҆ зако́нъ до сегѡ̀ прⷪ҇ро́ка прореко́ша: се́й же бꙋ́детъ всѣ́мъ прⷪ҇ро́кѡмъ соверше́нїе, и҆ зако́на ве́тхагѡ коне́цъ, прⷣте́ча же но́выѧ блгⷣти. Глаго́ла заха́рїа: добра̀ и҆ ра́достна вѣ́сть твоѧ̀, ѽ а҆́гг҃ле: а҆́ще бо всѧ́кїй сы́нъ премꙋ́дрый весели́тъ ѻ҆ц҃а̀, колмѝ па́че премꙋ́дрѣйшїй па́че всѣ́хъ прⷪ҇ро́кѡвъ сы́нъ возвесели́лъ бы менѐ ста́рца; но ка́кѡ и҆́мамъ весели́тисѧ, поне́же сꙋмню́сѧ ѡ҆ словесѣ́хъ твои́хъ: ра́дость же и҆ весе́лїе въ ве́щехъ сꙋмни́телныхъ не быва́етъ, ра́звѣ въ достовѣ́рныхъ. Молю̀ ѹ҆̀бо тѧ̀ а҆́гг҃ле бж҃їй, скажи́ ми, по чесомꙋ̀ разꙋмѣ́ю бл҃говѣствꙋ́ємаѧ тобо́ю; ѿвѣща̀ а҆́гг҃лъ: є҆ще́ ли сꙋмни́шисѧ, и҆ не и҆́меши вѣ́ры гл҃ѡмъ мои́мъ, ѽ заха́рїе; є҆да́ ли лѡ́жнаѧ глаго́лю; по́сланъ сы́й ѿ гдⷭ҇а, и҆́же вѣ́ренъ є҆́сть во всѣ́хъ словесѣ́хъ свои́хъ, и҆ прпⷣбенъ во всѣ́хъ дѣ́лѣхъ свои́хъ. и҆ не и҆знемо́жетъ ѹ҆ бг҃а всѧ́къ глаго́лъ. І҆ере́й и҆ ѹ҆чи́тель є҆сѝ і҆и҃левъ, и҆ си́хъ ли не вѣ́си, ꙗ҆́кѡ прише́ствїѧ мессі́и приспѣ̀ вре́мѧ, є҆́же а҆́зъ седми́нами лѣ́тъ и҆зочто́хъ, по́сланъ бы́въ въ вавѷлѡ́нъ къ данїи́лꙋ прⷪ҇рокꙋ; нѣ́сте ли члѝ прⷪ҇ро́чествїѧ є҆гѡ̀; и҆спыта́й и҆ ви́ждь, ꙗ҆́кѡ ѹ҆жѐ прибли́жисѧ спаса́ѧй і҆и҃лѧ, и҆ предтече́тъ по́сланный пред̾ ли́це́мъ є҆гѡ̀ а҆́гг҃лъ во пло́ти, и҆мѣ́ѧй бы́ти сы́нъ тво́й, и҆́же ѹ҆гото́витъ пꙋ́ть мессі́и, пред̾идꙋ́щїй пред̾ ни́мъ дх҃омъ и҆ си́лою и҆лїино́ю. но поне́же не вѣ́ровалъ є҆сѝ словесе́мъ мои́мъ, ꙗ҆̀же сбꙋ́дꙋтсѧ во вре́мѧ своѐ: бꙋ́ди ѹ҆̀бо молча̀, и҆ не могі́й проглаго́лати, до негѡ́же днѐ бꙋ́дꙋтъ сїѧ̑. И҆ а҆́бїе заха́рїи ѧ҆зы́къ нѣмото́ю свѧза́сѧ, а҆ є҆лїсаве́тѣ непло́дїѧ ѹ҆́зы разрѣши́шасѧ, а҆́гг҃лъ же ѿ̾и́де предстоѧ́ти прⷭ҇то́лꙋ вседержи́телѧ бг҃а, є҆мꙋ́же сла́ва во вѣ́ки, а҆ми́нь.

І҆кѡ́на зача́тїѧ чⷭ҇тна́гѡ и҆ сла́внагѡ прⷪ҇ро́ка, прⷣте́чи, и҆ крⷭ҇ти́телѧ гдⷭ҇нѧ і҆ѡа́нна.

Тропа́рь, гла́съ д҃:

Пе́рвѣе неражда́ющаѧ непло́ды возвесели́сѧ, се́ бо зачала̀ є҆сѝ сл҃нца свѣти́лника ꙗ҆́вѣ, просвѣ́щати и҆мꙋ́ща всю̀ вселе́ннꙋю слѣпото́ю недꙋ́гꙋющꙋю. ликꙋ́й заха́рїе, вопїѧ̀ со дерзнове́нїемъ: прⷪ҇ро́къ вы́шнѧгѡ є҆́сть хотѧ́й роди́тисѧ.

Конда́къ, гла́съ а҃:

Весели́тсѧ свѣ́тлѡ заха́рїа вели́кїй, со всесла́вною є҆лїсаве́тою сопрꙋ́жницею, досто́йнѡ зачина́юще і҆ѡа́нна прⷣте́чꙋ: є҆го́же а҆рха́гг҃лъ бл҃говѣстѝ ра́дꙋѧсѧ, и҆ человѣ́цы достодо́лжнѡ почти́мъ, ꙗ҆́кѡ таи́нника бл҃года́ти.

---

Въ то́йже де́нь па́мѧтъ ст҃ы́хъ мч҃нкъ а҆ндре́а, и҆ і҆ѡа́нна, и҆ ча́дъ і҆ѡа́нновыхъ, петра̀, и҆ а҆нтѡні́на, во а҆фрїкі́и ѿ кнѧ́зѧ а҆га́рѧнскагѡ а҆врахи́ма за хрⷭ҇та̀ страда́вшихъ. А҆ндре́й копїе́мъ пе́рвѣе въ пе́рси, та́же посредѣ̀ плещꙋ̀ ѹ҆да́ренъ и҆ пронзе́нъ бы́сть, по то́мъ главꙋ̀ є҆мꙋ̀ ноже́мъ ѿрѣ́заша. І҆ѡа́ннъ же надъ ча́дами свои́ми петро́мъ и҆ а҆нтоні́номъ лю́тѣ ѹ҆мꙋ́ченными, ноже́мъ в̾ горта́нь прободе́нъ сконча́сѧ.

И҆ сты́ѧ мч҃нцы і҆раі́ды дв҃цы а҆леѯандрі́йскїѧ, ꙗ҆́же и҆зше́дши ко и҆сто́чникꙋ почерпстѝ воды̀, ви́дѣ мно́жество дв҃и́цъ, и҆ мꙋже́й, и҆ і҆ере́ѡвъ, и҆ дїа́конѡвъ и҆ и҆́нокѡвъ въ кораблѝ пловꙋ́щихъ свѧ́заныхъ, и҆ на мꙋ́ки везо́мыхъ и҆сповѣ́данїѧ ра́ди и҆́мене і҆и҃съ хрⷭ҇то́ва, пове́ргши ѹ҆̀бо водоно́съ, приѡбщи́сѧ къ тѣ́мъ ѹ҆́зникѡмъ хрⷭ҇то́вымъ, и҆ свѧ́зана бы́сть съ ни́ми. доплы́вшымъ же и҆̀мъ во а҆нтїно́поль гра́дъ є҆гѵ́петскїй, та̀ пе́рваѧ по разли́чныхъ мꙋ́кахъ ѹ҆сѣ́чена бы́сть во главꙋ̀, а҆ по не́й и҆ про́чїи всѝ положи́ша своѧ̀ за хрⷭ҇та̀ главы̀.

И҆ прпⷣбныхъ же́нъ: ѯанѳі́ппы и҆ полѷѯе́нїи, ѹ҆чени́цъ а҆пⷭ҇лскихъ во і҆спа́нїи, ꙗ҆̀же ѿ ст҃ы́хъ а҆пⷭ҇лъ бы́вше просвѣщє́ны, мно́гѡ ѡ҆ и҆́мени хрⷭ҇то́вомъ чꙋдодѣ́йствовахꙋ, и҆ мнѡ́гїѧ ѹ҆вѣ́риша: и҆ съ ми́ромъ къ гдⷭ҇ꙋ ѿ̾идо́ша.