Колхоз бусы (Кедров)

From Wikisource
Jump to navigation Jump to search
Колхоз бусы
Автор: Филипп Григорьевич Кедров
Кылдытон дыр: 1928. Источник: Кедров Ф. Г. Катя: Кылбуръёс но повесть / Дасяз но азькыл гожтӥз А. А. Ермолаев. — Ижевск: Удмуртия, 1989. — С. 19—20. — 112 с. — («Школьная библиотека»).

Колхоз бусы


Пумыз-йылыз — ин но музъем,
Тусыз-буйыз — ӵуж зарезь,
Веттаське ук, эктэ сюлэм —
Ӧй шӧд кисьмамзэ юлэсь.

Ӟеч-а, бур-а, мусо бусы,
Ӟеч-а, бур-а, выль ю-нянь!
Куашетэмед, тынад тусыд
Мылкыдэз ӝутэ выллань.

Пичи дырысь мыным тодмо,
Уно лёгай вылтырдэ.
Соин мыным бусы дуно, —
Тодмаськод на-а вындэ?!

Соку тынад тусэд-буед
Кайгырысь муртлэн кадь вал,
Жаген суро будӥсь юэд
Лулӟылоз вай ул-нунал.

Жаг турынэн кыжмем йыран
Сюпсиз тонэ даурэн.
Со йыранэз табере корам, —
Ӟеч-а, бур-а, ю ӧре!

Клевер бере кизем ӟегмы
Камыш куроё будӥз,
Культозэ уг луы вормын —
Тани кытын жиль кидыс!

Бадӟым колхоз семьяен
Потӥм туннэ араны,
Дэмен но машинаен
Макем капчи ужаны.

Культо вӧзы культо пуксе
Вистэм-вожтэм бусые,
Ужлэн гурез котыр бызэ,
Лэйкатэ нюлэс вылэз.

Уж милемлы — шумпотон со,
Тыр мылкыдэз буйгатон.
Викышъяса ужын бӧрдон, —
Ӧвӧл табере лудын.

Ӟеч-а, бур-а, мусо бусы,
Ӟеч-а, бур-а, выль ю-нянь!
Куашетэмед, тынад тусыд
Мылкыдэз ӝутэ выллань.


1928

Public domain
This work is in the public domain in countries where the copyright term is the author's life plus 70 years or less. See Copyright.