Колхозонь эряф/1940/09/Социалистическяй реализмать колга

←Ёфкс кшнинь нярь бабать колга

Колхозонь эряф (1940), № 9 Сентябрь edited by Игнатьев Г. А., Дурнов Ф. С. Социалистическяй реализмать колга by авторсь: Максим Горький, мокшекс ётафтозе: Аф содаф (аноним)

Грива мархта ворхт→

Колхозонь эряф. Эрь ковонь литературно-художественнай и общественно-политическяй журнал. Мордовскяй Советскяй писателень союзть органоц. — № 9 Сентябрь 1940. — с. 60—67

М. Горький

---

СОЦИАЛИСТИЧЕСКЯЙ   РЕАЛИЗМАТЬ    КОЛГА

Литературнай работать техникац ащи — васендакиге — кяльть тонафнеманц эзда, конац (кяльсь — ред.) служай основной материалкс всякай книгати, а сембода пяк — беллетристическяйти. Французскяй „белль летр“ понятиясь рузкс значит — красивое слово. Мазышикс шарьхкочневи различнай материалхнень, а тяфта жа звукнень, тюснень, валхнень тяфтама сочетаниясна, — конац максси мастяр-ломанть созданнайнцты, тифонцты — форма, конац действондай чувствать и разумть лангс ломаттнень эса удивлениянь кепочни вийкс, синь творчестванди эсь способностьснон инголе гордостень и радостень кеподи вийкс.

Кяльть подлиннай мазышиц, конац действондай кода вий, тиендеви валхнень точностьснон, шарьхкодевиксшиснон, звучностьснон мархта, конат оформляндакшнесазь картинатнень, книгатнень характерснон, идеяснон. „Художник“-писательти эряви кели знакомства минь пяк козя словареньконь сембе валонь запасонц мархта и эряви маштомс кочкама сонь эздонза сембода точнай, шарьхкодеви, вии валхнень. Аньцек тяфтама валхнень сочетаниясна и правильнайста — синь смысласнон коряс — ня валхнень точкатнень ёткса ладямасна может образцовайста оформить авторть мыслянзон, тиемс валда картинат, лепиндамс ломаттнень живой фигураснон сяшкава убедительнайста, што лувись няезь няйсы сянь, мезе изобразил авторсь.

Литераторти эряви шарьхкодемс, што сон аф аньцек сёрмады пераса, но — рисовандай валса, и рисовандай аф живописень мастярть лаца, конац изображает ломанть фкя вастса ащикс, — литераторсь пытается няфтемс ломаттнень аф лоткси движениянь эса, действияса, фкя-фкянь мархта пефтома столкновенияса, класснень, группатнень, фкятнень тюремасост. Но — мирса аш движения, конац афоль васьфне ба сопротивления. Тяста — шарьхкодеви, што кяльть пяк цебярьста тонафнеманц эрявиксшидонза башка, сонь эздонза отлична разработаннай, но пяк усердна сорендакшневи шава и уродливай валса литературнай кяльть сембода пяк простой, чёткай и мазы валонзон кочкама маштомать развитиядонза башка, — тяда башка писательти эряви цебярьста содамс сядынгольдень историять и содамс тяниень пингть социальнай явлениянзон, коса сон терьтьф фкя пингста кафта ролень пяшкочнема: акушеркань ролень и калмонь шувиень ролень. Мекольдень валсь кайги мрачнайста, но сон педа-пес эсь вастсонза. Од писательхнень воляснон, маштомаснон эзда ащи сонь эрек и весёлай смысласа пяшкодемац, тянкса аньцек эряви лятфтамс, што минь од литератураньконь серьгядезе историясь сембонь сянь педа-пес шавомонза и калмамонза, конац враждебнай ломаттненди, — враждебнай мянь снярда, мзярда синь сонь кельгсазь.

Разумеется — наивна и смешно корхтамс буржуазнай обществань „кельгомать“ колга. Буржуазнай обществать моралень заповедензон эзда фкясь гласит: „Кельк ближняйцень, кода эсь пряцень“ и — значит: кемокснесы кельгомань основной образецокс ломанть эсь прянь кельгоманц.*)^[1] Цебярьста содаф, што классовай обществась афоль строяв и существовандав, кда сон подчиняндаль „Тят салсе“ ближняйцень эзда и „Тяк шавонда“ сонь заповеттненди.

Социалистическяй Советонь Союзса пионер-цёранятне ни тонафнихть шарьхкодемс и шарьхкодьсазь сельмос няеви аеркс истинать: буржуазиять цивилизацияц и культурац основандаф меньшинствать — топодьста „ближняйхнень“ — эфтярь сяшка большинствать — вачеда „ближняйхнень“ каршес аф лоткси зверскяй тюремаснон лангса. Йофси аш кода „кельгомс ближняйцень“, мзярда эряви грабсемс сонь, а кда сон сопротивляндакшни грабамати — шавондомс. Кунардонь пингстокиге, буржуазнай „стройть“ развитиянц процессонц мархта, беднайхне и вачедотне лихнесть эсь ёткстост ведь лангонь и коське вастонь разбойникт, а тяфта жа — гуманистт — ломатть, конат, эрямок аф сатомшка топодьста, доказывали топодьстотненди и вачедотненди эсь прянь кельгомать перяманц и кирьфтаманц эрявиксшинц.

Сяс мес разбойникнень деятельностьсна вельф сатомшка няевиста няфтезе козянь государствать подлиннай основанц, козятнень шачсь нуждасна разбойникнень эзда кой-мзяра машфнемс шавондозь, а кой-мзяра — тарксемс государствань управляндама тевти.

Сядынголе, кепотьксонди, средняй векнень пингста, лавочникне и мещаттне ремесленникнень и крестьяттнень каршес тюремста тиендсть разбойникнень эзда эстейст „вожтть“: герцокт, диктаторхт, „церькавонь княсть и стак тов,“ — торгашнень рабочайхнень каршес эсь прянь араламань тя приемсна эряй и минь шистонк, мзярда буржуазнай государстватнень лангса оцюкс ащихть банкирхне, оружиянь нолдай фабрикаттне, храбрай авантюристтне и вообще — „социальна опаснайхне“.

Гуманисттне тожа шорясть спокойна эрямс лавочникненди, тянкса сятнень, конат сембода упрямста доказывали, што эряви перямс эсь прянь кельгомась, буржуазиясь или машфнезень разнай приемса, плхнемок мянь живьём толмарса или жа — кода тиендихть минь пингстонк — соблазняндакшнезень предательствас, путнемок синь сери вастс, коза куцема ёткова гуманисттне ушеткшнихть буржуазнай стройть и покойть аралама, кода минь няйсаськ тянь Европань министрхнень деятельностьснон коряс, конатнень сфабриковандазь лавочникне инголи социалистокс ульф рабочайхнень ёткста.

Но сембось тя аф пачфнесы буржуазиять „класснень мирнай сотрудничествазост“, — гармонияти, конань смыслац сянь эса, што топодьста ближняйнь меньшинствась, кирнемок эсь кядьсонза „марнек политическяй властть“, тиендьсы сембонь, мезе тейнза выгодна, а большинствась — вачеда ближняйхне — покорна подчиняндакшни сембонди, мезе синь кядьстост вешихть сембе нациятнень вельф топодьста лавочниксна, — вельф топодьстотне и тупойготфне эсь преступнай эряфснон „радостьса“ вельф топафтоманц эзда. Историясь апак лотксек и сокрушительна шарьхкотьфнесы тейнек, кода юмористическяйкс аф кеме благополучиясна нльне тяфтама марнек золотаса валяф авантюрист-делецненьге, кодамкс ульсь „сардонянь знаменитай корольсь“ Ивар Крейгер и сонь лацонзотне.

Лавочникнень бытияснон аф кемешинц колга цебярьста корхтайхть най сидекстомкшни синь ётксост эсь прянь шавоматне. Но сят, конат машфнесазь эсь пряснон, мезьсонга и конашкадонга аф полафтфнесазь сятнень, конат иляткшнихть эряма и механически, идиотонь последовательность мархта, мольфтьсазь эсь подлай ёжефтома тевснон, — ёрайхть организовандамс од веры бойня, ся бойнять, конац, содамок, машфтсы ломанень кастать, конань эсь прянь кельгомац ащи туфталкс сембе несчастиятненди, трудовой народть эряфонц сембе горянцты.

Од советскяй литераторсь ламода лезды эстейнза шарьхкодемс действительностть смысланц — сонь материалонц — кда сон арьсесы эсь прянц люкайкс кафта вийхнень ёткса, конатнень эзда фкясь действондай сонь разумонц лангс, омбоцесь — чувстванц лангс. Именна тяфта путозе сонь историясь капитализмать крушениянь эпохастонза, пролетариатть буржуазиять каршес най сидекстомкшни веры стычканзон кизоснон пингста, всемирнай классовай тюремать и социализмать неизбежнай победанц сембода малатф пингстонза. Но хотя ушетф тюремать шумоц и оцю, — сонь сембе сяка вельхнесы аф оцюня мещаттнень эрь шинь вякнамасна, конат пресмыкандакшнемок крупнай буржуазиять тылсонза, кунардонь пингстокиге тонадсть аф ламнянь торгавамс, саламс и, эсь природаснон коряс, аф способнайхть воявама; мзярда жа оцю, козя азорхне ушечнесазь войнать — ёмланятне арсихть мародеркс, скрось шавондсазь и грабсесазь ранендафнень, салсихть кулофнень и тя ремеслать вельде сидеста касондыхть мелкайхнень ёткста оцюкс. Содаф, што буржуазнай „войнатне лихнихть геройхть“, но горазда сяда лама синь лихнихть жуликта, тяка мархта, геройхне обычна илячнихть битвань васттнень лангс пакшень-пакш сязентьфста, а сембода жуликне сувсихть эряфу азоркс, законодателькс и, шарьхкодемок массовай ломанень шавондомать выгодностенц, — оду тага ушеткшнихть аноклакшнемс тяфтама жа выгоднай тевня, сяс мес войнати работай промышленностсь особенна выгоднай. Ули тяфтама бог, лемоц сонь — Барыш, — аньцек тейнза буржуазиясь и верондай, тейнза и канни веры жертванди миллиотт рабочай и крестьян.

Мелкай мещанствась, — да и ламоц рабочайхневок, конатнень отравляндазень сонь мархтонза физическяй соседствась, — эрямок пиле видьге пезксса, пеняцяй сыростть лангс. Ня ёжефтома пеняцяматне, шоворькшнемок революционнай пролетариатть героическяй серьгядеманзон ёткс, вельхнесазь (заглушают) синь. Пеняцямок наксада и теснай пезкс вастса эряфть кальдявшинц лангс, путнихть вельф кржа вийда сянкса, штоба таргамс эсь пряснон сери и коське вастс, а ламонцне нльне кирдихть кеме мяль, што болотась — мода лангстонь „рай“.

Но, хотя „картинностсь“ — литераторти обязательнай, — карматама корхтама сяда аф „картиннайста“.

Минь, советскяй писателеньконди эряви кемоста содамс, што ламонцне сонь современниконзон эзда, — сонь работанц материалоц, — ломатть, конат лама векста воспитандафт кши сускомонкса фкя-фкянь мархта пощадафтома тюремаса, и што сембе сонь „ближняйнза“, кажнайсь синь эздост фатяфт материальнай благополучияс стремлениять мархта. Тя вполне естественнай стремления, тейнза основакс ащи биологическяй необходимостсь трямс пряцень, улемс удобнай жилищаса и ст. тов. — необходимостсь тя свойственнай сембе жувататненди и инжатнендиге: келазсь и кавалсь, модашеерсь и котфонь кодай инжась строяйхть пизот и модать потмос варянят, но кой-кона хищникне и паразиттне шавондыхть сяда лама сянь коряс, мзяра тейст эряви топодемс жрандамс. Ломаттнень материальнай благополучияти стремленияснон лангса строяф человечествать сембе культурац, но сонь паразитоц — буржуазиясь, — властть эсь кядьсонза кирдезь и рабочайхнень и крестьяттнень эксплоатировандамс мезьсонга апак перяк возможностенц мархта тись эрявикс потребностень удовлетворяндама почвать лангса ся соблазнительнай излишкать, конац лемневи „роскошекс“. Развращающай влиянияц тя излишкать шарьхкочневсь эстейнзонга: тяфта, кепотьксонди, роскошть каршес закотт улендсть древняй республиканскяй Римса, средняй векнень пингста роскошть касоманц каршес тюрсь Швециянь, Франциянь, Германиянь буржуазиясь. Буржуазиясь жрандакшнесь чужой рабочай вийда фалу сяда лама, мзяра тейнза эрявсь келидонга кели потребностензон удовлетворяндамс, сон заразиндавсь страстьса тёждяста козякодомати, ярмаконь и вещань пуроптомати-кирдемати, заразиндавсь сонць и заразиндазе сембе мирть. Тя заразась и тиезе тяниень пингонь идиотскяй картинать: Европань столицатнень эса целай ульцят заняфт магазинца, коса мишендихть золотой изделият, пяк питни кевнят, „роскошнай пустякт“, конатнень тиемаснонды карьхцсеви рабочай классть масса питнидонга питни энергияц, а сонць рабочай классь эряй вачашиса, сонь марнек нелькф возможностец развивандамс эсь потребностензон, способностензон, талантонзон. Мещанскяй страстсь вещань ёжефтома пуроптомати-ванфтомати, личнай собственностти урмань кодяма страстсь токафтф сондейнзонга.

Аф эряви арьсемс, што мон вообще роскошть каршес, аф, мон — сембонди роскошть инкса, но вещатненди идолопоклонствать каршес. Тиентть вещат кода можна сяда цебярьста, синь улихть сяда кемот, лихттядязь тонь лишнай трудонь карьхцямать эзда, но — „тят тиенде эстейть кумир“ кямоста, стулста или книгаста, конатнень тиить тонць, — вов цебярь „заповедсь“! И улель ба пяк пара, кда тя заповедть сяволезь эстейст минь рабочай од ломаненьке.

Материальнай благополучиянь, покойнь и „мезь лангска аф ванозь“ уютонь веши идолопоклонникне и минь шистонк, мзярда сембе вастса срады-калады буржуазнай культурась, сякокс нинге верондайхть кеме, тёждя и „мазы“ личнай эряфонь возможностти. Вероятна, лишнайксть ули, кда тага азса, што тя верованиять основац — эсь прянь кельгомась, конанц сувафтозе ломаттнень потмозост прошлайть историяц и кемокснесы церькавсь — сонь „святойнза“ типичнейшай эсь прянь кельгихть и человеконенавистникт.

Светскяй философияса сембода пяк усердна кемокснезе эсь прянь кельгомать, — лиякс мярьгомс: индивидуализмать, — вельф ёжу немецкяй мещанинць Иммануил Кант, ломанць, конац мыслил образцовайста механически и ульсь чуждай эряфти, кода ловажась.

Тя — позднандаф верования, и, кода всякай верованиясь, сон — сокор. Но аф ваномок тянь лангс, сон — овкснесыне ломаттнень, внушандакшнемок тейст нелепай и васькафнемань убеждения, што кажнайсь минь эздонк мирть „ушетксоц и пец,“ „единственнайсь“, и сембодонга цебярсь, и питнидонга питнись. Тя эсь прянди питнень латцемаса особенна яркайста няфтьф личнай собственностть влиянияц: аньцек физически и механически шоворямок марс ломаттнень нападениянь тиема — лафчста вооружандафнень и оружияфтомотнень эксплоатировандама, собственностсь необходимостть сюнеда — конкуренциянь „законть“ коряс кирдьсы кажнайть синь эздост „ближняй“ собственникть и единомышленникть каршес эсь прянь араламань состоянияса. Сотнемок мешаттнень внешняй ширде — нападениянь тиеманди, собственностсь потмова аерфнесыне синь фкя-фкянь эзда эсь прянь араламать инкса, ибо кажнайсь „сонць эсь инксонза“, и тя мархта тиендеви действительна врьгазонь эряф. „Ломанць ломанти — врьгаз“ пословицать создал именна собственниконь моральсь.

Зоологическяй индивидуализмась — урма, конань мархта заразиндазе буржуазиясь сембе мирть и конанц эзда сон, кода минь няйсаськ, — кулси. Содаф, кодак сяда курок сон кулы — сяда цебярь ули землять трудовой народонцты. Трудовой народть вийсонза и волясонза — кенордафтомс тя куломать.

Од советскяй писательти мещанствась — материалсь труднай и опаснай сяс, мес ули способностец заразиндафнемс, отравляндафнемс. Од, „ушеткшни“ минь писателеньке ашезень няенде мещаттнень „вийсост и славасост“, мещанствать аф кунардонь прошлайнц содасы аньцек книжкатнень эзда и — кальдявста, европейскяй буржуазиять тревожнай, сяряди и сраткшни-калаткшни эряфоц кржаста содаф тейнза и тожа аньцек книжкатнень, газетатнень коряс. Сонь странасонза трмождыхть нинге срафтф мещанствать ламолувксонь илятксонза, синь пяк лофкайста или сяда аф лофкайста тиендьсазь эсь пряснон „социальнай жуватакс“, эцекшнихть нльне коммунисттнень средазост, ванцазь эсь интересснон васькафнемань, лицемериянь, хитростень сембе вийснон мархта, — вийснон, конац илядсь тейст лама веконь ётаф пингть эзда. Синь сознательна и сознанияфтома саботировандайхть, нолалгочнихть, шкурничендайхть, синь ёткстост лисендихть браконь тиихть, вредительхть, шпиотт и предательхть.

Минь странастонк ёрдаф ломанень хламть тя илятксонзон колга миньцонк сёрматф и тяниенге сёрмачневи сатомшка лама книга, но пцтай сембе ня книгатне аф сатомшка виихть, пяк ланга-лунга и аф няевиста изображандакшнесазь врагть. Сяс мес основандаф „частнай случайнь“ лангса, синь характерсна арси анекдотическяйкс, синь эсост аф маряви „историзма“, конац пяк эряви художественнай произведенияса, и социалистически воспитательнай значениясна ня книгатнень пяк аф оцю. Шарьхкотьф, што 15 кизоста аф лихтят Мольерхт, Бальзакт, аф касфтсак „Ревизорть“ или „Головлев господатнень“ авторснон, но странаса, коса тя кизотнень пингста рабочай классть энергияц строясь од ошт, гигантскяй фабрикат, полафнесы эсь моданц физическяй географиянц, шувондомок моряста моряс каналхт, тиендемок цебярькс ломаттненди эрямс пустынятнень, изумительна козякофнемок государствать землять недранзон эзда аф лувови мзяра таргаф сокровищаса, — странаса, коса рабочай классь лихтсь эсь ёткстонза сядот изобретатель, кемотть наукань крупнейшай работник, коса сон эрь кизоня сувафни эряфс пцтай пяле миллион од ломань, конат получаншнихть высшай образования — тя странаса можнат путомс литературать инголи оцю требованият.

Сонь эсонза — од литератураса аф кржа ни вельф питни формальнай сатфкста, сонь эсонза действительностть охватоц сембе келемкшни и келемкшни, — естественна кирдемс мяль, штоба сон улель сяда крхка. Сон и кармай улема сяда крхка, кда од литераторхне шарьхкодьсазь эстейст необходимостть тонафнемс, касфнемс содамшиснон, развивандамс эсь познавательнай способностьснон, тоначнемс эсь лангозост сявф пяк важнай и ответственнай революционнай тевснон техниканц.

Подчиняндамок историять кафта вийнзон притяженияснонды — мещанскяй прошлайти и социалистическяй будущайти — ломаттне шарьхкодевиста колеблются: эмоциональнай началась усксыне синь прошлайти, интеллектуальнайсь — будущайти. Лама и кайгиста утькснихть, но — аф маряви спокойнай уверенность сянь эса, што решительнайста и кемоста кочкаф вполне определеннай ки, хотя сонь сатомшка няфтезе ни историясь.

Обанкротившай, дряхлайготф индивидуализмась сембе нинге эряй и действондай, лихнемок прянц мещанскяй честолюбиянь факттнень эса, стремленияса — сяда куроконе комотемс инголи, няеви вастс, „напоказ“ работаса, конац аф седиваксстонь, неряшливай, компрометировандакшнесы пролетариатть, и сембода пяк, — „инь ёмла сопротивлениянь линиява“ работаса. Литератураса тя — сядынгольти критическяй отношениянь линиясь. Кода ни азф сяда вяре, сонь аеркс шамац знакомай од литераторхненди ланга-лунга и теоретически. Сядынгольть критическяйста няфтеманц тёждяшиц аерфнесыне авторхнень шири тяниень пингть грандиознай явлениянзон и процессонзон няфтемаснон эрявиксшиснон эзда.

Од авторхнень аш нинге сатомшка кеме эрьгав вийсна, штоба кеподемс лувить седиса сядынгольти ненависть. И тянь сюнеда, синь аф сяшкава ряфцыесазь лувить сядынгольть эзда, конашкава — монь койсон — апак лотксек сядынгольть лятфнезь, кемокснесазь — фиксировандасазь, консервировандасазь — сонь лувить мялямсонза.

Сянкса, штоба сядынгольть ядовитай, каторжнай нулготксшиц улель цебярьста валдоптф и шарьхкотьф, — эряви эстейть тонадомс ванома сонь лангозонза тяниень пингонь сатфкснень пряста, сай пингонь великай цельхнень пряста. Тя сери ванома вастсь должен и кармай кепсема ся гордай, радостнай пафость, конац максы минь литератураньконди од тон, лезды тейнза тиемс од формат, тисы тейнек эрявикс од направлениять — социалистическяй реализмать, конац — стадонга ни содаф — может тиевомс аньцек социалистическяй опытонь факттнень лангса.

Минь эрятама павазу странаса, коса ули кинь кельгомс и уважандамс. Миньцонк ломанти кельгомась должен шачемс — и шачи — сонь творческяй энергиянц лангс дивандамань чувствать эзда, ломаттнень эсь пефтома трудовой коллективнай вийснонды, конац тии эряфонь социалистическяй формат, взаимнай уваженияснон эзда, партияти кельгомаснон эзда, конац ащи вождекс сембе странать трудовой народонцты и учителькс сембе масторонь пролетариятненди.

1933 к.⁠

---

1. *) Эсь прянь кельгомась, закон божийть эса ащи положительнай требованиякс, улемок стама исходнай пунктокс, конань эзда лисенди-касонды „ближняйхненди минь кельгоманьке“. „Церковный вестник“, 1909 к. 45 №-сь, „Ловажатнень плхнемаснон колга“ статьясь. Подписьфтома, вероятно, проф. Евсеевть.

 

This is a translation and has a separate copyright status from the original text. The license for the translation applies to this edition only.
Original:
Translation: