ჩიტჲ ვორექო, ფუბრინენი, ჩხომჲ ვორექო, ბნჩურენი*
ჩიტჲ ვორექო, ფუბრინენი, ჩხომჲ ვორექო, ბნჩურენი,
ბორჯჲ ვორექო, მიღუდასჷნი გოღა, ამდღა, ჭუმენი?..
ვართჲ ბორია ვავორექჷ, ქჲანას უდუნტირელი,
ვართ სერიში უკუმელა - ჩე გოთანათ თირელი...
ვართ ჭვემა დო ვართ მუნაფა, ვართ თირჲ ვორექ, ნახარა,
ვართ - ხანერშნერჲ უხანო დო ვართ - უხანოშჲ მახანა.
ვართ ჯა ვორექ, ნოჸელეფით იშო-აშო იბრქენი,
ვართი - გვალა, კჷდჷრცალო მიკობდგჷდას ქირქენი.
ვართ - თელა დო ვართი - ღურა, რინაშ გჷმაქვირსალი,
ვართი ფირქი ვავორექჷ, მაფურინჯე ქჷრცალი.
ვართი - ზუღა, რეღმეფითჷ ზღვაპიც გჷვაფოფორე,
ვართ - მურიცხიშ ციორი დო ვართ - თუთაში დოხორე.
ვართი ნოთე ვავორექჷ, ვართი - ჩხანაში ბარჩხალი,
სისმარიში წყარც ვორექჷ სინანდულეშ მარჩხალი...
ართ უნძალე არშჲ გოხოლჷთ, ცაშო - ტი დო მუნტური...
ჩქიმ გერე დო დჷმაკინე იშენ ვარე მუთუნი.
კოჩჲ ვორექჷ, ცოდათჷ დო ჯაბით დამონკებული,
ჭარაწკჷმა მალჷმერი, ლჷმა ვამოგებული.
მიწის, ღორონც აფუქია მუში თანგო ქიმნელი,
მარა მუთა შემიტყვებუ ჩქიმ დუდიშა თიმნერი.
ათაქ მუშა მობზოჯინი, თითჷ ვამარაგადე,
ნიტე, ნამთინ ქოპუასჷ, მუთ თაქ ეკობღაღადენ:
ვარა ჩიტჲ დო ვარა ჩხომი, ვარა ბორჯიშ მერქება,
ვარა ჭვემა, ვარა ჩხანა, ცაშ ნოთელიშ მერკება,
ვარა სერიშ უკუმელა, ვარა ფურე დაჩხირი,
ვარა კაპუ, ვარა ოდო, ვარა ალერტ-ხარჩილი!..
ვარ, ნამთინი ვეპიიქჷ, ვამკო გაღაშჲ ლანდღუა,
ჩქიმ ფირქიშ დო ნანარტიში სისმარს მიკობანდღუა.
ართ თოლიში ელანჯამა, ართ ჸუჯიში მორჩქილა,
ართშა ღურა, ართშა რინა, თეიშახ ართშა გორჩქინა.
ლანდო ულირ გეძირა დო ვარა აწოძირა და,
ჯიშთიცალო უბოლეთ ჭვათ-ჭვათირო წირადა,
ცაშ აქრაში მჷკნატკეცა, გჷნაველა ბაია...
ახავაი, თაქჷ მულა... ულა, ახავაია!..
მესიში 20, 2018 წანა, ქუთეში