მა - გალენიში, შქაკვათაშ სქუა
/ ნოჭყვედ მოიადურ ლექსიშე ,,ორთა ქართელი”/
ურთას ურთუე ურთა იყი,
ორთას გეუჯერდია ოშწანერ დედიბიქ,
ყვარია უჩაქ,
ვარწყექო, ღურელიშ ფერ გინორძუ დო
ნარჩა გაფუნია მუკმართაფუ,
ქვერსემიაშ უჩა წყარშა
ქოიგუნია ხონარი,
სო ძირ დო სო გეგონ
ყვერე დო ყუნგაქ.
დობაყუ დო დონიარუ გოთეშ ზვე
ნოყორჭითა ბორია ჩიჩაქ,
გელალ დო აკოშირ ბინეხ დო ოხვამერ ლაგვანეფი,
გელერქუ მაცირიაშ, ვარ ტყაში მაფაშ მოჭვე მენაბირაქ,
ვადაყუნ, ვეკაკაფუ გურქ,
ჟინიშ კვათაშა მანჭუაფუქ,
გიმეიან ორთაშ კაკლარონს გიშნატყაბარაქ,
ვეკლაყოთ ჭუაქ,
ვამკო მითინი!
ყვინგ გიტახუდასია,
ქიგნიყოთ ხუჯშა ძორცო ძუძუეფი,
დინჭირ დო ქინასხაპ ზღვას მაზაკვალქ.
გიმბარ ჩხვიჩხველ უჩაქ,
გვერშაპო ქიგნაფორ დოლო-ლიარს.
გოციუ ორქოშ ჩხომქ დო ვარ ჯვეშ სიზმარემქ,
გემთიცანცალეს დარანიშა.
ეთექ ქიმთოხედან დო დუს ვამკოჭვებუდან
ჩქიმ დოძახინ დო დორთაშა!
ქეკვაყუნ ცაშკიბულს, დობარხალუ ზარა-ნობი
ბორჯიშ წყარზიმუქ, სამენცაროს ერინაფილქ,
ქაშმონდღულ დღაქ.
ქიმშებობრკი ბორბოლიაუჩაშ ანკარიას.
ლასარით გუჩხოტი დო
გეშუზილიტ ქვარა მამოსალი,
ქიმეფრთ ჟინიშ სანძღოშა დო ქინვოჯინ
ღურელ თუთაშიშ მინორთელ თოლს,
მურიცხონს არგილაფირს.
გეგნირულ ონერცხვენს მორიალექ, ქუგომიდვ მარწუხეფი
ლისმარულო ნახინტკა ქუას მეყუნაფილ ხეს,
ქოქირუ ზისხირქ,
(კით ვაუწურუავა – ქუგმაშინ დედიბიშ ღანჯამ კიბირებმქ).
გეფალ ტყების, ჭყონიშ ტეფიათ გორთელს, ნოღურიშ ფორონჯემფქ,
ქაწმასერ თოლს დო დუმახუ ორსხუეფქ. ქინიფქოს ყვერე ინჭას.
მუქ ინმაყუნუო, ვარ მა იფხვამილეო,
ჩხონჩხიშა ქუგომდოხოდ ათოხვალამირ თუთაშიშ ძვალქ,
დუმარხუ აფხაქ.
ბირცხელო გეკიბტყაბარი ონერცხვენშა,
გეირზ დაჩხირქ,
ოთხ ინორღომას გეფანილქ,
გეფურინეს ფასქურემქ,
დირაყეს ორქოშ სუალეფი,
დიცარ დო გოციუ ტუტაქ, ტკილო გორთელქ.
ქუვაწყორ ფასქურიშ ბუნას –
თუთაშურ ნაჭარგას მუორელ
უშარე შარაშა მალუს.
ქუგმოშირ ჟინი ორთაშე
მაზადუ ბორიემქ დო ცაშ ნოტეხემქ
დიაწყარს ეშნალუეფი სამანეფი,
დიბაყუ წკვარამეფს ჭითა ორქოშ ჭურჭულეფქ,
ვარ ჩქიმ ზისხირ რდუო – დემეთხუ თელქ.
მუნულე გიმეიან ორთას, ოლუ დო ბორჯიშ ქართელს,
ყუს ქალმორკიუ მურიცხიქ,
ცას მუკოხარცქილქ,
ვარი ჟინოთას გიწონტებულქ.
ინა გიმეიან ორთაშა მისოფუდუნ, მა ჟი მიმჭუაფუდი,
იჭუდ დო იშენ გიმეიან ორთაშა უნჯანდ თოლი.
ჟინიშ ონოგურშა ქიმმაყუნ
იშ მაშქირატუ ინოჯინაქ.
აფხაშ გინით ქუგურე ჭკარჭკუნტიას -
დიაჩქიმიშ კართეშე ცას მიკოწონებულს,
აკმაჭიჭიხ გურქ.
გელერქუ დიხაშ დო ოთიფურეშ შურქ,
მუმაშ ნარზვენა ჭაშ შქიროშქიქ.
თუდოშე ნაძირეფ ცა გვალო შხვა რდუ,
წკელიშ ხეშფორცალო მუნმორთუდ დუს,
აქ - ქიმშაბდინ კამარეფიშ სარსიოლს.
იშენ ვამვოსქიდ მა, ყურუქ, ჯვეშ სისმარემს,
ქიბრაგვე დუდი ბჟა დო თუთაშა, მაფორუშ მაგორუქ.
მა ჩქიმ დიდა მიჩქუდუნი, იქ დაჩხირიშ შიბი ქიგილუ,
მუაჩქიმი მიჩქუდუნი –უჩა ოჭიშ ქომჭოფუ,
ყინიშ ქართაშა ქუმკომჭუ ხე, მუშო მახვამერი,
...ინემს მუნეფიშ მურიცხეფი გასხარსხალდეს.
ვარეთო მითინი!-
მიბგორე ჩქიმი ფასქურეფი.
მიდნაღელ სიზმარცალო სოდგარენ გიმე-ინი მიფაფუდ
ბჟა დო ყინიშ ნაჭვი სუაშ ფიორეფი,
ყვერე ინჭას ბორიაშ ინნაფართხა ყურზენჯგუა
გეთხოზუდ ჩქიმ ჩილამურეფი,
წყარ რცხულს რჩხუნსია დო ჩილამურ შურს –
დიბაყუ დო გეშაფუ ქვერსემიაშე
ბარჭყილ ხონარქ.
წკაცალო ქიმშაბდოხოდ ყურზენიშ კაკალემს
ართიქ – მიარეთ რცამულერქ.
გეგმიბკარკანტით გოდაჩხირელ შუროს,
გიშებლით ქუა დო ჭორღიშ უკმო–ელე ჭვიმას,
ჩე ლაქვათეფო ქიგვოლით უკიანო წყარს,
დიკვეთ, ვაკიწყორ ზღვაშ ჯიმუქ დო
თოლიშ ელნანგარა წყითექ -
ყურუ სოფელიშ ნაჭყოლა მესეფიშ ჭუა მურდუ
ჩქიმ ჭუაშ გეშა.
დინიარ ზღვაქ, ჭიჭკეფო ქომცის ჭორპამ მარდაშემქ,
ქიგმოსოფეს კორობა რეყეს,
გოწიუ ჩქიმ მაფორუ ჩილამურემქ,
შიმე თოლო ქიგებსკიდ ფურე ქუალემს.
ლაქვათა ინგარსია – გოსხარსხალეს.
გერჩქინდ ალამას თუთარჩელა ოსურქ, თოლშე იაია ელმუცენდ,
ქიგუჭვალ ძუძუშ ბჟა ფორონჯელ ხეშა.
ქუგმოწუ იშ ჩხაპილიეფქ, ქუმანთხ დიაჩქიმიშ შურქ-
თი მარდაშეფით მა პოფედი.
ქუმაწკანტუ სოლედგარენ, გოფუშუ ქვირა ცხენქ,
გესირქ ქუალეფშე ჩქიმ რცამულერ შური.
მა დოძახინს ვოცადუდინ, იქ გოჭირხინ დო ორქო გებრაყუ რეყეშე.
ქაწმაყუნეს დიაჩქიმქ.
ქორჩქინდ მუაჩქიმის ნათოლა ჯარგვალქ,
გემნუონჯი კარი, ხიხილერი.
ვართ ყებური, ვართ ყუდეშარეფი –
კარს მელე დოლო იბაყუდ დო
მიძიცანდეს მაზადუ სინთე-შურეფი…
ქაშადირთ კარგუმოლს შურიშ ცხენქ-
თაქ აკმიწყორუდ ორთა დო ურთა,
ორთას - დიაჩქიმის ჩე ქიცას უფიორუანდ
ჟინიში დო გიმეიან ბორიეფი,
ურთას - მუაჩქიმიშ შურს გილურაყუდ ჩქიმ ბაღანობას ნაღურა ცხენი,
გალენიშეფიშ ღორონს ქოგუდ – არძა ჭუაშე მარსხებელს.
აქ ურთათ დო ორთათ მისინთანდ
მა –გალენიშის, შქაკვათაშ სქუას.
უჯგუშის მუს ბგორუნდ ორთა ქართელს მა, ყურუ.
გევერიგ ღურუს.