Пряняснон пезома
Ляи сувайхть.
Ваймама пуромсть сей
Стирхне и цёратне,
Зойфу круг однятне
Келесост тисть;
Палсезе ляйнять синь
Весяла моросна,
Лангстонза рахазне
Тяшттненди лийсь.
Шудезевсь вайгялец
Велень гармошканять,
Бархатнай берягть лангс
Валозне-валсь;
Морть эзда вирське мянь
Радостна тошказевсь,
Ляйняса, ланганя
Чофиесть калхт.
Стирьхне кштихть, морть коряс
Лакафтыхть горяйнят,
Паляснон алда синь
Од мяштьсна тарсть,
Етксост синь цёратне
Шавсть пильгонь ёрязне,
Долгада тёждяста
Отькорьхне шарсть.
Седизе пара вал
Морась ня кштихненди:
„Лацкас, шумбраняста
Келькседа, отт.
Штоба май пингонте
Сиредезь тихтедель
Инголент панчфуста,
Тячиень онкс“.
Мазыста щаф-каряф
Менельнясь парьхциса,
Золодонь сельмонзон
Цють чипоряй.
Куду тусть ялгане,
Курок ни варьхмоди,
Блесткав лугать вельксса
Морня нюряй.
