თოლჷ ბწკურიდა...
თოლჷ ბწკურიდა, მა სი ჸვერე ვაიჩქუდა,
ჸუჯჷ იბძგიბდა, მა სი ჸუნგა ვაიჩქუდა,
უქვინჯელა ღურუშჷ ქვარა მომინჯუდას,
ჸათე გურჷ მა ჩილამურით ვამირჩხუდა.
მუშენი რე მარაჸვალუ ბირგულეფი,
მუშენი რე მაწილოხუ შურჷ დო გური?!
სო ოდინეთჷ ჩენჯალეფიშჷ ბირკულეფი,
ფურცელიში ხანტურელი მალაღური?!
ჸავავაი, ჟინჷ-ანთარი გობჭყორუნო,
თოლჷ ბწკურიდა _ ქვერსემია სინთე მარე,
ჸუჯჷ იბძგიბდა, სისანდობა ვარნჭყოლუნო?!
ჭიჭკეფითუ ეფშა მაფუ ოლაფარე.
ჸავავაი, კაკლარეფქუ ქომიცუეს,
ჸავავაი, ოჭუჭელეს ქეშუანთხი,
ბორბოლიეფქ დოფხართეს დო დუმორცუეს,
ჯვეშობურო ვემაჸუნუ ეშე განთხი.
ჟვერეფიშე ლაკარტამი გვერჷ ეფალუნს,
ჯა დუდგიმე მინმირთუ დო ჩხვიჩხვის ფაჩუნს,
ხე ქიმეთხი ჸათე მანჯეფს _ მუჭო ლალუნს,
მუჭო ლალუნს, მუჭო რკიანს, მუჭო აჭუ...
თიშენი რე თოლცჷ ბწკურუ დო ჸუცჷ იბძგიბუ,
სი ფიქრულენქ ვაგორწყექ დო ვამიჸორქუ,
შარეფჷ კუჩხის ჩაფლაშნერო მუმორწკიპუ,
თეშჷ გილულუ, ითამჷ დაჩხირჷ-სინთე მორკუ.
თოლჷ ბწკურიდა, სი მა ჸვერე ვაიჩქუდა,
ჸუჯჷ იბძგიბდა, სი მა ჸუნგა ვაიჩქუდა,
უქვინჯელა ღურუშჷ ქვარა მომინჯუდას,
ჸათე გურჷ მა ჩილამურით ვამირჩხუდა!