Ün bütsch d'amur ed üna padella
| ←A ...... (Fluors alpinas, p. 67) | Fluors alpinas (1883) by Ün bütsch d'amur ed üna padella |
Nun hest tü mê amo?→ |
Ün bütsch d'amur ed üna padella.
La mamma fo'l pisoul;
Nun am rester suletta!
Banduna il chanvoul,
Ve aint in la stüvetta,
Sech dvaint' intaunt il fain
E tü poser poust quia.
O ve! e baderlain,
In pêsch ed armonia.
Gugent, Ninetta, gniss
Tar te eir cuort' urella,
Scha füss con te promiss,
Scha füss tieu spus, ma bella!
Allur' at tramaglier
Podess il di, la saira;
Ed üna tras-cha fer
Cun te il di d'la faira.
Eau sun be ün povret
E tü est Signurina,
Usche nun he eau dret
Da't dir: eau t'am, cherina!
Tü m'amast, di, Fadri?
Eau t'am, eau t'am Ninetta,
Ve aint, ve aint amih,
Mieu cour, mieu cour at spetta!
Banduna il rasté!
Dad our il chod opprima;
Intuna co tar me
D'amur la prüma rima!
Ün bütsch, ün bütsch sonor
Resun' in la stüvetta;
La mamma sdasda our;
Surpraisa la figlietta
Disch: Mamma, vus avais
Dormieu be cuort' urella!
Eau füt sdasded' our d'pais,
Tres schlop d'üna padella!
La figlia in chadafö
Vo, tschercha la padella,
Per zoppanter il fö
Chi arda sa massella!