ᠨᡳᠪᠴᡠ ᠊ᡳ ᠪᠣᠵᡳ ᠪᡳᡨ᠌ᡥᡝ
| ᠨᡳᠪᠴᡠ ᠊ᡳ ᠪᠣᠵᡳ ᠪᡳᡨ᠌ᡥᡝ Fyodor Alexeyevich Golovin, Songgotu |
| 尼布楚條約, Нерчинский договор, PACTUM NERTSCHIAE |
ᡩ᠋ᡠ᠋ᠯᡳᠮᠪᠠᡳ ᡤᡠᡵᡠᠨ ᠊ᡳ ᡝᠨ᠋ᡩᡠ᠋ᡵᡳᠩᡤᡝ ᡥᡡᠸᠠᠩᡩ᠋ᡳ ᡥᡝᠰᡝᡳ ᠵᡝᠴᡝᠨ ᠪᠠ ᡨ᠋ᠣᡴ᠋ᡨ᠋ᠣᠪᡠᡥᠠ ᠠᠮᠪᠠᠨ᠈ ᡥᡝᠪᡝᡳ ᠠᠮᠪᠠᠨ᠈ ᡥᡳᠶᠠ ᠪᡝ ᡴᠠᡩ᠋ᠠᠯᠠᡵᠠ ᡩᠣᡵᡤᡳ ᠠᠮᠪᠠᠨ ᠰᠣᠩᡤᠣᡨᡠ᠋᠈ ᡩᠣᡵᡤᡳ ᠠᠮᠪᠠᠨ ᠪᡳᠮᡝ᠈ ᡤᡡᠰᠠᡳ ᡝᠵᡝᠨ᠈ ᡠᠵᡠ ᠵᡝᡵᡤᡳ ᡤᡠᠩ ᠨᠠᡴ᠋ᠴᡠ᠈ ᡨᡠ᠋ᠩ ᡤᡠᠸᡝ ᡬᠠᠩ᠈ ᡤᡡᠰᠠᡳ ᡝᠵᡝᠨ ᠯᠠᠩᡨ᠋ᠠᠨ᠈ ᡤᡡᠰᠠᡳ ᡝᠵᡝᠨ ᠪᠠᠨ᠋ᡩ᠋ᠠᡵᡧᠠᠨ᠈ ᠰᠠᡥᠠᠯᡳᠶᠠᠨ ᡠᠯᠠ ᠵᡝᡵᡤᡳ ᠪᠠᠪᡝ ᡨᡠ᠋ᠸᠠᡴᡳᠶᠠᡵᠠ ᠵᡳᠶᠠᠩᡤᡳᠶᡡᠨ ᠰᠠᠪᠰᡠ᠈ ᡨᡠ᠋ᡳ ᠵᠠᠩᡤᡳᠨ ᠮᠠᠯᠠ᠈ ᡨᡠ᠋ᠯᡝᡵᡤᡳ ᡤᠣᠯᠣ ᠪᡝ ᡩᠠᠰᠠᡵᠠ ᠵᡠᡵᡤᠠᠨ ᠊ᡳ ᠠᠰᡥᠠᠨ ᠊ᡳ ᠠᠮᠪᠠᠨ ᡠᠨ᠋ᡩ᠋ᠠ᠈ ᠣᡵᠣᠰ ᡤᡠᡵᡠᠨ ᠊ᡳ ᠴᠠᡤᠠᠨ ᡥᠠᠨ ᠊ᡳ ᡥᡝᠰᡝᡳ ᡨ᠋ᠠᡴᡡᡵᠠᡶ᠋ᡳ ᠵᡝᠴᡝᠨ ᠪᡝ ᡨ᠋ᠣᡴ᠋ᡨ᠋ᠣᠪᡠᠮᡝ ᠵᡳᡥᡝ ᠠᠮᠪᠠᠨ ᡝᠯᠴᡳᠨ᠈ ᠣ ᠺᠣᠯ ᠨᡳ ᠴᡝᡳ ᡳ ᠨᠠ ᠮᡳᠶᡝᠰ ᡨ᠋ᡳ ᠨᡳ ᡴᡝ ᠪᡠ ᡝᡵᡳᠶᠠᠨ ᠰᠶ ᠺᠣᡳ ᡶ᠋ᡳᠶᠣᡩ᠋ᠣᡵᠣ ᡝᠯᡳᡴ ᠰᡳᠶᡝᡳ ᠶᡝ ᠸᡝᡳ ᠴᠶ ᡥᠣ ᠯᠣ ᠸᡝᠨ ᠰᡝ᠈ ᡝᠯᡥᡝ ᡨ᠋ᠠᡳ᠌ᡶ᠋ᡳᠨ ᠊ᡳ ᠣᡵᡳᠨ ᠵᠠᡴᡡᠴᡳ ᠰᠣᡥᠣᠨ ᠮᡝᡳ᠌ᡥᡝ ᠠᠨᡳᠶᠠ ᠨᠠᡩ᠋ᠠᠨ ᠪᡳᠶᠠᡳ ᠣᡵᡳᠨ ᡩ᠋ᡠ᠋ᡳ᠌ᠨ ᡩ᠋ᡝ᠋᠈ ᠨᡳᠪᠴᠣᠣ ᠊ᡳ ᠪᠠᡩᡝ᠋ ᡠᡥᡝᡵᡳ ᠠᠴᠠᡶ᠋ᡳ᠈ ᠵᡠᠸᡝ ᡤᡠᡵᡠᠨ ᠊ᡳ ᠪᡠᡨ᠌ᡥᠠᡧᠠᠮᡝ ᠶᠠᠪᡠᡵᡝ ᠪᡠᠶᠠ ᡠᡵᠰᡝ ᠴᡳᠰᡠᡳ ᠵᡝᠴᡝᠨ ᠪᡝ ᡩᠠᠪᠠᠮᡝ ᠪᡠᡨ᠌ᡥᠠᡧᠠᠮᡝ᠈ ᡳᠰᡥᡠᠨ᠋ᡩᡝ᠋ ᠸᠠᠨ᠋ᡩᡠ᠋ᠮᡝ ᡩ᠋ᡠ᠋ᡵᡳᠨᡠᠮᡝ ᡶᠠᠴᡠᡥᡡᠨ ᠶᠠᠪᡠᡵᡝ ᠪᡝ ᡶᠠᡶ᠋ᡠᠯᠠᠮᡝ᠈ ᡩ᠋ᡠ᠋ᠯᡳᠮᠪᠠᡳ ᡤᡠᡵᡠᠨ᠈ ᠣᡵᠣᠰ ᡤᡠᡵᡠᠨ ᠮᡝᠨᡳ ᠮᡝᠨᡳ ᠵᡝᠴᡝᠨ ᠊ᡳ ᠪᠠᠪᡝ ᡤᡝᡨᡠ᠋ᡴᡝᠯᡝᠮᡝ ᡨ᠋ᠣᡴ᠋ᡨ᠋ᠣᠪᡠᡶ᠋ᡳ᠈ ᡩᠣᡵᠣ ᠠᠴᠠᡶ᠋ᡳ᠈ ᡝᠨ᠋ᡨᡝ᠋ᡥᡝᠮᡝ ᡤᠣᡳ᠌ᡩ᠋ᠠᠮᡝ ᡥᡡᠸᠠᠯᡳᠶᠠᠰᡠᠨ ᠊ᡳ ᠪᠠᠨᠵᡳᡵᡝ ᠵᠠᠯᡳᠨ ᡨ᠋ᠣᡴ᠋ᡨ᠋ᠣᠪᡠᠮᡝ ᡤᡳᠰᡠᡵᡝᡥᡝᠩᡤᡝ᠉
ᡝᠮᡠ ᡥᠠᠴᡳᠨ᠈ ᠰᠠᡥᠠᠯᡳᠶᠠᠨ ᡠᠯᠠ ᡩ᠋ᡝ᠋ ᠠᠮᠠᡵᡤᡳᠴᡳ ᡩᠣᠰᡳᠨᠵᡳᡥᠠ ᠴᠣᡵᠠᠨ ᠰᡝᡵᡝ ᡠᡵᡠᠮᠠ ᠪᡳᡵᠠᡳ ᡥᠠᠨᠴᡳ ᠪᡳᠰᡳᡵᡝ ᡤᡝᡵᠪᡳᠴᡳ ᠪᡳᡵᠠ ᠪᡝ᠈ ᠵᡝᠴᡝᠨ ᠣᠪᡠᡶ᠋ᡳ᠈ ᡝᡵᡝ ᠪᡳᡵᠠᡳ ᠰᡝᡴᡳᠶᡝᠨ ᠊ᡳ ᡝᡵᡤᡳ ᠸᡝᡥᡝ ᠨᠣᡥᠣ ᠠᠮᠪᠠ ᡥᡳᠩᡤᠠᠨ ᠊ᡳ ᠮᡠᡩᡠ᠋ᠨ ᠪᡝ ᠵᠠᡶᠠᡥᠠᡳ ᠮᡝᡩᡝ᠋ᡵᡳ ᡩ᠋ᡝ᠋ ᠨᡳᡴᡝᡨᡝ᠋ᠯᡝ ᠠᠨ᠋ᡨᡠ᠋ ᠊ᡳ ᡝᡵᡤᡳ ᠰᠠᡥᠠᠯᡳᠶᠠᠨ ᡠᠯᠠ ᡩ᠋ᡝ᠋ ᡩᠣᠰᡳᡴᠠᠯᡝ ᠪᡳᡵᠠ ᠪᡳᡵᡤᠠᠨ ᠪᡝ ᡤᡝᠮᡠ ᡩ᠋ᡠ᠋ᠯᡳᠮᠪᠠᡳ ᡤᡠᡵᡠᠨ ᠊ᡳ ᡥᠠᡵᠠᠩᡤᠠ ᠣᠪᡠᠮᡝ᠈ ᠪᠣᠰᠣᡳ ᡝᡵᡤᡳ ᡤᡡᠸᠠ ᠶᠠᠶᠠ ᠪᡳᡵᠠ ᠪᡳᡵᡤᠠᠨ ᠪᡝ ᡤᡝᠮᡠ ᠣᡵᠣᠰ ᡤᡠᡵᡠᠨ ᠊ᡳ ᡥᠠᡵᠠᠩᡤᠠ ᠣᠪᡠᠮᡝ᠈ ᡩᠠᠮᡠ ᡠᡩ᠋ᡳ ᠪᡳᡵᠠ ᠴᡳ ᠵᡠᠯᡝᠰᡳ᠈ ᡝᡵᡝ ᡨ᠋ᠣᡴ᠋ᡨ᠋ᠣᠪᡠᡥᠠ ᡥᡳᠩᡤᠠᠨ ᠊ᡳ ᠠᠯᡳᠨ ᠴᡳ ᠠᠮᠠᠰᡳ᠈ ᠵᡠᠸᡝ ᠰᡳᡩᡝ᠋ᠨ ᡩ᠋ᡝ᠋ ᠪᡳᠰᡳᡵᡝ᠈ ᠪᠠ ᠨᠠ᠈ ᠪᡳᡵᠠ᠈ ᠪᡳᡵᡤᠠᠨ ᠪᡝ ᡨ᠋ᠠᡴᠠ ᠰᡳᡩᡝ᠋ᠨ ᡩ᠋ᡝ᠋ ᠣᠪᡠᡶ᠋ᡳ᠈ ᠮᡝᠨᡳ ᠮᡝᠨᡳ ᡤᡠᡵᡠᠨ ᡩ᠋ᡝ᠋ ᠪᡝᡩᡝ᠋ᡵᡝᡥᡝ ᠮᠠᠩᡤᡳ᠈ ᠪᠠ ᠨᠠ ᠪᡝ ᡤᡝᡨᡠ᠋ᡴᡝᠯᡝᠮᡝ ᠪᠠᡳ᠌ᠴᠠᡶ᠋ᡳ᠈ ᡝᡳᠴᡳ ᡝᠯᠴᡳᠨ ᡨ᠋ᠠᡴᡡᡵᠠᠮᡝ ᡤᡳᠰᡠᡵᡝᡵᡝ᠈ ᡝᡳᠴᡳ ᠪᡳᡨ᠌ᡥᡝ ᡠᠩᡤᡳᠮᡝ ᡨ᠋ᠣᡴ᠋ᡨ᠋ᠣᠪᡠᡵᡝ ᠪᠠᠪᡝ ᠠᠮᠠᠯᠠ ᠵᠠᡳ ᡨ᠋ᠣᡴ᠋ᡨ᠋ᠣᠪᡠᠮᡝ᠉
ᡝᠮᡠ ᡥᠠᠴᡳᠨ᠈ ᡝᡵᡝ ᡨ᠋ᠣᡴ᠋ᡨ᠋ᠣᠪᡠᡥᠠ ᠵᡝᠴᡝᠨ ᠪᡝ ᠵᡠᠸᡝ ᡤᡠᡵᡠᠨ ᠊ᡳ ᠪᡠᡨ᠌ᡥᠠᡧᠠᡵᠠ ᡠᡵᠰᡝ ᠪᡝ ᠠᡳ᠌ᠨᠠᡥᠠ ᠰᡝᠮᡝ ᡩᠠᠪᠠᠪᡠᡵᠠᡴᡡ ᠣᠪᡠᡶ᠋ᡳ᠈ ᡝᠮᡠ ᠵᡠᠸᡝ ᠪᡠᠶᠠ ᡠᡵᠰᡝ ᠴᡳᠰᡠᡳ ᠵᡝᠴᡝᠨ ᠪᡝ ᡩᠠᠪᠠᠮᡝ ᠪᡠᡨ᠌ᡥᠠᡧᠠᠮᡝ ᡥᡡᠯᡥᠠᠮᡝ ᠶᠠᠪᡠᡵᡝᠩᡤᡝ ᠪᡳᠴᡳ᠈ ᠵᠠᡶᠠᡶ᠋ᡳ ᠮᡝᠨᡳ ᠮᡝᠨᡳ ᠪᠠ ᠨᠠ ᠊ᡳ ᡥᠠᡵᠠᠩᡤᠠ ᡴᠠᡩ᠋ᠠᠯᠠᡵᠠ ᡥᠠᡶᠠᠰᠠ ᡩ᠋ᡝ᠋ ᠪᡝᠨᡝᡴᡳᠨᡳ᠈ ᠪᠠ ᠨᠠ ᠊ᡳ ᡥᠠᡶᠠᠰᠠ ᡨᡝ᠋ᡵᡝ ᠶᠠᠪᡠᡥᠠ ᠨᡳᠶᠠᠯᠮᠠᡳ ᠠᡵᠠᡥᠠ ᠸᡝᡳ᠌ᠯᡝᡳ ᡠᠵᡝᠨ ᠸᡝᡳ᠌ᡥᡠᡴᡝᠨ ᠪᡝ ᡳᠯᡤᠠᠮᡝ ᠸᡝᡳ᠌ᠯᡝ ᠠᡵᠠᠮᡝ ᡳᠰᡝᠪᡠᡴᡳᠨᡳ᠈ ᡝᡵᡝᠴᡳ ᡶ᠋ᡠᠯᡠ ᠵᡠᠸᠠᠨ ᡨ᠋ᠣᡶ᠋ᠣᡥᠣᠨ ᠊ᡳ ᡥᠣᡴᡳᠯᠠᡶ᠋ᡳ᠈ ᠴᠣᠣᡥᠠᡳ ᠠᡤᡡᡵᠠ ᠵᠠᡶᠠᡶ᠋ᡳ᠈ ᠪᡠᡨ᠌ᡥᠠᡧᠠᠮᡝ ᠶᠠᠪᡠᡵᡝ᠈ ᠨᡳᠶᠠᠯᠮᠠ ᠸᠠᠮᡝ ᡩ᠋᠋ᡠ᠋ᡵᡳᠮᡝ ᠴᡠᠸᠠᠩᠨᠠᠮᡝ ᠶᠠᠪᡠᡵᡝᠩᡤᡝ ᠪᡳᠴᡳ᠈ ᡠᡵᡠᠨᠠᡴᡡ ᡩᠣᠨᠵᡳᠪᡠᠮᡝ ᠸᡝᠰᡳᠮᠪᡠᡶ᠋ᡳ᠈ ᡠᡨ᠌ᡥᠠᡳ ᡶᠠᡶ᠋ᡠᠨ ᠊ᡳ ᡤᠠᠮᠠᡴᡳᠨᡳ᠈ ᡝᠮᡠ ᡠᡩᡠ᠋ ᠨᡳᠶᠠᠯᠮᠠ ᡝᠨ᠋᠋ᡩᡝ᠋ᠪᡠᠮᡝ ᠶᠠᠪᡠᡥᠠ ᠰᡝᠮᡝ ᠵᡠᠸᡝ ᡤᡠᡵᡠᠨ ᡴᡝᠮᡠᠨᡳ ᡥᡡᠸᠠᠯᡳᠶᠠᠰᡠᠨ᠋ ᠊ᡳ ᠪᠠᠨᠵᡳᠮᡝ᠈ ᠠᡶᠠᡵᠠ ᡩᠠᡳ᠌ᠯᠠᡵᠠ ᠪᡝ ᡩ᠋ᡠ᠋ᡵᡳᠪᡠᡵᠠᡴᡡ ᠣᡴᡳ᠉
ᡝᠮᡠ ᡥᠠᠴᡳᠨ᠈ ᠨᡝᠨᡝᠮᡝ ᠶᠠᠪᡠᡥᠠ ᠶᠠᠶᠠ ᡥᠠᠴᡳᠨ ᠊ᡳ ᡶᡝ ᠪᠠᡳ᠌ᡨᠠ ᠪᡝ ᡤᡳᠰᡠᡵᡝᡵᠠᡴᡡᠴᡳ ᡨᡠ᠋ᠯᡤᡳᠶᡝᠨ᠈ ᠨᡝ ᡩ᠋ᡠ᠋ᠯᡳᠮᠪᠠᡳ ᡤᡠᡵᡠᠨ ᡩ᠋ᡝ᠋ ᠪᡳᠰᡳᡵᡝ ᠣᡵᠣᠰ ᠊ᡳ ᠨᡳᠶᠠᠯᠮᠠ᠈ ᠣᡵᠣᠰ ᡤᡠᡵᡠᠨ ᡩ᠋ᡝ᠋ ᠪᡳᠰᡳᡵᡝ ᡩ᠋ᡠ᠋ᠯᡳᠮᠪᠠᡳ ᡤᡠᡵᡠᠨ ᠊ᡳ ᠨᡳᠶᠠᠯᠮᠠ ᠪᡝ ᡳᠰᡥᡠᠨ᠋ᡩᡝ᠋ ᡤᠠᡳ᠌ᡵᡝ ᠪᡝ ᠨᠠᡴᠠᡶ᠋ᡳ ᡠᡨ᠌ᡥᠠᡳ ᠪᡳᠪᡠᠮᡝ᠉
ᡝᠮᡠ ᡥᠠᠴᡳᠨ᠈ ᠵᡠᠸᡝ ᡤᡠᡵᡠᠨ ᡝᠨ᠋ᡨᡝ᠋ᡥᡝᠮᡝ ᡤᠣᡳ᠌ᡩ᠋ᠠᠮᡝ ᡥᡡᠸᠠᠯᡳᠶᠠᠮᡝ ᠠᠴᠠᡥᠠ ᠪᡝ ᡩᠠᡥᠠᠮᡝ᠈ ᡝᡵᡝᠴᡳ ᠠᠮᠠᠰᡳ᠈ ᠶᠠᠶᠠ ᠠᠮᠠᠰᡳ ᠵᡠᠯᡝᠰᡳ ᠶᠠᠪᡠᡵᡝ ᠨᡳᠶᠠᠯᠮᠠ ᠵᡠᡤᡡᠨ ᠶᠠᠪᡠᡵᡝ ᡨᡝ᠋ᠮᡤᡝᡨᡠ᠋ ᠪᡳᡨ᠌ᡥᡝ ᠪᡳᠰᡳᡵᡝᠩᡤᡝ ᠣᠴᡳ᠈ ᡨᡝ᠋ᡵᡝᡳ ᡠᡩ᠋ᠠᡵᠠ ᡠᠨᠴᠠᡵᠠ ᠪᡝ ᡳᠯᡳᠪᡠᡵᠠᡴᡡ ᠣᠪᡠᠮᡝ᠉
ᡝᠮᡠ ᡥᠠᠴᡳᠨ᠈ ᡩᠣᡵᠣ ᠠᠴᠠᠮᡝ ᡤᠠᠰᡥᡡᡥᠠ ᡳᠨᡝᠩᡤᡳᠴᡳ ᠠᠮᠠᠰᡳ ᡠᡴᠠᠨᠵᡠ ᡠᡴᠠᠴᡳ᠈ ᠠᡳ᠌ᠨᠠᡥᠠ ᠰᡝᠮᡝ ᠰᡳᠩᡤᡝᠪᡠᡵᠠᡴᡡ᠈ ᠵᠠᡶᠠᡶ᠋ᡳ ᠠᠮᠠᠰᡳ ᠪᡠᠮᡝ᠉
ᡝᠮᡠ ᡥᠠᠴᡳᠨ᠈ ᠵᡠᠸᡝ ᡤᡠᡵᡠᠨ ᠊ᡳ ᠠᠮᠪᠠᠰᠠ ᠠᠴᠠᡶ᠋ᡳ ᠵᡠᠸᡝ ᠵᡝᠴᡝᠨ ᠊ᡳ ᠠᡶᠠᡵᠠ ᡩᠠᡳ᠌ᠯᠠᡵᠠ ᠪᡝ ᠨᠠᡴᠠᠪᡠᡶ᠋ᡳ᠈ ᡩᠣᡵᠣ ᠠᠴᠠᡶ᠋ᡳ ᡥᡡᠸᠠᠯᡳᠶᠠᠰᡠᠨ ᠰᠠᡳ᠌ᠨ ᠊ᡳ ᡝᠨ᠋ᡨᡝ᠋ᡥᡝᠮᡝ ᡤᠣᡵᠣ ᡤᠣᡳ᠌ᡩ᠋ᠠᠮᡝ᠈ ᡠᠮᡝᠰᡳ ᠠᡴᡩᡠ᠋ᠨ ᠊ᡳ ᡨ᠋ᠣᡴ᠋ᡨ᠋ᠣᠪᡠᡥᠠ ᠪᠠᠪᡝ ᡩᠠᡥᠠᠮᡝ ᠶᠠᠪᡠᠮᡝ ᠵᡠᡵᠴᡝᡵᠠᡴᡡ ᠣᡴᡳ᠈ ᡝᡵᡝ ᠰᠣᠩᡴᠣᡳ ᡝᠮᡨᡝ᠋ ᠪᡳᡨ᠌ᡥᡝ ᠠᡵᠠᡶ᠋ᡳ ᡩᠣᡵᠣᠨ ᡤᡳᡩ᠋ᠠᡶᡳ ᡳᠰᡥᡠᠨ᠋ᡩᡝ᠋ ᠪᡳᠮᡝ᠈ ᡤᡝᠯᡳ ᡝᡵᡝ ᠰᠣᠩᡴᠣᡳ ᡩ᠋ᡠ᠋ᠯᡳᠮᠪᠠᡳ ᡤᡠᡵᡠᠨ ᠊ᡳ ᠪᡳᡨ᠌ᡥᡝ᠈ ᠣᡵᠣᠰ ᡤᡠᡵᡠᠨ ᠊ᡳ ᠪᡳᡨ᠌ᡥᡝ᠈ ᠯᠠᡨ᠋ᡳᠨᠣ ᡤᡠᡵᡠᠨ ᠪᡳᡨ᠌ᡥᡝ ᠠᡵᠠᡶ᠋ᡳ᠈ ᠸᡝᡥᡝ ᡩ᠋ᡝ᠋ ᡶ᠋ᠣᠯᠣᡶ᠋ᡳ ᠵᡠᠸᡝ ᡤᡠᡵᡠᠨ ᠊ᡳ ᠠᠴᠠᠨ ᠊ᡳ ᠪᠠᡩᡝ᠋ ᡳᠯᡳᠪᡠᡶ᠋ᡳ᠈ ᡤᠣᡵᠣ ᡤᠣᡳ᠌ᡩ᠋ᠠᠮᡝ ᡨᡝ᠋ᠮᡤᡝᡨᡠ᠋ ᠣᠪᡠᡴᡳ᠉
ᡝᠯᡥᡝ ᡨ᠋ᠠᡳ᠌ᡶ᠋ᡳᠨ ᠊ᡳ ᠣᡵᡳᠨ ᠵᠠᡴᡡᠴᡳ ᠠᠨᡳᠶᠠ ᠨᠠᡩ᠋ᠠᠨ ᠪᡳᠶᠠᡳ ᠣᡵᡳᠨ ᡩ᠋ᡠ᠋ᡳ᠌ᠨ᠉
dulimbai gurun i enduringge hūwangdi hesei jecen ba toktobuha amban, hebei amban, hiya be kadalara dorgi amban songgotu, dorgi amban bime, gūsai ejen, uju jergi gung nakcu tung guwe g'ang, gūsai ejen langtan, gūsai ejen bandaršan, sahaliyan ula jergi babe tuwakiyara jiyanggiyūn sabsu, tui janggin mala, tulergi golo be dasara jurgan i ashan i amban unda, oros gurun i cagan han i hesei takūrafi jecen be toktobume jihe amban elcin, o k'ol ni cei i na miyes ti ni ke bu eriyan sy k'oi fiyodoro elik siyei ye wei cy ho lo wen [okol'nichey i namestnik bryanskoy Fedor Alekseyevich Golovin]se, elhe taifin i orin jakūci sohon meihe aniya nadan biyai orin duin de, nibcoo i bade uheri acafi, juwe gurun i buthašame yabure buya urse cisui jecen be dabame buthašame, ishunde wandume durinume facuhūn yabure be fafulame, dulimbai gurun, oros gurun meni meni jecen i babe getukeleme toktobufi, doro acafi, enteheme goidame hūwaliyasun i banjire jalin toktobume gisurehengge.
emu hacin, sahaliyan ula de amargici dosinjiha coran sere uruma birai hanci bisire gerbici bira be, jecen obufi, ere birai sekiyen i ergi wehe noho amba hinggan i mudun be jafahai mederi de niketele antu i ergi sahaliyan ula de dosikale bira birgan be gemu dulimbai gurun i harangga obume, bosoi ergi gūwa yaya bira birgan be gemu oros gurun i harangga obume, damu udi bira ci julesi, ere toktobuha hinggan i alin ci amasi, juwe siden de bisire, ba na, bira, birgan be taka siden de obufi, meni meni gurun de bederehe manggi, ba na be getukeleme baicafi, eici elcin takūrame gisurere, eici bithe unggime toktobure babe amala jai toktobume.
emu hacin, ere toktobuha jecen be juwe gurun i buthašara urse be ainaha seme dababurakū obufi, emu juwe buya urse cisui jecen be dabame buthašame hūlhame yaburengge bici, jafafi meni meni ba na i harangga kadalara hafasa de benekini, ba na i hafasa tere yabuha niyalmai araha weilei ujen weihuken be ilgame weile arame isebukini, ereci fulu juwan tofohon i hokilafi, coohai agūra jafafi, buthašame yabure, niyalma wame durime cuwangname yaburengge bici, urunakū donjibume wesimbufi, uthai fafun i gamakini, emu udu niyalma endebume yabuha seme juwe gurun kemuni hūwaliyasun i banjime, afara dailara be duriburakū oki.
emu hacin, neneme yabuha yaya hacin i fe baita be gisurerakūci tulgiyen, ne dulimbai gurun de bisire oros i niyalma, oros gurun de bisire dulimbai gurun i niyalma be ishunde gaire be nakafi uthai bibume.
emu hacin, juwe gurun enteheme goidame hūwaliyame acaha be dahame, ereci amasi, yaya amasi julesi yabure niyalma jugūn yabure temgetu bithe bisirengge oci, terei udara uncara be iliburakū obume.
emu hacin, doro acame gashūha inenggici amasi ukanju ukaci, ainaha seme singgeburakū, jafafi amasi bume.
emu hacin, juwe gurun i ambasa acafi juwe jecen i afara dailara be nakabufi, doro acafi hūwaliyasun sain i enteheme goro goidame, umesi akdun i toktobuha babe dahame yabume jurcerakv oki, ere songkoi emte bithe arafi doron gidafi ishunde bime, geli ere songkoi dulimbai gurun i bithe, oros gurun i bithe, latino gurun bithe arafi, wehe de folofi juwe gurun i acan i bade ilibufi, goro goidame temgetu obuki.
elhe taifin i orin jakūci aniya nadan biyai orin duin.