Çĕнĕ çул

by Тайăр Тимкки

Çĕнĕ çул  (1906)  by Тайăр Тимкки

Хайланă дата: 1906, Пичетленĕ çул: 1906. Çăлкуç: Вула Чăвашла

Килĕр, пĕрле пухăнса,
Çĕнĕ шухăш шухăшлар.
Çĕн çулта савăнса,
Кивĕ ĕçе пăрахар. .

Пирĕн кивĕ йĕркесем
Кунтан урăх ан пулччăр,
Халиччен пире тытакан
Тимĕр сăнчăр татăлтăр.

Пирĕн çĕнĕ шухăшшăн
Нумай ырă çын пĕтрĕ.
Пирĕн хуйха пĕлнĕшĕн
Нумай вĕри юн юхрĕ.

Анчах мĕншĕн тертленсе
Вăхăт ахаль ирттерес?
Пирĕн пĕрле халь пулас,
Халех ĕçе тытăнас!

Тата пĕр-ик çул иртĕ,
Çынсем аван пурăнĕç,
Ырă усала çĕнтерĕ,
Çынсем чунтан савăнĕç.

1906