მაჭირხოლი(სერგო წურწუმია)
მაფშალია ვა ვორექჷ, გობრჩქინელექ მაჭირხოლო,
რჩქილა ვორექ ჸუჯიში დო ჭურიაში მანჭი ხოლო,
ნთხაფა ვორექ შურიში დო შხვა ანდანერჲ ემოცია,
ცაშა მომწენც შურიშ ტება... ხორციშ - დიხას ენორცია...
შხვა ოლურჲ დო შხვა საშველი შხვას მისჷ რე მეჩამუნი?
შხვანერ ჭარა მის აჭარუ, მუთუ ცასჷ ვეჭარუნი?!.
ეშ, ნანდულო ქჷმოკოდჷ კინეხოლო დაბადება,
ართიშა დო ჟჷრშა ვარი, ბრელშა რინაშ განაღდება!..
მარა, ხვალე მუშ მოკოდ, ქიჸანაშა მა დიბრთენი,
არძა თაქჷ ვეჸინადა, მით ტიბჷ რენ დო მით ჩქიმ რენი?!.
ჩქიმ დიდა დო ჩქიმი მუმა, ჩქიმ ბაბუ დო ჩქიმი ბები,
ჩქიმი და დო ჩქიმი ჯიმა, თინეფიში გამნარყეფი,
ჩქიმ ოსურ დო ჩქიმი სქუა, ჩქიმ მოთა დო ჩქიმ მოძენი,
მოჯგჷრე დო მეძობელი, არძა, მისჷთ თოლი ორწყენი,
ჩქიმ ოფუტე, ჩქიმი ნოღა, ჩქიმ კუნთხუ დო ჩქიმ ქიჸანა,
მულირს მუდგაქ დოფხვადესჷნ, ანწი მითა მითირანა!..
კჷნოხ, ვამიჩქ, ვორდიო დო მუ მიღუდჷ დო მი პუნდუნი,
მი მიჸორდჷ, მის ვუჸორდი, მის ბწანდი დო მი ბჭუნდუნი,
კოჩ ვორდიო, ჩიტ ვორდიო, ჭყორ ვორდი თუ ვორდი ყილო,
მიქ დოფხვადჷ, მუქ დოფხვადჷ, დორცხილო თუ აკონწყილო...
მუ ჟამც ვორდი, სო ვორდი დო, დასტურ ვორდ თუ გიმაძირჷ,
ართ რინაქჷ მუმოკორდ თუ... ხოლო ართიქ გიმაძინჷ?
ასე ნამდგას ვორექჷნი, მაჟრა რენ თუ მასმა რინა,
სოლე ოკო მიღუდასჷ, თე დოფორილ ამბეშ რჩქინა?!.
თაქ მობრთინი, მიქჷ ბკითხჷ, ვარა მულა, ვარა ულა,
ვარა მიქჷ გჷმოშინჷ წოხლენ რინაშ დჷნაფულა?!
დიხაუჩას მუ მოკოდ, მუშენ ვაფსკეს შხვა აბანცჷ,
შხვა დიხასჷ შხვა მურიცხიშ სოთ თანკარი გაბარბანჩჷ,
შხვა ბჟალეფიშ შხვა ჩხორია შხვადო გჷმალაჸაფუდკო,
შურიშ გალენ გაქუნალო ხორცი საჭირო ვამაფუდკო!..
მაფშალია ვა ვორექჷ, გობრჩქინელექ მაჭირხოლო,
ჸოფაშ დუდ დო ბოლოსჷ დო რინაშ გურც მივანჭი, ხოლო,
მარენჯ იშენ ქო ვორექო, ურცხო ნძალაშ აკნაბორკა,
ოჭმარეშე ოჭმარეშა ლერსითჷ მაფუნ დუდი მონკა.
თე თოლც შანი ვაუძირჷ, ვონჯანდი თუ ბწკურუნდიო,
ჩქიმი ვერწემი დარინალ რე კოსმოსიში წკურუნტია.
ხვათაფალო იბდენ მოკო, თინ შარასჷ ვებჩირთენი,
თაქ იჸინო, თექ იჸინო, კინ ქჷმოკო ებრჩქინდენი,
მარა კინე ვებრჩქინდიდა, თეშ მეტ შხვა მუ დუვაპირა:
ირიათონ ბორჯიშ იშონც ქჷგვაგონა ჩქიმ ნაბირა!..
ქირსეთუთაში 30, 2014 წანა.
ქართი-ქუთეში.