|
| |||
 | ||||
| (СВЕТЛЫЙ ПУТЬ) | ||||
| Март ков 1932 к. 3 № |
| Нингя сяда пяк таргасаськ трудяй авать социалистическай строительствати |
Сембемасторлангонь коммунистическай авань шить 22-це годовщинац йотафневи ся пингоня, мзярда минь советонь масторсонок партиянь и сонь ленинскай ЦК-анц большевиконь кемя руководстванц вельдя сатомя пяк оцю сатфкст социализмань тиемаса и вете кизонь плантть ниле, а промышленностень кой кона юрхнень эса 3 и 2½ кизоста пяшкодемаса.
Нят пяк оцю сатфксне ниньге весть тейнек няфнесазь партиять генеральнай китьксонц цебярь шинц, нят сатфксне ниньгя весть корхтайхть рабочай клазть и трудяй сьора види колхозникнень ся пяк оцю творческай кепотьф мяленц (энтузиазманц) колга, конац ульсь няфтьф работаса.
Нят сатфкснень сатомаса аф йомбла васта заньцесть и заньцихть трудяй аватне конат производстваса и велень хозяйстваса работамстост оцю мяльса йотафнезь трудонь од метоттнень-социалистическай фкя фкянь йотамать и ударничествать, синь сидеста арсесть инициаторкс нят од метоттнень работати сувафтомаса.
Социализмать инькса тюремаса шиста-шис коль касы авать ролец, кода социалистическай обществань полноправнай и активнай строителень.
Минь советонь масторсонок авань труць заньци пяк оцю васта народонь хозяйствать сембе юронзон эзга. Кда сявсаськ промышленностть, то минь няйсаськ, што тоса сембоц авада работай 2 миллиотт 142 тьожань ломань транспорца 207 тьожань ломань, строительстваса 403 тьожань ломань. Марнек минь Советонь союзсонок работай и служай 16 миллион, 864 тьожань ломань, конатнень эзда авада 5 миллиотт 390 тьожань ломань.
Кда сявсаськ минь Мокшэрзянь областенеконь, то тяса тяфта-жа минь няйхтяма оцю сатфкст авать соц. строительствати таргамаса. Аф ваномок сянь ланкс, што мокшэрзянь авась ульсь пяк люпштаф оцю азорнь властть мархта, аф ваномок сянь ланкс, што сон культурнай ширьдя лятф пяк фталу, сон танга сяка марса алятнень мархта кярьмочни социалистическай строительствати.
1930 це кизоня минь Мокшэрзянь обласьцонок промышленносьца авада работась 324 ломань, 1931-це кизоня промышленносьца ни работась 1443 ава и торфоразработкатнень эса 2745 ава. Нят цыфратне пяк лац няфнесазь сянь, конашкава вишкста трудяй авась тарксеви вишкста касы социалистическай строительствати, конашкава трудяй авась тарксеви эсь куд йотконь стака и аф производительнай тевонзон эзда марстонь социализмань тиема тевти.
Тяконь шовор трудяй авась коль вишкста и вишкста тарксеви велень хозяйствать социалистическайкс одукс тиеманцты. Трудяень авась велеса арси васеньце рятти сплошной коллективизациять инькса тюремаса и тянь вельдя кулачествать, кода классонь машфтомаса.
Лама ава колхозонь производстваса работайхть руководящай работава (правлениянь председателькс, полеводкс бригадиркс). Лама ава арсихть васеньце колхозонь арганизаторкс.
Пяк лама ава оцю мяльса работайхть государствань управлениянь оргаттнень эса. Сембе Союзса 300 тьожань ава ащихть советонь исполкомонь и ревизионнай комиссиянь членкс; 500 тьожаньда лама ава таргафт советтнень работас предприятиятнень, совхоснень, колхоснень эзга секциятнень, производственнай совещаниятнень, батрацко-бедняцкай и депутатскай группатнень вельдя.
Тяста няеви кода тевса йотафневихть эряфс Ленинтть валонза — „эрь кухаркась маштоза государствать ланкса управлениянь вятема.“
Работницатнень и колхозницатнень производственнай активносьцнон касоманц мархта ряцок касы и синь политическай активносьцновок.
1930-це кизонь 1 це январьста минь Союзсонок партияса авада ульсь 219.338 ломань, али 14 процент сембе партиянь члеттнень и кандидаттнень эзда, а 1931-це кизонь 1-це июльти синь эздост партияса уль 383.149 ломань, али 15 6* процент.
Минь Мокшэрзянь обласцонок 1930-це кизоня партияв таргафоль авада 275 ломань, 1931-це кизоня 517 ломань. Но аф ваномок сембонь тянь ланкс, эряви азомс, што аватне партияв тарксевихть ниньгя афсатомшка и синь партияв таргамасост работась эряви вишкотемс.
1
