Ⲫⲏⲉ̅ⲑ̅ⲩ̅ ⲓⲱⲁⲛⲛⲏⲥ ⲡⲓⲉⲃⲟⲗϧⲉⲛ ⲫⲁⲛⲓϫⲱⲓⲧ

Ϯⲙⲁⲣⲧⲩⲣⲓⲁ ⲛ̀ⲧⲉ ⲡⲓⲁⲅⲓⲟⲥ Ⲓⲱⲁⲛⲛⲏⲥ ⲡⲓ ̀ⲙⲃⲉⲣⲓ ⲡⲓⲉⲃⲟⲗϧⲉⲛ ⲫⲁⲛⲓϫⲱⲓⲧ ϧⲉⲛ ⲧ̀ⲭⲱⲣⲁ ⲙ̀Ⲡⲟⲩϣⲓⲛ ⲉⲧⲁϥϫⲟⲕⲥ ⲉⲃⲟⲗ ⲛ̀ⲥⲟⲩ ⲙ̀ⲡⲓⲁⲃⲟⲧ Ⲡⲁϣⲟⲛⲥ ϧⲉⲛ ⲡ̀ⲉ̀ϩⲟⲟⲩ ⲙ̀ⲡ ϧⲉⲛ ϯⲁϫⲡⲊ ⲧⲉ ⲛⲁϩⲣⲁϥ ⲙ̀ⲡⲟⲩⲣⲟ Ⲉⲗⲭⲉⲙⲏⲗ ⲡϣⲏⲣⲓ ⲙ̀ⲡ̀ⲟⲩⲣⲟ Ⲉⲗⲁⲧⲉⲗ ⲡⲓⲡⲉⲣⲥⲏⲥ ⲁⲣⲁⲃⲟⲥ ϧⲉⲛ ⲡ̀ⲑ̀ⲣⲟⲛⲟⲥ ⲙ̀ⲡⲓⲃⲁⲛ ϩⲓϫⲉⲛ ⲛⲉⲛⲥ̀ⲫⲟⲧⲟⲩ ⲙ̀ⲫ̀ⲓⲁⲣⲟ ⲛ̀ⲧⲉ ⲭⲏⲙⲓ ϧⲉⲛ ⲟⲩϩⲓⲣⲏⲛⲏ ⲛ̀ⲧⲉ Ⲫϯ ⲁⲙⲏⲛ.

ⲛⲓⲥϩⲓⲙⲓ ⲛⲉⲙ ⲛⲓϧⲣⲟϯ ⲉ ⲫⲓⲁⲣⲟ ⲡⲁⲣⲁ ⲫⲁⲛⲓϫⲱⲓⲧ

Ⲥⲱⲧⲉⲙ ⲙ̀ⲫⲟⲟⲩ ⲱ ⲛⲁⲙⲉⲛⲣⲁϯ ⲉⲧ̀ⲥ̀ⲙⲏ ⲙ̀ⲡⲓⲉⲣⲟⲯⲁⲗⲧⲏⲥ Ⲇⲁⲩⲓⲇ ⲉϥⲉⲣⲯⲁⲗⲓⲛ ⲛⲉⲙⲁⲛ ⲉϥϫⲱ ⲙ̀ⲙⲟⲥ. ϫⲉ ⲑⲟⲩⲓⲛⲁⲙ ⲙ̀Ⲡⲟ̅ⲥ̅ ⲁⲥⲓ̀ⲣⲓ ⲛ̀ⲟⲩϫⲟⲙ, ⲑⲟⲩⲓⲛⲁⲙ ⲙ̀Ⲡⲟ̅ⲥ̅, ⲡⲉⲧⲁⲥϭⲁⲥⲧ, ⲑⲟⲩⲓⲛⲁⲙ ⲙ̀Ⲡⲟ̅ⲥ̅, ⲁⲥⲓ̀ⲣⲓ ⲛ̀ⲟⲩϫⲟⲙ, ⲛ̀ϯⲛⲁⲙⲟⲩ ⲁⲛ ϫⲉ, ⲁⲗⲗⲁ ϯⲛⲁⲱⲛϧ, ⲟⲩⲟϩ ⲛ̀ⲧⲁⲥⲁϫⲓ ⲛ̀ⲛⲓϩ̀ⲃⲏⲟⲩⲓ ⲛ̀ⲧⲉ Ⲡⲟ̅ⲥ̅. ϧⲉⲛ ⲟⲩⲥ̀ⲃⲱ ⲅⲁⲣ ⲁϥϯⲥ̀ⲃⲱ ⲛⲏⲓ ⲛ̀ϫⲉ Ⲡⲟ̅ⲥ̅ ⲟⲩⲟϩ ⲙ̀ⲡⲉϥⲧⲏⲓⲧ ⲉⲧⲟⲧϥ ⲉϥ̀ⲙⲟⲩ. ⲁⲙⲱⲓⲛⲓ ⲧⲏⲣⲟⲩ ⲙ̀ⲫⲟⲟⲩ ⲱ ⲛⲓⲡⲓⲥⲧⲟⲥ ⲟⲩⲟϩ ⲛⲓϣⲏⲣⲓ ⲛ̀ⲧⲉ ⲃⲁⲡⲧⲓⲥⲙⲁ ϩⲓⲛⲁ ⲛ̀ⲧⲉⲛϥⲁⲓ ⲙ̀ⲡⲓⲛⲁϩⲃⲉϥ ⲉⲧϩⲟⲗϫ ⲛ̀ⲧⲉ ⲡⲉⲛⲥ̅ⲱ̅ⲣ̅ ⲛ̀ⲁⲅⲁⲑⲟⲥ ⲟⲩⲟϩ ⲛ̀ⲁⲗⲏⲑⲓⲛⲟⲥ ⲛ̀ⲛⲟⲩϯ ⲉⲧⲱϣ ⲉⲣⲟⲛ ϩⲓ ⲡⲓⲉⲩⲁⲅⲅⲉⲗⲓⲟⲛ ⲉ̅ⲑ̅ⲩ̅ ⲉϥϯⲥ̀ⲃⲱ ⲛ̀ⲛⲓⲣⲉⲙⲛ̀ϩⲏⲧ ⲉϥϫⲱ ⲙ̀ⲙⲟⲥ ϫⲉ ⲁⲙⲱⲓⲛⲓ ϩⲁⲣⲟⲓ ⲟⲩⲟⲛ ⲛⲓⲃⲉⲛ ⲉⲧϧⲟⲥⲓ ⲟⲩⲟϩ ⲉⲧϩⲟⲣϣ ϧⲉⲛ ⲛⲟⲩⲉⲧⲫⲱⲟⲩⲓ ⲟⲩⲟϩ ⲁⲛⲟⲕ ⲉⲑⲛⲁϯⲙ̀ⲧⲟⲛ ⲛⲱⲧⲉⲛ ϧⲉⲛ ⲟⲩⲙⲉⲧϥⲁⲓⲣⲱⲟⲩϣ ⲛⲉⲙ ⲟⲩϩⲏⲧ ⲉϥⲥⲟⲩⲧⲱⲛ ⲙⲁⲣⲉⲛϥⲁⲓ ⲙ̀ⲡⲓⲛⲁϩⲃⲉϥ ⲉⲑⲛⲁⲛⲉϥ ⲛ̀ⲧⲉ ⲡⲓⲛⲁϩϯ ⲙ̀ⲡⲁⲓⲅⲉⲛⲛⲉⲟⲥ ⲛ̀ⲧⲱϫⲓ ⲙ̀ⲃⲉⲣⲓ ⲉⲧⲁϥⲫⲓⲣⲓ ⲉⲃⲟⲗϧⲉⲛ ⲛⲓⲁⲩⲗⲏⲟⲩ ⲛ̀ⲧⲉ ⲡⲓⲙⲉⲛⲣⲓⲧ Ⲓⲏ̅ⲥ̅. ⲛⲁⲓⲙⲉⲩⲓ ⲉⲒⲱ̅ⲁ̅ ⲡⲓⲧⲱϫⲓ ⲙ̀ⲃⲉⲣⲓ ⲉⲧⲁϥⲫⲓⲣⲓ ⲉⲃⲟⲗϧⲉⲛ ⲛⲁⲓⲉϩⲟⲟⲩ ⲙ̀ⲫ̀ⲣⲏϯ ⲛ̀ⲟⲩⲃⲱ ⲛ̀ⲕⲣⲓⲛⲟⲛ. ⲁⲗⲏⲑⲱⲥ ⲫⲁⲓ ⲡⲉ ⲡⲓϧⲁⲉ ⲛ̀ⲉⲣⲅⲁⲧⲏⲥ ⲛ̀ⲧⲉ ϯⲁϫⲡⲓ̅ⲁ ⲉⲧⲁϥⲓ̀ ϧⲉⲛ ⲟⲩⲓⲏⲥ ⲁϥϭⲟϫⲓ ⲉⲧϩⲏ ⲁϥϩⲱⲗⲉⲙ ⲙ̀ⲡⲉϥⲃⲉⲭⲉ ϧⲉⲛ ⲟⲩⲙⲉⲧϫⲱⲣⲓ ⲟⲩⲟϩ ⲁϥⲣⲁϣⲓ ⲛⲉⲙⲁϥ ⲛ̀ϫⲉ Ⲡⲟ̅ⲥ̅ ⲙ̀ⲡⲓⲟ̀ϩⲓ ⲛⲉⲙ ⲡⲓⲕⲟⲛⲟⲙⲟⲥ ⲛⲉⲙ ⲡⲓⲉⲡⲓⲧⲣⲟⲡⲟⲥ ⲉⲩⲥⲟⲡ. ⲛⲓⲕⲉⲉⲣⲅⲁⲧⲏⲓⲥ ϩⲱⲟⲩ ⲁⲩⲱⲣⲉⲙ ⲛ̀ⲥⲱϥ ϧⲉⲛ ⲟⲩϭⲓϣϣⲱⲟⲩ ⲛⲉⲙ ⲟⲩⲙⲉⲓ ⲙ̀ⲡ̅ⲛ̅ⲁ̅ⲧⲓⲕⲟⲛ. ⲁⲗⲏⲑⲱⲥ ⲫⲁⲓ ⲡⲉ ⲡ̀ϣⲏⲣⲓ ⲛ̀ⲧⲉ ⲙ̀ⲉⲧⲁⲧⲥⲱⲧⲉⲙ ⲉⲧⲁϥϭⲓ ⲛ̀ϯⲟⲩⲥⲓⲁ ⲛ̀ⲧⲉ ⲡⲉϥⲓⲱⲧ ⲟⲩⲟϩ ⲁϥϫⲱⲣ ⲙ̀ⲙⲟϥ ⲉⲃⲟⲗ ⲛⲉⲙ ⲛⲓⲡⲟⲣⲛⲟⲥ ⲛⲉⲙ ⲛⲓⲣⲉϥⲉⲣⲛⲟⲃⲓ ⲟⲩⲟϩ ⲁϥⲉⲣϧⲁⲉ ⲁϥϩ̀ⲕⲟ ⲟⲩⲟϩ ⲁϥⲉⲣϩⲏⲕⲓ ⲉⲁϥϧⲱⲛⲧ ⲙ̀ⲫ̀ⲙⲟⲩ ⲟⲩⲟϩ ⲁϥⲧⲁⲥⲑⲟϥ ϩⲁ ⲡⲉϥⲓⲱⲧ ⲁϥϣⲟⲡϥ ⲉⲣⲟϥ ϧⲉⲛ ⲟⲩⲣⲁϣⲓ. ⲫⲁⲓ ⲡⲉ ⲡⲓⲉⲥⲱⲟⲩ ⲉⲧⲁϥⲥⲱⲣⲉⲙ ⲉⲃⲟⲗ ϩⲓⲧⲟⲧϥ ⲙ̀ⲡⲉϥⲙⲁⲛⲉⲥⲱⲟⲩ ⲁϥϭⲟϫⲓ ⲛ̀ⲥⲱϥ ϧⲉⲛ ⲟⲩϥⲓⲣⲱⲟⲩϣ ϣⲁⲛⲧⲉϥϫⲉⲙϥ ⲁϥϣⲟⲡϥ ⲉⲣⲟϥ ϧⲉⲛ ⲟⲩⲣⲁϣⲓ ⲛⲉⲙ ⲟⲩⲟⲩⲛⲟϥ. ⲫⲁⲓ ⲡⲉ ⲡⲓϧⲏⲃⲥ ⲉⲧⲉⲣⲟⲩⲱⲓⲛⲓ ϧⲉⲛ ⲟⲩⲙⲁ ⲛ̀ⲭⲁⲕⲓ ϣⲁⲛⲧⲉ ⲡⲉϥⲟⲩⲱⲓⲛⲓ ⲫⲟϩ ⲉⲛⲓⲭⲱⲣⲁ ⲧⲏⲣⲟⲩ. ⲫⲁⲓ ⲡⲉ ⲡⲓⲛⲁⲫⲣⲓ ⲉⲧⲥⲉⲡⲓ ⲉⲃⲟⲗϧⲉⲛ ⲡⲓⲥⲙⲁϩ ⲁϥϯⲟⲩⲧⲁϩ ⲙ̀ⲫ̀ⲣⲏϯ ⲙ̀ⲡ̀ⲥⲉⲡⲓ ⲛ̀ϯⲃⲱ ⲛ̀ⲁⲗⲟⲗⲓ ⲧⲏⲣⲥ. ⲫⲁⲓ ⲡⲉ ⲡⲓⲥ̅ⲗⲓⲧⲏⲥ ⲛ̀ⲧⲁⲫⲙⲏⲓ ⲉⲧⲉ ⲙ̀ⲙⲟⲛ ⲇⲟⲗⲟⲥ ⲛ̀ϧⲏⲧϥ ⲟⲩⲇⲉ ⲕⲁⲕⲓⲁ ⲟⲩⲇⲉ ϭⲓⲛϫⲟⲛⲥ ⲕⲁⲧⲁ ⲡ̀ⲥⲁϫⲓ ⲙ̀Ⲡⲟ̅ⲥ̅. ⲫⲁⲓ ⲡⲓⲃⲱⲕ ⲉⲑⲛⲁⲛⲉϥ ⲉⲧⲁϥⲧⲁⲥⲑⲉ ⲡ̀ϩⲁⲧ ⲛ̀ⲧⲉ ⲡⲉϥⲟ̅ⲥ̅ ⲉϥⲕⲏⲃ ⲛ̀ⲍ̅ ⲛ̀ⲥⲟⲡ ⲙ̀ⲡⲉⲙⲑⲟ ⲛ̀ⲛⲏⲉⲧⲉⲛⲟⲩϥ ⲧⲏⲣⲟⲩ. ⲫⲁⲓ ⲡⲉ ⲡⲓⲛⲓϣϯ ⲛ̀ⲥⲁ ⲡⲓⲁⲛⲁⲙⲏⲓ ϣⲁⲛⲧⲉϥϫⲓⲙⲓ ⲙ̀ⲡⲁⲓⲛⲁⲙⲏⲓ ⲛ̀ⲁⲗⲏⲑⲓⲛⲟⲛ ⲉⲧⲉ ⲫⲁⲓ ⲡⲉ Ⲉⲙⲙⲁⲛⲟⲩⲏⲗ ⲡⲓⲱⲛⲓ ⲉⲧⲟⲛϧ. ⲫⲁⲓ ⲡⲉ ⲡⲓⲑⲱϩⲉⲙ ⲛ̀ⲕⲁⲑⲁⲣⲓⲧⲱⲥ ⲉⲧⲁϥⲉⲣⲫⲟⲣⲓⲛ ⲛ̀ϯϩⲉⲃⲥⲱ ⲛ̀ⲟⲩⲱⲓⲛⲓ ⲟⲩⲟϩ ⲛ̀ⲁⲧⲑⲱⲗⲉⲃ ⲟⲩⲟϩ ⲛ̀ⲁⲧⲁϭⲛⲓ ⲙ̀ⲡⲉⲙⲑⲟ ⲛ̀ⲛⲏⲉⲧⲑⲁϩⲉⲙ ⲧⲏⲣⲟⲩ. ⲫⲁⲓ ⲡⲉ ⲫⲏⲉⲧⲁϥⲉⲣϣⲟⲣⲡ ⲛ̀ϩⲉⲙⲥⲓ ϧⲉⲛ ⲡⲓⲁⲣⲓⲥⲧⲟⲛ ⲙ̀ⲡⲓϩⲟⲡ ⲉⲑⲃⲉ ϫⲉ ⲁϥⲣⲁⲛⲁϥ ⲙ̀ⲡⲓⲡⲁⲧϣⲉⲗⲉⲧ ⲙ̀ⲙⲏⲓ ⲛ̀ⲉⲡⲟⲩⲣⲁⲛⲓⲟⲛ Ⲓⲏ̅ⲥ ⲡⲉⲛⲥ̅ⲱ̅ⲣ̅.

Ⲁⲙⲱⲓⲛⲓ ⲧⲏⲣⲟⲩ ⲙ̀ⲫⲟⲟⲩ ⲱ ⲛⲓⲡⲓⲥⲧⲟⲥ ⲛ̀ⲏⲣⲥⲧⲓⲁⲛⲟⲥ ⲟⲩⲟϩ ⲛ̀ϣⲏⲣⲓ ⲛ̀ⲧⲉ ϯⲉⲕⲕⲗⲏⲥⲓⲁ ϩⲓⲛⲁ ⲛ̀ⲧⲉⲛⲟⲩⲱⲣⲡ ⲉϩ̀ⲣⲏⲓ ϩⲁ Ⲡⲟ̅ⲥ̅ ⲛ̀ϣⲉⲡϩ̀ⲙⲟⲧ ⲛⲓⲃⲉⲛ ⲛⲉⲙ ⲱⲟⲩ ⲛⲓⲃⲉⲛ ⲛⲉⲙ ⲥ̀ⲙⲟⲩ ⲛⲓⲃⲉⲛ ⲟⲩⲟϩ ⲛ̀ⲧⲉⲛⲉⲣϩⲟⲩⲟ ϭⲓⲥⲓ ⲙ̀ⲡⲉϥⲣⲁⲛ ⲉ̅ⲑ̅ⲩ̅ ⲟⲩⲟϩ ⲉⲧⲥ̀ⲙⲁⲣⲱⲟⲩⲧ ⲉⲧⲉ ⲫ̀ⲓⲱⲧ ⲛ̀ⲧⲉ ⲟⲩⲟⲛ ⲛⲓⲃⲉⲛ ⲛⲉⲙ ⲡⲉϥⲙⲟⲛⲟⲅⲉⲛⲏⲥ ⲛ̀ϣⲏⲣⲓ Ⲓⲏ̅ⲥ̅ Ⲡⲭ̅ⲥ̅ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ϣⲁ ⲉⲛⲉϩ ⲛ̀ⲧⲉ ⲡⲓⲉⲛⲉϩ ⲁⲙⲏⲛ. ϫⲉ ⲁϥⲓ̀ⲣⲓ ⲛⲉⲙⲁⲛ ⲕⲁⲧⲁ ⲡⲉϥⲛⲓϣϯ ⲛ̀ⲛⲁⲓ ⲟⲩⲟϩ ⲁϥϣⲱⲡⲓ ⲛⲁⲛ ⲙ̀ⲃⲟⲏⲑⲟⲥ ⲛⲉⲙ ⲟⲩⲣⲉϥϯⲛⲟⲙϯ ⲛⲉⲙ ⲟⲩϩⲉⲗⲡⲓⲥ ⲛ̀ⲥⲏⲟⲩ ⲛⲓⲃⲉⲛ ⲟⲩⲟϩ ⲁϥⲟⲩⲱⲛϩ ⲛ̀ⲧⲉϥϫⲟⲙ ⲛⲉⲙ ⲡⲉϥⲱⲟⲩ ⲛⲉⲙ ⲛⲉϥϣ̀ⲫⲏⲣⲓ ⲉⲩⲥⲟⲡ ϫⲉ ⲁϥⲓ̀ⲣⲓ ⲛⲉⲙⲁⲛ ⲕⲁⲧⲁ ⲡⲉϥⲛⲓϣϯ ⲛ̀ⲛⲁⲓ ⲟⲩⲟϩ ⲁϥⲛⲁϩⲙⲉⲛ ⲉⲃⲟⲗϧⲉⲛ ⲟⲩϩⲟϫϩⲉϫ ϫⲉ ϧⲉⲛ ⲟⲩⲥⲏⲟⲩ ⲉϥϣⲏⲡ ⲁϥⲥⲟⲃϯ ⲛⲁⲛ ⲛ̀ϩⲁⲛⲣⲉϥⲣⲱⲓⲥ ⲛⲉⲙ ϩⲁⲛⲣⲉϥϯⲛⲟⲙϯ ϧⲉⲛ ⲑ̀ⲙⲏϯ ⲙ̀ⲡⲓⲭⲁⲕⲓ ⲁϥⲓ̀ⲛⲓ ⲙ̀ⲡⲓⲟⲩⲱⲓⲛⲓ ⲟⲩⲟϩ ϧⲉⲛ ⲑ̀ⲙⲏϯ ⲙ̀ⲡⲓⲥⲑⲟⲓⲃⲱⲛ ⲛⲉⲙ ⲡⲓⲙⲏϣ ⲛ̀ⲭⲱⲛⲥ ⲁϥⲓ̀ⲛⲓ ⲙ̀ⲡⲓⲥⲑⲟⲓ ⲙ̀ⲡⲓⲁⲣⲱⲙⲁⲧⲁ. ⲟⲩⲟϩ ϧⲉⲛ ⲑ̀ⲙⲏϯ ⲙ̀ⲡⲓⲥⲟⲩⲣⲓ ⲛⲉⲙ ⲡⲓⲥⲉⲣⲱϫⲓ ⲁϥⲓ̀ⲛⲓ ⲛ̀ϩⲁⲛⲑ̀ⲙⲏⲓ ⲛⲉⲙ ⲛⲓϧⲱⲧⲉⲃ ⲛⲉⲙ ⲛⲓⲣⲉϥⲉⲣⲛⲟⲃⲓ ⲁϥⲓ̀ⲛⲓ ⲛ̀ϩⲁⲛⲑ̀ⲙⲏⲓ ⲛⲉⲙ ϩⲁⲛⲇⲓⲕⲉⲟⲥ ⲛⲉⲙ ϩⲁⲛⲣⲱⲙⲓ ⲉⲩⲟⲩⲁⲃ ⲁⲩϣⲱⲡⲓ ⲛⲁϥ ⲛ̀ϩⲁⲛⲣⲉϥϣⲉⲙϣⲓ. ⲙⲁⲗⲓⲥⲧⲁ ⲛⲓⲫⲉⲛⲥ̀ⲛⲟϥ ⲛⲉⲙ ⲛⲓϧⲁⲧⲉⲃⲣⲱⲙⲓ ⲁⲩϣⲱⲡⲓ ⲛ̀ϩⲁⲛⲕⲗⲏⲣⲟⲛⲙⲟⲥ ⲛⲁϯⲙⲉⲧⲟⲩⲣⲟ ⲛ̀ⲧⲉ ⲛⲓⲫⲏⲟⲩⲓ ϧⲉⲛ ⲑ̀ⲙⲏϯ ⲙ̀ⲡⲓⲙⲟⲥϯ ⲁϥⲓ̀ⲛⲓ ⲛ̀ϩⲁⲛⲥ̀ⲙⲟⲩ ⲟⲩⲟϩ ϧⲉⲛ ⲑ̀ⲙⲏϯ ⲙ̀ⲡⲓⲉⲛⲧⲏϫ ⲛ̀ⲁⲧⲟⲩⲧⲁϩ ⲁϥⲓ̀ⲛⲓ ⲛ̀ϩⲁⲛⲕⲁⲣⲡⲟⲥ ⲛ̀ⲧⲉ ϩⲁⲛⲥⲏⲟⲩ ⲛ̀ϫⲁⲙⲏ ϧⲉⲛ ⲑ̀ⲙⲏϯ ⲙ̀ⲡⲓϭⲱϧⲉⲙ ⲛⲉⲙ ⲡⲓϭⲓⲛϫⲟⲛⲥ ⲁϥⲓ̀ⲛⲓ ⲛ̀ϩⲁⲛϣⲏⲣⲓ ⲛ̀ⲑ̀ⲙⲏⲓ ⲛⲁϯⲙⲉⲧⲟⲩⲣⲟ ⲛ̀ⲧⲉ ⲛⲓⲫⲏⲟⲩⲓ. ⲟⲩⲟϩ ⲁϥϭⲁⲥⲟⲩ ⲥⲁⲡ̀ϣⲱⲓ ⲛ̀ⲛⲓⲁⲅⲅⲉⲗⲟⲥ ⲕⲁⲧⲁ ⲡⲓⲛⲟⲙⲟⲥ ⲙ̀ⲃⲉⲣⲓ ⲙ̀ⲙⲉⲧⲛ̀ⲉⲗⲉⲩⲑⲉⲣⲟⲥ ⲛ̀ⲧⲉ ⲡⲉⲛⲥ̅ⲱ̅ⲣ̅ Ⲓⲏ̅ⲥ̅ Ⲡⲭ̅ⲥ̅. ⲙⲁⲣⲉⲛⲉⲣϣⲁⲓ ⲱ ⲛⲁⲙⲉⲛⲣⲁϯ ϧⲉⲛ ⲟⲩϣⲁⲓ ⲙ̀ⲃⲉⲣⲓ ⲛ̀ⲉⲕⲕⲗⲏⲥⲓⲁⲥⲧⲓⲕⲟⲛ ⲛ̀ⲧⲉⲛⲉⲣⲯⲁⲗⲓⲛ ⲛⲉⲙ ⲡⲓⲯⲁⲗⲙⲱⲇⲟⲥ ⲛ̀ⲧⲉ ⲡⲓⲡⲣⲟⲫⲏⲧⲏⲥ Ⲇⲁ̅ⲇ̅ ⲡ̀ⲟⲩⲣⲟ ⲙ̀ⲡⲒⲥ̅ⲗ̅ ⲟⲩⲟϩ ⲛ̀ⲧⲉⲛϫⲱ ⲙ̀Ⲡⲟ̅ⲥ̅ ϧⲉⲛ ⲟⲩϫⲱ ⲙ̀ⲃⲉⲣⲓ ϫⲉ ⲁⲣⲉⲡⲉϥⲥ̀ⲙⲟⲩ ϧⲉⲛ ⲧⲉⲕⲕⲗⲏⲥⲓⲁ ⲛ̀ⲧⲉ ⲛⲏⲉ̅ⲑ̅ⲩ̅ ⲫⲁⲓ ⲟⲩϣⲁⲓ ⲙ̀ⲙⲁⲣⲧⲩⲣⲓⲟⲛ ⲛ̀ⲧⲉ ⲡⲓⲁⲅⲱⲛⲟⲑⲉⲧⲏⲥ ⲙ̀ⲙⲏⲓ ⲛ̀ⲧⲉ Ⲡⲭ̅ⲥ̅ ⲫⲏⲉ̅ⲑ̅ⲩ̅ Ⲓⲱⲁⲛⲛⲏⲥ ⲡⲓⲉⲃⲟⲗϧⲉⲛ ⲫⲁⲓ ⲉⲧⲁϥⲫⲓⲣⲓ ⲉⲃⲟⲗϧⲉⲛ ⲛⲁⲓⲉϩⲟⲟⲩ ⲛⲁⲓ ⲉϩⲟⲧⲉ ⲡⲓϣⲉⲛⲓⲥⲓϥⲓ ⲛ̀ⲧⲉ ⲡⲓⲗⲓⲃⲁⲛⲟⲥ. ⲫⲁⲓ ⲉⲧⲁϥϥⲁⲓ ⲙ̀ⲡⲓⲛⲁϩⲃⲉϥ ⲉⲧϩⲟⲗϫ ⲉⲧⲉ ⲫⲁⲓ ⲡⲉ ⲡⲓ. ⲉϥⲟⲓ ⲛ̀ⲁⲧϣⲓⲡⲓ ⲟⲩⲟϩ ⲙ̀ⲡⲉϥϩⲟⲣϣ ⲉϫⲱϥ ⲟⲩⲇⲉ ⲙ̀ⲡⲉϥϧⲓⲥⲓ ⲉⲡ̀ⲧⲏⲣϥ ⲫⲁⲓ ⲉⲧⲁϥϫⲱⲕ ⲉⲃⲟⲗ ⲙ̀ⲡⲓⲟⲩⲁϩⲥⲁϩⲛⲓ ⲛ̀ⲧⲉ ⲡⲓⲣⲉϥϯⲥ̀ⲃⲱ ⲙ̀ⲙⲏⲓ Ⲡⲭ̅ⲥ̅ ⲛⲉⲙ ⲁⲛⲟⲛ ϩⲱⲛ ⲉⲧⲱϣ ⲉⲃⲟⲗ ⲉⲣⲟⲛ ϩⲓ ⲡⲓⲉⲩⲁⲅⲅⲗⲓⲟⲛ ⲉ̅ⲑ̅ⲩ̅ ⲫⲁⲓ ⲁϥⲥⲟⲑⲙⲉⲥ ⲛ̀ⲕⲁⲗⲱⲥ ⲟⲩⲟϩ ⲁϥϫⲟⲕⲥ ⲉⲃⲟⲗ ⲛ̀ⲕⲁⲗⲱⲥ ϫⲉ ⲫⲏⲉⲑⲛⲁϯϣⲓⲡⲓ ⲉⲟⲩⲟⲛϩⲧ ⲉⲃⲟⲗ ⲛⲉⲙ ⲛⲁⲥⲁϫⲓ ⲛ̀ⲛⲱⲓⲕ ⲛ̀ⲣⲉϥⲉⲣⲛⲟⲃⲓ ⲡ̀ϣⲏⲣⲓ ϩⲱϥ ⲙ̀ⲫ̀ⲣⲱⲙⲓ ϥ̀ⲛⲁϯϣⲓⲡⲓ ⲛⲁϥ ϩⲟⲧⲁⲛ ⲁϥϣⲁⲛⲓ̀ ϧⲉⲛ ⲡ̀ⲱⲟⲩ ⲛ̀ⲧⲉ ⲡⲉϥⲓⲱⲧ ⲛⲉⲙ ⲛⲉϥⲁⲅⲅⲉⲗⲟⲥ ⲉ̅ⲑ̅ⲩ̅. ⲁⲗⲏⲑⲱⲥ Ⲓⲱ̅ⲁ̅ ⲡⲓⲁⲅⲓⲟⲥ ⲙ̀ⲃⲉⲣⲓ ⲟⲩⲇⲉ ⲙ̀ⲡⲉϥϭⲓϣⲓⲡⲓ ⲟⲩⲇⲉ ⲙ̀ⲡⲉϥⲉⲣϩⲟϯ ⲟⲩⲇⲉ ⲙ̀ⲡⲉϥϣⲟϣϥ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϫⲉ ⲧⲟⲩϩⲟϯ ⲇⲉ ⲙ̀ⲡⲉⲣⲉⲣϩⲟϯ ϧⲁⲧⲉⲥϩⲏ ⲟⲩⲇⲉ ⲙ̀ⲡⲉⲣϣⲑⲟⲣⲧⲉⲣ Ⲡⲟ̅ⲥ̅ ⲇⲉ Ⲡⲭ̅ⲥ̅ ⲙⲁⲧⲟⲩⲃⲟϥ ⲛ̀ϧ̀ⲣⲏⲓ ϧⲉⲛ ⲛⲉⲧⲉⲛϩⲏⲧ. ⲡⲁⲓⲣⲏϯ ⲫⲏⲉ̅ⲑ̅ⲩ̅ Ⲓⲱ̅ⲁ̅ ⲁϥⲧⲟⲩⲃⲟ ⲙ̀ⲡⲉϥϩⲏⲧ ϧⲉⲛ Ⲡⲟ̅ⲥ̅ ⲁϥⲟⲩⲟⲛϩϥ ⲛⲁⲧϭⲓϣⲓⲡⲓ ⲙ̀ⲡⲉⲙⲑⲟ ⲛ̀ⲛⲓⲟⲩⲣⲱⲟⲩ ⲛⲉⲙ ⲛⲓⲁⲣⲭⲱⲛ ⲛⲉⲙ ⲛⲓⲣⲉϥϯϩⲁⲡ ⲛⲉⲙ ⲛⲓⲁⲣⲭⲏ ⲛⲓⲉⲝⲟⲩⲥⲓⲁ ⲟⲩⲟϩ ⲁϥⲟⲩⲱⲛϩ ⲙ̀Ⲡⲭ̅ⲥ̅ ⲉⲃⲟⲗ ⲙ̀ⲡⲟⲩⲙⲑⲟ ϧⲉⲛ ⲟⲩⲧⲟⲗⲙⲉⲥⲓⲁ ⲉϥϫⲱ ⲙ̀ⲙⲟⲥ ϫⲉ ⲁⲛⲟⲕ ⲟⲩⲭⲣⲓⲥⲧⲓⲁⲛⲟⲥ.

Ⲥⲱⲧⲉⲙ ⲱ ⲡⲓⲗⲁⲟⲥ ⲙ̀ⲡⲓⲥⲧⲟⲥ ⲟⲩⲟϩ ⲙ̀ⲙⲉⲛⲣⲁϯ ⲛ̀ⲧⲉ ⲕ̀ⲁⲑⲟⲗⲓⲕⲏ ⲛⲁⲓ ⲉⲧⲁⲥϫⲫⲟⲟⲩ ⲛ̀ϫⲉ ϯⲧⲣⲁⲓⲥ ⲉ̅ⲑ̅ⲩ̅ ⲟⲩⲟϩ ⲛ̀ⲧⲁⲧⲁⲙⲱⲧⲉⲛ ⲉⲡ̀ⲧⲁⲓⲟ ⲙ̀ⲡⲁⲓⲅⲉⲛⲛⲉⲟⲥ ⲙ̀ ̀ⲉ̅ⲑ̅ⲩ̅ ⲉⲧⲉⲛⲉⲣϣⲁⲓ ⲛⲁϥ ⲙ̀ⲫⲟⲟⲩ ϧⲉⲛ ⲟⲩϣⲁⲓ ⲙ̀ⲡ̅ⲛ̅ⲁ̅ⲧⲓⲕⲟⲛ ⲉⲧⲉ ⲡⲓⲁⲅⲓⲟⲥ Ⲓⲱ̅ⲁ̅ ⲡⲓⲃⲱⲕ ⲉⲑⲛⲁⲛⲉϥ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲟⲩⲟϩ ⲡⲓⲉⲥⲱⲟⲩ ⲉⲧⲁϥⲧⲁⲥⲑⲟϥ ⲉϯϣⲁⲓⲣⲓ ⲛ̀ⲗⲟⲅⲓⲕⲏ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϧⲉⲛ ⲡⲓⲉⲩⲁⲅⲅⲉⲗⲓⲟⲛ ⲉ̅ⲑ̅ⲩ̅ ⲉϥϫⲱ ⲙ̀ⲙⲟⲥ ϫⲉ ϣⲁⲣⲉ ⲟⲩⲣⲁϣⲓ ⲛⲁϣⲱⲡⲓ ϧⲉⲛ ⲧ̀ⲫⲉ ⲙ̀ⲡⲉⲙⲑⲟ ⲛ̀ⲛⲓⲁⲅⲅⲉⲗⲟⲥ ⲛ̀ⲧⲉ Ⲫϯ ⲉϫⲉⲛ ⲟⲩⲣⲉϥⲉⲣⲛⲟⲃⲓ ⲛ̀ⲟⲩⲱⲧ ⲉϥⲉⲣⲙⲉⲧⲁⲛⲓⲟⲛ ⲉϩⲟⲧⲉ ⲡⲓϥ̅ⲑ̅ ⲛ̀ⲑ̀ⲙⲏⲓ ⲉⲧⲉ ⲛ̀ⲥⲉⲉⲣⲭⲣⲓⲁ ⲁⲛ ⲙ̀ⲙⲉⲧⲁⲛⲟⲓⲁ ⲉϣⲱⲡ ⲇⲉ ⲁⲣⲉϣⲁⲛ ⲛⲓⲁⲅⲅⲉⲗⲟⲥ ⲉⲧϧⲉⲛ ⲧ̀ⲫⲉ ⲛⲉⲙ ⲟⲩⲭⲱⲣⲟⲥ ⲉⲩⲉⲣⲁϣⲓ ⲛⲉⲙ ⲡⲁⲓⲟⲩⲁⲓ ⲛ̀ⲟⲩⲱⲧ ⲛ̀ⲣⲉϥⲉⲣⲛⲟⲃⲓ ⲉⲧⲁϥⲧⲁⲥⲑⲟ ϫⲉ ⲁⲩⲛⲁⲩ ⲉⲧⲉϥⲙⲉⲧⲁⲛⲟⲓⲁ ⲛⲉⲙ ⲡⲉϥⲟⲩⲱⲛϩ ⲉⲃⲟⲗ ⲛ̀ⲁⲧϣⲓⲡⲓ ⲟⲩⲇⲉ ⲛ̀ⲁⲧϩⲟϯ ⲥ̀ϣⲉ ⲛⲁⲛ ⲁⲛⲟⲛ ϧⲁ ⲛⲓⲣⲉⲙⲛ̀ⲕⲁϩⲓ ⲛ̀ⲥⲁⲣⲕⲓⲕⲟⲛ ⲛ̀ⲧⲉⲛⲉⲣϣⲁⲓ ⲛⲉⲙ ⲡⲉⲛϣ̀ⲫⲏⲣ ⲛ̀ⲥⲁⲣⲕⲓⲕⲟⲛ ⲫⲁⲓ ⲉⲧⲁϥϯ ⲙ̀ⲡⲉϥⲥⲱⲙⲁ ⲉⲛⲓⲇⲓⲙⲱⲣⲓⲧⲏⲥ ⲛⲉⲙ ⲛⲓϧⲓⲥⲓ ⲛⲉⲙ ⲛⲟⲙⲁⲥⲧⲓⲅⲝ ⲉⲑⲃⲉ ⲧ̀ϩⲉⲗⲡⲓⲥ ⲛ̀ⲟⲩϫⲁⲓ ⲛ̀ⲧⲉ ⲡ̀ⲱⲛϧ ⲟⲩⲟϩ ⲛ̀ⲧⲉⲛⲉⲣϩⲩⲙⲛⲟⲥ ⲛⲉⲙ ⲡⲓⲉⲣⲟⲯⲁⲗⲧⲓⲥ Ⲇⲁ̅ⲇ̅ ⲉⲛϫⲱ ⲙ̀ⲙⲟⲥ ϫⲉ ⲕⲟⲧϯ ⲧⲁⲯⲩⲭⲏ ⲉⲡⲉⲙⲁⲛⲉⲙⲧⲟⲛ ϫⲉ ⲁⲠⲟ̅ⲥ̅ ⲉⲣⲡⲉⲑⲛⲁⲛⲉϥ ⲛⲏⲓ ⲟⲩⲟϩ ϫⲉ ⲁⲫⲁⲓ ⲁϥⲕⲟⲧϥ ϩⲁ Ⲡⲟ̅ⲥ̅ ⲟⲩⲟϩ ⲁϥⲉⲣ ⲡⲉϥⲛⲁⲓ ⲛ̀ⲛⲓϣϯ ⲛⲉⲙⲁϥ.

ⲑⲗⲁⲩⲣⲁ ϧⲉⲛ ϯⲕⲉϣⲣⲱⲙⲓ

Ⲁⲥϣⲱⲡⲓ ⲇⲉ ϧⲉⲛ ⲑ̀ⲙⲉⲧⲟⲩⲣⲟ ⲛ̀ϩⲟⲩⲑⲙⲉⲛ ⲡ̀ϣⲏⲣⲓ ⲛⲒⲱⲥⲏⲫ ⲡⲓⲟⲩⲣⲟ ⲉⲧⲑⲏϣ ⲉⲃⲁⲃⲩⲗⲱⲛ ⲛ̀ⲧⲉ ⲭⲏⲙⲓ ⲛⲉⲙ ϯⲡⲁⲣⲁⲗⲓⲁ ⲛⲉⲙ ϯⲤⲩⲣⲓⲁ ⲛⲉⲙ ⲛⲓⲑⲱϣ ⲛ̀ⲧⲉ Ⲇⲁⲙⲁⲥⲕⲟⲥ ⲛⲉⲙ ϯⲉⲣⲃⲓ ⲟⲩⲟϩ ⲡⲁⲓⲟⲩⲣⲟ ⲟⲩⲕⲩⲇⲁⲣⲓⲧⲏⲥ ⲡⲉ ⲟⲩⲟϩ ⲙ̀ⲡⲉⲣⲥⲏⲥ ⲛ̀ⲕⲁⲇⲁⲝⲓⲁⲣⲭⲏⲥ ⲛ̀ⲧⲉ ⲫ̀ⲛⲁϩϯ ⲛ̀ⲛⲓⲁⲅⲁⲣⲓⲛⲛⲉⲟⲥ ⲉϥⲛⲁⲧⲁⲥⲑⲟϥ ϧⲉⲛ ⲡⲉϥⲛⲁϩϯ ⲛ̀ⲛⲓⲁⲣⲁⲃⲟⲥ ⲛⲉⲙ ⲛⲓⲓⲥⲙⲁⲏⲗⲓⲧⲏⲥ ⲁϥϣⲱⲡⲓ ⲇⲉ ⲛ̀ϫⲉ ⲟⲩⲣⲱⲙⲓ ⲛ̀ⲣⲉⲙⲣⲏⲥ ⲉⲃⲟⲗϧⲉⲛ ⲟⲩϯⲙⲓ ϫⲉ Ⲫⲁⲛⲓϫⲱⲓⲧ ϧⲉⲛ ⲡ̀ⲑⲱϣ ⲛ̀ⲧⲭⲱⲣⲁ ϫⲉ Ⲡⲟⲩϣⲓⲛ ⲉⲡⲉϥⲣⲁⲛ ⲡⲉ Ⲓⲱⲁⲛⲛⲏⲥ ⲡϣⲏⲣⲓ ⲙ̀ⲙⲁⲣⲕⲟⲥ ⲟⲩⲟϩ ⲫⲁⲓ ⲛⲉ ⲟⲩⲇⲓⲁⲕⲱⲛ ⲡⲉ ⲟⲩⲟϩ ⲛ̀ⲭⲣⲓⲥⲧⲓⲁⲛⲟⲥ ⲛ̀ⲣⲱⲙⲓ ⲁⲗⲗⲁ ⲁϥⲙⲟⲩϫⲧ ⲛⲉⲙ ⲛⲓⲉⲑⲛⲟⲥ ⲛ̀ⲥ̀ⲙⲁⲏⲗⲓⲧⲏⲥ ⲛ̀ⲗⲁⲙⲓⲧⲏⲥ ⲟⲛⲧⲱⲥ ⲛⲉⲙ ⲛⲓⲡⲟⲣⲛⲟⲥ ⲛⲉⲙ ⲛⲓⲛⲱⲓⲕ ⲙⲁⲗⲓⲥⲧⲁ ⲛⲓⲙⲁⲛⲫⲁϣ ⲛ̀ϣ̀ⲛⲉ ⲛ̀ϫⲟⲣϫⲥ ⲫ̀ⲙⲱⲓⲧ ⲙ̀ⲡⲓⲥⲗⲁⲧⲗⲉⲧ ⲛ̀ⲥ̀ϩⲓⲙⲓ ⲙ̀ⲡⲟⲣⲛⲟⲥ ⲛⲓⲣⲉϥⲭⲁⲫⲁϣ ⲛⲁ ⲛⲓⲣⲱⲙⲓ ⲓⲥϫⲉⲛ ϩⲏ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϫⲉ ⲁⲩⲙⲟⲩϫⲧ ⲛⲉⲙ ⲛⲓⲉⲑⲛⲟⲥ ⲟⲩⲟϩ ⲁⲩⲧⲥⲁⲃⲉ ⲛⲟⲩϩⲃⲏⲟⲩⲓ ⲡⲁⲓⲣⲏϯ ϫⲉ ⲫⲁⲓ Ⲓⲱⲁⲛⲛⲏⲥ ⲁϥⲙⲟⲩϫⲧ ⲟⲛ ⲛⲉⲙ ⲛⲁⲓⲟⲩⲟⲛ ⲙ̀ⲡⲁⲓⲣⲏϯ ⲟⲩⲟϩ ⲁϥⲧⲥⲁⲃⲉ ⲛⲟⲩϩⲃⲏⲟⲩⲓ ⲉⲑⲃⲉϫⲉ ⲛⲉ ⲟⲩⲣⲉϥϯⲙⲁϩⲓ ⲡⲉ ⲛⲁ ⲛⲓϩⲓⲟⲙⲓ ⲉⲃⲟⲗ ϧⲉⲛ ⲑⲗⲁⲩⲣⲁ ⲙ̀Ⲡⲓⲥⲉⲩⲉⲣϫⲓⲥ ϧⲉⲛ ϯⲕⲉϣⲣⲱⲙⲓ ⲁϥⲉⲣϩⲁⲗ ⲙ̀ⲙⲟϥ ⲛ̀ϫⲉ ⲡ̀ⲥⲁⲧⲁⲛⲁⲥ ϧⲉⲛ ⲟⲩⲉⲡⲓⲑⲩⲙⲓⲁ ⲛ̀ⲥ̀ϩⲓⲙⲓ ⲛ̀ⲥⲁⲣⲁⲕⲓⲛⲏ ⲁϥϩⲉⲓ ⲛⲉⲙⲁⲥ ϧⲉⲛ ϯⲡⲟⲣⲛⲓⲁ ⲟⲩⲟϩ ⲁⲥⲉⲣϭⲥ ⲉⲣⲟϥ ⲛ̀ϫⲉ ϯⲁⲛⲟⲙⲓⲁ ϣⲁ ⲫ̀ⲙⲟⲩ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϫⲉ ϩⲏⲡⲡⲉ ⲓⲥ ϯⲁⲛⲟⲙⲓⲁ ϣⲁⲥⲉⲣⲃⲟⲕⲓ ⲟⲩⲟϩ ϣⲁⲥϯ ⲛⲁⲕϩⲓ ⲟⲩⲟϩ ⲁⲥⲙⲓⲥⲓ ⲙ̀ⲫ̀ⲙⲟⲩ ⲡⲁⲓⲣⲏϯ ⲡⲉ ⲉⲧⲁϥϣⲱⲡⲓ ⲙ̀ⲡⲓⲑⲙⲏⲓ Ⲓⲱⲁⲛⲛⲏⲥ ⲁⲗⲗⲁ ⲁϥⲁⲣⲉϩ ⲉⲣⲟϥ ⲛ̀ϫⲉ ⲫⲏⲉⲧⲁϥϫⲟϥ ⲙ̀ⲡⲉϥⲟⲩⲱⲓ ⲉⲑⲃⲉ ϯⲃⲱ ⲛ̀ⲕⲉⲛⲧⲉ ⲉⲑⲃⲉ ⲡⲉⲥϫⲓⲛⲟⲗⲥ ⲓⲉ ⲛ̀ⲧⲉⲥⲕⲉⲣϥ ⲙ̀ⲡⲓⲕⲁϩⲓ ⲡⲉϫⲉ ⲡⲉϥⲟⲩⲱⲓ ⲇⲉ ⲛⲁϥ ϫⲉ ⲭⲁⲥ ⲛ̀ⲧⲁⲓⲕⲉⲣⲟⲙⲡⲓ ⲉϣⲱⲡ ⲇⲉ ⲁⲥϣⲁⲛϯⲟⲩⲧⲁϩ ⲛ̀ⲧⲁⲓⲕⲉⲣⲟⲙⲡⲓ ⲉⲑⲛⲏⲟⲩ ⲙ̀ⲙⲟⲛ ⲓⲉ ⲕⲟⲣϫⲥ ⲁⲪϯ ⲇⲉ ⲱⲟⲩⲛ̀ϩⲏⲧ ⲉϫⲱϥ ϧⲉⲛ ⲡⲉϥϫⲓⲛϩⲉⲓ ⲛⲉⲙ ⲡⲉϥϫⲉⲟⲩⲁ ⲛⲉⲙ ⲡⲉϥϭⲱϧⲉⲙ ⲛⲉⲙ ⲛⲓⲡⲟⲣⲛⲟⲥ ⲛⲉⲙ ⲛⲓⲛⲱⲓⲕ ⲉϥϧⲉⲛ ⲟⲩⲑⲱⲙ ⲛ̀ϩⲏⲧ ⲛⲉⲙ ⲟⲩϥⲓⲣⲱⲟⲩϣ ⲙ̀ⲡⲓⲃⲓⲱⲧⲓⲕⲟⲛ ⲛ̀ⲥⲁⲣⲕⲓⲕⲟⲛ ⲛⲉⲙ ⲫ̀ⲗⲁⲟⲥ ⲛ̀ⲁⲣⲁⲃⲟⲥ ⲗⲛⲉⲑⲛⲟⲥ ⲙ̀ⲙⲁⲥⲧⲉⲛⲟⲩϯ Ⲡⲭ̅ⲥ̅ ϧⲉⲛ ϩⲁⲛⲙⲏϣ ⲛ̀ⲥⲏⲟⲩ ϣⲁⲛⲧⲟⲩϣⲱⲡⲓ ⲛⲁϥ ⲛ̀ϫⲉ ϩⲁⲛϣⲏⲣⲓ ⲟⲩⲟϩ ⲁϥⲉⲣⲣⲱⲙⲓ ⲛ̀ⲥⲭⲓⲙⲱⲛ ⲟⲩⲟϩ ⲁϥⲧⲁⲥⲑⲟϥ ⲉⲡⲉϥϯⲙⲓ ϫⲉ Ⲡⲉⲡⲗⲉⲩ ϩⲁⲛⲙⲏϣ ⲇⲉ ⲛ̀ⲣⲱⲙⲓ ⲉⲃⲟⲗϧⲉⲛ ⲡⲉϥϯⲙⲓ ⲉⲩϫⲉⲟⲩⲁ ⲟⲩⲟϩ ⲁⲩϣⲱⲡⲓ ⲛ̀ⲗⲁϩⲙⲓ ⲟⲩⲟϩ ⲁⲩⲱⲙ ⲛ̀ϩ̀ⲑⲏⲟⲩ ⲉⲑⲃⲉ ⲡⲟⲩϫⲉⲟⲩⲁ ⲛⲁⲓ ⲁⲩϣⲉ ⲛⲱⲟⲩ ϣⲁ ⲟⲩϯⲙⲓ ⲉⲥⲥⲁⲣⲏⲥ ⲙ̀ⲙⲱⲟⲩ ⲉⲡⲉⲥⲣⲁⲛ ⲡⲉ Ⲡⲉⲡⲉⲗⲉⲩ ⲉⲑⲃⲉ ϫⲉ ⲡⲉⲥⲉⲝⲟⲩⲥⲓⲁⲧⲏⲥ ⲉϥⲙⲉⲓ ⲛ̀ⲛⲓⲭⲣⲓⲥⲧⲓⲁⲛⲟⲥ ⲟⲩⲟⲛ ⲛⲓⲃⲉⲛ ⲉⲧϣⲟⲡ ϧⲉⲛ ⲡⲉϥϯⲙⲓ ϣⲁϥⲁⲣⲉϩ ⲉⲣⲟϥ ⲉⲃⲟⲗϧⲉⲛ ϭⲓⲛϫⲟⲛⲥ ⲛⲓⲃⲉⲛ ⲙⲁⲗⲓⲥⲧⲁ ⲇⲉ ⲛⲓⲭⲣⲓⲥⲧⲓⲁⲛⲟⲥ ⲛⲭⲉⲛⲁⲩϫⲉⲟⲩⲁ ϥ̀ⲛⲁⲧⲁⲥⲑⲱⲟⲩ ⲉⲡⲟⲩⲛⲁϩϯ ⲟⲩⲟϩ ⲛ̀ⲛⲉϥⲭⲁ ϩ̀ⲗⲓ ⲉⲉⲣⲡⲉⲧϩⲱⲟⲩ ⲛⲱⲟⲩ ⲁⲛ

Ⲡⲓⲑⲙⲏⲓ ⲇⲉ Ⲓⲱ̅ⲁ̅ ⲁϥⲥⲱⲧⲉⲙ ⲉⲛⲁⲓⲥⲁϫⲓ ⲉⲑⲃⲉ ⲡⲟⲩⲡⲗⲁⲩ ⲁϥϭⲓ ⲛ̀ⲛⲉϥⲁⲗⲱⲟⲩⲓ ⲛⲉⲙ ⲫⲏⲉⲧⲉⲛⲧⲁϥ ⲁϥϣⲉ ⲛⲁϥ ⲁϥϣⲱⲡⲓ ⲛ̀ϧⲏⲧⲥ ⲉⲣⲉ ⲡⲉϥⲛⲟⲩⲥ ⲉϥⲥⲟⲩⲧⲱⲛ ⲛⲉⲙ Ⲡⲭ̅ⲥ̅ ⲉϥϭⲓϣϣⲱⲟⲩ ⲛ̀ϫⲱⲣϩ ⲛⲉⲙ ⲙⲉⲣⲓ ⲉⲑⲣⲉ Ⲡⲭ̅ⲥ̅ ϫⲱⲕ ⲛⲁϥ ⲛ̀ⲛⲉϥⲉⲧⲏⲙⲁ ⲉⲃⲟⲗ ϫⲉ ϩⲓⲛⲁ ϧⲉⲛ ⲟⲩⲙⲟⲩ ⲛ̀ⲧⲉϥⲙⲟⲩ ⲉϫⲉⲛ ⲫ̀ⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ϧⲉⲛ ⲟⲩⲟⲩⲱⲛϩ ⲉⲃⲟⲗ ⲛⲁϥⲙⲏⲛ ⲇⲉ ⲙ̀ⲡⲁⲓⲣⲏϯ ⲛ̀ϫⲉ ⲫⲏⲉ̅ⲑ̅ⲩ̅ Ⲓⲱ̅ⲁ̅ ⲡⲓⲣⲁⲛ ⲉⲧϩⲟⲗϫ ⲉⲑⲛⲟⲧⲉⲙ ϧⲉⲛ ϩⲁⲛϣ̀ⲗⲏⲗ ⲛⲉⲙ ϩⲁⲛⲧⲱⲃϩ ⲛⲉⲙ ϩⲁⲛⲉⲣⲙⲱⲟⲩⲓ ⲛⲉⲙ ϩⲁⲛϯϩⲟ ⲛⲉⲙ ϩⲁⲛϣ̀ⲣⲱⲓⲥ ⲛⲉⲙ ϩⲁⲛⲛⲏⲥⲧⲓⲁ ϧⲉⲛ ⲟⲩⲧⲟⲩⲃⲟ ⲛⲉⲙ ⲟⲩⲙⲩⲥⲧⲏⲣⲓⲟⲛ ⲉϥϩⲏⲡ ϫⲉ ⲛⲁⲣⲉ ⲡⲓⲕⲟⲥⲙⲟⲥ ⲧⲏⲣϥ ϣⲱⲡⲓ ⲙ̀ⲡⲉϥⲙⲑⲟ ⲙ̀ⲫ̀ⲣⲏϯ ⲛ̀ⲟⲩϩ̀ⲗⲓ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϫⲉ ⲟⲩⲉⲫⲗⲏⲟⲩ ⲛ̀ⲧⲉ ϩⲁⲛⲉⲫⲗⲏⲟⲩ ⲛⲉ ⲣⲱⲙⲓ ⲛⲓⲃⲉⲛ ⲉⲧⲟⲛϧ

Ϩⲟⲧⲁⲛ ⲇⲉ ⲉⲧⲁⲩⲉⲣϩⲟⲩⲟ ⲉϫⲱϥ ⲛ̀ϫⲉ ⲛⲓⲣⲟⲙⲡⲓ ⲉϥϣⲟⲡ ϧⲉⲛ ⲟⲩⲙ̀ⲕⲁϩ ⲛ̀ϩⲏⲧ ⲁⲡⲉϥϩⲏⲧ ⲓ̀ ⲛⲁϥ ⲟⲩⲟϩ ⲁϥⲛⲉϩⲥⲓ ⲉⲃⲟⲗϧⲉⲛ ⲡⲓⲥⲣⲟⲙ ⲛ̀ⲧⲉ ⲧⲉϥⲉⲃϣⲓ ⲛⲉⲙ ⲡⲉϥϫⲓⲛⲁⲙⲉⲗⲉⲥ ⲟⲩⲟϩ ⲡⲉϫⲁϥ ⲙ̀ⲡⲁⲓⲣⲏϯ ϫⲉ ⲟⲩ ⲡⲁϩⲏⲟⲩ ϫⲉ ⲉϣⲱⲡ ⲁⲓϣⲁⲛⲙⲟⲩ ⲙ̀ⲡⲓⲁⲣⲏϯ ⲟⲩⲇⲉ ⲙ̀ⲡⲓⲟⲩⲟⲛϩⲧ ⲛ̀ⲕⲁⲗⲱⲥ ⲁⲗⲗⲁ ϧⲉⲛ ⲟⲩϩⲱⲃ ⲉϥϩⲏⲡ ϯⲛⲁⲱⲛϧ ⲁⲗⲗⲁ ϯⲛⲁⲧⲱⲛⲧ ⲛ̀ⲧⲁϣⲉⲛⲏⲓ ϣⲁ Ⲃⲁⲃⲩⲗⲱⲛ ⲛ̀ⲧⲉ ⲭⲏⲙⲓ ⲟⲩⲟϩ ⲛ̀ⲧⲁⲟϩⲓ ⲉⲣⲁⲧ ⲛⲁϩⲣⲉⲛ ⲡⲓⲟⲩⲣⲟ ⲉⲗⲭⲉⲙⲉⲗ ⲟⲩⲟϩ ⲛ̀ⲧⲁⲉⲣⲉⲧⲓⲛ ⲛ̀ⲧⲟⲧϥ ⲙ̀ⲡⲁⲛⲁϩϯ ⲉϣⲱⲡ ⲁϥϣⲁⲛⲉⲣϩⲙⲟⲧ ⲙⲙⲟⲥ ⲛⲏⲓ ϯⲛⲁⲱⲛϧ ϧⲉⲛ ⲟⲩϩⲏⲧ ⲉϥⲑⲏⲧ ⲉϣⲱⲡ ⲇⲉ ⲙⲙⲟⲛ ⲉϥⲛⲁϧⲟⲑⲃⲉⲧ ϧⲉⲛ ⲧⲥⲏϥⲓ ⲟⲩⲟϩ ⲛ̀ⲧⲁⲙⲟⲩ ⲛ̀ⲕⲁⲗⲱⲥ ⲉϫⲉⲛ ⲫⲣⲁⲛ ⲙⲡⲉⲛⲟⲓⲥ Ⲓⲏⲥⲟⲩⲥ Ⲡⲓⲭⲣⲓⲥⲧⲟⲥ ⲥⲁⲧⲟⲧϥ ⲇⲉ ⲁϥⲧⲱⲛϥ ⲛ̀ⲁⲧϭⲉⲛⲛⲉ ⲁϥϭⲓ ⲙ̀ⲡⲉϥϣⲏⲣⲓ ⲛⲉⲙⲁϥ ⲁϥⲉⲣⲁⲓⲟⲩ ϣⲁ ⲭⲏⲙⲓ ⲛⲉⲙ ϩⲁⲛⲕⲟⲩϫⲓ ⲙ̀ⲙⲁϩⲓ ⲛⲁϥϣⲟⲡ ⲡⲉ ⲛⲉⲙ ⲛⲓⲣⲉⲙⲣⲏⲥ ⲛⲓⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ⲟⲩⲟϩ ⲁϥϯ ⲙ̀ⲡⲓⲁⲙⲁϩⲓ ⲉⲃⲟⲗ ⲟⲩⲟϩ ⲁϥϯ ⲙ̀ⲡⲉϥⲧⲓⲙⲏ ⲛⲁⲡⲉϥϣⲏⲣⲓ ⲟⲩⲟϩ ⲙⲉⲛⲉⲛⲥⲁ ⲛⲁⲓ ⲁϥⲥⲉⲃⲧⲱⲧϥ ⲉⲑⲣⲉϥⲙⲟⲩ ⲉϫⲉⲛ ⲫⲣⲁⲛ ⲙ̀ⲡⲉⲛϭⲟⲓⲥ Ⲓⲏⲥⲟⲩⲥ Ⲡⲓⲭⲣⲓⲥⲟⲧⲟⲥ

Ⲛⲉ ⲛⲉ ⲟⲩⲟⲛ ⲟⲩⲣⲱⲙⲓ ⲛ̀ⲑ̀ⲙⲏⲓ ⲙ̀ⲡⲣⲉⲥⲃⲩⲧⲉⲣⲟⲥ ⲉⲡⲉϥⲣⲁⲛ ⲡⲉⲒⲱ̅ⲁ̅ ⲉⲟⲩⲟⲛ ⲛ̀ⲧⲁϥ ⲙ̀ⲙⲁⲩ ⲛ̀ⲟⲩⲥⲟⲛ ⲙ̀ⲙⲟⲩⲛⲁⲭⲟⲥ ⲁϥⲓ̀ ⲛ̀ϫⲉ ⲡⲓⲑ̀ⲙⲏⲓ ⲉⲕⲱϯ ⲛ̀ⲥⲱϥ ϧⲉⲛ ⲧⲉϥⲉⲕⲕⲗⲏⲥⲓⲁ ⲟⲩⲟϩ ⲙ̀ⲡⲉϥϫⲉⲙϥ ⲟⲩⲟϩ ⲁϥϭⲓ ⲙ̀ⲡⲥⲟϭⲛⲓ ⲙ̀ⲡⲓⲡⲁⲡⲁ Ⲓⲱ̅ⲁ̅ ⲉⲑⲃⲉ ⲡⲁⲓϩⲱⲃ ⲡⲉϫⲉ ⲡⲓⲡⲁⲡⲁ ⲛⲁϥ ϫⲉ ⲙⲁϣⲉⲛⲁⲕ ϣⲁ ⲡⲓⲡⲁⲧⲣⲓⲁⲣⲭⲏⲥ ⲛ̀ϣⲟⲣⲡ ⲟⲩⲟϩ ϭⲓ ⲙ̀ⲡⲉϥⲥⲟϭⲛⲓ ϧⲉⲛ ⲫⲁⲓ ϣⲁⲛⲧⲉⲕⲥⲱⲧⲉⲙ ⲉⲡⲉϥⲥⲁϫⲓ ⲡⲉϫⲉ ⲡⲓⲙⲁⲕⲁⲣⲓⲟⲥ ⲛⲁϥ ϫⲉ ϯⲉⲣϩⲟϯ ⲉⲑⲃⲉ ⲡⲓⲡⲁⲧⲣⲓⲁⲣⲭⲏⲥ ⲛ̀ⲧⲉϥϩⲓϩⲟϯ ⲉⲣⲟⲓ ⲉⲑⲃⲉ ⲡⲓϧⲱⲧⲉⲃ ⲁⲗⲗⲁ ⲡⲁⲡⲁⲧⲣⲓⲁⲣⲭⲏⲥ ⲛⲉⲙ ⲡⲁⲣⲉϥⲥⲟϭⲛⲓ Ⲡⲭ̅ⲥ̅ ⲡⲉ ϧⲉⲛ ⲡⲓⲙⲟⲩ ⲛⲉⲙ ⲡⲓⲱⲛϧ ⲁⲗⲗⲁ ϯⲛⲁϣⲉⲛⲏⲓ ϣⲁ ⲡⲓϧⲉⲗⲗⲟ ⲙ̀ⲙⲁⲓⲭ̅ⲣ̅ⲥ̅ ⲟⲩⲟϩ ⲡⲓⲥⲟⲫⲟⲥ ⲉⲧⲉ ⲫⲁⲓ ⲡⲉ Ⲉⲡⲟⲩϣⲉⲭⲉⲣ ⲡⲓⲥⲏⲓⲛⲓ ⲙ̀ⲡⲟⲩⲣⲟ Ⲉⲗⲭⲉⲙⲉⲗ ⲛ̀ⲧⲁϭⲓ ⲙ̀ⲡⲉϥⲥⲟϭⲛⲓ ϣⲁⲛⲧⲁⲥⲱⲧⲉⲙ ⲉⲡⲉϥⲥⲁϫⲓ ϧⲉⲛ ⲛⲁⲓ ⲡⲁⲓⲣⲏϯ ⲁϥⲧⲱⲛϥ ⲁϥϣⲉⲛⲁϥ ϣⲁⲣⲟϥ ϧⲉⲛ ⲟⲩϩⲏⲧ ⲉϥϫⲟⲣ ϣⲁ ⲡⲓϧⲉⲗⲗⲟ ⲛ̀ⲥⲟⲫⲟⲥ ⲡ̀ⲥⲏⲓⲛⲓ ⲙ̀ⲡ̀ⲟⲩⲣⲟ ⲁϥⲧⲁⲙⲟϥ ⲉⲡⲉϥϩⲱⲃ ⲓⲥϫⲉⲛ ϯⲁⲣⲭⲏ ϣⲁ ⲡⲓϫⲱⲕ ⲉⲃⲟⲗ ⲡⲉϫⲉ ⲡⲓⲥⲟⲫⲟⲥ ⲛⲁϥ ϫⲉ ⲁⲣⲓⲉⲙⲓ ⲛⲁⲕ ϫⲉ ⲛⲓⲥⲁϫⲓ ⲉⲧⲁⲕϫⲟⲧⲟⲩ ϩⲁⲛϫⲉⲟⲩⲁ ⲁⲛ ⲛⲉ ⲁⲗⲗⲁ ⲙ̀ⲫ̀ⲣⲏϯ ⲛ̀ϩⲁⲛⲥⲁⲙⲉⲑⲛⲟⲩϫ ⲟⲩⲟϩ ⲁⲛⲟⲛ ⲧⲉⲛϫⲉ ⲙⲉⲑⲛⲟⲩϫ ⲛ̀ⲛⲁⲩ ⲛⲓⲃⲉⲛ ⲁⲗⲗⲁ ⲁⲣⲉ ϯⲅⲣⲁⲫⲏ ϫⲱ ⲙ̀ⲙⲟⲥ ϧⲉⲛ ϯⲡⲣⲟⲥⲉⲩⲭⲏ ϫⲉ ⲙ̀ⲡⲉⲣⲉⲛⲧⲉⲛ ⲉϧⲟⲩⲛ ⲉⲡⲓⲣⲁⲥⲙⲟⲥ ⲁⲗⲗⲁ ⲛⲁϩⲙⲉⲛ ⲉⲃⲟⲗ ϩⲁ ⲡⲓⲡⲉⲧϩⲱⲟⲩ ⲛⲁⲕⲉⲙⲓ ⲛⲁⲕ ⲁⲛ ⲡⲉ ϫⲉ ⲛⲁⲓⲉⲑⲛⲟⲥ ϩⲁⲛⲡⲉⲧϩⲱⲟⲩ ⲉⲙⲁϣⲱ ⲟⲩⲟϩ ⲭ̀ⲛⲁⲟⲩⲱⲛϩ ⲛ̀ⲟⲩⲥⲁϫⲓ ⲙ̀ⲡⲁⲓⲣⲏϯ ⲙ̀ⲡⲟⲩⲙⲑⲟ ⲉⲃⲟⲗ ⲓⲉ ⲁⲣⲏⲟⲩ ⲙ̀ⲡⲉⲕⲁⲙⲟⲛⲓ ⲛ̀ⲧⲟⲧⲕ ϧⲉⲛ ϩⲁⲛⲡⲓⲣⲁⲥⲙⲟⲥ ⲧⲉⲛⲛⲁϣⲱⲡⲓ ⲁⲛⲟⲛ ϧⲉⲛ ϩⲁⲛϣⲓⲡⲓ ⲁⲗⲗⲁ ⲙⲁϣⲉ ⲛⲁⲕ ⲉⲃⲟⲗ ϧⲉⲛ ⲡⲁⲓⲕⲁϩⲓ ⲛⲉⲙ ⲉⲃⲟⲗ ϧⲉⲛ ⲑ̀ⲙⲏϯ ⲛ̀ⲛⲁⲓⲙⲏϣ ⲛ̀ⲉⲑⲛⲟⲥ ⲛⲉⲙ ⲡ̀ϩⲟⲩⲟ ⲙ̀ⲡⲟⲩⲙⲟⲥϯ ⲉⲣⲟⲛ ⲟⲩⲟϩ ⲙⲁϣⲉⲛⲁⲕ ⲉⲃⲟⲗϧⲉⲛ ⲟⲩⲃⲁⲕⲓ ⲉⲃⲁⲕⲓ ⲛⲉⲙ ⲟⲩϯⲙⲓ ⲉⲕⲉϯⲙⲓ ⲕⲁⲧⲁ ⲫⲏⲉⲧⲁ Ⲡⲭ̅ⲥ̅ ϫⲟϥ ϧⲉⲛ ⲡⲓⲉⲩⲁⲅⲅⲉⲗⲓⲟⲛ ϫⲉ ⲉϣⲱⲡ ⲁⲩϣⲁⲛϭⲟϫⲓ ⲛ̀ⲥⲱⲧⲉⲛ ϧⲉⲛ ⲧⲁⲓⲃⲁⲕⲓ ⲫⲱⲧ ⲉⲕⲉⲟⲩⲓ ⲁⲙⲏⲛ ϯϫⲱ ⲙⲙⲟⲥ ⲛⲱⲧⲉⲛ ϫⲉ ⲛ̀ⲛⲉⲧⲉⲛⲫⲟϩ ⲉⲙⲉϣⲧ ⲉⲛⲓⲃⲁⲕⲓ ⲛ̀ⲧⲉ ⲡⲒⲥ̅ⲗ̅ ϣⲁⲛⲧⲉϥⲓ̀ ⲛ̀ϫⲉ ⲡ̀ϣⲏⲣⲓ ⲙ̀ⲫ̀ⲣⲱⲙⲓ

Ⲡⲓⲛⲁⲓⲁⲧϥ ⲇⲉ ϧⲉⲛ ⲟⲩⲙⲉⲑⲙⲏⲓ Ⲓⲱ̅ⲁ̅ ⲁϥⲑⲱⲙ ⲛ̀ⲣⲱϥ ⲟⲩⲟϩ ⲁϥϣⲉⲛⲁϥ ⲉⲃⲟⲗϩⲁⲣⲟϥ ⲁϥⲉⲣ ⲉⲃⲇⲟⲙⲁⲥ ⲛ̀ⲉ̀ϩⲟⲟⲩ ⲁϥⲥ̀ϧⲁⲓ ⲛ̀ϩⲁⲛⲡⲟⲧⲁⲕⲓⲟⲛ ϣⲁ ⲡ̀ⲟⲩⲣⲟ ⲉϥⲛ̀ϧ̀ⲣⲏⲓ ⲛ̀ϧⲏⲧⲥ ⲙ̀ⲡⲁⲓⲣⲏϯ ϫⲉ ⲡⲉϩⲉⲙϩⲁⲗ ⲟⲩⲣⲱⲙⲓ ⲛ̀ⲭ̀ⲣⲓⲥⲧⲓⲁⲛⲟⲥ ⲓⲥϫⲉⲙ ϩⲁⲛⲕⲉⲣⲟⲙⲡⲓ ⲁⲩϫⲉⲙϫⲟⲙ ⲉϩ̀ⲣⲏⲓ ⲉϫⲱⲓ ⲛ̀ϫⲉ ⲛⲓⲣⲉⲙⲕⲉϣⲣⲱⲙⲓ ϧⲉⲛ ϩⲁⲛⲙⲉⲑⲣⲉⲩ ⲛ̀ⲛⲟⲩϫ ⲟⲩⲟϩ ϯⲛⲟⲩ ⲱ ⲡⲁⲟ̅ⲥ̅ ⲡ̀ⲟⲩⲣⲟ ⲁⲡⲉⲕϩ̀ⲙⲟⲧ ⲧⲁϩⲉ ⲟⲩⲟⲛ ⲛⲓⲃⲉⲛ ⲁⲓⲧ ⲛⲟⲩⲁⲓ ⲛ̀ⲧⲉ ⲛⲭⲉⲧⲁⲕⲉⲣϩ̀ⲙⲟⲧ ⲉϫⲱⲟⲩ ⲓⲉ ⲛ̀ⲧⲉⲕⲉⲣϩ̀ⲙⲟⲧ ⲛⲏⲓ ⲙ̀ⲡⲁⲛⲁϩϯ ⲓⲉ ⲛ̀ⲧⲉⲕⲧⲟⲩⲃⲟ ⲙ̀ⲡⲁϭⲱϧⲉⲙ ⲉⲃⲟⲗ ϧⲉⲛ ⲧⲉⲕⲥⲏϥⲓ ⲟⲩⲟϩ ⲛ̀ϯⲛⲁⲙⲟⲩ ⲉϫⲉⲛ ⲫ̀ⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ Ⲫϯ ⲛ̀ⲧⲉ ⲛⲁⲓⲟϯ ⲕⲉⲙⲏϣ ⲇⲉ ⲙ̀ⲡⲟⲇⲓⲁⲕⲟⲛ ⲙ̀ⲡⲁⲓⲣⲏϯ ⲟⲩⲟϩ ⲙ̀ⲡⲉ ⲟⲩϣⲓⲛⲓ ⲓⲛⲓ ⲉⲃⲟⲗ ⲛ̀ϧⲏⲧⲟⲩ ⲟⲩⲟϩ ⲉⲧ ⲡⲓⲉϩⲟⲟⲩ ϣⲱⲡⲓ ⲛ̀ⲧⲉ ϯⲕⲩⲣⲓⲁⲕⲏ ⲁϥⲧⲁⲥⲑⲟϥ ⲉ ⲭⲏⲙⲓ ϧⲉⲛ ⲟⲩⲛⲓϣϯ ⲛ̀ⲉⲙⲕⲁϩ ⲛ̀ϩⲏⲧ ⲉⲙⲁϣⲱ ⲡⲉ ⲕⲁⲧⲁ ⲧ̀ⲥⲩⲛⲏⲑⲓⲁ ⲛ̀ⲧⲉ ⲛⲓⲣⲉⲙⲣⲏⲥ ⲛⲓⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ϧⲉⲛ ⲡ̀ϩⲟⲩⲟ ⲛ̀ⲧⲉ ⲧⲟⲩⲁⲅⲁⲡⲏ ⲉⲡⲓ ̀ⲛ̀ⲁⲣⲭⲉⲟⲥ ⲡⲓⲁⲣⲭⲏⲑⲗⲓⲧⲏⲥ ⲡⲓ ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲡⲓⲙⲉⲗⲉⲧⲟⲛ ϣⲁⲩⲓⲣⲓ ⲛ̀ϯⲍ̅ ⲛ̀ⲕⲩⲣⲓⲁⲕⲏ ⲛ̀ⲧⲉ ⲡⲓⲛ̅ ⲛ̀ϣⲁⲓ ⲛⲁϥ ⲟⲩⲟϩ ϣⲁⲩⲱϣ ⲛ̀ⲧⲉϥⲙⲁⲣⲧⲩⲣⲓⲁ ⲕⲁⲧⲁ ⲕⲩⲣⲓⲁⲕⲏ ϧⲉⲛ ϩⲁⲛⲃⲱϩⲉⲙ ⲛⲉⲙ ϩⲁⲛⲯⲁⲗⲓ ⲉⲩⲉⲣⲡⲣⲉⲡⲓ ⲉⲡⲉϥⲧⲁⲓⲥ

Ⲟⲩⲟⲛ ⲟⲩⲕⲟⲩϫⲓ ⲇⲉ ⲛ̀ϯⲙⲓ ⲛ̀ⲥⲁⲙⲉⲛⲧ ⲛ̀ⲧⲉ ⲫ̀ⲓⲁⲣⲟ ⲛ̀ⲧⲉ ⲭⲏⲙⲓ ⲉⲡⲉⲥⲣⲁⲛ ⲡⲉ Ⲡⲟⲛⲙⲟⲛⲣⲟⲥ ⲉϥⲛ̀ϧ̀ⲣⲏⲓ ⲛ̀ϧⲏⲧⲥ ⲛ̀ϫⲉ ⲉⲕⲕⲗⲏⲥⲓⲁ ⲉϫⲉⲛ ⲫ̀ⲣⲁⲛ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲟⲩⲟⲛ ⲟⲩⲡⲣⲉⲥⲃⲩⲧⲉⲣⲟⲥ ⲛ̀ϧⲏⲧⲥ ⲉⲡⲉϥⲣⲁⲛ ⲡⲉ Ⲁⲣⲟⲩⲥ ⲛⲉ ⲟⲩⲟⲛ ⲟⲩⲣⲱⲙⲓ ⲙ̀ⲑ̀ⲙⲏⲓ ⲉϥⲉⲣϩⲟϯ ϧⲁⲧϩⲏ ⲙ̀Ⲫϯ ⲡⲓⲙⲁⲕⲁⲣⲓⲟⲥ ⲇⲉ Ⲓⲱ̅ⲁ̅ ⲉⲧⲁϥⲛⲁⲩ ⲉⲛⲓⲙⲏϣ ϫⲉ ⲉⲥϩⲱⲗ ⲙ̀ⲙⲁⲩ ⲁϥⲧⲱⲛϥ ⲁϥϣⲉⲛⲁϥ ⲛⲉⲙⲱⲟⲩ ⲙ̀ⲙⲁⲩ ϫⲉ ϩⲓⲛⲁ ⲉⲑⲣⲉϥϫⲏⲕ ⲡ̀ϣⲁⲓ ⲙ̀ⲡⲓⲁⲅⲓⲟⲥ Ⲅⲉⲱⲣⲅⲓⲟⲥ ⲛⲉⲙ ⲡ̀ⲭⲱⲣⲟⲥ ⲛ̀ⲧⲉ ⲛⲓⲭⲣⲓⲥⲧⲓⲁⲛⲟⲥ

ⲟⲩⲟϩ ⲉⲧⲁ ⲛⲓⲕⲗⲏⲣⲟⲥ ϫⲱⲕ ⲙ̀ⲡⲓϣ̀ⲗⲏⲗ ⲛ̀ⲧⲉ ϩⲁⲛⲁⲣⲟⲩϩⲓ ⲛⲉⲙ ϯⲯⲁⲗⲙⲱⲇⲓⲁ ⲛ̀ⲧⲉ ⲡⲓⲉϫⲱⲣϩ ⲡⲁⲓⲣⲏϯ ⲙ̀ⲫ̀ⲛⲁⲩ ⲙ̀ϣⲱⲣⲡ ⲟⲩⲟϩ ⲛⲁⲩⲉⲣⲯⲁⲗⲓⲛ ⲉⲡⲓⲁⲅⲓⲟⲥ Ⲅⲉⲱⲅⲓⲟⲥ ϧⲉⲛ ϩⲁⲛϩⲱⲇⲏ ⲛⲉⲙ ϩⲁⲛⲧⲱⲃϩ ⲛ̀ⲑⲟϥ ⲇⲉ ⲡⲓⲡⲓⲥⲧⲟⲥ ϧⲉⲛ Ⲡⲟ̅ⲥ̅ ⲡⲓⲁⲅⲓⲟⲥ Ⲓⲱ̅ⲁ̅ ⲁⲡⲉϥϩⲏⲧ ⲓ̀ ⲉⲣⲟϥ ⲛⲁϥⲙⲉⲩⲓ ⲙ̀ⲁⲡⲓⲣⲏϯ ⲉⲑⲃⲉ ⲛⲓⲛⲓϣϯ ⲛ̀ϩ̀ⲙⲟⲧ ⲉⲧⲁ Ⲫϯ ⲁⲓⲧⲟⲩ ⲛⲉⲙ ⲡⲓⲁⲅⲓⲟⲥ Ⲅⲉⲱⲅⲣⲓⲟⲥ ⲛⲉⲙ ⲛⲓⲭⲁⲣⲓⲥⲙⲁ ⲉⲧϣⲟⲡ ⲛⲁϥ ϧⲁⲧⲉⲛ ⲟⲩⲟⲛ ⲛⲓⲃⲉⲛ ⲥⲁⲧⲟⲧϥ ⲇⲉ ⲁϥⲥⲁϫⲓ ⲛⲉⲙ ⲡⲓⲡⲣⲉⲥⲃⲩⲧⲉⲣⲟⲥ ϫⲉ Ⲁⲣⲟⲩⲥ ⲉϥϫⲱ ⲙ̀ⲙⲟⲥ ⲛⲁϥ ϫⲉ ⲙⲁⲧⲁⲙⲟⲓ ⲱ ⲡⲁⲟ̅ⲥ̅ ⲛ̀ⲓⲱⲧ ϫⲉ ⲫⲁⲓ ϫⲉ Ⲅⲉⲱⲅⲣⲓⲟⲥ ⲉⲧⲉ ⲛⲁⲓⲛⲓϣϯ ⲛ̀ⲧⲁⲓⲟ ϣⲟⲡ ⲛⲁϥ ⲟⲩⲁⲅⲅⲉⲗⲟⲥ ⲓⲉ ⲟⲩⲣⲱⲙⲓ ϣⲁⲧⲉϥϭⲓ ⲛ̀ⲛⲁⲓⲧⲁⲓⲟ ⲉⲧⲕⲏⲃⲁϥⲉⲣⲟⲩⲱ ⲛ̀ϫⲉ ⲡⲓⲡⲣⲉⲃⲩⲧⲉⲣⲟⲥ ⲡⲉϫⲁϥ ϫⲉ ⲟⲩⲣⲱⲙⲓ ⲁϥϯ ⲙ̀ⲡⲉϥⲥⲱⲙⲁ ⲉⲛⲁⲓⲃⲁⲥⲁⲛⲟⲥ ⲛⲉⲙ ⲛⲓⲇⲓⲙⲱⲣⲓⲁ ⲉⲧϧⲟⲥⲓ ϣⲁⲧⲉ ⲛⲁⲓⲧⲏⲣⲟⲩ ϣⲱⲡⲓ ⲛⲁϥ ⲁϥⲉⲣⲟⲩⲱ ⲛ̀ϫⲉ ⲡⲓⲁⲅⲓⲟⲥ Ⲓⲱ̅ⲁ̅ ⲉϥϫⲱ ⲙ̀ⲙⲟⲥ ϫⲉ ⲁⲙⲏⲛ ⲡⲁⲟ̅ⲥ̅ ϧⲉⲛ ⲧ̀ϫⲟⲙ ⲙ̀ⲡⲁⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ϯⲛⲁⲙⲟⲩ ⲁⲛⲟⲕ ϩⲱ ϧⲉⲛ ⲧ̀ⲥⲏϥⲓ ⲟⲩⲟϩ ⲛ̀ⲧⲁⲫⲱⲛ ⲙ̀ⲡⲁⲥ̀ⲛⲟϥ ϩⲱ ⲉϫⲉⲛ ⲡⲉϥⲣⲁⲛ ⲉ̅ⲑ̅ⲩ̅ ⲫⲁⲓ ⲉϥⲉ̀ϣⲱⲡⲓ ⲛ̀ⲧⲉⲛ ⲫ̀ⲓⲱⲧ ⲛ̀ⲁⲅⲁⲑⲟⲥ ⲛⲉⲙ ⲡⲉϥⲙⲟⲛⲟⲅⲉⲛⲏⲥ Ⲓⲏ̅ⲥ̅ Ⲡⲭ̅ⲥ̅ ⲡⲉⲛⲟ̅ⲥ̅ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲛ̀ⲣⲉϥⲧⲁⲛϧⲟ ϣⲁ ⲉⲛⲉϩ ⲁⲙⲏⲛ ⲡⲉϫⲉ ⲡⲓⲡⲣⲉⲥⲃⲩⲧⲉⲣⲟⲥ ⲛⲁϥ ϫⲉ ⲱⲟⲩⲛⲓⲁⲧⲕ ⲡⲁⲥⲟⲛ ϧⲁⲧⲉⲛ Ⲡⲟ̅ⲥ̅ ⲉϣⲱⲡ ⲁⲕϣⲁⲛⲓ̀ⲣⲓ ⲙ̀ⲫⲁⲓ ϥ̀ⲛⲁⲉⲣⲥⲱⲓⲧ ⲛ̀ϫⲉ ⲡⲉⲕⲣⲁⲛ ϧⲉⲛ ⲭⲏⲙⲓ ⲧⲏⲣⲥ ⲛⲉⲙ ⲡⲉⲥⲑⲟϣ ⲉⲩⲥⲟⲡ ⲛⲁϥⲉⲣⲁⲥⲡⲁⲍⲉⲥⲑⲉ ⲙ̀ⲙⲟϥ ⲛ̀ϫⲉ ⲡⲓⲡⲣⲉⲥⲃⲩⲧⲉⲣⲟⲥ ⲟⲩⲟϩ ⲁϥⲥ̀ⲙⲟⲩ ⲉⲣⲟϥ ⲟⲩⲟϩ ⲥⲁⲧⲟⲧϥ ⲁϥⲓ̀ ⲉⲃⲟⲗ ⲉⲭⲏⲙⲓ ⲛ̀ⲁⲗⲕⲉ ⲙ̀Ⲫⲁⲣⲙⲟⲩⲑⲓ ⲡ̀ϣⲁⲓ ⲙ̀ⲡⲓⲁⲅⲓⲟⲥ Ⲙⲁⲣⲕⲟⲥ ⲡⲓⲁⲡⲟⲥⲧⲟⲗⲟⲥ ⲛ̀ⲣⲉϥϩⲓⲱⲓϣ ⲛ̀ⲧⲉ ⲭⲏⲙⲓ.

Ⲛ̀ϩ̀ⲣⲏⲓ ⲇⲉ ϧⲉⲛ ⲟⲩⲁⲓ ⲙ̀ⲡⲁϣⲟⲛⲥ ⲉⲧⲉ ⲡⲓⲉϩⲟⲟⲩ ⲉⲧⲁⲩⲙⲓⲥⲓ ⲛ̀ϯⲡⲁⲣⲩⲉⲛⲟⲥ Ⲙⲁⲣⲓⲁ ϯⲑⲉⲟⲧⲟⲕⲟⲥ ⲁϥⲣⲱⲓⲥ ⲁ̀ϥⲣⲱⲓⲥ ⲙ̀ⲫ̀ⲛⲁⲩ ⲛ̀ϣⲟⲣⲡ ⲁϥϣ̀ⲗⲏⲗ ϩⲁ Ⲫϯ ⲟⲩⲟϩ ⲁϥϯ ⲙ̀ⲡⲓⲙⲏⲓⲛⲓ ⲛ̀ⲧⲉ ⲡⲓ. ⲉϫⲉⲛ ⲡⲉϥϩⲟⲟⲩⲟϩ ⲁϥⲙⲟⲩⲣ ϧⲉⲛ ϯϫⲟⲙ ⲙ̀ⲡⲉⲛⲥ̅ⲱ̅ⲣ̅ Ⲓⲏ̅ⲥ̅ Ⲡⲭ̅ⲥ̅ ⲟⲩⲟϩ ⲁϥⲓ̀ ⲉⲃⲟⲗ ⲛ̀ⲧⲉ ⲭⲏⲙⲓ ⲛ̀ⲧⲉ ϯⲕⲉϣⲣⲱⲙⲓ ⲡⲉ ϣⲁ ϯⲁⲩⲗⲏ ⲙ̀ⲡ̀ⲟⲩⲣⲟ ⲉⲧⲉ ϯⲭⲁⲗⲁ ⲑⲏⲉⲧⲭⲏ ⲥⲁⲃⲟⲗ ⲛ̀ⲧⲉ ϯⲕⲉϣⲣⲱⲙⲓ ⲡⲟⲩⲣⲟ ⲇⲉ ⲁϥⲧⲁⲗⲏⲟⲩⲧ ⲛⲉⲙ ⲡⲓⲥⲧⲣⲁⲧⲉⲩⲙⲁ ⲛⲉⲙ ⲡⲓⲁⲣⲭⲏϯϩⲁⲡ ⲛ̀ⲧⲉ ⲡⲉϥϣ̀ⲗⲟⲗ ⲛⲉⲙ ⲡ̀ⲁⲣⲭⲏϧⲉⲗⲗⲟ ⲛ̀ⲧⲉ ⲛⲓϧⲉⲗⲗⲟⲓ ⲛⲉⲙ ϩⲁⲛⲕⲁⲑⲏⲭⲟⲩⲙⲉⲛⲓⲧⲏⲥ ⲙ̀ⲃⲁⲣⲃⲁⲣⲟⲥ ⲁϥϥⲟϫϥ ⲇⲉ ⲉⲑ̀ⲙⲏϯ ⲛ̀ⲛⲓⲙⲏϣ ⲉⲧⲟϣ ⲁϥⲉϣ ⲟⲩϧⲣⲱⲟⲩ ϣⲁ ⲡ̀ⲟⲩⲣⲟ ⲉϥϫⲱ ⲙ̀ⲙⲟⲥ ϫⲉ ⲁⲙⲟⲛⲓ ⲛ̀ⲧⲁϫⲓϫ ⲱ ⲡⲁⲟ̅ⲥ̅ ⲡ̀ⲟⲩⲣⲟ Ⲉⲗⲭⲉⲙⲏⲗ ϩⲓⲛⲁ ⲛ̀ⲧⲉ Ⲫϯ ⲉⲣϩ̀ⲙⲟⲧ ⲛⲁⲕ ⲙ̀ⲡ̀ⲧⲁϫⲣⲟ ⲛ̀ⲧⲉ ⲧⲉⲕⲙⲉⲧⲟⲩⲣⲟ ⲡ̀ⲟⲩⲣⲟ ⲇⲉ ⲁϥⲟ̀ϩⲓ ⲉⲣⲁⲧϥ ⲟⲩⲟϩ ⲁⲩⲓ̀ⲛⲓ ⲛⲁϥ ⲙ̀ⲡⲓⲑ̀ⲙⲏⲓ ⲡⲓⲙⲁⲕⲁⲣⲓⲟⲥ Ⲓⲱ̅ⲁ̅ ϧⲉⲛ ⲑ̀ⲙⲏϯ ⲛ̀ⲛⲓⲇⲁⲝⲓⲥ ⲉⲑⲛⲉⲙⲁϥ ⲡⲉϫⲉ ⲡ̀ⲟⲩⲣⲟ ⲛⲁϥ ϫⲉ ⲟⲩ ⲡⲉ ⲉⲧⲓⲁ ⲛ̀ⲧⲉ ⲡⲉⲕϧⲣⲱⲟⲩ ⲡⲉϫⲁϥ ⲛⲁϥ ϫⲉ ⲱⲟⲩⲛⲛ̀ϩⲏⲧ ⲛⲉⲙⲏⲓ ϣⲁⲛⲧⲁⲧⲁⲙⲟⲕ ⲉⲧⲁⲓⲁⲡⲟⲕⲣⲏⲥⲓⲥ ⲡⲉϫⲁϥ ⲛⲁϥ ⲛ̀ϫⲉ ⲡ̀ⲟⲩⲣⲟ ϫⲉ ϩⲉⲣⲓ ⲙ̀ⲙⲟⲕ ⲟⲩⲟϩ ⲥⲁϫⲓⲓ ϧⲉⲛ ⲟⲩⲧⲁϫⲣⲟ ⲡⲉϫⲁϥ ϫⲉ ⲁⲛⲟⲕ ⲟⲩⲭⲣⲓⲥⲧⲓⲁⲛⲟⲥ ⲁⲥⲉⲣϩⲁⲗ ⲙ̀ⲙⲟⲓ ⲛ̀ϫⲉ ϯⲁⲛⲟⲙⲓⲁ ϣⲁⲛⲧⲁ ⲙⲉⲑⲛⲟⲩϫ ⲉⲡⲁⲛⲁϩϯ ⲟⲩⲟϩ ⲁⲓϫⲉⲗ ⲡⲁⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲟⲩⲟϩ ϯⲛⲟⲩ ⲁⲓⲥⲱⲧⲉⲙ ⲉⲑⲃⲉ ⲡⲉⲕϩ̀ⲙⲟⲧ ⲛⲉⲙ ⲧⲉⲕⲇⲓⲕⲉⲟⲩⲥⲩⲛⲏ ⲉⲧⲫⲟⲣϣ ⲉⲃⲟⲗϧⲉⲛ ⲧⲉⲕⲙⲉⲧⲟⲩⲣⲟ ⲁⲓⲛⲏⲟⲩ ϣⲁⲣⲟⲕ ⲁⲣⲏⲟⲩ ⲛ̀ⲧⲉⲕⲉⲣϩ̀ⲙⲟⲧ ⲛⲏⲓ ⲙ̀ⲡⲁⲛⲁϩϯ ⲙ̀ⲙⲟⲛ ⲡⲟⲩ ⲁⲛⲟⲕ ⲟⲩⲣⲱⲙⲓ ⲉⲧϭⲁϧⲉⲙ ⲙⲁⲧⲟⲩⲃⲟⲟⲓ ⲉⲃⲟⲗϧⲉⲛ ⲧⲉⲕⲥⲏϥⲓ ⲫⲁⲓ ⲅⲁⲣ ⲡⲉ ⲡⲁⲟⲩⲱϣ ϧⲉⲛ Ⲡⲟ̅ⲥ̅ ⲡ̀ⲟⲩⲣⲟ ⲇⲉ ⲡⲉϫⲁϥ ⲛ̀ⲛⲓϩⲟⲩⲁϯ ⲛ̀ⲧⲉ ⲡⲉϥϣ̀ⲗⲟⲗ ⲛⲉϥϧⲉⲗⲗⲟⲓ ⲡⲉϫⲁϥ ⲛⲱⲟⲩ ϫⲉ ⲟⲩ ⲡⲉⲧⲉⲛϯϩⲁⲡ ⲛ̀ⲧⲉ ϯⲁⲇⲓⲕⲓⲁ ϫⲉ ⲫⲁⲓ ⲟⲩⲣⲱⲙⲓ ⲛ̀ⲗⲓⲃⲓ ⲡⲉ ϫⲉ ⲫⲁⲓ ⲙⲁⲣⲟⲩϩⲓϩⲟϯ ⲉⲣⲟϥ ⲛ̀ⲅ̅ ⲁⲣⲏⲟⲩ ⲛ̀ⲥⲉⲧⲁⲥⲑⲟϥ ⲉⲃⲟⲗϧⲉⲛ ⲡⲉϥⲗⲓⲃ ⲉϣⲱⲡ ⲁϥϣⲁⲛⲧⲁⲥⲑⲟϥ ⲙⲁⲣⲟⲩⲧⲁⲓⲟϥ ϥ̀ⲛⲁⲧⲁⲥⲑⲟϥ ⲟⲛ ⲙⲁⲣⲟⲩⲕϩϥ ⲉϥⲟⲛϧ ⲡⲉϫⲉ ⲡ̀ⲟⲩⲣⲟ ⲙ̀ⲡⲓⲁⲣⲭⲏⲥⲧⲣⲁⲧⲉⲩⲙⲁ ϫⲉ ⲙⲁⲣⲉ ⲅ̅ ⲛ̀ⲕⲉⲛⲧⲉⲣⲓⲟⲛ ⲉⲩⲁⲣⲉϩ ϣⲁ ⲅ̅ ⲛ̀ⲉϩⲟⲟⲩ ϣⲁⲛⲧⲉⲛⲛⲁⲩ ⲉⲡⲉϥⲥⲟϭⲛⲓ ⲙⲉⲛⲉⲛⲥⲱⲟⲩ.

Ⲡⲓⲑ̀ⲙⲏⲓ ⲇⲉ ⲁⲩⲁⲙⲟⲛⲓ ⲙ̀ⲙⲟϥ ⲛ̀ϫⲉ ⲛⲓⲕⲉⲛⲧⲉⲣⲓⲟⲛ ⲁⲩⲟⲗϥ ⲉϯⲭⲁⲗⲁ ⲫ̀ⲙⲁⲛϣⲱⲡⲓ ⲙ̀ⲡⲟⲩⲣⲟ ⲟⲩⲟϩ ⲁⲡⲓⲥⲱⲓⲧ ⲥⲱⲣ ⲉⲃⲟⲗϧⲉⲛ ⲃ̅ ⲙ̀ⲡⲟⲗⲓⲥ ⲭⲏⲙⲓ ⲛⲉⲙ ⲙⲓⲥⲧⲣⲁⲙ ⲙ̀ⲫ̀ⲣⲏϯ ⲛ̀ⲟⲩⲕⲣⲓⲅⲙⲁ ⲛⲉϥⲙⲟⲩϯ ϫⲉ ⲁ̅ ⲟⲩⲁⲓ ⲁϥⲓ̀ ϣⲁ ⲡ̀ⲟⲩⲣⲟ Ⲉⲗⲭⲉⲙⲏⲗ ⲉⲉⲣ ̀ⲁⲡⲓϣⲓⲛⲓ ⲇⲉ ⲫⲟϩ ϣⲁ ⲛⲓϧⲉⲗⲗⲟⲓ ⲉⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ⲉⲑⲃⲉ ⲡⲓⲑⲙⲏⲓ ⲛⲁⲩⲑⲟⲩⲓⲧ ⲇⲉ ⲛⲉⲙ ⲡⲓⲥⲟⲫⲟⲥ ⲡⲓⲥⲏⲓⲛⲓ ⲙ̀ⲡ̀ⲟⲩⲣⲟ ⲉⲑⲃⲉ ϫⲉ ⲟⲩⲟⲛ ⲛ̀ⲧⲁϥ ⲙ̀ⲙⲁⲩ ⲛ̀ⲟⲩⲁⲝⲓⲱⲙⲁ ϧⲁⲧⲉⲛ ⲡ̀ⲟⲩⲣⲟ ⲁⲣⲏⲟⲩ ⲛ̀ⲧⲉϭⲓϩ̀ⲙⲟⲧ ⲉϫⲉⲛ ⲡⲓⲑ̀ⲙⲏⲓ ϧⲁⲧⲉⲛ ⲡⲟⲩⲣⲟ ⲛ̀ⲧⲉϥⲭⲁϥ ⲉⲃⲟⲗ ⲡⲓⲥⲟⲫⲟⲥ ϫⲉ ⲫⲁ Ⲉⲡⲟⲩϣⲉⲭⲉⲣ ⲁϥϭⲓ ⲛ̀ⲛⲓϧⲉⲗⲗⲟⲓ ⲛ̀ⲧⲁⲣⲓⲥⲉⲟⲥ ⲛ̀ⲧⲉ ⲡ̀ⲟⲩⲣⲟ ⲁϥⲧⲱⲛϥ ⲁϥⲙⲟϣⲓ ϣⲁ ⲫ̀ⲙⲁ ⲛ̀ⲛⲧⲉⲛⲧⲉⲣⲓⲟⲛ ⲉⲧⲣⲱⲓⲥ ⲉⲡⲓⲙⲁⲕⲁⲣⲓⲟⲥ Ⲓⲱ̅ⲁ̅ ⲡⲉϫⲁϥ ⲛⲱⲟⲩ ϫⲉ ϩⲱⲗ ⲧⲁⲓ ϣⲁⲛⲧⲁⲥⲁϫⲓⲛⲉⲙ ⲡⲁⲓⲥⲁϥϩⲏⲧ ⲛ̀ⲣⲱⲙⲓ ⲉⲧⲟⲓ ⲛ̀ⲁⲧⲕⲁϯ ϣⲁϯⲛⲁⲩ ⲉⲡⲉⲥⲕⲁϯ ϫⲉ ⲟⲩ ⲛⲓⲕⲉⲛⲧⲉⲣⲓⲟⲛ ⲁⲩⲟⲩⲓ ⲉⲃⲟⲗ ⲙ̀ⲙⲱⲟⲩ ⲛ̀ⲟⲩⲕⲟⲩϫⲓ ⲧⲟⲧⲉ ⲡⲉϫⲉ ⲡⲓⲥⲟⲫⲟⲥ ⲛⲁϥ ϫⲉ ⲧ̀ϩⲓⲣⲏⲛⲏ ⲛⲁⲕ ⲛ̀ϣⲟⲣⲡ ⲡⲁϣ̀ⲫⲏⲣ ⲁⲓⲕⲏⲛ ⲁⲓⲧⲁⲙⲟⲕ ⲉⲑⲃⲉ ⲡⲁⲓϩⲱⲃ ⲱ ⲡⲁⲥⲟⲛ ϫⲉ ⲙ̀ⲫ̀ⲣⲏϯ ⲛ̀ⲟⲩⲥⲁϫⲓ ⲙ̀ⲙⲉⲑⲛⲟⲩϫ ⲓⲉⲩⲉⲣ ⲡⲉ ⲧⲉⲛⲙⲉⲑⲛⲟⲩϫ ⲙ̀ⲡⲓⲉϩⲟⲟⲩ ⲧⲏⲣϥ ⲥⲱⲧⲉⲙ ⲛ̀ⲧⲁⲧⲁⲙⲟⲕ ⲕ̀ⲉⲙⲓ ϫⲉ ⲟⲩⲟⲛ ϣ̀ϫⲟⲙ ⲛ̀ⲧⲁⲕ ⲛⲁⲛⲓϧⲓⲥⲓ ⲛⲉⲙ ⲛⲓⲃⲁⲥⲁⲛⲟⲥ ⲱⲟⲩⲓⲛⲓⲁⲧⲕ ϧⲁⲧⲉⲛ Ⲫϯ ⲟⲩϫⲟⲙ ⲛ̀ⲧⲁⲕ ⲙ̀ⲙⲁⲩ ⲁⲛ ⲁⲛⲟⲕ ϯⲛⲁϯϩⲟ ⲉⲡ̀ⲟⲩⲣⲟ ⲛ̀ⲧⲉϥⲭⲁⲕ ⲉⲃⲟⲗ ⲛ̀ⲧⲉⲕϣⲉⲛⲁⲕ ϩⲱⲗ ϣⲁ ϯⲥⲓⲣⲓⲁ ⲓⲉ ϯⲡⲁⲣⲁⲗⲓⲁ ⲉⲣϣⲉⲙⲙⲟ ⲛⲁⲕ ⲉⲑⲃⲉ Ⲡⲭ̅ⲥ̅ ⲟⲩⲟϩ Ⲡⲭ̅ⲥ̅ ⲛⲁⲛⲁϩⲙⲉⲕ ϧⲉⲛ ϩⲁⲛⲛⲏⲥⲧⲓⲁ ⲛⲉⲙ ϩⲁⲛⲧⲱⲃϩ ⲛⲉⲙ ϩⲁⲛⲧⲉⲩⲭⲏ ⲟⲩⲟϩ ⲫ̀ⲛⲁⲓ ⲙ̀Ⲫϯ ⲛⲁϣⲉⲡⲕ ⲟⲩⲟϩ ϥ̀ⲛⲁⲛⲁϩⲙⲉⲕ ⲡⲁⲓⲣⲏϯ ⲛⲓϧⲉⲗⲗⲟⲓ ⲙ̀ⲡⲓⲥⲧⲟⲥ ⲛⲁⲩⲥⲁϫⲓ ⲛⲉⲙⲁϥ ⲟⲛⲧⲱⲥ ⲛ̀ⲑⲟϥ ⲇⲉ ⲡⲓⲁⲑⲗⲓⲧⲏⲥ ⲡⲓⲃⲱⲕ ⲛ̀ⲧⲉ Ⲡⲭ̅ⲥ̅ ⲫⲏⲉⲧⲥ̀ⲙⲁⲣⲱⲟⲩⲧ Ⲓⲱ̅ⲁ̅ ⲁϥⲉⲣⲟⲩⲱ ⲙ̀ⲙⲱⲟⲩ ⲁⲛ ⲉⲃⲏⲗ ϫⲉ ⲛ̀ⲧⲁⲙⲟⲩ ⲉϫⲉⲛ ⲫ̀ⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲁⲛⲟⲩϯ ⲉⲧⲁⲩⲥⲱⲧⲉⲙ ⲇⲉ ⲉⲛⲁⲓ ⲛ̀ϫⲉ ⲛⲓϧⲉⲗⲗⲟⲓ ⲛⲓⲡⲓⲥⲧⲟⲥ ⲛⲉⲙ ⲡⲓⲥⲟⲫⲟⲥ ⲙ̀ⲡⲓⲁϫⲣⲟ ⲙ̀ⲡⲉϥⲛⲁϩϯ ϧⲉⲛ Ⲡⲟ̅ⲥ̅ ⲡⲉϫⲱⲟⲩ ⲛⲁϥ ϫⲉ ϫⲉⲙⲛⲟⲙϯ ϧⲉⲛ Ⲡⲭ̅ⲥ̅ Ⲫϯ ⲉϥⲉϣⲱⲡⲓ ⲛⲉⲙⲁⲕ ⲟⲩⲟϩ ⲁⲩϯϩⲓⲣⲏⲛⲏ ⲛⲁϥ ⲟⲩⲟϩ ⲁⲩϣⲉ ⲛⲱⲟⲩ ⲧⲟⲧⲉ ⲡⲓⲥⲟⲫⲟⲥ ⲁϥⲙⲟⲩϯ ⲉⲛⲓⲕⲉⲛⲧⲉⲣⲓⲟⲛ ⲡⲉϫⲁϥ ⲛⲱⲟⲩ ϫⲉ ϯϩⲟ ⲉⲣⲧⲱⲉⲛ ⲁⲣⲉϩ ⲉⲡⲁⲓⲁⲑⲛⲟⲩⲥ ⲟⲩⲟϩ ⲡⲁⲗⲓⲛ ⲁϥⲙⲟⲩϯ ⲉⲣⲱⲟⲩ ⲛ̀ⲭⲱⲡ ⲁϥϯ ⲛ̀ϩⲁⲛϩⲁⲧ ⲛⲱⲟⲩ ⲟⲩⲟϩ ⲁϥϩⲉⲛϩⲱⲟⲩ ⲉⲣⲟϥ ⲟⲩⲟϩ ⲁϥϣⲉⲛⲁϥ ⲁϥⲭⲁϥ ⲛⲉⲙⲱⲟⲩ

Ⲡⲓⲙⲁⲕⲁⲣⲓⲟⲥ ⲇⲉ Ⲓⲱ̅ⲁ̅ ⲉϥⲭⲏ ⲛⲉⲙ ⲡⲓⲅⲉⲛⲧⲉⲣⲓⲟⲛ ⲉⲩⲁⲣⲉϩ ⲉⲣⲟϥ ⲟⲩⲇⲉ ⲛ̀ⲛⲟⲩⲉⲣⲙ̀ⲕⲁϩ ⲛⲱⲟⲩ ⲛⲁϥ ⲉⲃⲏⲗ ⲉⲛⲓⲁⲗⲱⲟⲩⲓ ⲛ̀ⲧⲉ ⲡ̀ⲟⲩⲣⲟ ⲛⲓⲕⲟⲩϫⲓ ⲛⲁⲩϩⲓϩⲟϯ ⲉⲣⲟϥ ϧⲉⲛ ϩⲁⲛⲥⲁϫⲓ ⲛ̀ⲕⲁⲗⲁⲕⲓⲁ ⲓⲧⲉ ⲛⲉⲙ ⲛⲓⲥⲁϥϩⲏⲧ ⲛⲉⲙ ⲛⲓⲥⲧⲁⲩⲗⲟⲛ ⲛⲁⲩϩⲓϩⲟϯ ⲉⲣⲟϥ ⲡⲉ ϧⲉⲛ ϩⲁⲛϩⲟⲣϣ ⲛ̀ⲥⲁϫⲓ ⲛⲉⲙ ϩⲁⲛϣⲱϣ ⲉⲛⲁϣⲱⲟⲩ ⲟⲩⲟϩ ⲛⲁⲓ ⲧⲏⲣⲟⲩ ⲛⲁϥⲟⲩⲱⲛ ⲛ̀ⲣⲱϥ ⲁⲛ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϧⲉⲛ ⲡⲓⲡⲣⲟⲫⲏⲧⲏⲥ Ⲇⲁ̅ⲇ̅ ⲉϥϫⲱ ⲙ̀ⲙⲟⲥ ϫⲉ ⲁⲩⲕⲱϯ ⲉⲣⲟⲓ ⲛ̀ϫⲉ ⲟⲩⲑⲟ ⲛ̀ⲟⲩϩⲱⲣ ⲟⲩⲟϩ ⲟⲩⲥⲩⲛⲁⲅⲱⲅⲏ ⲛ̀ϫⲁϫⲃⲱⲛ ⲡⲉ ⲉⲧⲁⲥⲁⲙⲟⲛⲓ ⲙ̀ⲙⲟⲓ ⲉⲧⲁ ⲡⲓⲉϫⲱⲣϩ ⲇⲉ ϣⲱⲡⲓ ⲛ̀ⲑⲟϥ ⲇⲉ ⲡⲓⲑ̀ⲙⲏⲓ ⲛⲁϥⲙⲏⲛ ⲛⲉⲙ ⲛⲓⲣⲉϥⲁⲣⲉϩ ϣⲁⲛⲧⲉ ⲟⲩⲟⲛ ⲁⲙⲟⲛⲓ ⲙ̀ⲙⲟϥ ⲟⲩⲟϩ ⲁⲩⲉⲛϥ ϣⲁ ⲡ̀ⲟⲩⲣⲟ ϧⲉⲛ ⲡⲉϥⲕⲁⲥⲇⲟⲛ ⲁⲩⲧⲁϩⲟϥ ⲙ̀ⲡⲉϥⲙ̀ⲑⲟ ⲡⲉϫⲉ ⲡ̀ⲟⲩⲣⲟ ⲙ̀ⲡⲓⲑ̀ⲙⲏⲓ Ⲓⲱ̅ⲁ̅ ϫⲉ ⲙⲁⲧⲁⲙⲟⲓ ⲙ̀ⲡ̀ⲧⲁϫⲣⲟ ⲙ̀ⲡⲉⲕϩⲏⲧ ⲛⲉⲙ ⲡⲉⲕⲙⲉⲩⲓ ⲟⲩⲟⲛ ⲟⲩⲇⲁⲛⲓⲥⲧⲏⲥ ⲉϫⲱⲕ ⲛ̀ⲁⲟⲩⲁⲓ ϣⲁ ⲧ̀ⲁⲫⲉ ⲙ̀ⲡⲁⲓⲱⲧ ⲡ̀ⲟⲩⲣⲟ Ⲉⲗⲁⲧⲉⲗ ϯⲛⲁⲧⲟⲩⲃⲟ ⲛⲁⲕ ⲉϫⲱⲕ ⲟⲩⲫⲉⲛⲥ̀ⲛⲟϥ ϯⲛⲁⲛⲁϩⲙⲉⲕ ⲉⲃⲟⲗ ⲙ̀ⲙⲟϥ ⲉϣⲱⲡ ⲭ̀ⲟⲩⲱϣ ⲉⲡⲉⲕⲛⲁϩϯ ⲗⲛⲧⲉ ϣⲱⲣⲡ ⲁⲙⲟⲩ ⲛ̀ⲧⲟⲟⲩⲓ ⲛⲁϩⲣⲁϥ ⲙ̀ⲡⲓⲁⲣⲭⲏⲕⲣⲓⲧⲏⲥ ⲛⲉⲙ ⲛⲓⲕⲁⲑⲏⲭⲟⲩⲙⲉⲛⲧⲏⲓⲥ ⲛⲉⲙ ⲡⲓϧⲉⲗⲗⲟ ⲛ̀ⲧⲉ ⲛⲓϧⲉⲗⲗⲟⲓ ⲉⲣⲗⲁⲙⲓⲧⲏⲥ ⲙ̀ⲡⲟⲩⲙⲑⲟ ⲟⲩⲟϩ ⲙⲱⲓⲧ ⲛⲓⲃⲉⲛ ⲉⲧⲉⲕⲟⲩⲁϣϥ ϩⲱⲗ ⲉⲣⲟϥ ⲟⲩⲟϩ ϣⲱⲡⲓ ⲛ̀ⲭⲣⲓⲥⲧⲓⲁⲛⲟⲥ ⲡⲉⲧⲉϩⲛⲁⲕ ⲡⲓⲙⲁⲕⲁⲣⲓⲟⲥ ⲇⲉ Ⲓⲱ̅ⲁ̅ ⲛⲁϥⲭⲱ ⲛ̀ⲣⲱϥ ⲡⲉϫⲉ ⲁ̅ ⲇⲉ ⲟⲩⲛ ⲛⲁϥ ⲉⲃⲟⲗϧⲉⲛ ⲛⲏⲉⲧⲟ̀ϩⲓ ⲉⲣⲁⲧⲟⲩ ϫⲉ ⲛⲁⲛⲉϥ ⲉⲑⲣⲉⲕⲥⲱⲧⲉⲙ ⲛ̀ⲥⲁ ⲡ̀ⲟⲩⲣⲟ ⲟⲩⲟϩ ⲛ̀ⲧⲉⲕⲓ̀ⲣⲓ ⲙ̀ⲡⲉⲑⲣⲁⲛⲁϥ ⲡⲉϫⲉ ⲡⲓⲁⲅⲓⲟⲥ Ⲓⲱ̅ⲁ̅ ϫⲉ ϯⲥⲱⲟⲩⲛ ⲛ̀ϩ̀ⲗⲓ ⲛ̀ⲧⲁⲛⲓⲥⲧⲏⲥ ⲉϫⲱⲓ ⲁⲛ ⲟⲩⲇⲉ ⲙ̀ⲡⲓⲫⲉⲛⲥ̀ⲛⲟϥ ⲉⲛⲉϩ ⲟⲩⲙⲉⲧϫⲁϫⲓ ⲛⲉⲙ ⲟⲩⲣⲱⲙⲓ ⲛ̀ⲛⲉⲥϣⲱⲡⲓ ⲙ̀ⲙⲟⲓ ⲉⲃⲏⲗ ⲉⲡⲁⲛⲟⲃⲓ ⲙ̀ⲙⲁⲩⲁⲧϥ ⲉⲧⲟϣ ⲟⲩⲟϩ ϯⲛⲟⲩ ⲱ ⲡ̀ⲟⲩⲣⲟ ⲁⲡⲉⲕϩ̀ⲙⲟⲧ ⲧⲁϩⲉ ⲛⲉⲕϭⲓⲏ̀ ⲧⲏⲣⲟⲩ ⲁⲛⲟⲕ ⲇⲉ ⲁⲓⲥⲱⲧⲉⲙ ⲉⲑⲃⲏⲧⲟⲩ ⲟⲩⲟϩ ⲁⲓⲓ̀ ϣⲁ ⲡⲉⲕⲕⲣⲁⲧⲟⲥ ⲡ̀ⲟⲩⲣⲟ ⲉϣⲱⲡ ⲁⲕⲓ̀ⲣⲓ ⲛ̀ⲟⲩⲁⲅⲁⲑⲟⲛ ⲛ̀ⲧⲉⲕⲉⲣϩ̀ⲙⲟⲧ ⲛⲏⲓ ⲙ̀ⲡⲁⲛⲁϩϯ ⲁⲕⲓ̀ⲣⲓ ⲛ̀ⲟⲩⲛⲁⲓ ⲛⲉⲙⲏⲓ ⲙ̀ⲙⲟⲛ ⲱ ⲡ̀ⲟⲩⲣⲟ ⲁⲛⲟⲕ ⲁⲓⲕⲏⲛ ⲁⲓⲧⲁⲙⲟⲕ ϫⲉ ⲁⲛⲟⲕ ⲟⲩⲣⲱⲙⲓ ⲉϥϭⲁϧⲉⲙ ⲙⲁⲧⲟⲩⲃⲟⲓ ⲉⲃⲟⲗϧⲉⲛ ⲧⲉⲕⲥⲏϥⲓ

Ⲟⲩⲟϩ ⲡ̀ⲟⲩⲣⲟ ⲛⲁϥⲥⲱⲧⲉⲙ ⲉⲣⲟϥ ϧⲉⲛ ⲟⲩⲙⲉⲧⲣⲉϥⲱⲟⲩ ⲛ̀ϩⲏⲧ ⲉⲣⲉ ⲛⲉϥⲕⲁⲑⲉⲇⲣⲟⲥ ⲧⲏⲣⲟⲩ ⲉⲩⲑⲟⲩⲏⲧ ⲉⲣⲟϥ ϧⲉⲛ ⲡⲓⲉϫⲱⲣϩ ⲉⲧⲉⲙⲙⲁⲩ ⲡ̀ⲟⲩⲣⲟ ⲇⲉ ⲡⲉϫⲁϥ ϫⲉ ⲟⲩⲕⲟⲩⲛ ⲭ̀ⲟⲩⲱϣ ⲉⲑⲣⲉⲕⲙⲟⲩ ⲡⲉϫⲉ ⲡⲓⲁⲅⲓⲟⲥ ⲛⲁϥ ϫⲉ ⲥⲉ ⲡⲁⲟ̅ⲥ̅ ϯⲟⲩⲱϣ ⲉⲙⲟⲩ ⲉϫⲉⲛ ⲫ̀ⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ϧⲉⲛ ⲧⲉⲕⲥⲭϥⲓ ⲱ ⲡ̀ⲟⲩⲣⲟ ⲡⲉϫⲉ ⲡ̀ⲟⲩⲣⲟ ⲛ̀ⲛⲏⲉⲧⲟ̀ϩⲓ ⲉⲣⲁⲧⲟⲩ ϫⲉ ⲭⲁϥ ⲛⲉⲙ ⲛⲓⲅⲉⲛⲧⲉⲣⲓⲟⲛ ϣⲁ ⲡ̀ϫⲱⲕ ⲙ̀ⲡⲓⲅ̅ ⲛ̀ⲉ̀ϩⲟⲟⲩ ⲕⲁⲧⲁ ⲡ̀ⲥⲁϫⲓ ⲙ̀ⲡⲓⲣⲉϥϯϩⲁⲡ ⲟⲩⲟϩ ϧⲉⲛ ⲡⲓⲉϩⲟⲟⲩ ⲙ̀ⲙⲁϩⲅ̅ ⲧⲉⲛϫⲱⲕ ⲛⲁϥ ⲛ̀ⲧⲉϥⲉⲡⲓⲧⲓⲙⲓⲁ ⲧⲟⲧⲉ ⲁⲩⲟⲗϥ ⲁⲩⲧⲏⲓϥ ⲛⲁⲛⲓⲅⲉⲛⲧⲉⲣⲓⲟⲛ ⲉⲡ̀ϫⲓⲛⲑ̀ⲣⲟⲩⲁⲣⲉϩ ⲉⲣⲟϥ ⲛ̀ⲑⲟϥ ⲇⲉ ⲡⲓⲑ̀ⲙⲏⲓ ⲛⲁϥⲙⲏⲛ ϧⲉⲛ ϯⲡⲣⲟⲥⲉⲩⲭⲏ ⲛⲉⲙ ⲟⲩⲣⲱⲓⲥ ⲛ̀ⲧⲉ ⲡⲓⲉϫⲱⲣϩ ϧⲉⲛ ⲟⲩϩⲏⲧ ⲉϥⲥⲟⲩⲧⲱⲛ ⲛⲉⲙ Ⲡⲟ̅ⲥ̅

Ⲁⲡⲓⲉϩⲟⲟⲩ ⲇⲉ ⲙ̀ⲙⲁϩⲃ̅ ϫⲱⲕ ⲛⲉⲙ ⲡⲓⲙⲁϩⲅ̅ ⲉⲣⲉ ⲡⲓⲑ̀ⲙⲏⲓ ⲛⲉⲙ ⲛⲓⲣⲉϥⲁⲣⲉϩ ⲛⲁϥⲙⲏⲛ ϧⲉⲛ ⲛⲓⲁⲣⲉⲧⲏ ⲟⲩⲟϩ ⲛⲓⲣⲉϥⲣⲱⲓⲥ ⲛⲁⲩϯⲁⲥⲟ ⲉⲣⲟϥ ⲉⲩⲃⲉ ⲡ̀ⲥⲁϫⲓ ⲙ̀ⲡⲓⲥⲟⲫⲟⲥ ⲉⲧⲁ ⲡⲓⲉϩⲟⲟⲩ ⲇⲉ ⲙ̀ⲙⲁϩⲇ̅ ϣⲱⲡⲓ ⲉⲧⲉ ⲡ̀ⲉ̅ ⲛ̀ⲉⲃⲇⲟⲙⲁⲥ ⲡ̀ⲟⲩⲣⲟ ⲉϥϥⲓⲣⲱⲟⲩϣ ⲉ̀ϩⲓ ⲉϫⲏⲟⲩ ⲛ̀ⲧⲉ ⲛⲓⲥⲧⲟⲗⲟⲧⲟⲥ ⲉⲫ̀ⲓⲁⲣⲟ ⲉⲑⲣⲉϥⲟⲩⲟⲣⲡⲟⲩ ⲉⲉⲣⲡⲟⲗⲉⲙⲓⲛ ⲁϥⲉⲣⲕⲉⲗⲉⲩⲓⲛ ⲉⲑⲣⲟⲩⲓ̀ⲛⲓ ⲙ̀ⲡⲓⲙⲁⲕⲁⲣⲓⲟⲥ Ⲓⲱ̅ⲁ̅ ⲉϧ̀ⲣⲏⲓ ⲛⲉⲙⲁϥ ⲉⲭⲏⲙⲓ ⲧⲟⲧⲉ ⲛⲓⲅⲉⲛⲧⲉⲣⲓⲟⲛ ⲁⲩⲉⲛϥ ⲛ̀ⲁⲧⲙⲏⲣ ⲛ̀ⲁⲧⲥⲟⲛϩ ⲁⲗⲗⲁ ⲛⲁϥⲙⲟϣⲓ ⲛⲉⲙ ⲛⲓⲅⲉⲛⲧⲉⲣⲓⲟⲛ ⲕⲉⲟⲩⲁⲓ ⲥⲁ ⲛⲁⲓ ⲛⲉⲙ ⲥⲁ ⲙ̀ⲛⲁⲓ ⲙ̀ⲙⲟϥ ⲛ̀ⲑⲟϥ ⲉϥϧⲉⲛ ⲧⲟⲩⲙⲏϯ ⲁⲗⲗⲁ ⲛⲁϥⲙⲏⲛ ⲛⲛⲉϥⲕⲓⲣⲓⲥ ϩⲟⲗⲱⲥ ⲛⲓⲅⲉⲛⲧⲉⲣⲓⲟⲛ ⲁⲩⲫⲁϣⲙⲉϥ ϧⲉⲛ ⲛⲓⲡⲗⲁⲧⲓⲁ ⲛ̀ⲧⲉ ⲭⲏⲙⲓ ⲛⲉⲙ ⲛⲓⲫⲁⲅⲙⲟⲥ ⲛⲉⲙ ⲛⲓⲭⲓⲣ ϧⲉⲛ ⲑ̀ⲙⲏϯ ⲛ̀ⲛⲓⲣⲉϥϯ ⲉⲃⲟⲗ ⲛⲉⲙ ⲛⲓⲁⲅⲟⲣⲉⲟⲥ ⲛⲏ ⲙⲉⲛ ⲉⲁⲩⲛⲁⲩ ⲉⲣⲟϥ ⲛⲁⲩⲉⲣⲗⲟⲓⲙⲟⲥ ⲉⲣⲟϥ ⲫⲏ ⲉⲣⲉⲧⲉⲛⲛⲁⲩ ⲉⲫⲁⲓ ϫⲉ ϥ̀ⲛⲁϩⲱⲗ ⲉⲉⲣ ̀ⲟⲩⲟϩ ⲛⲁⲩⲥⲱⲃⲓ ⲙ̀ⲙⲟⲓ ⲛ̀ϫⲉ ⲛⲏⲉⲧϩⲉⲙⲥⲓ ϧⲉⲛ ⲛⲓⲁⲩⲗⲏ ⲟⲩⲟϩ ⲛⲁⲩⲉⲣⲯⲁⲗⲓⲛ ⲉⲣⲟⲓ ⲛ̀ϫⲉ ⲛⲏⲉⲧⲥⲱ ⲙ̀ⲡⲓⲏⲣⲡ ⲛ̀ⲑⲟϥ ⲇⲉ ⲡⲓⲙⲁⲕⲁⲣⲓⲟⲥ Ⲓⲱ̅ⲁ̅ ⲛⲁϥⲙⲏⲛ ⲉⲡⲓⲣⲁⲛ ⲛ̀ⲟⲩϫⲁⲓ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲉⲧⲁⲩⲓ̀ ⲇⲉ ⲉⲫ̀ⲙⲁ ϫⲉ ⲫ̀ⲙⲁ ⲛ̀ⲑⲱⲟⲩϯ ⲛ̀ⲛⲓⲧⲉⲭⲛⲓⲧⲏⲥ ⲁⲩⲧ̀ϩⲉⲙⲥⲟϥ ⲙ̀ⲙⲁⲩ ⲧⲟⲧⲉ ⲡⲓⲁⲅⲓⲟⲥ Ⲓⲱ̅ⲁ̅ ⲁϥⲱⲗⲓ ⲛ̀ⲟⲩⲕⲟϫⲓ ⲛ̀ϩⲁⲧ ⲁϥⲧⲏⲓⲥ ⲛ̀ⲛⲓⲅⲉⲛⲧⲉⲣⲓⲟⲛ ⲡⲉϫⲁϥ ⲛⲱⲟⲩ ϫⲉ ϣⲱⲡ ⲛⲱⲧⲉⲛ ⲛ̀ϩⲁⲛϧ̀ⲣⲏⲟⲩⲓ ⲉⲣⲉⲧⲉⲛⲟⲩⲱⲙ ⲉⲑⲃⲉ ϫⲉ ⲉⲣⲉⲧⲉⲛϣⲉⲡϧⲓⲥⲓ ϧⲉⲛ ⲡ̀ϫⲓⲛⲙⲟϣⲓ ⲛⲉⲙⲏⲓ ⲉⲣⲉ Ⲡⲟ̅ⲥ̅ ⲥ̀ⲙⲟⲩ ⲉⲣⲱⲧⲉⲛ ⲁⲟⲩⲁⲓ ϣⲉⲛⲁϥ ⲁϥϣⲉⲡ ⲟⲩⲱⲓⲕ ⲛⲉⲙ ⲟⲩⲁⲗⲱⲙ ⲉϥϫⲉϥϫⲱϥ ⲛⲉⲙ ⲟⲩϣⲟⲡ ⲟⲩⲟϩ ⲁϥⲉⲛⲟⲩ ⲉⲫ̀ⲙⲁ ⲛ̀ⲛⲉϥϣ̀ⲫⲏⲣ ⲟⲩⲟϩ ⲛⲁϥϩⲉⲙⲥⲓ ⲛⲁⲩⲟⲩⲱⲙ ⲛⲓⲅⲉⲛⲧⲉⲣⲓⲟⲛ ⲇⲉ ⲛⲁⲩϯϩⲟ ⲉⲣⲟϥ ⲉⲩϫⲱ ⲙ̀ⲙⲟⲥ ϫⲉ ⲧⲉⲛϯϩⲟ ⲉⲣⲟⲕ ⲉⲑⲃⲉ Ⲫϯ ϫⲉⲙϯⲡⲓ ⲛ̀ⲟⲩⲕⲟⲩϫⲓⲓ ⲛ̀ⲱⲓⲕ ⲛ̀ⲑⲟϥ ⲇⲉ ⲁϥϭⲓ ⲛ̀ⲟⲩⲙⲁⲣⲓ ⲁϥⲧⲏⲓⲥ ⲛ̀ⲣⲱϥ ⲁⲟⲩⲁⲓ ⲇⲉ ⲉⲃⲟⲗϧⲉⲛ ⲛⲓⲅⲉⲛⲧⲉⲣⲓⲟⲛ ⲫⲁϣ ⲟⲩϣⲟⲡ ⲟⲩⲟϩ ⲁϥϯ ⲡⲉⲥⲫⲁϣ ⲛⲁϥ ⲁϥϫⲉⲙϯⲡⲓ ⲙ̀ⲙⲟⲥ ⲉⲑⲃⲉ ⲡⲟⲩϯϩⲟ ⲉⲧⲓ ⲟⲩⲛ ⲛⲁⲩϩⲉⲙⲥⲓ ⲛⲉⲙⲁϥ ⲓⲥ ϩⲁⲛⲙⲏϣ ⲛ̀ϧ̀ⲣⲱⲟⲩ ϣⲱⲡⲓ ⲉⲩⲱϣ ⲉⲃⲟⲗ ⲉⲩϫⲱ ⲙ̀ⲙⲟⲥ ϫⲉ ⲁⲛⲓⲟⲩⲓ ⲙ̀ⲡⲓ ̀Ⲓⲱ̅ⲁ̅ ϣⲁ ⲡⲟⲩⲣⲟ.

Ⲧⲟⲧⲉ ⲁⲩⲉⲛϥ ϧⲉⲛ ⲑ̀ⲙⲏϯ ⲛ̀ⲛⲁⲓⲙⲏϣ ⲛ̀ⲁⲧϭⲓⲏⲡⲏ ⲙ̀ⲙⲱⲟⲩ ⲛⲓⲥⲧⲣⲁⲧⲓⲗⲁⲧⲏⲥ ⲛⲓⲧⲁⲙⲟⲓ ⲛⲓϩⲩⲡⲉⲩⲥ ⲛⲓⲙⲁⲥⲙⲁⲧⲟⲓ ⲛⲓⲅⲉⲛⲧⲉⲣⲓⲟⲛ ⲛⲓⲣⲉϥϯϩⲁⲡ ⲛⲓⲕⲁⲑⲭⲟⲩⲙⲉⲛⲧⲏⲓⲥ ⲛⲓⲣⲉϥⲉϣⲣⲱⲟⲩ ⲛⲓⲣⲉϥⲉⲣⲙⲉⲗⲉⲧⲁⲛ ⲛⲓⲣⲉϥⲙⲟⲩϯ ϯⲛⲁⲡⲓϣⲗⲏⲗ ⲛⲓϧⲉⲗⲗⲟⲓ ⲛⲓⲥⲱⲓⲧ ⲛⲓϣⲱⲧ ⲛⲓⲣⲉϥϯ ⲉⲃⲟⲗ ⲛⲓⲁⲣⲁⲃⲟⲥ ⲛⲓⲡⲁⲣⲑⲟⲥ ⲛⲓⲛⲟⲡⲓⲟⲥ ⲛⲓⲁⲩⲑⲁⲩϣ ⲛⲓⲣⲱⲙⲉⲟⲥ ⲛⲓⲃⲁⲣⲃⲁⲣⲟⲥ ⲛⲏⲉⲧϣⲟⲡ ⲛⲉⲙ ⲛⲓϣⲉⲙⲱⲱⲟⲩ ⲛⲓϩⲱⲟⲩⲧ ⲛⲓⲥ̀ϩⲓⲙⲓ ⲛⲓⲕⲟⲩϫⲓ ⲛⲉⲙ ⲛⲓⲛⲓϣϯ ⲛⲓⲃⲱⲕ ⲛⲉⲙ ⲛⲓⲣⲉⲙϩⲉⲩ ⲁⲡⲁⲝ ⲁⲡⲗⲱⲥ ⲛⲉⲙ ⲉⲃⲟⲗϧⲉⲛ ϣ̀ⲗⲟⲗ ⲛⲓⲃⲉⲛ ⲛ̀ⲧⲉ ⲡ̀ⲕⲁϩⲓ ⲁⲩⲟ̀ϩⲓ ⲉⲣⲁⲧⲟⲩ ⲡⲉ ϧⲉⲛ ⲡⲓⲉϩⲟⲟⲩ ⲉⲧⲉⲙⲙⲁⲩ ⲉⲑⲃⲉ ⲡⲟⲩϫⲓⲛⲛⲁⲩ ⲉⲛⲓϫⲏⲟⲩ ⲛⲉⲙ ⲡ̀ⲟⲩⲣⲟ ⲙⲁⲗⲓⲥⲧⲁ ϫⲉ ⲁⲩⲥⲱⲧⲉⲙ ⲉⲑⲃⲉ ⲡⲓ ̀Ⲓⲱ̅ⲁ̅ ⲡⲓⲙⲁⲧⲟⲓ ⲛ̀ⲧⲉ Ⲡⲭ̅ⲥ̅ ⲟⲩⲟϩ ⲁⲩⲧⲁϩⲟϥ ⲉⲣⲁⲧϥ ⲙ̀ⲡⲉⲙⲑⲟ ⲙ̀ⲡⲓⲟⲩⲣⲟ Ⲉⲗⲭⲉⲙⲏⲗ ⲛⲉⲙ ⲡⲉϥⲥⲧⲣⲁⲧⲉⲩⲙⲁ ⲛⲉⲙ ⲫ̀ⲣⲉϥϯϩⲁⲡ ⲛ̀ⲧⲉ ⲛⲓⲣⲉϥϯϩⲁⲡ ⲛⲉⲙ ⲡⲓϧⲉⲗⲗⲟ ⲛ̀ⲧⲉ ⲛⲓϧⲉⲗⲗⲟⲓ ⲛⲉⲙ ⲡⲓⲕⲁⲑⲏⲭⲟⲩⲙⲉⲛⲓⲧⲏⲥ ⲙ̀ⲃⲁⲣⲃⲁⲣⲟⲥ ⲓⲧⲁ ⲡⲉϫⲉ ⲡ̀ⲟⲩⲣⲟ ⲙ̀ⲡⲓⲙⲁⲕⲁⲣⲓⲟⲥ Ⲓⲱ̅ⲁ̅ ϫⲉ ⲁⲕϫⲉ ⲟⲩ ⲱ Ⲓⲱ̅ⲁ̅ ⲁⲡⲉⲕϩⲏⲧ ⲑⲱⲧ ⲉⲣⲟⲛ ⲛⲉⲙ ⲡⲉⲛϣ̀ⲗⲟⲗ ϣⲁⲛ ⲙ̀ⲙⲟⲛ ⲁϥⲉⲣⲟⲩⲱ ⲛ̀ϫⲉ ⲡⲓⲙⲁⲕⲁⲣⲓⲟⲥ Ⲓⲱ̅ⲁ̅ ⲡⲉϫⲁϥ ⲙ̀ⲡ̀ⲟⲩⲣⲟ ϫⲉ ⲁⲛⲟⲕ ⲟⲩⲣⲱⲙⲓ ⲉϥⲙⲟϩ ⲛ̀ϭⲱϧⲉⲙ ⲙⲁⲧⲟⲩⲃⲟⲓ ⲉⲃⲟⲗϧⲉⲛ ⲧⲉⲕⲥⲏϥⲓ ⲓⲉ ⲁⲣⲏⲟⲩ ⲛ̀ⲧⲉⲕⲉⲣϩ̀ⲙⲟⲧ ⲛⲏⲓ ⲙ̀ⲡⲁⲛⲁϩϯ ⲡⲉϫⲉ ⲡ̀ⲟⲩⲣⲟ ⲛⲁϥ ϫⲉ Ⲓⲱ̅ⲁ̅ ϯⲱⲣⲕ ⲛⲁⲕ ϣⲁ ⲧ̀ⲁⲫⲉ ⲙ̀ⲡⲁⲓⲱⲧ ⲡ̀ⲟⲩⲣⲟ Ⲉⲗⲁⲧⲉⲗ ⲉϣⲱⲡ ⲁⲕϣⲁⲛⲧⲁⲥⲑⲟⲕ ⲉⲣⲟⲛ ϯⲛⲁϯ ⲛⲧⲁⲓⲥⲧⲟⲗⲏ ⲉⲧⲧⲟⲓ ϩⲓⲱⲧ ϯⲛⲁⲧⲏⲓⲥ ⲉϫⲱⲕ ⲟⲩⲟϩ ⲡⲁⲓϩ̀ⲑⲟ ⲫⲁⲓ ⲉⲛⲁⲓⲧⲁⲗⲏⲟⲩⲧ ⲉⲣⲟϥ ⲟⲩⲟϩ ⲟⲩⲟϩ ⲡⲓⲉⲍⲍⲉⲓⲑⲟⲩⲛ ϯⲛⲁⲧⲏⲓⲥ ⲛⲁⲕ ⲛ̀ϩ̀ⲙⲟⲧ ⲟⲩⲟϩ ϯⲛⲁⲧⲏⲓⲕ ⲛ̀ϩⲓⲡⲉⲩⲥ ⲕⲁⲧⲁ ϣⲟ ⲛ̀ⲗ̀ⲟⲕⲟϫⲓ ⲕⲁⲧⲁ ⲣⲟⲙⲡⲓ ⲟⲩⲟϩ ϯⲛⲁⲁⲓⲕ ⲛ̀ϩⲏⲅⲉⲙⲱⲛ ⲉϫⲉⲛ ⲁϣ ⲛ̀ⲑⲱϣ ⲉⲧⲉⲕⲟⲩⲁϣϥ ϧⲉⲛ ⲣⲏⲥ ⲓⲉ ϧⲏⲧ ⲡⲓⲙⲁⲕⲁⲣⲓⲟⲥ ⲇⲉ ⲛⲁϥⲙⲏⲛ ⲉϥϣⲱⲗⲉⲙ ⲛⲉⲙ ⲛⲓⲉⲡⲟⲩⲣⲁⲛⲓⲟⲛ ⲉⲟⲩⲟⲛ ⲛ̀ⲣⲱϥ ⲑⲱⲙ ⲓⲧⲁ ⲡⲉϫⲉ ⲁ̅ ⲛⲁϥ ⲉⲃⲟⲗϧⲉⲛ ⲛⲏⲉⲧⲟ̀ϩⲓ ⲉⲣⲁⲧⲟⲩ ⲡⲉϫⲁϥ ⲛⲁϥ ϫⲉ ⲥⲱⲧⲉⲙ ⲛ̀ⲥⲁ ⲡ̀ⲟⲩⲣⲟ ⲱ ⲡⲓⲧⲁⲗⲉⲡⲱⲣⲟⲥ ϩⲓⲛⲁ ⲉⲑⲣⲉⲕϭⲓ ⲛ̀ⲛⲁⲓⲧⲁⲓⲟ ⲉⲧϭⲟⲥⲓ ⲡⲓⲁⲅⲓⲟⲥ Ⲓⲱ̅ⲁ̅ ⲁϥⲟⲩⲱⲛ ⲛ̀ⲣⲱϥ ⲡⲉϫⲁϥ ⲛⲁϥ ϫⲉ ⲉ̀ⲣⲭⲣⲓⲁ ⲁⲛ ⲛ̀ⲛⲟⲩⲃ ⲟⲩⲇⲉ ϩ̀ⲃⲱⲥ ⲟⲩⲇⲉ ϩ̀ⲑⲟⲣ ⲟⲩⲇⲉ ⲭⲣⲏⲙⲁ ⲁⲗⲗⲁ ⲁⲛⲟⲕ ⲟⲩⲣⲱⲙⲓ ⲉϥϭⲱϧⲉⲙ ⲙⲁⲣⲉ ⲡⲁⲟ̅ⲥ̅ ⲡ̀ⲟⲩⲣⲟ ⲧⲟⲩⲃⲟⲓ ⲉⲃⲟⲗϧⲉⲛ ⲧⲉϥⲥⲏϥⲓ ⲓⲉ ⲛ̀ⲧⲉϥⲉⲣϩ̀ⲙⲟⲧ ⲛⲏⲓ ⲙ̀ⲡⲁⲛⲁϩϯ ⲡⲉϫⲉ ⲡ̀ⲟⲩⲣⲟ ⲙ̀ⲡⲓⲡⲁⲧⲣⲓⲁⲭⲏⲕⲣⲓⲧⲏⲥ ϫⲉ ⲁⲕϫⲉ ⲟⲩ ϧⲉⲛ ⲫⲁⲓ ⲡⲉϫⲁϥ ⲙ̀ⲡⲓϧⲉⲗⲗⲟ ⲛ̀ⲛⲓϧⲉⲗⲗⲟⲓ ϫⲉ ⲡⲁⲓⲱⲧ ⲟⲩ ⲡⲉⲕⲥⲟϭⲛⲓ ⲡⲉϫⲁϥ ⲛⲁϥ ϫⲉ ⲁⲣⲓⲉⲙⲓ ⲛⲁⲕ ⲟⲩⲡⲁϣⲏⲣⲓ ϫⲉ ⲡⲓϫⲓⲛⲣⲱⲕϩ ϧⲉⲛ ⲡⲓⲭⲣⲱⲙ ⲛⲁⲪϯ ⲙ̀ⲙⲁⲩⲁⲧϥ ⲫⲁⲓ ⲙⲁⲣⲟⲩⲱⲗⲓ ⲛ̀ⲧⲉϥⲛⲁϩⲃⲓ ϧⲉⲛ ⲧⲉϥⲥⲏϥⲓ ⲟⲩⲟϩ ⲁϥⲧⲏⲓⲥ ⲉⲁ̅ ⲛ̀ⲛⲉϥϩⲩⲡⲉⲩⲥ ⲉⲡⲉϥⲣⲁⲛ ⲡⲉ Ⲫⲓⲗⲓⲙ ⲟⲩⲟϩ ⲫⲁⲓ ⲡⲉ Ⲫⲓⲗⲓⲙ ⲟⲩⲣⲱⲙⲓ ⲛ̀ⲣⲱⲙⲉⲟⲥ ⲁϥⲉⲣⲡⲁⲣⲁⲃⲉⲛⲓⲛ ⲛⲛⲓⲡⲁⲣⲁⲇⲓⲥⲟⲥ ⲛ̀ⲧⲉ ⲛⲉϥⲓⲟϯ ⲁϥⲙⲟⲩϣⲧ ⲛ̀ⲛⲓⲥⲁⲣⲁⲅⲏⲛⲟⲥ ⲟⲩⲟϩ ⲁϥϣⲱⲡⲓ ⲛⲉⲙⲱⲟⲩ ϧⲉⲛ ⲟⲩⲛⲁϩϯ ⲓⲧⲁ ⲡ̀ⲟⲩⲣⲟ ⲙⲟⲩϯ ⲉⲣⲟϥ ⲡⲉϫⲁϥ ⲛⲁϥ ⲛ̀ⲭⲱⲡ ϫⲉ ϩⲓϩⲟϯ ⲉⲣⲟϥ ⲁⲣⲏⲟⲩ ⲛ̀ⲧⲉϥⲧⲁⲥⲑⲟϥ ϧⲉⲛ ϯϩⲟϯ ⲛ̀ϯⲥⲏϥⲓ ⲡⲉϫⲉ ⲡ̀ⲟⲩⲣⲟ ⲛ̀ⲛϩⲩⲡⲉⲣⲉⲧⲏⲥ ϫⲉ ϩⲱⲃⲥ ⲛ̀ⲛⲉϥⲃⲁⲗ ⲙ̀ⲙⲁⲩⲁⲧϥ ⲛ̀ϧⲏⲧⲥ ⲟⲩⲟϩ ⲁϥⲟ̀ϩⲓ ⲉⲣⲁⲧϥ ϧⲉⲛ ⲟⲩⲏⲥⲓⲭⲓⲁ ⲛⲉⲙ ⲟⲩⲭⲁⲣⲱϥ ⲟⲩⲟϩ ⲛⲁϥ ⲟⲩⲱⲛ ⲛ̀ⲣⲱϥ ⲁⲛ ⲡⲉ ⲉⲥⲁϫⲓ ⲕⲁⲧⲁ ⲫ̀ⲣⲏϯ ⲉⲧⲥ̀ϧⲏⲟⲩⲧ ϩⲓ ⲡⲓⲡⲣⲟⲫⲏⲧⲏⲥ Ⲏⲥⲁⲓⲁⲥ ⲉϥϫⲱ ⲙ̀ⲙⲟⲥ ϫⲉ ⲙ̀ⲫ̀ⲣⲏϯ ⲛ̀ⲟⲩⲉⲥⲱⲟⲩ ⲉⲁⲩⲉⲛϥ ⲉⲡ̀ϧⲟⲗϧⲉⲗ ⲛⲉⲙ ⲙ̀ⲫ̀ⲣⲏϯ ⲛ̀ⲟⲩϩⲏⲃ ⲛ̀ⲁⲧϧⲣⲱⲟⲩ ⲙ̀ⲡⲉⲙⲑⲟ ⲙ̀ⲫⲏⲉⲧϧⲱⲕ ⲙ̀ⲙⲟϥ ⲟⲩⲟϩ ⲛⲁϥⲟⲩⲱⲛ ⲁⲛ ⲡⲉ ⲉⲥⲁϫⲓ ⲡⲉ ⲉⲥⲁϫⲓ

Ⲡⲁⲓⲣⲏϯ ⲡⲓⲛⲁⲓⲁⲧϥ Ⲓⲱ̅ⲁ̅ ⲛⲁϥⲟ̀ϩⲓ ⲉⲣⲁⲧϥ ⲙ̀ⲡⲉⲙⲑⲟ ⲛ̀ⲛⲁⲓⲙⲏϣ ⲉⲧⲟϣ ⲟⲩⲟϩ ⲛⲁⲩⲥⲁϫⲓ ⲛ̀ϩⲁⲛⲙⲏϣ ⲛ̀ⲥⲁϫⲓ ϩⲁⲛⲟⲩⲟⲛ ⲛⲁⲩϯ ϩⲱⲟⲩϣ ⲉⲣⲟϥ ϩⲁⲛⲕⲉⲭⲟⲩⲱⲓⲛⲓ ⲇⲉ ⲛⲁⲩⲥⲁϩⲟⲩⲓ ⲉⲣⲟϥ ⲟⲩⲟϩ ⲛⲁⲩϯ ϣⲱϣ ⲛⲁϥ ⲛ̀ⲑⲟϥ ⲇⲉ ⲛⲁϥⲟ̀ϩⲓ ⲉⲣⲁⲧϥ ⲉⲣⲉ ⲛⲉϥⲃⲁⲗ ϩⲏⲡ ⲟⲩⲟϩ ⲡⲉϥⲛⲟⲩⲥ ⲛⲉⲙ ⲡⲉϥⲕⲁϯ ⲉϣⲱⲗⲉⲙ ⲛⲉⲙ ⲡⲉⲛⲥ̅ⲱ̅ⲣ̅ Ⲓⲏ̅ⲥ̅ Ⲡⲭ̅ⲥ̅ ⲡⲓⲙⲁⲧⲟⲓ Ⲫⲓⲗⲓⲙ ⲁϥⲗⲟⲕⲥϥ ϧⲉⲛ ⲧ̀ⲥⲏϥⲓ ⲁϥⲫⲱⲛ ⲉⲃⲟⲗ ⲙ̀ⲡⲉϥϫⲉ ϩⲁⲛⲙⲏϣ ⲛ̀ⲥ̀ⲛⲟϥ ϧⲉⲛ ⲡⲉϥⲥⲱⲙⲁ ϣⲁⲧⲉ ⲟⲩⲟⲛ ⲛⲓⲃⲉⲛ ⲉⲣϣ̀ⲫⲏⲣⲓ ⲉⲩϫⲱ ⲙ̀ⲙⲟⲥ ϫⲉ ⲣⲱⲙⲓ ⲛⲓⲃⲉⲛ ⲉϣⲁⲩⲉⲛⲟⲩ ⲉⲧ̀ⲥⲏϥⲓ ϣⲁⲣⲉ ⲡⲟⲩⲥ̀ⲛⲟϥ ϣⲱⲟⲩⲓ ⲛ̀ϧⲏⲧⲟⲩ ⲉⲃⲏⲗ ⲉⲫⲁⲓ ⲙ̀ⲡⲉϥⲉⲣϩⲟϯ ⲛ̀ⲑⲟϥ ⲁⲛ ϧⲁⲧϩⲏ ⲛ̀ⲧ̀ⲥⲏϥⲓ ⲉⲑⲃⲉ ⲫ̀ⲛⲁⲩ ⲙ̀ⲫ̀ⲙⲟⲩ ⲓⲧⲁ ⲡⲉϫⲉ Ⲫⲓⲗⲓⲙ ⲛⲁϥ ϫⲉ ⲟⲩ ⲡⲉ ⲡⲉⲕⲥⲟϭⲛⲓ ⲁϫⲟⲥ ⲙ̀ⲡⲁⲛⲧⲉⲕⲙⲟⲩ ⲛ̀ⲑⲟϥ ⲇⲉ ⲡⲉϫⲁϥ ϫⲉ ϣⲁϣ ϧⲉⲛ ⲫ̀ⲣⲁⲛ ⲙ̀ⲡⲁⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲁⲛⲟⲩϯ ⲡⲉϫⲉ ⲡⲓⲁⲣⲭⲏⲕⲣⲓⲧⲏⲥ ⲙ̀ⲡⲓⲙⲁⲧⲟⲓ Ⲫⲓⲗⲓⲙ ϫⲉ ⲫⲟⲛϩϥ ⲉⲣⲏⲥ ⲛ̀ⲑⲟϥ ⲇⲉ ⲡⲓⲁⲅⲓⲟⲥ Ⲓⲱ̅ⲁ̅ ⲁϥⲫⲱⲛϩ ⲉⲡⲓⲉⲃⲧ ⲟⲩⲟϩ ⲛⲁϥⲉⲣⲙⲉⲗⲉⲧⲁⲛ ⲉⲫ̀ⲣⲁⲛ ⲙ̀ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡⲉϫⲉ Ⲫⲓⲗⲓⲙ ⲙ̀ⲡ̀ⲟⲩⲣⲟ ϫⲉ ⲡⲁⲟ̅ⲥ̅ ϫⲉ ⲕⲁⲧⲁ ⲧⲉⲕⲕⲉⲗⲉⲩⲥⲓⲥ ⲡⲉϫⲉ ⲡ̀ⲟⲩⲣⲟ ⲇⲉ ⲛⲁϥ ϫⲉ ⲕⲁⲧⲁ ⲧ̀ⲕⲉⲗⲉⲩⲥⲓⲥ ⲡⲉϫⲉ ⲙⲡⲓⲣⲉϥϯϩⲁⲡ ⲡⲉϫⲉ ⲡⲓⲣⲉϥϯϩⲁⲡ ⲛⲁϥ ϫⲉ ⲕⲁⲧⲁ ⲡⲁⲥⲟϭⲛⲓ ⲡⲉϫⲉ ⲡⲟⲩ ⲛⲁϥ ϫⲉ ϫⲱⲕ ⲛⲁⲓ ⲁⲩϣⲱⲡⲓ ϣⲁ ⲅ̅ ⲛ̀ⲥⲟⲡ ⲙⲉⲛⲉⲛⲥⲁ ⲛⲁⲓ ⲧⲏⲣⲟⲩ ⲁϥⲓⲏⲥ ⲙ̀ⲙⲟϥ ⲛ̀ϫⲉ Ⲫⲓⲗⲓⲙ ⲟⲩⲟϩ ⲛⲁϥⲥⲉⲗ ⲧⲉϥⲛⲁϩⲃⲓ ϧⲉⲛ ⲟⲩϣⲁϣ ⲛ̀ⲟⲩⲱⲧ ⲟⲩⲟϩ ϯϣⲁϣ ⲁⲥⲥⲉϫⲡ ⲟⲩⲙⲁⲥ ⲛ̀ϣⲁⲣ ⲉⲣⲉ ⲡⲉϥⲙⲟⲩⲧ ⲡⲁⲓⲣⲏϯ ⲉⲥⲁϣⲓ ⲉϫⲉⲛ ⲧⲉϥⲁⲫⲉ ⲉⲡⲉϥⲥⲱⲙⲁ ⲟⲩⲟϩ ⲡⲁⲓⲣⲏϯ ⲁ ⲟⲩⲙⲏϣ ⲛ̀ⲥ̀ⲛⲟϥ ϧⲁϯ ⲉⲃⲟⲗϧⲉⲛ ⲡⲉϥⲥⲱⲙⲁ ϩⲱⲥⲇⲉ ⲛ̀ⲧⲟⲩⲉⲣϣ̀ⲫⲏⲣⲓ ⲧⲏⲣⲟⲩ

Ⲟⲩⲟϩ ⲡⲁⲓⲣⲏϯ ⲁⲡⲓⲁⲅⲱⲛⲟⲑⲉⲧⲏⲥ ⲛ̀ⲧⲉ Ⲡⲭ̅ⲥ̅ ⲡⲓⲁⲅⲓⲟⲥ ⲙ̀ ̀ⲟⲩⲟϩ ⲙ̀ⲙⲁⲕⲁⲣⲓⲟⲥ Ⲓⲱ̅ⲁ̅ ⲡ̀ϣⲏⲣⲓ ⲙ̀Ⲙⲁⲣⲕⲟⲥ ⲡⲓⲣⲉⲙⲫⲁⲛⲓϫⲱⲓⲧ ⲉⲧⲁϥⲫⲓⲣⲓ ⲉⲃⲟⲗ ⲟⲩⲟϩ ⲁϥϯ ⲟⲩⲧⲁϩ ⲉϥⲛⲟⲧⲉⲙ ⲛⲁⲛⲓⲯⲩⲭⲏ ⲛ̀ⲧⲉ ⲛⲓⲯⲩⲭⲏ ⲛ̀ⲧⲉ Ⲡⲟ̅ⲥ̅ ⲛⲓⲡⲓⲥⲧⲟⲥ ⲛ̀ⲟⲣⲑⲟⲇⲟⲝⲟⲥ ⲟⲩⲟϩ ⲛⲓⲭⲣⲓⲥⲧⲓⲁⲛⲟⲥ ⲉⲧⲁϥϫⲱⲕ ⲙ̀ⲡⲉϥⲁⲅⲱⲛ ⲉⲃⲟⲗ ⲛ̀ⲥⲟⲩⲇ̅ ⲙ̀Ⲡⲁϣⲟⲛⲥ ⲉⲧⲉ ⲡⲓⲉϩⲟⲟⲩ ⲙ̀ⲡ̀ⲉ̅ ϧⲉⲛ ⲫ̀ⲛⲁⲩ ⲛ̀ⲁϫⲡⲊ ϧⲉⲛ ⲑ̀ⲙⲁϩⲣ̅ⲕ̅ⲍ̅ ⲛ̀ⲣⲟⲙⲡⲓ ⲛ̀ⲧⲉ ⲡⲓⲁⲅⲓⲟⲥ ⲙ̀ ̀ϧⲉⲛ ⲛⲓⲉϩⲟⲟⲩ ⲛ̀ⲑ̀ⲙⲉⲧⲡⲁⲧⲣⲓⲁⲣⲭⲏⲥ ⲙ̀ⲡⲉⲛⲓⲱⲧ ⲉⲧⲧⲁⲓⲏⲟⲩⲧ ⲛ̀ⲁⲣⲭⲏⲉⲡⲓⲥⲕⲟⲡⲟⲥ ⲁⲃⲃⲁ Ⲓⲱ̅ⲁ̅ ⲡⲟⲩⲗⲉⲟⲩ ⲡⲁⲧⲣⲓⲁⲣⲭⲟⲩ Ⲁⲗⲉⲝⲁⲛⲇⲣⲓⲁ Ⲫϯ ⲛ̀ⲧⲉ ⲧ̀ⲫⲉ ϯ ⲛ̀ⲟⲩⲭⲁⲣⲓⲥ ⲛⲁϥ ⲟⲩⲟϩ ⲛ̀ⲧⲉϥⲧⲁϫⲣⲟϥ ϩⲓϫⲉⲛ ⲡⲉϥⲑ̀ⲣⲟⲛⲟⲥ ⲛ̀ϩⲁⲛⲙⲏϣ ⲛ̀ϩⲓⲣⲏⲛⲏⲕⲟⲛ ⲛⲉⲙ ϧⲉⲛ ϯⲙⲁϩⲓ̅ⲁ̅ ⲛ̀ⲣⲟⲙⲡⲓ ⲛ̀ⲧⲉ ⲑ̀ⲙⲉⲧⲟⲩⲣⲟ ⲙ̀Ⲙⲟⲩϩⲁⲙⲙⲉⲧ ⲡ̀ϣⲏⲣⲓ ⲡ̀ϣⲏⲣⲓ ⲛ̀Ⲉⲡⲟⲩⲡⲁⲕⲣ ⲡ̀ϣⲏⲣⲓ ⲛ̀Ⲓⲱⲃ ⲡ̀ⲥⲟⲛ ⲛ̀Ⲓⲱⲥⲏⲫ ⲫⲁⲓ ⲡⲉ Ⲓⲱⲥⲏⲫ ⲫ̀ⲓⲱⲧ ⲙ̀ⲡ̀ⲟⲩⲣⲟ Ϩⲟⲑⲙⲉⲛ ⲉⲧⲁϥⲉⲣⲗⲁⲙⲓⲧⲏⲥ ϧⲉⲛ ⲡⲉϥⲥⲏⲟⲩ ϧⲉⲛ ⲛⲉⲛⲥ̀ⲫⲟⲧⲟⲩ ⲙ̀ⲫ̀ⲓⲁⲣⲟ ⲛ̀ⲧⲉ ⲭⲏⲙⲓ ϩⲓϫⲉⲛ ⲡ̀ⲑⲣⲟⲛⲟⲥ ⲙ̀ⲡⲓⲃⲁⲛ ⲉⲣⲉ ⲛⲁⲓⲙⲏϣ ⲛ̀ϣ̀ⲗⲟⲗ ⲉⲣⲑⲉⲱⲣⲓⲛ ⲙ̀ⲫⲏⲉⲧⲁϥϣⲱⲡⲓ ⲟⲩⲟϩ ⲁϥϣⲉⲛⲁϥ ϩⲁ Ⲡⲟ̅ⲥ̅ ⲫⲏⲉⲧⲁϥⲙⲉⲛⲣⲓⲧϥ ϧⲉⲛ ⲛⲓⲙⲁⲛⲙ̀ⲧⲟⲛ ⲛ̀ⲧⲉ Ⲓⲗ̅ⲏ̅ⲙ̅ ⲛ̀ⲧⲉ ⲧ̀ⲫⲉ ϧⲉⲛ ϯⲙⲉⲧⲟⲩⲣⲟ ⲛ̀ⲧⲉ ⲛⲓⲫⲏⲟⲩⲓ ⲉⲣⲉ ⲡⲉϥⲥⲙⲟⲩ ⲉⲑ̅ⲩ̅ ϣⲱⲡⲓ ⲛⲉⲙⲁⲛ.

Ϩⲟⲧⲁⲛ ⲇⲉ ⲉⲧⲁⲩⲛⲁⲩ ⲛ̀ϫⲉ ⲙⲁⲥⲧⲉⲛⲟⲩϯ ⲛⲓⲁⲅⲟⲣⲉⲟⲥ ⲛⲉ ⲛⲏⲉⲧϯ ⲛⲉⲙ ⲛⲓⲛⲓϣϯ ⲛ̀ⲭⲁⲙⲉⲟⲥ ⲁⲩⲁϣ ⲟⲩⲛⲓϣϯ ⲛ̀ϧ̀ⲣⲱⲟⲩ ⲛ̀ⲧⲉ ⲛⲟⲩϣ̀ⲗⲏⲗ ⲉⲩϫⲱ ⲙ̀ⲙⲟⲥ ϫⲉ Ⲫϯ ⲛⲉⲙ ⲡⲓⲛⲓϣϯ ⲡⲉ ⲟⲩⲟϩ ⲡ̀ϩⲟⲩⲟ ⲙ̀ⲡⲟⲩϧ̀ⲣⲱⲟⲩ ⲁⲥϣ̀ⲑⲟⲣⲧⲉⲣ ⲛ̀ϫⲉ ϯⲡⲟⲗⲓⲥ ⲭⲏⲙⲓ ⲟⲩⲟϩ ⲁϥⲙⲟϩ ⲛ̀ϫⲉ ⲡⲓⲁⲏⲣ ⲉⲃⲟⲗϧⲉⲛ ⲡⲓϣⲱⲓϣ ⲛ̀ⲧⲉ ⲛⲟⲩϭⲗⲁⲩϫ ⲟⲩⲟϩ ⲟⲩⲛⲓϣϯ ⲇⲉ ⲛ̀ϩⲟϫϩⲉϫ ϣⲱⲡⲓ ⲉϫⲉⲛ ⲛⲓⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ⲉⲃⲟⲗⲛ̀ϧⲏⲧⲟⲩ ϧⲉⲛ ⲡ̀ⲉϩⲟⲟⲩ ⲉⲧⲉⲙⲙⲁⲩ ⲟⲩⲟϩ ϧⲉⲛ ⲛⲁⲓ ⲧⲏⲣⲟⲩ ⲛⲁⲩϩⲱⲃ ϧⲉⲛ ⲛⲓⲙⲏϣ ⲟⲩⲟϩ ⲛⲁⲩϩⲱⲃ ⲛⲉⲙ ⲛⲟⲩϣ̀ⲫⲏⲣ ϩⲓⲛⲁ ⲛ̀ⲧⲟⲩⲛⲁⲩ ⲉⲫⲏⲉⲧⲁϥϣⲱⲡⲓ ⲟⲩⲁⲓ ⲙⲉⲛ ⲧⲉϥϣⲉⲡ ⲧⲉϥⲗⲉⲛⲅⲓ ⲟⲩⲟϩ ⲕⲉⲟⲩⲁⲓ ϣⲉⲡ ⲧⲉϥⲕⲟⲗⲕⲉⲗ ⲕⲉⲟⲩⲁⲓ ⲇⲉ ϣⲉⲡ ⲟⲩⲧⲱⲓⲥⲓ ⲉⲃⲟⲗϧⲉⲛ ⲧⲉϥⲗⲁⲕⲙⲓⲥ ⲉⲑⲣⲟⲩϭⲓⲥⲙⲟⲩ ⲉⲃⲟⲗⲛ̀ϧⲏⲧⲟⲩ.

Ⲙⲉⲛⲉⲛⲥⲁ ⲛⲁⲓ ⲇⲉ ⲁϥⲉⲣⲕⲉⲗⲉⲩⲓⲛ ⲛ̀ϫⲉ ⲡⲓⲟⲩⲣⲟ ⲉⲑⲣⲟⲩⲁϣϥ ⲟⲩⲟϩ ⲡⲁⲓⲣⲏϯ ⲁⲩⲁϣϥ ⲉϫⲉⲛ ⲟⲩϣⲉ ⲥⲁϧⲏⲧ ⲙ̀ⲡⲓⲙⲁ ⲉⲧⲁϥϫⲱⲕ ⲉⲃⲟⲗ ⲛ̀ϧⲏⲧϥ ⲟⲩⲟϩ ⲡⲁⲓⲣⲏϯ ⲡⲉ ⲉⲧⲁⲩⲁⲓⲧⲟⲩ ⲛⲁϥ ϩⲁⲛⲣⲱⲙⲓ ⲇⲉ ⲛ̀ⲣⲟⲙⲉⲟⲥ ⲛ̀ⲉⲭⲙⲁⲗⲱⲧⲟⲥ ⲉⲧⲁⲩⲛⲁⲩ ⲉⲫⲏⲉⲧⲁϥϣⲱⲡⲓ ⲙ̀ⲡⲓⲁⲅⲓⲟⲥ ⲁⲩⲓ̀ ⲙ̀ⲡⲉⲙⲑⲟ ⲙ̀ⲡ̀ⲟⲩⲣⲟ ⲟⲩⲟϩ ⲁⲩⲉⲣⲉⲧⲓⲛ ⲉⲡ̀ⲥⲱⲙⲁ ⲛ̀ⲧⲟⲧϥ ⲙ̀ⲡ̀ⲟⲩⲣⲟ ⲁⲛⲓⲙⲁⲧⲟⲓ ϩⲱⲟⲩϣ ⲉϫⲱⲟⲩ ⲟⲩⲟϩ ⲛⲁϩⲓⲟⲩⲓ ⲉϫⲱⲟⲩ ϣⲁⲛⲧⲟⲩⲫⲁϣ ⲧⲁⲫⲉ ⲛ̀ⲟⲩⲁⲓ ⲙ̀ⲙⲱⲟⲩ ⲁϥⲧⲁⲙⲟⲛ ⲇⲉ ⲛ̀ϫⲉ ⲟⲩⲥⲟⲛ ⲙ̀ⲡⲡⲓⲥⲧⲟⲥ ⲙ̀ⲡⲓⲡⲣⲉⲥⲃⲩⲧⲉⲣⲟⲥ ϫⲉ ⲁⲓⲛⲁⲩ ⲉⲟⲩⲁⲓ ⲛ̀ⲧⲉ ⲛⲓⲭⲣⲓⲥⲧⲓⲁⲛⲟⲥ ⲉⲣⲉ ⲧⲉϥⲁⲫⲉ ⲫⲉϣ ⲁⲓϣⲉⲛⲏⲓ ⲁⲓϭⲓ ⲛ̀ⲟⲩⲙⲁⲣⲙⲁⲣ ⲛⲉⲙ ⲟⲩϣⲁⲗ ⲟⲩⲟϩ ⲁⲓⲧⲏⲓϥ ⲉⲡⲉϥⲉⲣϧⲟⲧ ⲛⲓⲙ ⲉⲑⲛⲁϣ̀ϭⲓϣⲓⲡⲓ ⲙ̀ⲡ̀ⲥⲉⲡⲓ ⲛ̀ⲛⲓⲣⲱⲙⲓ ⲉⲧϩⲓⲟⲩⲓ ⲙ̀ⲡ̀ⲥⲱⲙⲁ ⲙ̀ⲡⲓⲁⲅⲓⲟⲥ ϧⲉⲛ ϩⲁⲛⲱⲛⲓ ⲛⲉⲙ ϩⲁⲛⲧⲱⲃⲓ ⲛ̀ⲕⲟⲕⲥ ϣⲁⲛⲧⲉϥⲉⲣⲑⲁⲗ ⲥⲁϧⲣⲏⲓ ⲙ̀ⲡⲓϣⲉ ϩⲁⲛⲙⲏϣ ⲇⲉ ⲁⲩϭⲓ ⲛ̀ϩⲁⲛⲕⲁϣ ⲟⲩⲟϩ ⲛ̀ⲟⲩⲑⲁⲙⲓⲟ ⲙ̀ⲙⲱⲟⲩ ⲙ̀ⲫ̀ⲣⲏϯ ⲛ̀ⲟⲩⲗⲟⲅⲭⲏ ⲟⲩⲟϩ ⲛⲁⲩⲗⲟⲕⲥ ⲙ̀ⲡⲉϥⲥⲱⲙⲁ ⲙ̀ⲡⲡⲓⲁⲅⲓⲟⲥ ϣⲁ ϩⲁⲛⲁⲣⲟⲩϩⲓ

Ⲁϥⲉⲣⲥⲕⲉⲗⲉⲩⲓⲛ ⲇⲉ ⲛ̀ϫⲉ ⲡⲓⲁⲣⲭⲏⲕⲣⲓⲧⲓⲏⲥ ϫⲉ ϩⲓⲛⲁ ⲛ̀ⲧⲟⲩⲣⲱⲓⲥ ⲉⲡⲓⲥⲱⲙⲁ ⲓⲉ ⲛ̀ⲧⲟⲩⲓ̀ ⲛ̀ϫⲉ ⲛⲓⲭⲣⲓⲥⲧⲓⲁⲛⲟⲥ ⲟⲩⲟϩ ⲛ̀ⲥⲉϭⲓ ⲛ̀ϩ̀ⲗⲓ ⲛ̀ϧⲏⲧϥ ⲁϥⲉⲣⲙⲉⲑⲣⲉ ⲛⲁⲓ ⲛⲁⲛ ⲛ̀ϫⲉ ⲟⲩⲣⲱⲙⲓ ⲙ̀ⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ⲡⲓⲡⲣⲉⲥⲃⲩⲧⲉⲣⲟⲥ ϫⲉ ⲁⲥϣⲱⲡⲓ ⲉⲧⲁ ⲡⲓⲉϫⲱⲣϩ ⲁⲓϩⲱⲗ ⲁⲛⲟⲕ ⲛⲉⲙ ⲕⲉⲃ̅ ⲙ̀ⲡⲣⲉⲥⲃⲩⲧⲉⲣⲟⲥ ⲛ̀ⲅ̅ ⲡⲉ ⲟⲩⲟϩ ⲁⲛⲟⲕ ϯⲥⲱⲟⲩⲛ ⲙ̀ⲡⲓⲅ̅ ⲙ̀ⲡⲣⲉⲥⲃⲩⲧⲉⲣⲟⲥ ⲁⲛϭⲓ ⲛⲉⲙⲁⲛ ⲛ̀ⲟⲩⲭⲁⲓⲟⲩⲱⲙ ⲉⲑⲣⲉⲛⲟⲩⲟⲙϥ ⲉⲑⲃⲉ ϫⲉ ⲁⲛⲥⲱⲕ ⲙ̀ⲡⲓⲉϩⲟⲟⲩ ⲉⲧⲉⲙⲙⲁⲩ ⲧⲏⲣϥ ⲛ̀ⲁⲧⲟⲩⲱⲙ ⲟⲩⲟϩ ⲫⲏⲉⲧⲁϥϣⲱⲡⲓ ⲙ̀ⲡⲉⲛϫⲉⲙ ⲙⲁⲛⲭⲱⲡ ⲛⲁⲛⲁⲗⲏⲓ ⲉⲡ̀ϫⲟⲓ ⲙ̀ⲡ̀ⲟⲩⲣⲟ ⲁⲛⲭⲱⲡ ⲟⲩⲟϩ ⲛⲁⲛⲣⲏⲥ ϣⲁ ⲁϫⲡ Ⲋ ⲙ̀ⲡⲓⲉϫⲱⲣϩ ⲟⲩⲟϩ ⲟⲩⲟⲛ ⲛⲓⲃⲉⲛ ϣⲉⲛⲁϥ ⲉⲡⲉϥⲙⲁ ϥ̀ⲟⲛϧ ⲛ̀ϫⲉ ⲡ̀ⲟⲩⲣⲟ ⲙ̀ⲡⲒⲥ̅ⲗ ⲁⲛⲟⲛ ⲁⲛⲛⲁⲩ ⲉⲡⲓⲟⲩⲱⲓⲛⲓ ⲉϥⲛⲏⲟⲩ ⲉϫⲱϥ ϣⲁⲛⲧⲉϥϩⲱⲃⲥ ⲙ̀ⲡⲓⲥⲱⲙⲁ ⲧⲏⲣϥ ⲉⲧⲉⲙⲙⲁⲩ ⲟⲩⲟϩ ⲑⲁⲓ ⲧⲉ ⲧⲉⲛⲙⲉⲧⲙⲑⲣⲉ ⲙ̀ⲡⲉⲙⲑⲟ ⲙ̀Ⲡⲟ̅ⲥ̅ ⲓⲧⲉ ϩⲁⲛⲟⲩⲟⲛ ⲛ̀ⲗⲁⲙⲓⲧⲏⲥ ⲉⲩϣⲟⲡ ϧⲉⲛ ϯⲛⲏⲥⲟⲥ ⲉⲧⲁⲩⲛⲁⲩ ⲉⲡⲓⲟⲩⲱⲓⲛⲓ ⲁⲩⲉϣ ϧ̀ⲣⲱⲟⲩ ⲉⲩϫⲱ ⲙ̀ⲙⲟⲥ ϫⲉ ⲁⲛⲁⲩ ⲁⲛⲁⲩ ϫⲉ ⲁⲛⲓⲭⲣⲓⲥⲧⲓⲁⲛⲟⲥ ⲁⲩⲓ̀ⲛⲓ ⲛ̀ϩⲁⲛⲙⲟⲗϩ ⲛⲉⲙ ϩⲁⲛⲗⲁⲙⲡⲁⲥ ⲉϫⲉⲛ ⲟⲩ ̀ϣⲁⲧⲟⲩϫⲟⲥ ϫⲉ ⲁϥⲓ̀ ⲛ̀ϫⲉ ⲡⲓⲟⲩⲱⲓⲛⲓ ⲉϩ̀ⲣⲏⲓ ⲉϫⲱϥ ⲟⲩⲟϩ ⲥⲁⲧⲟⲧⲟⲩ ⲁⲩⲓ̀ ⲉⲫ̀ⲙⲁ ⲙ̀ⲡⲓϣⲉ ⲙ̀ⲡⲟⲩϫⲉⲙ ϩ̀ⲗⲓ ⲙ̀ⲙⲁⲩ ⲉⲃⲏⲗ ⲉⲡⲓⲃⲁϣⲓ ϩⲟⲗⲱⲥ ϩⲓϫⲉⲛ ⲡⲉϥⲅⲉⲛⲟⲥ ⲛⲁϥⲉⲣⲙⲉⲑⲣⲉ ⲛⲁⲟⲩⲙⲏϣ ⲉⲩϫⲱ ⲙ̀ⲙⲟⲥ ϫⲉ ⲁⲛⲟⲕ ⲁⲓⲛⲁⲩ ⲉⲫ̀ⲛⲁⲩ ⲉⲧⲁⲩⲉⲗ ⲫⲏⲉⲧⲉϥⲛⲁϩⲃⲓ ⲟⲩⲫⲁⲛⲟⲥ ⲛ̀ⲛⲟⲩⲃ ⲉϥⲛⲏⲟⲩ ⲉⲡⲉⲥⲏⲧ ⲉⲃⲟⲗϧⲉⲛ ⲧ̀ⲫⲉ ⲁⲩⲭⲱ ⲛ̀ⲧ̀ⲯⲩⲭⲏ ⲙ̀ⲡⲓⲁⲅⲓⲟⲥ ⲛ̀ϧⲏⲧϥ ⲁⲩⲟⲗⲥ ⲉⲡ̀ϣⲱⲓ ⲉⲧ̀ⲫⲉ ⲟⲩⲟϩ ⲡⲁⲓⲣⲱⲙⲓ ⲁϥϣⲉⲛⲁϥ ⲉⲃⲟⲗϧⲉⲛ ⲭⲏⲙⲓ ⲟⲩⲟϩ ⲙ̀ⲡⲟⲩϫⲉⲛⲁⲩ ⲉⲣⲟϥ ϩⲁⲛⲕⲉⲟⲩⲟⲛ ⲅ̅ ⲛ̀ⲣⲱⲙⲓ ⲙ̀ⲃⲁⲣⲃⲁⲣⲟⲥ ⲡⲉ ⲁⲩⲉⲣⲑⲉⲱⲣⲓⲛ ⲙ̀ⲡⲓⲟⲩⲱⲓⲛⲓ ⲟⲩⲁⲓ ⲙⲉⲛ ⲁϥⲫⲱⲧ ϣⲁ ⲫⲟⲟⲩ ⲟⲩⲟϩ ⲡⲓⲕⲉⲃ̅ ⲁϥϭⲓⲧⲟⲩ ⲛ̀ϫⲉ ⲡⲓⲁⲣⲭⲏⲕⲣⲓⲧⲏⲥ ⲁϥⲭⲉⲡ ⲡⲟⲩϩⲱⲃ ϣⲁ ⲉϧⲟⲩⲛ ⲉⲫⲟⲟⲩ ⲛⲉϩⲟⲟⲩ ⲁϥⲉⲣⲙⲉⲑⲣⲉ ⲛ̀ϫⲉ ⲟⲩⲡⲓⲥⲧⲟⲥ ⲛ̀ⲁⲣⲭⲱⲛ ⲟⲩⲟϩ ⲫⲁⲓ ⲁϥⲉⲣ ⲟⲩⲙⲟⲛⲁⲭⲟⲥ ⲉⲑⲃⲉ ⲡ̀ⲥⲁϫⲓ ⲛ̀ⲁⲣⲭⲱⲛ ⲟⲩⲟϩ ⲉⲧⲉ ⲡ̀ϣⲏⲣⲓ ⲛ̀ⲁϣϣⲏⲥ ⲟⲩⲣⲉⲙⲣⲏⲥ ⲡⲉ ϫⲉ ⲁⲛⲟⲕ ⲛⲉⲙ ⲡⲁⲓⲱⲧ ⲛⲉⲙ ⲡⲁⲓ ̀ϧⲉⲛ ⲡⲓϫⲟⲓ ϣⲁ ⲭⲏⲙⲓ ⲟⲩⲟϩ ⲛⲁⲛⲭⲏ ϧⲉⲛ ⲡϫⲟⲓ ⲁⲛⲉⲣⲫⲙⲉⲩⲓ ⲉⲫⲣⲁⲛ ⲛ̀ⲛⲏⲉⲑⲟⲩⲁⲃ ⲟⲩⲟϩ ⲡⲓⲙⲁⲕⲁⲣⲓⲟⲥ ⲡⲉϫⲁϥ ⲛⲁⲛ ϫⲉ ⲁⲙⲱⲓⲛⲓ ⲓⲥϫⲉⲛ ⲡⲁⲓⲉ̅ ⲫⲁⲓ ϣⲁ ⲡⲉⲕⲉⲃ̅ ⲉⲑⲛⲏⲟⲩ ⲉⲣⲉⲧⲉⲛⲛⲁⲩ ⲉⲟⲩ ̀ⲉϥⲁϣⲓ ⲉϫⲉⲛ ⲡ̀ⲑⲟⲛⲟⲥ ⲙⲡⲓⲃⲁⲛ ϧⲉⲛ ⲛⲉⲛⲥ̀ⲫⲟⲧⲟⲩ ⲙ̀ⲫ̀ⲓⲁⲣⲟ ⲛ̀ⲭⲏⲙⲓ ϩⲁⲛⲙⲏϣ ⲛ̀ϣⲫⲏⲣⲓ ⲛⲁⲓ ⲉⲧⲉ ⲙ̀ⲡⲉⲛⲉⲙⲓ ⲉⲡⲟⲩⲧⲁϫⲣⲟ ⲛⲉⲙ ⲧⲟⲩⲙⲉⲑⲙⲏⲓ ϣⲁⲛⲧⲉⲛⲥϧⲏⲧⲟⲩ.

Ⲁⲥϣⲱⲡⲓ ⲇⲉ ϧⲉⲛ ⲡⲓⲉϫⲱⲣϩ ⲙ̀ⲡⲓⲥⲁⲃⲃⲁⲧⲟⲛ ⲡ̀ⲟⲩⲣⲟ ⲉⲛⲕⲟⲧ ϧⲉⲛ ⲡⲉϥⲡⲁⲗⲗⲁⲧⲓⲟⲛ ϩⲏⲡⲡⲉⲓⲥ ⲡⲓⲁⲅⲓⲟⲥ Ⲓⲱ̅ⲁ̅ ⲁϥⲟⲩⲟⲛϩϥ ⲉⲣⲟϥ ϩⲱⲥ ⲟⲩⲭⲁⲣⲓⲏⲥⲧⲣⲁⲩⲗⲁⲧⲏⲥ ⲛ̀ⲁⲝⲓⲱⲙⲁⲧⲓⲕⲟⲥ ⲟⲩⲟϩ ⲡⲉϫⲁϥ ϫⲉ ⲕⲏⲛ ⲛⲁⲕ ϫⲉ ⲁⲕϫⲉⲕ ⲡⲉⲕⲉⲣϣⲓϣⲓ ⲧⲏⲣϥ ⲛ̀ϧⲏⲧ ⲟⲩⲁϩⲥⲁϩⲛⲓ ⲙⲁⲣⲟⲩⲉⲗ ⲡⲁⲥⲱⲙⲁ ⲉⲃⲟⲗϩⲓ ⲡⲓϣⲉ ⲡ̀ⲟⲩⲣⲟ ⲁϥⲉⲣϩⲟϯ ⲉⲙⲁϣⲱ ⲟⲩⲟϩ ⲡⲁⲓⲣⲏϯ ⲁϥϩⲱⲡ ⲉⲃⲟⲗϩⲁⲣⲟϥ ⲉⲧⲁϥⲣⲱⲓⲥ ⲇⲉ ⲙ̀ⲫ̀ⲛⲁⲩ ⲛ̀ϣⲱⲣⲡ ⲁϥⲙⲟⲩϯ ⲇⲉ ⲉⲡⲓϧⲉⲗⲗⲟ ⲛⲁϥ ϫⲉ ⲛ̀ⲛⲟⲩϣⲉⲣϩⲁⲗ ⲙ̀ⲙⲟⲕ ⲛ̀ϫⲉ ⲛⲁⲓⲡⲁⲑⲟⲥ ⲛ̀ⲉⲫⲗⲏⲟⲩ ⲛ̀ⲧⲉ ⲛⲓⲣⲁⲥⲟⲩⲓ ⲁⲗⲗⲁ ⲛⲁⲓ ⲉⲩⲃⲉ ϫⲉ ⲙ̀ⲡⲉⲕⲛⲁⲩ ⲉⲟⲩⲣⲱⲙⲓ ⲉⲛⲉϩ ⲁⲩⲉⲗ ⲡⲉϥⲛⲁϩⲃⲓ ⲉⲃⲏⲗ ⲉⲫⲁⲓ ϯⲛⲟⲩ ϫⲉ ⲙ̀ⲡⲉⲕϣⲱⲗⲉⲙ ⲙ̀ⲡⲉϥⲛⲟⲩⲥ ⲉⲣⲟϥ ⲡⲁⲓⲣⲏϯ ϧⲉⲛ ⲡⲓⲕⲉⲉϫⲱⲣϩ ⲉⲑⲛⲏⲟⲩ ⲉⲧⲉ ϯⲕⲩⲣⲓⲁⲕⲏ ⲧⲉ ⲡ̀ⲟⲩⲣⲟ ⲇⲉ ⲉⲛⲕⲟⲧ ϧⲉⲛ ⲡⲓⲙⲁⲫⲣⲏϣ ϣⲁⲛⲧⲉϥⲟⲩⲱⲛϩ ⲉⲣⲟϥ ⲛ̀ϫⲉ ⲡⲓⲁⲅⲓⲟⲥ Ⲓⲱ̅ⲁ̅ ϧⲉⲛ ⲟⲩⲛⲓϣϯ ⲛ̀ⲭⲁⲣⲓⲥⲙⲁ ⲛⲉⲙ ⲟⲩⲛⲓϣϯ ⲛ̀ⲁⲝⲓⲱⲙⲁ ⲉϩⲟⲧⲉ ϣⲱⲣⲡ ϣⲁⲛⲧⲉϥⲉⲣϩⲟϯ ⲛ̀ϫⲉ ⲡ̀ⲟⲩⲣⲟ ϧⲁⲣⲟϥ ⲟⲩⲟϩ ⲡⲉϫⲁϥ ⲛⲁϥ ϫⲉ ⲁⲓⲕⲏⲛ ⲉϫⲟⲥ ⲛⲁⲕ ⲉⲑⲃⲉ ⲡⲁⲥⲱⲙⲁ ⲟⲩⲟϩ ⲙ̀ⲡⲉⲓ̀ⲣⲓ ⲙⲁⲣⲟⲩⲉⲗ ⲥⲱⲙⲁ ϩⲓ ⲡⲓϣⲉ ⲛ̀ⲧⲁⲫⲱⲣⲕ ⲛ̀ⲛⲉⲕⲃⲁⲗ ⲟⲩⲟϩ ⲁϥⲙⲁϩϥ ⲛ̀ϩⲟϯ ⲟⲩⲟϩ ⲁϥϩⲟⲡϥ ⲉⲃⲟⲗϩⲁⲣⲟϥ ⲉⲧⲁ ⲡⲓⲉϫⲱⲣϩ ⲇⲉ ϣⲱⲡⲓ ⲙ̀ⲡⲓⲃ̅ ⲉⲧⲉ ⲡ̀ⲉϫⲱⲣϩ ⲉⲡ̀ϣⲁⲓ ⲙ̀ⲡⲓⲁⲅⲓⲟⲥ Ⲓⲱ̅ⲁ̅ ⲡⲓⲣⲉⲙⲯⲉⲛϩⲱⲟⲩⲧ ⲉⲧⲉ ⲥⲟⲩⲏ̅ ⲙ̀Ⲡⲁϣⲟⲛⲥ ⲁⲡⲓⲟⲩⲣⲟ ⲟⲩⲁϩⲥⲁϩⲛⲓ ⲙ̀ⲡⲓⲙⲁⲧⲟⲓ ⲣⲱ ⲟⲛ ϫⲉ ⲙⲁϣⲉⲛⲁⲕ ϣⲓ ⲙ̀ⲡⲓⲥⲱⲙⲁ ⲛ̀Ⲓⲱ̅ⲁ̅ ⲟⲩⲟϩ ϩⲓⲧϥ ⲉⲫ̀ⲓⲟⲙ ⲟⲩⲟϩ ⲁϥϭⲓ ⲛ̀ⲟⲩϭⲛⲟϥ ⲛ̀ⲧⲟϩ ⲟⲩⲟϩ ⲁⲩⲉⲗ ⲛⲓⲱⲛⲓ ⲛⲉⲙ ⲛⲓⲧⲱⲃⲓ ⲉⲛⲁⲩϩⲓⲱⲛⲓ ⲙ̀ⲙⲱⲟⲩ ⲉϫⲱϥ ⲛⲉⲙ ⲡⲓⲙⲁ ⲉ̅ⲑ̅ⲩ̅ ⲛ̀ⲧⲉ ⲡⲓⲁⲅⲓⲟⲥ Ⲓⲱ̅ⲁ̅ ⲟⲩⲟϩ ⲁⲩⲧⲁⲗⲱⲟⲩ ⲉⲟⲩϫⲏⲟⲩ ϣⲁⲁ ⲧ̀ⲫⲁϣⲓ ⲙ̀ⲫ̀ⲓⲟⲙ ⲟⲩⲟϩ ⲁⲩϩⲓⲧϥ ⲉⲫ̀ⲓⲟⲙ ϣⲁ ⲡⲁⲓⲙⲁ ⲡⲉ ⲡⲉⲛⲉⲙⲓ ⲉⲫⲏⲉⲧⲁϥϣⲱⲡⲓ ⲙ̀ⲡ̀ⲥⲱⲙⲁ ⲙ̀ⲫⲏⲉ̅ⲑ̅ⲩ̅ Ⲓⲱ̅ⲁ̅ ⲡⲓ ̀ⲛ̀ⲧⲉ Ⲡⲭ̅ⲥ̅

Ⲟⲩⲟϩ ⲓⲥϫⲉⲛ ⲡⲓⲉϩⲟⲟⲩ ⲉⲡⲁⲓ ̀ϭⲓⲭⲗⲟⲙ ⲛ̀ϧⲏⲧϥ ϣⲁ ⲡ̀ⲉϩⲟⲟⲩ ⲙ̀ⲡ̀ϫⲓⲛϥⲓⲣⲱⲟⲩϣ ⲙ̀ⲡ̀ϣⲁⲓ ⲛ̀ⲛⲉϥϧⲓⲥⲓ ⲉ̅ⲑ̅ⲩ̅ ⲓ̅ⲁ ⲛ̀ⲁⲃⲟⲧ ϣⲁⲛⲧⲉϥϭⲓ ⲙ̀ⲡ̀ⲧⲁϫⲣⲟ ⲙ̀ⲡⲓⲥⲁϫⲓ ⲛⲉⲙ ⲧⲉϥⲙⲉⲑⲙⲏⲓ ⲛ̀ⲕⲁⲗⲱⲥ ⲉⲃⲟⲗϩⲓⲧⲉⲛ ϩⲁⲛⲣⲱⲙⲓ ⲙ̀ⲡⲓⲥⲧⲟⲥ ϫⲉ ϯϣⲟⲡ ⲁⲛⲟⲕ ϧⲉⲛ ⲭⲏⲙⲓ ϧⲉⲛ ⲡⲓⲕⲉⲣⲟⲥ ⲉⲧⲉⲙⲙⲁⲩ ⲟⲩⲟϩ ϯⲛⲟⲩ ⲱ ⲡⲓ ̀ⲉ̅ⲑ̅ⲩ̅ ⲡⲓⲁⲅⲓⲟⲥ Ⲓⲱ̅ⲁ̅ ⲡⲓⲛⲁⲓⲁⲧϥ ϧⲉⲛ Ⲡⲟ̅ⲥ̅ ϩⲓⲧⲉⲛ ⲟⲩⲛⲁⲓ ⲛⲁⲙⲉⲧⲉⲃⲓⲏⲛ ⲛⲉⲙ ⲧⲁⲙⲉⲧⲧⲁⲗⲉⲡⲱⲣⲟⲥ ⲡⲓⲃⲱⲕ ⲛ̀ⲉⲭⲙⲁⲗⲱⲧⲟⲥ ϧⲉⲛ ⲫ̀ⲛⲟⲃⲓ Ⲙⲁⲣⲕⲟⲥ ⲡⲓⲁⲧⲉⲙⲡ̀ϣⲁ ⲁⲛ ⲛ̀ϯⲙⲉⲧⲣⲱⲙⲓ ⲙⲁⲗⲓⲥⲧⲁ ϯⲙⲉⲧⲡⲣⲉⲥⲃⲩⲧⲉⲣⲟⲥ ⲡⲓⲙⲁⲑⲏⲧⲏⲥ ⲛ̀ⲧⲉ ⲁⲃⲃⲁ Ⲙⲏⲭⲁⲏⲗ ⲡⲓⲉⲡⲓⲥⲕⲟⲡⲟⲥ ⲛ̀ⲧⲉ Ⲡⲟⲩⲥⲁϯⲛⲉⲙ ⲫⲗⲁⲃⲉⲥ ϫⲉ ⲁⲛⲟⲕ ⲁⲓⲥⲱⲧⲉⲙ ⲉⲧⲥⲙⲏ ⲙ̀ⲡⲓⲉⲩⲁⲅⲅⲉⲗⲓⲥⲧⲏⲥ ⲉⲥϫⲱ ⲙ̀ⲙⲟⲥ ϫⲉ ⲫⲏⲉⲑⲛⲁϣⲉⲡ ⲟⲩⲡⲣⲟⲫⲏⲧⲏⲥ ⲉϥ̀ⲣⲁⲛ ⲛ̀ⲟⲩⲡⲣⲟⲫⲏⲧⲏⲥ ⲉϥⲉϭⲓ ⲙ̀ⲫⲃⲉⲭⲉ ⲛ̀ⲟⲩⲑⲙⲏⲓ ⲟⲩⲟϩ ⲫⲏⲉⲑⲛⲁⲥⲧⲉ ⲟⲩⲁⲓ ⲛ̀ⲛⲁⲓⲕⲟⲩϫⲓ ⲉⲑⲛⲁϩϯ ⲉⲣⲟⲓ ⲛ̀ⲟⲩⲁⲫⲟⲧ ⲙ̀ⲙⲱⲟⲩ ϩⲱϫ ⲛ̀ⲑⲱⲧⲉⲛ ⲛⲁⲠⲭ̅ⲥ̅ ⲁⲙⲏⲛ ϯϫⲱ ⲙⲙⲟⲥ ⲛⲱⲧⲉⲛ ϫⲉ ⲛ̀ⲛⲉϥⲧⲁⲕⲟ ⲛ̀ϫⲉ ⲡⲉϥⲃⲉⲭⲉ ϧⲁⲧⲟⲧⲕ ⲉⲑⲣⲉⲕϯϩⲟ ⲙ̀ⲡⲉⲛϣⲟⲣⲡ ⲙ̀ⲫⲁⲓ ⲉⲧⲁϥⲫⲱⲛ ⲉⲃⲟⲗ ⲙ̀ⲫⲏⲉⲧⲉ ⲫⲱⲛ ⲛ̀ⲥⲛⲟϥ ⲉⲃⲟⲗ ⲉⲑⲃⲉ ⲡⲉⲛϣⲟⲣⲡ ⲙ̀ⲡⲗⲁⲥⲙⲁ Ⲁⲇⲁⲙ ⲛⲉⲙ ⲁⲛⲟⲛ

ϩⲱⲛ ⲟⲩⲟϩ ⲁϥⲁⲓⲧⲉⲛ ⲛ̀ⲣⲉⲙϩⲉ ⲉⲃⲟⲗϧⲉⲛ ⲡⲥⲁϩⲟⲩⲓ ⲛ̀ⲧⲉ ⲡⲓⲛⲟⲙⲟⲥ ⲟⲩⲥⲛⲟϥ ⲛⲁⲛⲟⲃⲓ ⲁϥⲧⲟⲩⲃⲟ ⲛ̀ⲛⲓⲣⲉϥⲉⲣⲛⲟⲃⲓ ϯⲙⲉⲩⲓ ⲉⲡⲓⲥ̀ⲛⲟϥ ⲛ̀ⲧⲉ ⲡⲓⲙⲟⲛⲟⲅⲉⲛⲏⲥ ⲛ̀ϣⲏⲣⲓ ⲛ̀ⲧⲉ ⲡⲓⲡⲁⲛⲧⲟⲕⲣⲁⲧⲱⲣ ⲫⲓⲱⲧ ⲉⲧⲉ ⲫⲁⲓ ⲡⲉ ⲡⲓⲥ̅ⲱ̅ⲣ̅ ⲙ̀ⲡⲓⲕⲟⲥⲙⲟⲥ ⲧⲏⲣϥ ⲡⲉⲛⲟ̅ⲥ̅ ⲟⲩⲟϩ ⲡⲉⲛⲛⲟⲩϯ ⲟⲩⲟϩ ⲡⲉⲛⲥ̅ⲱ̅ⲣ̅ Ⲓⲏ̅ⲥ̅ Ⲡⲭ̅ⲥ̅ ⲉⲑⲃⲉ ϫⲉ ϩⲓⲛⲁ ⲉⲑⲣⲉϥⲟⲩⲛⲁⲓ ⲛⲉⲙⲏⲓ ϧⲉⲛ ⲡⲉϥⲃⲏⲙⲁ ⲉⲧⲟⲓ ⲛ̀ϩⲟϯ ϧⲉⲛ ⲡⲓⲉϩⲟⲟⲩ ⲛ̀ⲧⲉ ⲡⲓⲣⲉϥϯϩⲁⲡ ⲙ̀ⲙⲏⲓ ⲉⲑⲃⲉ ⲡⲉⲕϯϩⲟ ⲉ̅ⲑ̅ⲩ̅ ⲙ̀ⲡⲓⲁⲅⲓⲟⲥ Ⲓⲱ̅ⲁ̅ ϫⲉ ⲁⲓⲕⲏⲛ ⲁⲓⲁⲙⲟⲛⲓ ⲙ̀ⲡ̀ϣⲁϯ ⲛ̀ⲛⲉⲕϩ̀ⲃⲱⲥ ⲉ̅ⲑ̅ⲩ̅ ϫⲉ ϩⲓⲛⲁ ⲛ̀ⲧⲁϫⲉⲙϩⲏⲟⲩ ⲙ̀ⲡⲉϥⲙ̀ⲑⲟ ⲁⲛⲟⲕ ⲇⲉ ⲙ̀ⲙⲁⲩⲁⲧ ⲁⲛ ⲱ ⲡⲓⲙⲉⲛⲣⲓⲧ Ⲓⲱ̅ⲁ̅ ⲁⲗⲗⲁ ⲛⲉⲙ ⲡ̀ⲥⲉⲡⲓ ⲛ̀ⲛⲓⲭⲣⲓⲥⲧⲓⲁⲛⲟⲥ ⲙⲁⲗⲓⲥⲧⲁ ⲛⲓⲣⲉⲙⲡ̀ⲕⲁϩⲓ ⲛ̀ⲭⲏⲙⲓ ⲉⲧϣⲟⲡ ϧⲉⲛ ⲡⲓϩⲟϫϩⲉϫ ⲉⲧⲉⲕⲥⲱⲟⲩⲛ ⲙ̀ⲙⲟϥ ⲥⲉ ⲛⲉⲙ ⲛⲏⲉⲧϥⲓ ⲫ̀ⲣⲱⲟⲩϣ ⲛⲉⲙ ⲛⲏⲉⲑⲛⲁⲥⲱⲧⲉⲙ ⲉⲣⲟⲥ ⲛⲉⲙ ⲛⲏⲉⲧϥⲓ ⲫ̀ⲣⲱⲟⲩϣ ⲛ̀ⲛⲓⲁⲡⲁⲣⲭⲏ ⲛⲉⲙ ⲡⲓⲡⲣⲟⲥⲫⲟⲣⲁ ⲛⲉⲙ ⲛⲓⲉⲩⲭⲏ ϧⲉⲛ ⲫ̀ⲣⲁⲛ ⲙ̀ⲫ̀ⲓⲱⲧ ⲛⲉⲙ ⲡ̀ϣⲏⲣⲓ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲛⲓⲕⲟⲩϫⲓ ⲛⲉⲙ ⲛⲓⲛⲓϣϯ ⲉⲩⲛⲁϣⲱⲡⲓ ϣⲁ ⲡⲓⲙⲁⲛⲭⲁⲛⲟⲃⲓ ⲉⲃⲟⲗϧⲉⲛ ϯⲙⲉⲧⲟⲩⲣⲟ ⲛ̀ⲧⲉ ⲛⲓⲫⲏⲟⲩⲓ ϧⲉⲛ ⲡⲓϩ̀ⲙⲟⲧ ⲛⲉⲙ ⲛⲓⲙⲉⲧϣⲉⲛϩⲏⲧ ⲛⲉⲙ ϯⲙⲉⲧⲙⲁⲓⲣⲱⲙⲓ ⲛ̀ⲧⲉ ⲡⲉⲛⲟ̅ⲥ̅ ⲟⲩⲟϩ ⲡⲉⲛⲛⲟⲩϯ ⲟⲩⲟϩ ⲡⲉⲛⲥ̅ⲱ̅ⲣ̅ Ⲓⲏ̅ⲥ̅ Ⲡⲭ̅ⲥ̅ ⲫⲁⲓ ⲉⲧⲉ ⲉⲃⲟⲗϩⲓⲧⲟⲧϥ ⲉⲣⲉ ⲱⲟⲩ ⲛⲓⲃⲉⲛ ⲛⲉⲙ ⲧⲁⲓⲟ ⲛⲓⲃⲉⲛ ⲛⲉⲙ ⲡⲣⲟⲥⲕⲩⲛⲏⲥⲓⲥ ⲛⲓⲃⲉⲛ ⲉⲣⲡ̀ⲣⲉⲡⲓⲙⲫ̀ⲓⲱⲧ ⲛⲉⲙⲁϥ ⲛⲉⲙ ⲡⲓⲡ̅ⲛ̅ⲁ ⲉ̅ⲑ̅ⲩ̅ ⲛ̀ⲣⲉϥⲧⲁⲛϧⲟ ⲟⲩⲟϩ ⲛ̀ⲟⲙⲟⲟⲩⲥⲓⲟⲥ ⲛⲉⲙⲁⲕ ϯⲛⲟⲩⲛⲉⲙ ⲛ̀ⲥⲏⲟⲩ ⲛⲓⲃⲉⲛ ⲛⲉⲙ ϣⲁ ⲉⲛⲉϩ ⲛ̀ⲧⲉ ⲛⲓⲉⲛⲉϩ ⲧⲏⲣⲟⲩ ⲁⲙⲏⲛ.

Ⲁⲥϫⲱⲕ ⲉⲃⲟⲗ ⲛ̀ϫⲉ ϯⲙⲁⲣⲧⲩⲣⲓⲁ ⲛ̀ⲧⲉ ⲡⲓⲁⲅⲓⲟⲥ Ⲓⲱ̅ⲁ̅ ⲡⲓ ̀ⲛ̀ⲧⲉ Ⲡⲭ̅ⲥ̅ ⲛ̀ⲥⲟⲩⲇ̅ ⲙ̀ⲡⲓⲁⲃⲟⲧ Ⲡⲁϣⲟⲛⲥ ϧⲉⲛ ⲟⲩϩⲓⲣⲏⲛⲏ ⲛ̀ⲧⲉ Ⲫϯ ⲁⲙⲏⲛ

Ⲫϯ ⲛⲁⲓ ⲙ̀ⲫⲏⲉⲧⲁϥⲥ̀ϧⲁⲓ ⲙ̀ⲡⲓⲉⲃⲓⲏⲛ ⲛ̀ⲧⲁⲗⲉⲡⲣⲱⲥ ⲛ̀ⲁⲧϣⲁⲩ Ⲡⲉⲧⲣⲟⲥ ⲡ̀ϣⲏⲣⲓ ⲙ̀ⲡⲁⲡⲁ Ⲡⲟⲩⲗϥⲁⲣⲁϫ ⲡⲓⲣⲉⲙϯⲙⲉⲛϩⲟⲩⲣ . ⳨ⲕ̅ⲍ̅