Миннь кизефнесамазь мезе „юрта“ валсь?
Кучан рисунка, омба ширесонза колма кяльса (рузкс, французкс и немецокс) сьорматф „юрта“ Минь, Сире-Синдру валесонок юрта мярьгихть пирьфти и куд вастти. Аф мокшонь-ли те валсь?
Тултаев.
Мокша-эрзянь Кяльса лама вастова повонди вал „юрта“, лама ломатть те валоть азонцазь кие кода машхты.
„Юрта“ валось сиря пингень и сон повонды лама кяльса; татаронь, башкирань, киргизонь, туркань, рузонь, французонь, немцень, мокшань и лиянь.
Туркакс Юрталемсь: куд сембе постройкатнень мархта, участка, мода область, царства и лия. Турцияса лисенди журнал „тюрок юрта“ лиякс мерьгомс: „туркань государства“.
Рузонь кяльса „Юрт“ „Юрта“ валсь стане же лувондови кода турцияса. Сире оцю азоронь каготтне тяфта ушодовольть; „от царя и великаго князя Михаила Феодоровича всея руси на Дон в нижние и верхние Юрты“ и ста тов. Сире кизонь тештфса (летопизса) фалу васедат азфт: „Астрахань Темира царев юрт“, „Крым Тохтамышев юрт“, „Бухарский юрт“, Хивинский* юрт“. Юрта мергихть чукчатне, алеутне, тунгусне, самоедтне и лият шалашненди, коса эряхть.
Францусня и немецня тяфтама шалашненди тоже мергихть „Юрта“.
Мокшотнень и эрзятнень корхтамаса „Юрта“ мяргоньдихть, — кутти и сембе калдазон и лия пиряф мархта, „Сонзе Юртозо.“ — Сойнь юрхтоц цебярь.
Ученай ломаттне корхтахть што „Юрт“ и „Юрта“ валсь тюркскай, конаста севозь сембя лия нароттне. Но монь содамазень коряс те валсь мокшерзянь, сонь ушотксац Юр валста; рузск основание, корень. Юрыямсь — нолдан коретть — пустить корни, основаться. „Юрт“ стама васта коза ломанць строяй, эряма васта. Кемоксневи те вастти, нолдай юрхт.
М. Е. Евсеев.
