| М. Горький.
|
| ТЯДЯСЬ |
| Омбоце пялькссь |
Шить лядыкс пингоц йотась лятфнематнень сьормав туманцост, стака сизефть эса, конац кемоста кутмордазе теланц и седиенц. Серай пятнакс комотнесь афоцька офицернясь, пиндолдсь Павелонь бронзовай шамац, пеедсть Андреень сельмонза.
Тядясь якась комнатать эзга, озсесь вальмять ваксс, ванондсь ульцяв, тага якась меки-васу, кепсезе сельме кунонц, тркстыесь, варжакснесь и мысляфтома, мезе бди вешендсь. Симсь ведьта, симоманц апак янгафтт, и ашезь валов мяштьсонза тоскань и обидань пидезь пиди коцамась. Шись кафтова керьфоль, сонь ушеткссонза ульсь содержания, а тяни сонь эздонза сембось шудесь, сонь инголенза келемсь ризфу пустышь, шерьхксь аф шарьхкодеви кизефкссь:
— Мезе ина тяни?
Сась Корсуновась. Сон яфиезень кядензон, иватькшнесь, авардьсь и кенерькшнесь, топиезень пильгонзон, мезе бди мярьгондсь и надияфнесь, кинди бди гразясь. Сембе тя ашезе токсе тядять седиенц.
— Аха! — кулезе сон Марьянь крикондайнь вайгяленц. — Токазь, таки, народть седиенц. Лоткась фабрикась, — марнек лоткась!
— Да, да! — прянь шуказь сетьмоняста корхтась тядясь, а сельмонза сонь апак чипоряк ванондозь сянь, мезсь арась ни йотафокс, тусь сонь эздонза Андреень и Павелонь мархта марса. Авардемать сон ашель авардев, — седиец кирендсь, коськсь, трванза станя жа коськсть, и кургсонза ашесть сатне селькне. Трнатсть кяденза, копорьстонза мелкай трнатомаса тркстыесь кедец.
Илять састь жандарматне. Тядясь васьфтезень синь апак дивандак, аф пелезь. Синь сувасть шумназь, и синь эсост ульсь мезе бди кеняртьф, довольнай. Тюжа шама офицерсь корхтась пеень низелфтозь:
— Ну-с, — кода эрятада? Колмоцеда васетькшнетяма минь, а?
Тядясь мезевок ашель корхта, трванзон нолсезень коське кяленц мархта. Офицерсь корхтась лама, поучительна, эста тядясь марязе, што офицерти приятна корхтамс. Но сонь валонза ашесть пачкотькшне тядяти, ашесть шоря теенза. Аньцек мзярда сон мярьгсь:
— Тон тонць виноватат, матушкай, кда ашеть машта эсь цьорацень тонафтомонза шкайть и оцязорть кельгома...
Кенкш лангса ащезь и лангозонза апак ватт тядясь потмораста отвечась:
— Да, — тейнек судьятне — иттне. Синь лувсамазь минь виноватокс мес минь кадондсаськ синь тяфтама ки лангса.
— Мезе? — ивадсь офицерсь. — Сяда кайгиста!
— Мон корхтан: судьятне — иттне! — куфкстозь тага азозе тядясь.
Эста офицерсь корхтазевсь мезень бди колга вишкста и кяжиста, но сонь валонза шарондсть перьфпяльге, тядять ашезь токсе.
Понятойкс ульсь Корсунова Марьясь. Сон ащесь тядять ваксса, но лангозонза ашель ван, и мзярда офицерсь пшкятькшнесь тейнза кодамовок кизефксса, сон тейнза эряскодозь и алу сюконякшнезь, фкя лаца отвечакшнесь:
— Аф содаса, ваше благородие! Авась мон аф образованнаян, вятян торговля, эсь глупайшидон мезевок аф содан...
