Хоть комузозе аф кайги,
Кальдяв кирдемс сон элесон,
Сякокс ванынень-муцяйнень
Морнень мархта тунь мялезост.
Ламонц монь лацон муцяфнень
Токтогул петнесь мяльняснон,
Азондсть мзолдозь панцефне
Паровалхт разнай кяльняса.
Содазь синь, што чёфксан мон,
Хоть мон тожа аф волясан, —
Токтогулть тяни содасазь.
Комузозень аварьгодсть
Пиксоф шабакс струнанянза,
Шиста-шис моронь морама
Чудесанень мон ламонзань.
Судьбазе монь кодама?
Мзярда мондейне паваз сай?
Мон няйса эсь сельмосон:
Вачашить эзда кельмосихть,
Лисихть ялганень ваймосна;
Пондснон ёрясазь ямас синь;
Модать лангозост валясазь
Стака, оцю кшни каймоса.
Аеркс тя вастса пингозе
Йотни; седизе шокшеви.
Морсень морот, мон чёфксолень, —
Тяни аш нльне лемозе.
Туманга туй мялезе,
Шары, сязеви, модав прай;
Эх, мзярда од ков лаца
Тейне меки ся эряфсь сай?
Тевса мучендаф ломаттне
Вачашить эзда прашендыхть.
Сисем шити весть ваномонк
Важнай оцюня сашенды.
Азондсть тейнза колган монь
И вот валса весть ёлгамань,
Пялязкс уромкшнесь лангозон.
Сон комузозень фатязе
Кяжиста кядьстон монь,
Кевс эрьхтезе... Ськамонян
Темницав монь пякстамань.
Сявса кодак комузозень, —
Ольксихть морозти куфкснихне,
Ризфса-пичефксса сиредсь ни
Тинь киргизскяй чёфксонте.
