La Caridá de Tella

Tella ye un lugar plantificato n'o Perineyo Aragonés, mui zerca de Bielsa y Chistáu. Enguan bibe bien poca chen perque muitas familias s'en son itas per dibersos motibos a bebir t'altros puestos. Ista chen n'o berano e per las fiestas bienen ta Tella, per estar lo suyo lugar e per tener-ye recuerdos pro gratos de la suya ninneza. Un d'istes recuerdos ye la clamata «Caridá» que se bi-fa n'as fiestas e ye una zena que autualmén se i-fa n'o salón, ya que d'antes se feba a lo raso, n'a que se reparte bin e torta. Agora tos boy a contar con més detalle que ye y como ye lo que se fa n'a «Caridá». Iste costumbre biene de tiempos bien tazaga e lo nombre de «Caridá» ye perque n'aqués tiempos yeba chen muto pobre e l'Ayuntamiento compraba bin e tortas ta toz n'o lugar. Isto se i-fa lo 26 de chunio que se zelebra una fiesta n'onor a San Chuan. Iste diya se yiba ta la medodiyata ta misa ta una ilesia que ibi-ha a medio Km de lo lugar e que n'a autualidá ye famosa per estar de lo siglo XI. e per estar consagrata. Como tos ibe dezindo, ta ista ilesia se ye-iba en carrera e se deziba la misa, en rematando ista, se'n torna- ba un'altra begata en carrera ta la Ilesia de lo lugar, aon se bendeziban las tortas e lo bin. Dimpués d'ista zeremonia totas las tortas se partiban a trozos ta reparti-las de tardes n'a «Caridá», saco una u dos d'istas tortas se traixaban a trozos chicóz e se daban ta la chen, isto yera com'un aperitibo. Dimpués de tot isto, cada un s'en iba a minchar ta casa suya e cuan la tardata empezipiaba a cayer, tota la chen de lo lugar se replegaba a lo costato de la Ilesia; cada un se i-lebaba la zena e se feban corroldos per familias. Cada añada yeran dos casas las encargatas de repartir-ye las tortas, e lo bin, isto lo i-feba una presona de cada casa. Lo bin se i-lebaba n'una pichera de bardo feta asprés ta ista acuasión e con lo nombre de Tella n'un costato. Istas dos presonas, un ratet cada una, yiban pasando per toz es corroldos con la pichera, dando a la chen tot lo bin qu'en quereban. Mutas personas no eban prebato lo bin en tot l'año e alabez s'encaprinaban como cubas. Cuan toz remataban de zenar, se i-pasaba con corbillos repartindo-ye la torta, un troz u gancho (ye como se le diz) ta cada presona. Dimpués d'isto yeba baile t'aon yiba tota la chen, uns més caprins qu'altros e yeran bailando dica que beniba l'alba. Enguan en Tella ista tradizional zeremonia sigueix ensistindo conna unica diferenzia de que güé se fa enno salón n'o que més tarde se baila. Cada añada, cuan remata la «Caridá» toz asperamos que i-allegue un'altra begata lo 26 de chunio de lo siguién año: es biellos per recordar es tiempos n'es que'és yeran chobens y es chobens t'asiguir una tradizión que tanto nos cuaca e asperamos que se i-asiguexca conserbando d'igual, ta i-pode-lo pasar ta las chenerazións benideras tal e como dica agora se ye isto fendo.