Каток электро тылъя
Кисьтаське, чильк-вальк выре,
Музыка шудэм тӧлъя
Пальккаське сэзъ омыре.
Ялан шат пукод коркан,
Жӧк сьӧрын пумем сямен.
Катокын капчи шокан,
Нискылан шулдыр дэмен.
Сюлэм ик потэ икак:
Ӟеч ужало конькиос,
Тӧл бамез чупа шуак,
Капчи луо мылкыдъёс.
Гажаса эше Саня
Ӝик-ӝик кырмиз бур киме,
Ӵыж-ӵыж ымнырыз мыня, —
Ӵош шыртӥськом конькиен.
Тыр толэзь учке шоре,
Кизилиос чиль выро.
Кырӟан, мадиськон, серем
Омырез котыр сэзъяло.
Кызьы уд лыкты татчы:
Юнма мугор катокын.
Ужам бере огазьын
Шулдырез кӧня татын!
Каток электро тылъя
Кисьтаське, чильк-вальк выре,
Музыка шудэм тӧлъя
Пальккаське сэзь омыре.
