Колхозонь эряф/1936/03/Формализмать квалма
| ←Горькийть эряфонь киц | Колхозонь эряф (1936), № 3 (33) Май-Июнь ков edited by Купряшкин Т., Бебан М. А. Формализмать квалма by авторсь: Максим Горький, мокшекс ётафтозе: Аф содаф (аноним) |
„Колхозонь эряф“ журналть подписчиконзонды и лувондыензонды!→ |
| Колхозонь эряф (Колхозная жизнь). Мокшень литературно-художественнай и общественно-политическай журнал. Мокшэрзянь АССР-нь писателень союзть правлениянц органоц. Лисеньди вейхксоце кизось, кафта ковти весть. — № 3 (33) Май-Июнь ков, 1936 киза. — с. 11—15 |
М. ГОРЬКИИ
| Формализмать квалма |
Классовай, иерархическай строень масторса свирепствует фашизмась, конац, сонь сутенц коряс, арси организациякс, кона кочкси инь гнуснай мерзавецт и подлецт сембе иляды ломаттнень порабощенияснон инкса, капиталисттненьди кудонь животнайкс синь воспитандамаснон инкса.
Классовай структурань масторга властть кирдьсазь вяря азф мерзавецне и подлецне, конат заботиндайхть наглай и откровеннай деспотизмать келептеманц и кемокстаманц инкса, конанц лаца ниньгя мезевок ашель трудовой народть порабощенияса и ломанькс афлувомаса. Терминттнень „подлецт“ и „мерзавецт“ мон азончнесайня аньцек сяс, мес аф мушендан сяда виюфт.
Приблизительна 500 киза буржуазиясь вятьсь проповедь гуманизмать квалмова, корхнесь и сёрмадчнесь ломаттнень эса добрай чувствань воспитандамать колга: терпиндамс, улемс сятявкс, кельгомс маластонь ломаньтть и стак тов. Тяни сембе тя мармеладсь йофси аф васьфневи, ердаф и полафтф строптивайхнень укрощениянь инь простой формаснон мархта: строптивайхнень кярсесазь пряснон узерьса. Тя, конечно, арси инь цебярь формакс ломантть честнайста арьсемда лоткафтоманкса.
Станя лемневи международнай правась, конац едва ли вообще мзярдонга ульсь, тяни прокс машфтф. Итальянскай фашизмась тиеньди рекордт ломаньтть ломанькс аф лувомаса: тапси бомбаса якстерь крезонь лазареттнень, пес-пегля шавонды ранендафнень, шавонды медицинскай персоналть, ляпияфни мирнай населениять газса, кулсефти ядть эзда жувататьнень, отравляндакшни модать, ведьть, растительностть. Немецкай фашизмась тяфтажа седи вакска аноклай пря тяфтама радикальнай тевти: корхтайхть, сон тись стама яд, конань виец аф машты лама кизонь ётамс, т.е. модась, кона отравленнай тя ядть мархта, аф кармай эсь лангсонза касфтома мезевок ветешка киза, мезьть мархта сатневи народть, кулофтомац вача шить эзда. Мальтусне, мальтузианецне и Уэльсне должетт улемс довольнайхть: муф теждяняста применимай средства насилениять кирьфтаманкса. Кой-кона расатьнень и пляматьнень пес-пегля машфтомань эрявикс шиснон колга ниньгя аф корхтайхть, но кой-мезь тя ёньфтемя шить кигя кармасть ни тиеньдемя.
Пяк цебярь ломаньтти, кда сонь ули истинац, конац валхнельхце ба сонь лангстонза ответственностть эсь прянь вятеманц инкса. Пяк удобна верондамс шкаень улемаи, ибо христианскай церькавсь тонафты: шкайсь — истина единай во веки веков; сонь эсонза же сембе вийсь и мудростьсь и сонь воляфтомонза нлта фкя шяярь аф прай ломаньтт пряста. Стало быть: мезе мон афолень ти — тяфта эряви шкайти, монь волязень азоронцты, а мон — аф муворан и аф муворан нлта и эста, мзярда монь сельме инголен ломантть шяярензон валхнесазь прястонза узерьса марса прянц мархта, валхнесазь аньцек сянкса, мес ся ломаньць арьси станя жа кода арьсян и мон. Мон маштан эряма спокойнайста и равнодушнайста, мон лихнян эрьгязень средняй качествань, стихнень, средняй качествань роматнень сёрмадоманкса. Ня занятиятьнень эзда свободнай пингста арьсекшнян формать значениянц квалма, формализмать квалма и иля кизефкснень квалма, конат кирьдихть кой-кодама отношения монь сочинителень профессиязьти.
Формать квалма кизефкссь — сире кизефкс. Сонь лангозонза шарфнихть мяль аф аньцек литерэторхне, — немецкяй [ 12 ]фашисттне, садизмать вишкоптеманкса форматьнень полной афзависимостьснон инкса тюрезь, ашезь лув эрявиксоньди революционнай гильотинать и полафтозь сонь мясникть узеренц лангс. Минь мирсонок станя али тяфта сембе оформленай и оформливается.
Тянь лангс ниньгя шарфтсь эсь мяленц Платон атянясь, идеализмань философиять основоположникоц, конац эрясь приблизительна 2.366 кизода инголя минь шинеконь эзда. Содаф, што сон тонафтсь, што формась — единственнай и действующай вий, што реальнайста эряй аньцек сон, и сембе реальносттне — природать явлениянза, предметтне, конат тифт ломантть трудонц мархта, — и вообще сембе материясь ащи аньцек сянь инкса, штоба пяшкодьчнемс формать. Платонтть коряс лисеньди, што формась арси сембе сущайть совершеннай идеякс, и кда афоль уль формать идеяц, эста ба мезевок и афоль уля; вселеннайть эзга лиеньдельхть ба апак няйхть и апак маряк аньцек планетатьнень, шитьнень, мелавнятьнень, дуцятьнень, орелхнень идеясна. Келдат, таракатт и вообще паразитт — афольхть уль, ибо синь неряшливай культиваторсна — ломаньць — эряль ба станяжа аф няевикс и аф марявикс. Эряй литератор, а сурцень токафтомс теенза аш кода. Шарьхкодеви, тя пяк пара теенза.
Идеалистическайста мирть шарьхкодемац аф сембенди теждяняста шарьхкодьчневи, тянкса формать значениянц квалма спорьсихть 2.366 кизот, мянь 1936 кизонь март ковть самс. Литератураса формань кизефкссь — эстетикань кизефкс. Мазы шить квалма кизефкс. Гегельти, кода и Платонтти, мазы шись (красотась) — идеять азомац. Правать областьса формализмась няфневи сянь мархта, што кельгови буквать законоц, а аф сонь смыслац. Эстетикаса — мазы шить квалма учения — формалисттне корхтайхть, што мазы шись ащи звукнень, краскатьнень, линиятьнень гармоничнай сочетаниясост, конат приятнайхть зренияти и кулемати синць, кода тяфтапт и сянь лангс апак вантт, мезь азончневи синь мархтост.
Архитектураса линиятьнень соотношениясна, орнаментса линиятьнень налхкомасна, минь платьянь материясонок краскатьнень сочетаниясна, стройностьсь, изяществась, посудать и кудонь разнай предметтнень формаснон цебярь шисна кой—мзярда станя же великолепнайхть и мазыхть, кода цебярь мелодиясь музыкаса. Литератураса лишнай орнаментонь и деталень тиеньдемась неизбежнайста вятихть факттнень и обраснень смысласнон афшарьходемасконды, синь шобдалгофтомаснонды. Кинь мялец шарьхкодемс тянь, катк лувсыня Екклезиастонь, Шекспиронь, Пушкинонь, Толстоень, Флоберонь вийхцок Марсель Прустть, Джойсонь, Дос—Пассосонь и различнай Хемин—Гуэйхнень мархта.
Формализмась кода „манера“ кода „литературнай прием“ сембеда пяк сидеста арси душать шава шинц али нищай шинц кяшеньдикс. Ломанць ерай корхтамс ломаттнень мархта, но азомс теенза аш мезь, и сизефтезь, лама корхтамаса, хоть кой-мзярда мазы и ловкайста кочкаф валса, сон корхтай сембень квалмова, мезь няи, но мезьть аф машты, аф ерай али пели содаманц. Формализмати кярьмодьчнихть эста, мзярда пелихть простой, яснай, а кой-мзярда грубой валть эзда, пелихть тя валть инкса ответственностть эзда. Кой-кона авторхне формализмать сявоньцазь средствакс, конань мархта щафнесазь эсь мяльснон станя, штоба аф курок муволь синь уродливо—враждебнай отношениясна действительностти, синь намерениясна коламс факттнень и явлениятьнень смысласнон. Но тя лувондови ни аф валть исскустванцты, а жульничествать искусстванцты.
Спорямась эрь мезьне эряви ушедчнемс шарьхкодемать али предметть точнайста определениянц эзда, конань квалмова моли спорямась. Точнайста определениясь — тевсь пяк стака, кда аф сявоньдемс ня определениятьнень синь историческай развитиясост. Историясь — единственнай ваномась, кона афламода лезды няемс ломантть эсь прянц ичкозьде, ся вастть эзда, коса сонь кати-мзярда яфиесь няеви и кяца капшави пулоц и коса тяни маряк, черепть шовоненц маласа апак няйхть тожа эряй кати—кодама пулоня, кона касфтф церькавть и отечествать (т е. классть) [ 13 ]лездомаснон мархта. Крхка древностть пингста, мзярда ломаньць кармась арьсемя, сон арьсесь технологически, т. е. неженьчнесь аньцек эсь трудонь опытонц лангс. Технологиясь, тя — факттнень логикасна, конат (факттне) тиеньдевихть ломаттьнень трудовой деятельностьснон вельде, идеологиясь — идеянь логика, т. е. факттнень эзда таргаф смыслатьнень логикасна, ся смыслатьнень логикасна, конат няфнесазь од фактонь творчествать кинзон, приемонзон и форманзон. Мышлениясь эсь ушедоманц эзда сявомок ульсь диалектичнай и ашель кода аф улемс теенза материалистическайкс. Ломаттне курмозьста симсть ведь, тя, — аф пара. Ломанттне кармасть тиеньдемя шаванят шуфтонь кедьста, шуфтста, севоньцта, металлста, гляньцекста. Менельть музь шаванякс ащикс сяда меле, мзярда модать лангса шаванясь ульсь тиф. Аш кода няфтемс фкявок отвлеченнай понятия, конань основаса афоль аще ба реальностьсь.
Идеологическай мышлениясь сязевсь технологическайть эзда, сяс мес трудть эзда сявозь арьсема правать. Тянь мархта ульсь колаф, кастяф трудяй ломантть диалектическай мышлениянь процессоц. Ульсть тифт религиозно-моральнай идеят, конатнень цельсна эвфнемс ломаттнень, кошардомс синь кулхцендомс идеятьнень, конат мезевок пцтай аф кирьдихть марстонь трудовой жизнедеятельностть мархта. Идеятне, конатненди почвакс илядчнесь трудсь, должетт ульсть прьняндамс и прьняндасть характер сказочнай, фантастическай, но сембе сяка илядсть трудовойкс, верондайкс трудть победоноснай виенцты. Мон кирьдян мяльсон воздухть завоеваниянь идеянц, веществать превращениянц, пространстваса движениять вишкоптеманц, ляйхнень шудема вийснон лангса властть, жив и кулоф ведьть идеянц и стак тов, философиясь фольклорть ня идеянзон ашезень ванонда. Мон пяк сидеста и лама сермачнень тя темать ланга и лувонца лишнаеньди оду азончнемс афвесть азондфть.
Формализмать квалма спорямать мон, шарьхкодеви, шнаса. Литераторонь с‘ездта меле етась кивейксыя кофт, и пяк кнара ни эряволь мезень квалмованга спорямс. Однако, теень арам Формализмать квалма корхтамать аделазь пяк курок. И сяс мес тя спорямась лиссь аф союзть потма ширестонза, а уша ширьде, — лисеньди афверондама апак аделак ли тя тевсь аньцек валса? Моньдеень арам спорямась формализмать квалма эряволь крхкалгафтомс и келептемс, сувафтомок эзонза минь поведениянеконь форманзон колга темать, ибо минь поведениянеконь эса няеньзеви кой-мезь загадочнай.
Кеподьксоньди сяфтяма омба масторонь интеллигенциять кой-конашка пяльксоц, конац фашизмать мерзостенц шарьхкодемок и сянь няемок, што Советскай Союзонь пролетариатсь сатфкс мархта тии тев, кона кирьди интернациональнай значения, — шарьхкодьчнесы пользанц и неизбежнай шинц классовай тюреметь и ушедчни работама эсь масторонь пролетариянзон мархта, — кода тянь лангс ванттама минь, Советонь Союзть литературонза? Кодама мяльхть сргозьфни тя явлениясь минь эсонок, мезь именна корхтави минь мархтонок стихса и прозаса тя кизефксть квалмова?
Минь литературанекя кой-конашкада, афламняда, тиевсь ни интернациональнайкс. Теенек пингя шарьхкодемс, што тя — сонь киц, сонь назначенияц. Минь книганеконь учсесазь, и учсесазь пяк реалистическайкс, но валдоптфокс и эждьфокс ся трудовой героическай пафость мархта, конань мархта пяшкодьф минь эряфонекя.
Тяста прокс шарьхкодеви, што теенек эряви работамс минь народнеконь трудодеятельностень интернациональнай смысланц апак юкснек, старандамс максомс омба масторонь пролетариятьненьди пролетариатть героизманц квалма инь валда представления.
Мес минь литературанькя скромнайста али гордайста местькя аф кашторды мзярда марьси, лувонды фашизмать мерзостензон квалмова. Мес аф мушендтама гневондама, сянь квалмова лувомок, кода итальянскай летчикне ляценьдихть бомбат Краснай крестонь госпитальхнень лангс, пес пегля шавондыхть ранендаф абиссинецнень, шавондыхть медикнень, аватьнень, итьтнень, [ 14 ]отравиндакшнихть ведьть, модать, жувататнень, растительностть? Вдь аш кода мярьгомс, што минь литераторнекя заняфт эсь масторнеконь эряфонц мархта сяшкава, што синь ни аш пингсна, аш эрьгасна иля масторонь мирть эряфонц лангс ваноманкса.
Хоть и книгатьне миньценок сермадчневихть станя же вишкста, кода и небрежнайста, сембе сяка кивейхксыя ковда меле конат етасть с“ездть эзда писателень союзть 3000 членонза макстть удивителька кржа эсь творчествань продукцияда. Цебярь, кда тя аф эряскадомась корхтай сяда цебярь работань квалма.
Эряволь сяда серьезнайста корхтамс сянь квалма мезь и кодама формаса машттама и должеттама минь максомс омба масторонь лувихненьди. Эряви тяфта же серьезнайста думандамс „обороннай“ литературань тиемать эрявикс шинц ланга, ибо фашизмась усерднайста шовай пеензон и кеньжензон минь каршезнок, и Италиянь фашисттнень мархта абиссинецнень поголовнай истреблениясна, конечно, ванондови немецкай фашисттнень мархта кода „мечть пробац“, конанц синь, кода содаф, ерасазь нолдамс именна Советонь Союзть пролетариянзон и колхозниконзон машфтомаснон инкса.
Тяса васцонза ули няфтемс, што немецкай литераторхне — Фейхвангер, А. Деблин и ламоц илятьне мусть ни пингя сянь инкса, штоба достойнайста няфтемс фашизмать гнусностензон, а миньценок кимгафксува кизонь етамс сембе ниньгя апак макст фкявок книга, конац няфтельхце ба странать преобразованиянь грандиознай процессонц стама вийса и красотаса, конанц тя процессь каннесы мирть эряфонцты. Минь эздонок мирсь учи именна тяфтама книгат, и минь должеттама максомс синь, но — сембе ниньгя аф макссетяма. Мес? Теень арам сяс, што — кода азозе фкя литераторсь пуромкснень эса мартста — „минь етксонок оцю разобщенность, минь етксонок паньжи фкя-фкянь эзда аердчнемась“. Омбоце литераторсь мярьгсь, што „авторсь должен нокамс ответственностень чувствати“.
Пяк эряви теенек воспитандамс минь средасонок коллегиальнай, коллективнай ответственностень чувства лувихнень и литературать инголя, но тя чувствась аш кода крьвястемс „разобщенностень“ и „фкя фкянь эзда аердчнемань“ условияса. Кда пиеательхне психологически аердчнихть „фкя-фкянь эзда,“ станя же, кода физически барсукне и осминогтне, — тя, шарьхкодеви, аф кармай лездома литераторхненьди синь работань смысласнон шарьхкодеманц касфтоманцты и странать инголя синь коллективнай ответственностьснон шарьхкодеманцты.
Йотай пингоня литераторсь кепсесь, кода эсь лозунгонц, кода „эряфонь правила“: „Тон оцязорат, эряк ськамот.“ Соньдеенза эрявсь тиеньдемс тя, ибо сон эрясь стама средаса, теенза враждебнайса, классовай обществаса, конац афольхце куль правдать бессмысленнай, паразитивнай эсь эряфонц квалма. Но нлта Александр Пушкин, — генийсь, конань лаца илят ашельхть и аш, — ерсесь пуроптомс эсь перьфканза коллектив, личнай дружбань чувстватьнень лангс нежедезь.
Кивейхксыя кофт тяда инголя странась од ломанензон мархта — комсомолть, рабочайхнень колхозникнень мархта няфтезе Европань писательхненьди, што мирса мзярдонга и косонга ниньгя литературась ашезь уленьдя тяшкава питни, конашка питне макссеви теенза Советонь Союзса, што мзярдонга ниньгя искусствать историческай, культурнай ролец ашезь шарьхкодьчнев тяшкава валдста.
Теень арам трудяй народть тяфтама цебярь отношенияц литературати должен пуроптомс марс литераторхнень, крьвястемс синь потмосост странать инголя ответственностень чувства, должен ба кошардомс синь заботиндама содама шить касфтоманц инкса, синь персональнай культурностьснон кеподеманц инкса. Но, Москуса март ковонь корхнемань стенограмматьнень лувомок, крхка ризф мархта няйсак, кода беднай советскай литераторсь эсь тевонц содамаса, кода кальдявста сон содасыня литературнай течениятьнень, модатьнень, увлечениятьнень и иля фокуснень, конатьнень основаса кяшеньди драмань али [ 15 ]трагикомедиянь образса действительностть няфтеманц вийфтома шиц али валхнень мархта маниакальнай налхкомась, али мимикриясь, маштомась архнемс эсь кедьцень перьф-пяльдень действительностть тюсонц коряс. Минь писательнеконь историко-культурнай и техническай малограмотностьснон мархта минь условиясонок арси грознайкс синьдеест. Пяк лама книгатнень, конат ульсть кой-мзяра кизода инголя цебярькс, аф лувонцыня ни од лувись, кода тянь квалма корхтайхть библиотекатьнень отчетсна и ули пяк естественна, кда синць авторхне, конат пяк верондайхть эсь гениальностьснонды, курок кармайхть рахафтома эсь лангозост од ломаттнень. Афкнара тяфтама авторхнень еткста фкясь макссь интервью, конань эса азф вага мезе: „Монь мялезень шарфни эсь лангозонза античнай апокрифнень квалма кизефкссь. Оду лувиня Эсхильть, Софоклть, Эврипидть, Плавтть. Арьсян, што тя сермадф сяда позна ся пингть коряс, конань лувондыхть. Сявость, кеподьксоньди Аристотельть. Сонь эсонза няфтьф сембе средневековай схоластикась...“
Писательсь таргазе тя премудростть фкя маниакть и пцтай ни графомантть рахафты болтавнянц ззда. А марнек сембе интервьюсь безответственнай и васькафнемань чепуха. Цебярь ниньгя, што интервьюсь печатлаф журналса, конань, вероятна, кивок афи лувонцы.
Но пяк оцю мяльса и болтливайста эсь намеренияснон азончнемок, минь писательнекя сидеста печатлакшнесазь тяфтама визьфкс чепухать, што сон пяк может скомпрометировать минь литературанеконь Западонь писательхнень сельминголя, ломанттнень инголя, конат исторически грамотнайхть и технически искуснайхть.
Оцю материалть лангста коллективнай работатьне аральхть ба минь писательнеконьди семинариумкс, конат пяк лац лездольхть ба теест козякадомс етафть и тяниень пингть содамаса. Но „две пятилетки“ кафта книгатьнень лангса работась — художестеннай отчетть лангса, кона няфнесы од эряфонь тии странать комось кизонь пингста подвигонзон, — тя работась ашезь ту писательхнень мяльс. Минь аш литературань историянекя, аш городонь культурань историянекя и теенек вообще ламоц афсатни.
Ня шитьнень ули паньчф комсомолть — партиять резервонц с“ездоц. Минь смел, дерзновеннай, героическай од ломаньнекя аф юкстасы, вероятна, азомс эсь валонц современнай литературать квалма. Кда тя валсь лятфтасы литераторнеконьди сянь, кит синь и мезь синь пяльдест учихть, — тя ули пяк эсь васцонза валкс, — теень арам машты налхкома минь литературасонок иля, сяда активнай настроениянь срхкафтыень роль.
 This is a translation and has a separate copyright status from the original text. The license for the translation applies to this edition only.
| |
| Original: |
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
The author died in 1936, so this work is also in the public domain in other countries and areas where the copyright term is the author's life plus 87 years or less (if applicable), or the copyright term is 87 years or less since publication (if applicable).
Public domainPublic domainfalsefalse |
| Translation: |
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 87 years or less since publication.
Public domainPublic domainfalsefalse |
