Кизён дыр (Кедров)

From Wikisource
Jump to navigation Jump to search
Кизён дыр
Автор: Филипп Григорьевич Кедров
Кылдытон дыр: 1928. Источник: Кедров Ф. Г. Катя: Кылбуръёс но повесть / Дасяз но азькыл гожтӥз А. А. Ермолаев. — Ижевск: Удмуртия, 1989. — С. 18—19. — 112 с. — («Школьная библиотека»).

Кизён дыр


Лыз инмын тюрагай туж сюлмысь
Дыртыса ик сэрттэ ас гурзэ.
Кисьтаське куараез туж вылысь,
Ӵуж шунды маялля мугорзэ.

Сьӧд музъем ни котрак вырӟемын,
Ма, крестьян ни потӥз ук лудэ.
Кизён дыр табере вуэмын,
Музъемез корт плугед бугыртэ.

Аналэн вылъёсаз шырчикъёз
Кырӟаса нумыръёс бичало.
Ӵанаос, сьӧд куакаос, куакаос
Крестьянлы мар мында ужало.

Бугырес музъемез усыед
Сынаса мамыклы берыктэ.
Усылэн пинь улаз сезьыед
Сюрыса музъемен ӵоксаське.

Куд гуртын усыос, герыос
Луд вылын ни ӧвӧл — пазьгемын,
Интыяз ӝужало машинъёс,
Выль улон уд гуртэ каръямын.

Кизён дыр шулдырскиз, кизён дыр,
Музъемез ке ужам машинаен,
Крестьянлы со луоз ведь майбыр —
Асьмеос узырмом ю-нянен.


1928

Public domain
This work is in the public domain in countries where the copyright term is the author's life plus 70 years or less. See Copyright.