ტრიოლეტი (ჯანო შენგელია)
Jump to navigation
Jump to search
იფრელ პოტიკ რე, ქუაცალო გენნირთ ქიანაქ,
ტანშე უფცალო იფწიმინდა გუნაჭყა ლერსეფს,
შორიშ გვალეფი, ტურეფცალო გუმორკიანა,
იფრელ პოტიკ რე, ქუაცალო გენნირთ ქიანაქ,
ღურელიშ შურეფ გემუანას გუმადიარა
დო ჩქიმ ჸოროფა სანთელცალო ენმიჭუ ირ სერს.
იფრელ პოტიკ რე, ქუაცალო გენნირთ ქიანაქ,
ტანშე უფცალო იბწიმინდა გუნაჭყა ლერსეფს.