Lo sieze comte de Foix, vescomte de Castelbo (Roger-Bernard II)
Mossen Roger Bernat lo Gran foc fil de Mossen Ramond Roger et de dona Phelippa, foc marit de Madona Brunissen de Castelbo et foc feyt comte l'an MCCXXIII et vescomte de Castelbo. Et foc valen cavalier et en armas valeros, et era del homenatge del comte Ramond de Tolosa per lo Comtat de Foix; losquals se avian promes et convengut de se adjudar et secorer et de no fer pax la un sans l'autre ab la Gleisa ne ab lo rey de Fransa, per la iretgia que tenian, que dessus es dita. Et apres per lo papa Innocen et per lo rey de Fransa foc dada la conquesta al comte Simon de Montfort, que conquestec lo comtat de Tolosa et Albeges, Comenges, Foix, Carcasses, Bederies. Lo darrier foc assietat al castel de Muret per lo rey En Peyre d'Arago, los comtes de Tolosa, de Foix, de Comenges et de Palhas, en l'an MCCXII. Et foren C mil combatans contra lo comte de Montfort et, ab mil combatans, los escoffic touts et auciguec lo ren En Peyre d'Arago et lo traynec a la coa de son cabailh entro la punta de Garona et de Arieja; et foc gran la mort dels iretges. Lo comte de Tolosa et lo comte de Foix s'en fugin; et lo comte de Montfort abatec las muralhas et fortalesas de Tolosa, et fec gran destruccio en las fortalesas del Comtat de Foix et cremec tout lo borg de Foix. Mossen Roger Bernat se deffendec dins lo castel de Foix que jamais lo comte de Montfort no y a pogut fer dampnatges. Avans lo comte de Foix li auciguec son fraire et dos cavalhers pres de Varilhas, dementre que abatian la fortalesa de Mengos, que era al Pèch darrer Mongauzy, et apres li anec aussi grans gens costa Lesinha en Narbones et se retrejaguec a Lordat. Et apres lo comte de Montfort, ab lo restan de sa gent, s'en tornec en Fransa; et li foc confermada la conquesta per lo papa et per lo rey, et apres no tardec gayre a morir.
Lo rey Sant Loys demorec heritier et venguec a Tolosa, y tenguec lo seti et aguec per gran afam, et apres conquestec Marmanda et tout lo pays entro Avigno, et tout Avigno taves, et Proensa, que aussi ben eran iretges, et derroguec las muralhas d'Avigno; et tornen a la obediensa del legat del papa. Et apres lo rey s'en tornec a Paris ab lo comte de Tolosa per l'accord del matrimoni de la filha del comte de Tolosa ab Alfonso, fray del rey. Et per aqui es vengut la successio al rey del comtat de Tolosa et dugat de Narbonna.
Lo comte de Tolosa trametec sas lettras al comte de Foix que lo absolvia del sagramen del homenatge et que se fessa home del rey et fessan pax am la Gleisa. Et lo comte de Foix no si volguec accordar, avans lo rey li aguec a fer guerra. Et foc trames lo cardenal de Sant Angel, legat de part del papa et del rey de Fransa, per lo absolver et dispensar del sagramen et de toutas la malas feytas al loc de Sant Johan de Verges on foren, ab lo legat, Mossen Pey, archevesque de Narbonna, Folco, avesque de Tolosa, C. de Carcassonna, Guilhem de Tornacien, C. de Coserans, avesques, Bernat de la Grassa, abbats, Mossen Pey de Calames, vicegeren del cardinal de Sant Angel, Mossen Mathieu de Malhac, vicegeren del rey Loys de Fransa, Mossen Guilhem de Levis, mareschal de Fransa, Lambert de Lator et tropes autres clercs et lays, adjustats a Sant Johan de Verges. Et aguda que aguec la absolucio del legat et sagelada de touts los prelats, lo comte de Foix prometec de anar fer l'homenatge al rey et, per segura causa, metec a la ma del rey lo castel de Foix, lo castel de Montgailhard, lo castel de Montreal, lo castel de Vicdessos, lo castel de Lordat. Et apres anec fer son homenatge, lo premier que foc feyt al rey de Fransa per lo comtat de Foix, a Molis, lo vingt noviesme de septembre l'an MCCXXIX. Et lo rey li donec mil liuras de rendas perpetuals assetiadas en lo pays de Carcasses, so es en las villas de Arsens, Alairac, Preixa, Fontia et en lo termini de la Valeta entro a la valor de la dita renda, et la resta que se trobara et assignara en l'avesquat de Carcassonna, fora las villas de Carcassonna, del Mas, de Montreal, de Cabers et de Saixac, ainsy que appar per las lettras reals ab cordas de seda roja et verda ab lo gran sagel vert en penden. Et apres aucun temps aquestas mil liuras foren per lo comte de Foix assignadas a sa sor, Madona Esclarmonda, regina de Malhorca, molher del rey En Jacmes. Et Mossen Simo Brisatesta, seneschal de Carcassonna, ac pres jus la ma del rey et n'a demorat pleyt a la cort de Parlamen a Paris.
Lo comte de Foix perdec l'heritatge de Carcassonna et de Bezes et de las marcas de la bassa Proensa per causa de ladita iretgia, car lo comte de Montfort aguec la conquesta don lo rey a agut la successio, et aussy ben de las autras terras de Corcorbes et aussy ben de l'homenatge que li fasia lo seignor de Mirapeys. Car Mossen Guilhem de Levis, mareschal de Fransa, conquestec aquela terra de Mirapeys, et lo rey se retenguec l'homenatge; et per so, al comte de Foix no demorec sinou lo comtat de Foix, loqual ab l'espasa avia deffendut, et per aquel fec l'homatge tan solamen al rey. Et apres, en l'an MCCXXX, donec Madona Esclarmonda, sa filha, al vescomte de Cardona, et donec Madona Cecila al comte d'Urgel ab XXV mil sols Molgares. Et lo comte de Cardona donec Madona Brunissen a Roger, fil del comte de Foys.
Et, en l'an MCCXXXV, foc una granda famina per tout lo realme de Fransa, que gens manjavan las herbas per los camps cum las bestias.
Et en l'an MCCXXXIX sant Loys, rey de Fransa, fec portar de Constantinobla a Paris la corona de Jesus Christ.
Aqueste Mossen Roger Bernard moric l'an MCCXLI, et foc comte dex hoeyt ans.