Айы сюлэм (Пилем)

Айы сюлэм Пилем псевдоним улсын печатламын

Источник: Гудыри : газет. — 1924. — № 92. — 4-тӥ бам.

Айы сюлэм

Куазь уйшор. Калык изе.
Гурт вадьсын толэзь пиштэ.
Ас югытсэ вылысен
Чалмыт гуртэ со кисьтэ.

Кезьыт лымы пыд улын
Кырӟам кадик ӟукыртэ,
Вужеръёстэм интыын
Лыз тылъёсын со пиштэ.

Ас вужерзэс коркаос
Сюрес валлин уськыто,
Соос йылтӥ писпуос
Улзэс-вайзэс возьмато.

Уйшор понна атасъёс
Одӥг кылысь чоръяло,
Вӧзазы ик пуныос
Кин ке шоры утыло.

Куара карись бырыса,
Азьло кадик гурт чалме,
Азьло кадик пиштыса,
Гурт вадьсын толэзь улэ.

Одӥг коркан, гурт пумын,
Мылыз поттэк, тыл пиштэ,
Шимес коркан, ӟус вылын,
Бӧрдыса удмурт пуке.

Синмысьтыз синкылиез
Эриктэм солэн потэ,
Туж бадӟым куректонэз
Сюлэмзэ тылын сутэ.

Куректонлы сётскытэк,
Кема улны быгатӥз;
Пумаз вуса, чидатэк,
Бӧрдыны куанер кутскиз.

Нылпиосыз быремен
Солэн сюлмыз ӵуштаське,
Берпум пиез Москвае
Дышетскыны кошкемен.

Киоссэ сюлмаз понса,
Тазьы шуэ со бӧрдса:
„Ӧд лу, пие, ки воштӥсь,
Пересь айыдэ сюдӥсь:
Огнаме монэ кельтӥд,
Герыез но тон куштӥд.

Кышно басьтын турттыса,
Тон ӧд кылзы мынэсьтым:
Семинарын улыса
Мозмид мынам киысьтым.

Ма со луоз ог пӧртэм
Кинӥгалы дышетскем,
Гожтыны но чырдыны
Кулэ вылэм ин дышыны!

Чиньы йылысь поттыны
Ӧдъяськод лэся нянез,
Шӧдтэк шорысь куштыны
Кулэ, ӧй вал герыез:

Пунылы-а кельтыса,
Куштӥд асьме юртъерез.
Эк! пуртэн кадь вандыса
Кельтӥд ась-ме вы-жы-ез!“

Вераны ик турттыса,
Со усе лябомыса. . . .

Ӟар потыны кутскыса
Толэзь улэ васькемын,
Айылэн куректыса
Ляб сюлмыз пилиськемын.

---