Тулыс омыр мамык выллем
Вешаськыны яратэ.
Мылкыд капчи, шудэ сюлэм,
Шулдыр дырлы шумпотэ.
Шырчик сайкам кызьпу йылын
Нёръя веськрес гуръёссэ,
Инмын кырӟась тюрагайлы
Пазя кыл саламъёссэ.
Ваньмыз маде, кырӟа, вера
Шумпотэмзэ туннэлы.
Онись, Пекла, Аркаш, Вара
Дӥсяськиллям ӵуж, горд, лыз.
Школа азе ошем флагез
Тӧл каньылля маялля.
«Шулдыртом коть Нырысь маез!»
Шуыса, флаге гожтӥллям.
Калык тубе, тубе, тубе
Школае пумтэм-йылтэм.
Чын-чын берын пересь Губей
Калыкез сутыны турттэ.
Шулдырен, каньылэн улон понна,
Выль сюресъёс утчаны
Вордӥськемын туннэ нунал
Ужась, крестьян калыклы.
«Вунэтомы вуж улонэз,
Выльыныз кушласькомы.
Вунэтомы аракэез,
Улонмес шулдыртомы», —
Школа пушкысь плакат, лозунг
Калыклы маде озьы.
Калык тырмиз, вырӟиз ужпум,
Маез данъян кутскизы.
Ӟеч кылъёсын, выль гуръёсын
Школаед эктэ туннэ…
Котыр кунысь тушмонъёслы
Сильтӧл кужфмзэ пунэ.
