जेठें खाना-पीना छोड़ी देले छेलै, कमजोरी से मुँह तांय नै खुलै छै, आरो हम्मे यहाँ भगमानों से दादा के औरदा मांगी रहलों छी, जबकि वहाँ रही के हमरा सेवा करै के जरूरत है। इखनी तें दीदियों के हमरों होने जरूरत है। आरो हम्में मनारों पर बैठी के की करी रहलो छियै। सत्ती बुदबुदैलै, "हे भगवान. .. भला कथी लें, की की सोची, हम्मे की की करते रहलियै। हमरों सोभाव हेन्हों छै कि जे हमरा लें एत्तें सोचै छै, हम्मे ओकरे विरुद्ध बनी जाय छियै। नै तें की लाल दा के मॉन हेना उचाटतियै, आरी जे बेटा लें हम्में ऊ सब करलियै, वही कॉन हमरा सही बतैलकै ! तब सही ते जेठे नी। हुनी हमरों की की बात नै सहलकै, मतर कभियो नै आपन्है सें, नै दीदिये से कुछ कहवैलकै। आरो एक हम्में, कि आपनों बात ऊँच्चों राखै के फेरा में सब कुछ अनसुना करते रहलियै। यहाँ तांय कि झिटकिया सें, जमीन तांय जोर खोदवाय के भी बात सोची लेलियै.... कहीं हेनों तें नै कि हौ बात बाते-बातों में झिटकिया करी दे रहे कि डाँड़ के छीलतें छीलते खेतों तांय पहुंचाय दैलें रहें -ई सोची कि वैद्य का के पूरा घोर तें हुनको बीमारिये लैकें ओझरैलो छै, आरो यही मौका छै..... हे भगवान जो केन्हों के ई बात जेठ, आकि दीदिये के मालूम होय जाय, ते हुनका सिनी पर की गुजरतै, कुछुवो गुजरें पारें... एतना सोचहैं ऊ योगमठ से बाहर निकली गेलै आरो सीधे पापहरणी तांय उतरै लें हिन्ने हुन्ने रास्ता से तेज-तेज निकले लागलै, जेना ऊ चलते नै रहें, मनारों पर ससरतें रहें।
पापहरणी तांय ऊ एक्के साँस में उतरी ऐलों छेलै। पापहरणी देवी के दूरहै सें सिर नवैलें छेलै आरी पूवारियेवाला रास्ता पकड़ी लेलें छेलै, जे रास्ता पकड़ी के तीन दिन पहिले ऊ यहाँ ऐलों छेलै। अभी तें गोधूली बेराहौ नै होलों छेलै; डेढ़ कोस नापाड़े में कर्ते समय लागतियै, तभियो सत्ती आपनों चाल नरम नै करलें छेलै। सोचलकै - नाथ मंदिर होले निकली जांव, तें अच्छा।
अभी ऊ नाथ मंदिर के नगीच पहुँचलो नै होते कि ओकरों सामना में वही औघड़ ठाढ़ों दिखेले, जे कै साल पहिले ओकरों दुआरी से बिना कुछ लेले लौटी गेलो छै। सत्ती ऊ दिस बढ़तियै, कुछ बोलतियै, एकरों पहिले ऊ बोली पड़लों छेलै, "माँटी के की चिंता करवों, सबके माँटीहै में मिलना छै। अलख निरंजन !” एतना कही ऊ नाथ मंदिर के नीचे उतरी गेलों छेलै। सत्ती
